Matiyo 26 - FỊAFỊA BAỊBỤLỤ

Ịn Ḅaa-Ḅẹrẹ Ḅiya Jizọsị Pịrịm

¹ Jizọsị ò toluma sime aị mamgba toluma fama tẹso, ọ̀ nwẹnị ò ḍukamẹnjịapụ ma ḅẹẹ,

² “Maa ḍin kọnm, ọmịnị sọ nimi ḅara ḅụ, Saḅa-ḅọrọ Alalị mẹ fị sakị mẹ la ḅa, tẹ Juu-ḅẹ-apụ ma Tomḅọ Tụḅọ ḅe saḅama igoniapụ ma pịrị tẹ ini ọ̀ kẹ ẹngbẹsẹ-sịn ḅụ ḅakụ ḅa.”

³ Anịtẹso agbamịẹapụ ma na omongi apụ ma na nwẹnị Kayafasị, Sịḅịda-Agbamịẹḅọ ḅẹ, opu warị mẹ ḅio kobiri,

⁴ tẹ ịn ḅọịma tẹ Jizọsị kun tẹ ọ̀ ḅaa ḅẹ ḅẹrẹ-ḅiya ḅa.

⁵ Ini mẹẹ, “Ini alalị mẹ fịarị ogbo wa miemẹ mịẹ ḅịa, tomi ma ḅofa ama fiema.”

Bẹtani Ḅụ Ịn Olo Kẹ Jizọsị Sịḅị Saram

⁶ Jizọsị Bẹtani ḅụ Sayịmọnị nwẹn-sịn jen sakị sofịnị-obi kọn tẹ so tẹ ḅọ warị mum.

⁷ Jizọsị anịanga yefịarị ogbo, gbọrụ ẹrẹḅọ ọ̀ dama-ḅom, tẹ á ḅara yela lamatẹ sẹntị, tẹ ịn kẹ alabasịta nwẹn-sịn ḍụḅarị ololo kẹ sụa ye simem, tẹ á nwẹnị sẹntị mẹ kẹ ọ̀ sịḅị ḅama sara.

⁸ Ò ḍukamẹnjịapụ ma miemẹ ẹrị tẹ ịganịm. Ịn nwẹnị gbela, “Tiye ẹrẹsị á papaa mie mẹmgba guluguluma?

⁹ Mị sẹntị mẹ ini inetẹ anị kẹ dẹrị ḅarị igbigi ḅaka wararị, tẹ igbigi mẹ kẹ igoin-apụ pịrị ḅarị ya!”

¹⁰ Jizọsị ịn ḍuko ye mẹ nimi tẹ ịn ḅẹẹm, “Ó tiegotẹ ma ẹrẹḅọ ma ḅụụ fụkamarị? Iḅi lamatẹ, kpaịntẹ ye mie á mịẹ ị̀ pịrị ye!

¹¹ Sakị mamgba ọmịnị igoin-apụ nyana ḅa, kụma sakị mamgba ọmịnị ị̀ nyana ḅịa.

¹² Á mịẹ ye mẹ anie, á mị sẹntị mẹ kẹ ì oju akpakpa mẹ tẹlẹma tẹ kẹ anị ḍiḅi ḅẹ sakị wẹrịmam.

¹³ Mịọkụ à mịẹtẹ ó nimiarị mịnẹ, piki-pikiye-ofori ḅara ḅụ, ịn mị Iḅi-oku mẹ ḍuko ḅẹ anga goyegoye, bebe tomikiri mẹ ḅụ, á mịẹ ye mẹ ịn kẹ á kẹ gotẹ ḍuko ḅa.”

Judasị Mininim Ò Jizọsị Kẹ Dẹrịma Ḅa

¹⁴ Anịtẹso ò Ḍukamẹnjị Oyi Maa apụ Finji ma ḅẹ gbọrụḅọ, ịn kẹ Judasị Isikarịyọtị sịn ḅọ ḅe, agbamịẹapụ ma dama-mu

¹⁵ tẹ gbelam, “Ó tiye kẹ ị̀ pịrị ḅa, à Jizọsị ḅẹ kẹ ọmịna ḅara-ḅio dẹrịma kụma?” In seleḅa igbigi ḅẹ suei kịẹn pakama-ḅo tẹ kẹ ọ̀ pịrịm.

