Matiyo 27 - FỊAFỊA BAỊBỤLỤ

In Jizọsị Kẹ Mu Payịleti Tọrọkọ Lam

¹ Dede-funfun ḅụ agbamịẹapụ mamgba na ama ḅẹ omongi apụ ma na nwẹnị tọn-pẹlẹ mịnẹ ịn Jizọsị ḅaa ḅa.

² In nwẹnị ikoli kẹ ori ịkasị, tẹ ọ̀ ḅọrọma pakama mu, tẹ ọ̀ saḅama Payịleti, Romu ḅẹ apụ ma kẹ fịrịma Ḅẹrẹtọnḅọ ḅẹ pịrị.

Judasị Ọ̀ Ḅụụ Kpọ Ḅaam

³ Judasị, Jizọsị kẹ dẹrịma ḅọ ḅe, ḅo nimi tẹ mịnẹ ịn ḅaa-ḅẹrẹ-pẹlẹ Jizọsị pịrị tẹ ḅe sakị, ori ọ̀ mịẹ si mẹ ḅụ pịkị tẹ, seleḅa igbigi, pakịrị asuei, ma kẹ agbamịẹapụ ma na ama ḅẹ omongiapụ ma na pịrị ḅẹ mum.

⁴ Ori mẹẹ, “À si mịẹ tẹ, à si mịẹ-a tomḅọ kẹ dẹrịma tẹ ini ọ̀ ḅaa ḅẹ-yearị!” Ịn nwẹnị pakịrị, “Anie tọ-ḅara kẹ wa gboloma? Anie ị́ ḅẹrẹ!”

⁵ Tẹ Judasị nwẹnị igbigi ma kẹ Tamụnọ-warị mẹ ḅio wọịma sara tẹso, ọ̀ nwẹnị mu ọ̀ ḅụụ kpọọ ḅaam.

⁶ Agbamịẹapụ ma nwẹnị igbigi ma kolokolo tẹ ḅẹẹ, “Miemẹ anie ọmbie igbigi, anị kẹ mu Tamụnọ-warị mẹ ḅẹ igbigi koko anga suu wamịna Oloko na tụḅụrụ wararị.”

⁷ Ịn ḅo anị gboloma ye ḅụ ḅịḅị-kẹ-ogbosọ tẹso, ịn nwẹnị kẹ mu “Kuku-Tẹmẹḅọ Piri” mẹ fẹẹ, ịn kẹ igoniapụ tẹ ịna ama sime tẹ fịị apụ ḍiḅi ḅẹ ẹrẹsị.

⁸ Anie mie ịn gotẹ “Ọmbie Piri” kẹ anị sịn nwenii ḅo mịmgba ḅẹ eneḅaka sọ la ye.

⁹ Anịtẹso anị ḅara ḅụ ịkịankoro Jerimaya ḅẹẹ ye mẹ ḅo karakara ye sọ tẹ: “In seleḅa pakịrị asuei ma ọkịm, anie Izirẹlịapụ ma ḍuko pẹlẹm tomḅọ ḅe la ḅa ḅẹẹ igbigi ḅịḅị mẹ,

¹⁰ tẹ nwẹnị igbigi mẹ kẹ kuku-tẹmẹḅọ piri mẹ fẹẹ, KỊNỊNYANAḄỌ ḅe tọn ị̀ pịrị ḅara ḅụ.”

Payịleti Ye Kẹ Jizọsị Gbelam

¹¹ Jizọsị nwẹnị Romu ḅẹ apụ ma Ḅẹrẹtọnḅọ ḅe tọrọkọ sịẹ sime, tẹ ọ̀ nwẹnị ye kẹ ò gbela. Ò gbelam, “Juu-ḅẹ-apụ amadaḅọ ḅe?” Jizọsị nwẹnị pakịrị, “Anie yẹrị ḍuko ḅara.”

¹² Kụma agbamịẹapụ ma na, ama ḅẹ omongiapụ ma na, kẹ ọ̀ sịḅị sẹịn aị ma pakịrị ḅụ gberie-sọ ò ḍuko-a.

¹³ Mie ḅụ Payịleti ọ̀ ḅẹẹm, “Mịna aị mamgba tẹ ịn kẹ ị́ sịḅị sẹịn-arị aị ma ị́ naa-a?”

¹⁴ Kụma Jizọsị ḍụkụ tẹ ẹkwẹn-ngbọ kịngẹ sọ pakịrị-a, tẹ miemẹ nwẹnị Ḅẹrẹtọnḅọ ḅe ḅụụ-gbiripuma lama.

Payịleti Ḅaa-Ḅẹrẹ Pẹlẹ Jizọsị Pịrịm

¹⁵ Kụra-kụra ọ̀ mịẹ-mịẹ ḅara ḅụ, Romu ḅẹ apụ ma Ḅẹrẹtọnḅọ ḅe Juu-ḅẹ-apụ Saḅaḅọrọ-Alalị sakị ḅụ gbọrụ ikoliḅọ, tẹ tomina-ogbo mẹ ḅii ḅọ ḅii ḅọ, pakama-ḅo ịn pịrị pịrịm.

¹⁶ Anị kụra mẹ ḅụ, ama mamgba nimi lama wararị gbọrụ ikoliḅọ simem, ori ẹrẹ Barabasị.

¹⁷ Mie ḅụ tomina-ogbo mẹ ḅo kobiri tẹso, Payịleti nwẹnị ịn gbela, “Ndẹẹ ó ḅiiarị à pakama-ḅo ọ́ pịrị nwẹn ḅẹẹ ḅọ, Barabasị mụnọọ, Jizọsị, ịn kẹ Mẹsaya sịn-arị ḅọ ḅe?”

¹⁸ Payịleti gotẹ ọkọ kẹ Juu-ḅẹ-apụ ḅẹrẹkọn apụ ma gbela ye, ò nimi lamam, mịnẹ in Jizọsị ḅe ḍiki-ḅioḅuarị ẹrẹsị ini ọ̀ kẹ ḅo ọ̀ pịrịm.

¹⁹ Payịleti paa ḅẹrẹtọn anga mẹ ḅụ lẹgị wararị ogbo, oku ọ̀ ta ḅara ḅo ọ̀ la tẹ ḅẹẹm: “Ị́ ḅara kẹ anị mịẹye-ofori tomḅọ ḅe gboloma ye ḅụ suu ma, kẹ gotẹ ọkọ ḅẹẹarị, ḅịẹịn ḍiin, ḍawọ jụ ḅụ, ò gotẹ àrị ẹrị tọrụsiẹrị ḅakam.”

²⁰ Agbamịẹapụ ma na, ama ḅẹ omongiapụ ma na, nwẹnị tomina-ogbo mẹ toluma, mịnẹ ịn Payịleti ḅara ḅii mịnẹ ọ̀ Barabasị ḅụ ḅara-siin ịn pịrịị, tẹ Jizọsị ḅaa.

²¹ Kụma Payịleti nwẹnị ịn gbela, “Mịna maa apụ ma ḅụ ó ḅiiarị à pakama-ḅo ọ́ pịrị ḅẹ ḅọ tụḅọ?” Ịn nwẹnị pakịrị, “Barabasị.”

²² Payịleti nwẹnị ịn gbela, “Anịsakị à tọ-ḅara kẹ Jizọsị ịn kẹ Mẹsaya sịn-arị ḅọ ḅe mịẹ ḅẹ?” Inimgba nwẹnị pakịrị, “Ọ̀ kẹ ẹngbẹsẹ-sịn ḅụ ḅakụụ!”

²³ Kụma Payịleti gbelam, “Ọ̀ tọ siye mịẹ?” Anịtẹso ịn nwẹnị saakị kụrọma oloku-oloku tẹ ḅẹẹ, “Ọ̀ kẹ ẹngbẹsẹ-sịn ḅụ ḅakụụ!”

²⁴ Payịleti nwẹnị ḅo ẹrị, mịnẹ ọ̀ mịẹ ḅẹ ye ḅarị ofori, tẹ tomi ma pịkị ama fiema ḅẹ-yearị ḅẹ sakị, ọ̀ nwẹnị tomi ogbo mẹ tọrọkọ minji ọkị tẹ kẹ amịna aḅara sịkịrị tẹ ḅẹẹ, “Ḅị tomḅọ ḅe fịị ḅụ ị̀ ḅara ofori! Ọmịnị mie anị dogi-ḅo ye!”