¹⁶ Anị sakị ḅụ Judasị saakị, ò Jizọsị ḅọrọma ịna ḅara ḅio suu ḅẹ ḅọkọ ḍọkịm.

Jizọsị Ò Ḍukamẹnjịapụ Ma Na Saḅa-ḅọrọ Fịye Mẹ Fịm

¹⁷ Sun-a Fịturu Alalị mẹ ḅẹ tarị ene mẹ ḅụ, Jizọsị ḍukamẹnjịapụ ma ọ̀ dama-ḅo tẹ ò gbelam, “Í ḅiiarị wa Saḅa-ḅọrọ Fịye mẹ tẹlẹma ị́ pịrị ḅẹ anga tọ-anga?”

¹⁸ Ọ̀ nwẹnị ịn ḅẹẹ, “Ọmịnị opu ama mẹ ḅio nwẹn pembema tomḅọ dama-mu tẹ ọ̀ ḅẹẹ, Ye-tolumaḅọ ḅe mẹẹ, ‘Ị̀ sakị la tẹ, ì ḍukamẹnjịapụ ma na ị̀ na ị́ warị Saḅa-ḅọrọ Fịye mẹ fị ḅa.’ ”

¹⁹ Ò ḍukamẹnjịapụ ma Jizọsị in ḅẹẹ ḅara mịẹ tẹ Saḅa-ḅọrọ Fịye mẹ tẹlẹmam.

²⁰ Ene ḅoḅiri tẹso, Jizọsị na ò Ḍukamẹnjị Oyi Maa apụ Finji ma na fịye fị ḅẹ tẹ lẹgị-simem.

²¹ In ye mẹ fịarị ogbo, Jizọsị nwẹnị ḅẹẹ, “À ḍuko ọ́ pịrịarị, ọmịna ḅụụ ḅẹ gbọrụḅọ ị̀ kẹ dẹrịma ḅa.”

²² Ò ḍukamẹnjịapụ ma nwẹnị ḅụụ-ḅalaḅala lama tẹ, gbọrụḅọ, gbọrụḅọ: saakị ò gbelam, “KỊNỊNYANAḄỌ, karakara-ḅara-ḅụ ị́ ị̀ ḅẹẹ-a?”

²³ Jizọsị nwẹnị pakịrị, “Amịna fịturu kẹ ị̀ na gbọrụ ẹfẹrẹ ḅio gbọn-fịarị ḅọ ḅe anie ị̀ kẹ dẹrịma ḅarị ye.

²⁴ Tomḅọ Tụḅọ ḅe fịị ḅa Fịafịa Ḍiri mẹ wẹrịtẹ ḅẹẹ ḅara, kụma tẹkẹlẹ kpọma sime Tomḅọ Tụḅọ ḅe kẹ dẹrịmarị ḅọ ḅe pịrị ḅa! Ọkọ sime pịrị ḅarị tomḅọ mẹ mḅọ gbala-gbala iyi-a iḅi mḅọ iyim mẹ nẹngịm!”

²⁵ Judasị, Jizọsị kẹ dẹrịma ḅọ ḅe, nwẹnị ẹkwẹn pakama tẹ gbela: “Ye-tolumaḅọ, karakara-ḅara-ḅụ ị́ ị̀ ḅẹẹ-a?” Jizọsị nwẹnị pakịrị, “Anie ḍuko ḅara.”

KỊNỊNYANAḄỌ ḅe Ḅoḅiri Fịye Mẹ

²⁶ In ye mẹ fịarị ogbo, Jizọsị nwẹnị fịturu ọkị, tẹ ịmịẹtẹ kẹ Tamụnọ ḅẹẹ tẹ, anị paịn tẹ kẹ ò ḍukamẹnjịapụ ma pịrị. Ori mẹẹ, “Ọmịnị ọkị tẹ fị, mie ì oju mẹ.”

²⁷ Anịtẹso ọ̀ mọngị mẹ ọkị tẹ ịmịẹtẹ kẹ Tamụnọ ḅẹẹ tẹ anị kẹ ịn pịrịm. Ori mẹẹ, “Ọmịnị-mgba anị ḅuu;

²⁸ mie ị̀ ọmbie mẹ, tẹ Tamụnọ kẹ ori ọḅọkụ mẹ mịẹ kụrọmarị ye mẹ, ị̀ ọmbie tẹ tọnwa atomi asi wẹrịso gotẹ ọsụ-sara ye mẹ.