²⁵ Bebe tomina-ogbo mẹ nwẹnị Payịleti pakịrị, “Yee ọ̀ fịị mẹ ḅẹ fomu-ḅara mẹ ḅo wamịnị na wamịna awọmẹ na ọgọnọ gbana!”

²⁶ Anịtẹso Payịleti nwẹnị Barabasị ḅụ ḅara-siin ịn pịrị, tẹ Jizọsị fomu kọsịma tẹrẹmẹ ọ̀ daḅọrọma ịn pịrị, mịnẹ ini ọ̀ kẹ mu ẹngbẹsẹ-sịn ḅụ ḅakụụ.

Romu Ọmụapụ Jizọsị Kẹ Kpọọtiim

²⁷ Anịtẹso Payịleti ọmụapụ ma Jizọsị kẹ Ḅẹrẹtọnḅọ ḅe opu warị mu tẹ bebe ọmụ-ogbo mẹ ḅo kobiri ori ikelemam.

²⁸ Ịn nwẹnị ori akapa sin fama tẹ awụ vọrọrọ-kapa kẹ ọ̀ sụa.

²⁹ Anịtẹso ịn nangị asịn ịkpangị kẹ ama-da sun kịkama mie tẹ kẹ ọ̀ sịḅị sure, tẹ sịn kẹ ori ama-ḅara sụam; anịtẹso in kombo ḅara kẹ ọ̀ tọrọkọ kparakị tẹ ọ̀ ḅẹẹm, “Yee Juu-ḅẹ-apụ Amadaḅọ ḅe nangwọ ḍumo kọn!”

³⁰ Ịn nwẹnị fịla kẹ ori isi, tẹ ịn kẹ ọ̀ ḅara sụa sịn mẹ ọkị tẹ kẹ ọ̀ sịḅị fomu.

³¹ Ini ò kombo fama tẹso, ini ịn kẹ ọ̀ sụa kapa mẹ sin tẹ pịkị ori akapa kẹ ọ̀ sụam. Anịtẹso ịn nwẹnị ọ̀ ḅọrọma pakama ẹngbẹsẹ-sịn ḅụ ḅakụ ḅẹ mu.

In Jizọsị Kẹ Ẹngbẹsẹ-sịn Ḅụ Ḅakụ Ḅaam

³² Ịn mẹnjị pakarị ogbo ịn Sayịrini ḅụ sime tẹ ḅo gbọrụ tomḅọ na bịamam, Sayịmọnị nwẹn-sịn ḅọ, tẹ ọmụapụ ma nwẹnị kụrọ-ḅara kẹ ori ọlọ, tẹ Jizọsị ẹngbẹsẹ-sịn mẹ kẹ ọ̀ pịrị dogi.

³³ Ịn nwẹnị ḅo Gọlịgọta nwẹn-sịn anga la, tẹ Gọlịgọta mẹ fiearị ye, “Arịapụ Sịḅịkọ.”

³⁴ Anịanga ḅụ ini akụ ye kẹ gwa tẹ iru kẹ Jizọsị pịrị ḅuu ḅẹm; kụma ọ̀ ḅẹlẹ kẹ anị lama ḍiki tẹso, ọ̀ ḅarị ḅuu ḍụkụ-a.

³⁵ Ini ọ̀ kẹ ẹngbẹsẹ-sịn mẹ ḅụ ḅakụ tẹso, ini apịan sụa tẹ ori akapa ma ḍiema ọkịm.

³⁶ Anie ḅọrọ tẹso, ini anị yọ lẹgị sime tẹ ò korum.

³⁷ Ọ̀ sịḅị ọgọnọ-jụ ḅụ ịn nwẹnị ịn kẹ ọ̀ sịḅị sẹịn tẹ ọ̀ kẹ ḅakụ ye mẹ kẹẹ tẹ kẹ sololo: “Ḅie Jizọsị, Juu-ḅẹ-apụ Amadaḅọ ḅee.”

³⁸ Anịtẹso ịn pịkị ama oloko kan tẹ paka-mu piri ọgọnọ jụ sime tẹ kịnị aḅara ye fọịn fọịn maa apụ sọ kẹ ẹngbẹsẹ-sịn ḅụ ḅakụm, gbọrụḅọ ori ama-ḅara anga, osi-ḅọ ori ere-ḅara anga.