²⁹ À ḍuko ọ́ pịrịarị, à ḅarị jen-maaịn kẹ mị iru mẹ ḅuu ḅịa, nwenii ị̀ Ḍa ḅe Ama-da tẹ ḅẹrẹtọn-arị anga mẹ ḅụ àrị ọmịnị na ịwọ iru mẹ ḅuu sakị la ḅa.”

³⁰ Anịtẹso ịn gbọrụ nume-su tẹ mẹnjị paka so Olivu Tụndụ mẹ mum.

Jizọsị Ḍukom Pita Ò Piki Ḅa

³¹ Anịtẹso Jizọsị nwẹnị ịn ḅẹẹ, “Mị gbọrụ ḍin mẹ ḅụ, ọmịnị-mgba ì koroma mangị-so ḅa, kẹ gotẹ ọkọ ḅẹẹarị, Fịafịa Ḍiri mẹ ḍuko tẹ, ‘Tamụnọ anana-ḍikiḍikiḅọ ḅe ḅaa tẹ anana ogbo mẹ gala-gala ḅa.’

³² Kụma Tamụnọ fịị ḅụ ị̀ saakịma sakị, yẹrị tarị mu, ọmịnị amụ mu la-a ogbo, Galili la ḅa.”

³³ Pita nwẹnị ẹkwẹn pakama tẹ Jizọsị ḅẹẹ, “Yẹrị kụma, gbala-gbala àrị í koroma so ḅịa, kirikọn-apụ mamgba nwẹnị ọkọ mịẹ sọ.”

³⁴ Jizọsị nwẹnị Pita ḅẹẹ, “À ḍuko ị́ pịrịarị, mịnẹ mị ḍin ḅụ tarị ọḅọkọ amụ paan-a ogbo, ị́ tẹra sakị kẹ ḅẹẹ ḅa mịnẹ í ì nimi-a!”

³⁵ Pita pakịrịm, “Gbala-gbala, yẹrị ọkọ sime ye ḍuko ḅịa, arị ị́ ḅụụ sọ tẹ fịị ḅẹ sọ!” Tẹ Jizọsị ḍukamẹnjịapụ ma ḅụ osi apụ mamgba sọ anị gberie mẹ ḍukom.

Jizọsị Gẹtịsimani Ḍụọ Ḅụ Tẹkẹm

³⁶ Anịtẹso Jizọsị ò ḍukamẹnjịapụ ma kẹ ọ̀ ḅụụ sụa tẹ Gẹtịsimani nwẹn-sịn anga mum, tẹ ori ịn ḅẹẹm, “Ọ́ mịanga lẹgị-sime tẹ yẹrị mu osi saḅa-anga tẹkẹ.”

³⁷ Ọ̀ nwẹnị Pita na Zẹbidi maa owiapụ-awọmẹ ma na ọkị ọ̀ ḅụụ sụa mu. Opu kururu na tẹmẹ-naịn-naịn na ọ̀ ḅụụ sọm.

³⁸ Tẹ ori ịn ḅẹẹm, “Ì ḅioḅẹngbọ ponomarị kururu mẹ ḅaka ḅara ẹrẹsị anị ị̀ ḅaa ḅẹ-yearị. Ọ́ mịanga sime tẹ ị̀ na koruu.”

³⁹ Ọ̀ nwẹnị kẹlẹ mẹnjị tọrọkọ mu, tẹ amịna ḅụụ sẹma-kiri-gbin, tẹ iḅo tẹ tẹkẹ, “Ị̀ Ḍa, anị inetẹ mịẹ ḅarị ḅẹḅẹ, ị̀ ḅara ḅụ mị kururu kọpụ mẹ siin! Anịsọ à ḅii ḅara-a, kụma ị́yẹrị ḅii ḅara.”

⁴⁰ Anịtẹso Jizọsị pịkịma ò ḍukamẹnjị tẹra apụ ma dama-mu tẹ ini ẹrịm ịn monoarị; tẹ ọ̀ nwẹnị Pita ḅẹẹ, “Ndẹẹ ọmịnị tẹra apụ ma inetẹ gbọrụ sakị kịngẹ sọ kẹ mono-a tẹ ị̀ na koru-a ḅara?