³⁹ Mẹnjị ḅọrọ apụ nwẹnị sịḅị jike, jike tẹ Jizọsị gọlị:

⁴⁰ “Ị́ kọkọ Tamụnọ-warị mẹ kaan-sara tẹ tẹra aḍin kẹ anị nama sịẹma ḅẹ tọn! Ị́yẹrị nwẹnị Tamụnọ Tụḅọ ḅẹḅẹ, ị́ ḅụụ ḅọrọmaa! Ẹngbẹsẹ-sịn mẹ ọgọnọ sime tẹ koro ḅo!”

⁴¹ Anị gbọrụ ḅara mie agbamịẹapụ ma na, Oloko toluma apụ ma na, ama ḅẹ omongi apụ ma na, sọ kẹ ọ̀ mịẹ-sima ḅara:

⁴² “Ọ̀ kọkọ ja apụ ḅọrọma, ḅọrọma, kụma ori inetẹ amịna ḅụụ ḅọrọma-a! Ḅie Izirẹlị ḅẹ amadaḅọ ḅe ori-a! Mịọkụ ori ẹngbẹsẹ-sịn mẹ ọgọnọ sime tẹ koro ḅo ḅẹḅẹ wa ò minini ḅa!

⁴³ Ọ̀ kọkọ Tamụnọ kẹ ḅiokpọma tẹ pịkị ọkị wararị mịnẹ ori Tamụnọ Tụḅọ. Anie ḅẹḅẹ, iḅim, ó yee wa ḍiki mịọkụ Tamụnọ ḅo ọ̀ ḅọrọma ḅarị ḅoto!”

⁴⁴ Ama oloko kan tẹ mangị piri ọgọnọ mu tẹ kịnị ḅara ye fọịn, fọịn apụ ma tẹ ịn kẹ sụa ẹngbẹsẹ-sịn ḅụ ḅakụ apụ ma sọ anị gbọrụ ḅara mẹ kẹ ọ̀ mịẹ simam.

Jizọsị Kunoma Ọwụ Sara Tẹ Fịịm

⁴⁵ Anị ḅo eneḅaka ogbo la sakị, kanakana ḅo bebe ama mẹ gbaịn tẹ, sonio aso ọkị mu esenia aso la anị nwẹn kẹ ọkọ simem.

⁴⁶ Tẹra so ḅiri ḅụ Jizọsị kụrọma oloku tẹ ḅẹẹm, “Ẹli, Ẹli, lẹma Sabakitani?” Anie fiearị ye, “Ị̀ Tamụnọ, ị̀ Tamụnọ, tiye ẹrẹsị ị́ ị̀ kẹ gbin koroma tẹ so?”

⁴⁷ Anịanga sịẹsime atomi ḅẹ ja apụ ò ḍuko ye naa tẹ ḅẹẹm, “Ori Ịlayịja sịn-arị!”

⁴⁸ Ịna ḅụ ḅẹ gbọrụḅọ, kiri, kiri mangị mu minji nọnjị ọkị ye, tẹ ịn kẹ sịpọnjị sịn ye, ọkị-ḅo tẹ kẹ kpọọtẹ iru ḅio taụ tẹ anị kẹ sịn ḅịḅị sụka tẹ saakị tẹ kẹ ọ̀ ḅịḅị lamam, ọ̀ ḅụụkụrọma tẹ mịẹtẹ ò ḅuu ḅẹ tọnm.

⁴⁹ Kụma osi apụ ḅẹẹm, “Koruu, ó yee wa ḍiki Ịlayịja ọ̀ ḅọrọma ḅẹ ḅoarị ḅoto.”

⁵⁰ Tẹ Jizọsị sin kụrọma oloku tẹso, ori ịnyọ nwẹnị biin.

⁵¹ Anịtẹso ịn kẹ Tamụnọ-warị mẹ ḅio kiki-pẹlẹ-ḅịtẹ mẹ, tẹ sololo sime ye mẹ, maaịn puum, ọgọnọ ideri-ḅo suku la. Kiri jikem, ịkụ ma puu kọsịm,

⁵² ḍuḅu ma kan finjim, tẹ Tamụnọ ori atomi ma tẹ fịị ḅọrọtẹ apụ ma ḅẹ tọnwa-apụ saakịmam.

⁵³ In ḍuḅu ma ḅio paka-ḅom, tẹ Jizọsị fị-ḅụ-saakị tẹso, ịn Fịafịa Opu ama mẹ sọ-mu tẹ tọnwa-apụ anịanga ini ẹrịm.

⁵⁴ Ọmụ-alaḅọ ḅe na ori na sime ọmụapụ ma na, tẹ Jizọsị koru sime apụ ma, kiri jike ye mẹ na, paka jen ye goyegoye ẹrị tẹso, ịn ḅalafa lama tẹ ḅẹẹm, “Karakara-ḅara-ḅụ ḅieḅe anie Tamụnọ Tụḅọ!”

⁵⁵ Tọnwa ereme anịanga ḅele tẹ mịẹ aị ma ḍiki simem, anie Galili ḅụ Jizọsị ḍuka-ḅo tẹ ḅarasụa ọ̀ pịrị sime apụ.

⁵⁶ Ịna ogboku Magidala ḅẹ Meri na, Jemusị na Josẹfụ na iyingi Meri na, Zẹbidi ta ma na sọ simem.

Arịmatiya Ḅẹ Josẹfụ Ò Ḍuḅu Ḅio Jizọsị Ḍiḅim

⁵⁷ Anị ḅo ḅoḅiri-so la sakị gbọrụ ngọ-kọnḅọ, Arịmatiya ama ḅụ sime tẹ ḅo la tẹ, ori ẹrẹ Josẹfụ, ori sọ Jizọsị ḍukamẹnjịḅọ.

⁵⁸ Ọ̀ nwẹnị Payịleti dama-mu tẹ ọ̀ ḅara Jizọsị fịtẹ oju mẹ ḅii. Payịleti nwẹnị tọn mịnẹ ini oju akpakpa mẹ kẹ Josẹfụ pịrịị.

⁵⁹ Anie ḅụ Josẹfụ anị ọkị tẹ, ịwọ ferefere, pịna-fa ḅịtẹ kẹ anị fangala tẹlẹma

⁶⁰ tẹ, mu anị kẹ, ori ḅarana ịwọma ịkụ ḅio sọkị sọ-mu tẹ mịẹ amịna ḅụụ pịrị wararị ḍuḅu ḅio koromam. Anịtẹso ọ̀ nwẹnị gbọrụ opu ḍụḅarị kpo mbelembele mu ḍuḅu mẹ ḅịḅị gbaịn tẹ mẹnjị so.

⁶¹ Anịsakị Magidala ḅẹ Meri na, osi Meri ma na anịanga, ḍuḅu mẹ na dama ḅụ, lẹgị sime wararị.

Ọmụapụ Ḍuḅu Mẹ Korum

⁶² Ene ḅaa ḅụ, anie Ịnyọsara-Ene mẹ, agbamịẹapụ ma na Farịsiiapụ ma na Payịleti na ẹrịya

⁶³ tẹ ḅẹẹm, “Wa nyanaḅọ, wa kẹ ḅioḅọrọmaa, mịnẹ anị iruoḅọ ḅe ḍumo wararị sakị ọ̀ ḅẹẹm, Tẹra ḍin ḅọrọ tẹso, Tamụnọ fịị ḅụ ị̀ saakịma ḅa.

⁶⁴ Ọkọẹrẹsị tọn ịn tọrụ kẹ kiri lama tẹ ò ḍuḅu mẹ koru nwenii ḅo tẹra aḍin karama ene mẹ la, mịẹtẹ ò ḍukamẹnjịapụ ma ḅarị inetẹ mu oju mẹ furu so tẹ ḍuko tomi ma pịrị ḅịa ḅara, mịnẹ ọ̀ fịị ḅụ saakịm. Tẹ anị kunoma iruo mẹ nwẹnị ḅo sii tarị ye mẹ nẹngị ḅa.”

⁶⁵ Payịleti nwẹnị ḍuko ịn pịrị, “Ọmịnị ḅarana ọmụapụ ọkị mu ọmịnị inetẹ ḅara, inetẹ ḅara kẹ ḍuḅu mẹ koru kpaịnmaa.”

⁶⁶ Mie ḅụ in so tẹ ye kẹ ḍuḅu mẹ tọrụ gbaịn ḍụḅarị mẹ oḅolo tẹ anị koru ḅẹ ọmụapụ tọn koromam.