⁴¹ Ó koru tẹ tẹkẹẹ, mịẹtẹ ọ́ daaḍiki ḅio sọ ḅịa ḅara. Tẹmẹ ḅe minini wararị, kụma meni-oju mẹ ịnyọ nyana-a.”

⁴² Jizọsị nwẹnị jen gbọrụ sakị kẹ mẹnjị sọ-mu tẹkẹ, “Ị̀ Ḍa, ị̀ ḅara ḅụ ị́ nwẹnị mị kururu kọpụ mẹ sin ḅẹ ọkụ ofori, arị anị ḅio sime ye ḅuu sikima, ḅẹḅẹ ị́ tọn ye mịẹ.”

⁴³ Ọ̀ nwẹnị jen gbọrụ sakị kẹ pịkịma ḅo tẹ ẹrị mịnẹ ò ḍukamẹnjịapụ ma mono ḅọrọ so tẹ, ịn ḅarị inetẹ ịna atọrụngbọ finji-a.

⁴⁴ Jizọsị nwẹnị sin ịn koroma so, tẹ mẹnjị mu tẹra sakị karama ye kẹ tẹkẹ, tẹ paa gbọrụ ẹkwẹn mẹ kọn.

⁴⁵ Anịtẹso ọ̀ pịkịma ò ḍukamẹnjịapụ ma dama-mu tẹ ḅẹẹm, “Ọ́ paa mono tẹ ịnyọsararị? Ḍikii! In Tomḅọ Tụḅọ ḅe saḅama si-mịẹapụ kụrọ ḅara-ḅio suu ḅẹ sakị mẹ la tẹ.

⁴⁶ Ọ́ saakịị, ó yee wa so. Ḍikii, ḅie ị̀ kẹ dẹrịmarị tomḅọ ḅe mịanga!”

In Jizọsị Kunm

⁴⁷ Jizọsị paa ẹkwẹn-arị ogbo, Judasị ò Ḍukamẹnjị Oyi Maa apụ Finji ma ḅẹ gbọrụḅọ gbọrụ opu tomina-ogbo na ḅom; ịna ḅụ ja apụ okologie ọlọm, ja apụ pịkị mgbele dogim; agbamịẹapụ ma na omongiapụ ma na ịn kẹ fịrịmam.

⁴⁸ Jizọsị kẹ dẹrịma ḅọ ḅe mị elekima mẹ ḍuko tomina-ogbo mẹ pịrị wẹrị tẹ: “À ḅẹlẹma ḅara ḅụ ekpe kẹ fịnama ḅarị ḅọ ḅe anie ó ḅiiarị tomḅọ ḅee. Ọmịnị ò kuun.”

⁴⁹ Judasị nwẹnị da-da mẹnjị mu Jizọsị la tẹ ḅẹẹ, “Ye-tolumaḅọ, dein ị́ na simee,” tẹ nwẹnị ḅẹlẹma ḅara ḅụ ekpe kẹ ọ̀ fịnama.

⁵⁰ Jizọsị nwẹnị pakịrị, “Ikiaḅọ, sarasarama í gotẹ ḅo ye mịẹ.” Anịtẹso ịn mẹnjị mu Jizọsị kun tẹ ori ọlọ kụrọmam.

⁵¹ Jizọsị na sime apụ ma ḅẹ gbọrụḅọ nwẹnị ori okologie wọrọ-pakama-ḅo tẹ kẹ Sịḅịda-Agbamịẹḅọ ḅe omoniḅọ ḅeri pẹlẹ sin.

⁵² Jizọsị nwẹnị ọ̀ ḅẹẹ, “Í okologie mẹ kẹ sin lubulu mẹ ḅio suu wẹrịị. Ogie sin-arị apụ mamgba ogie fịị mie ịn kọn ḅarịye.

⁵³ Í nimi-a, àrị inetẹ ị̀ Ḍa ḅe tẹkẹ tẹ ori anị gbọrụ kiri oyi maa enjẹlị ọmụ-ogbo finji nẹngị ye kẹ fịrịma tẹ in ḅo ḅarasụa ị̀ pịrị ḅẹ ḅara?

⁵⁴ Tẹ anị nwẹnị anị ḅara paka kụma, ndẹẹ Fịafịa Ḍiri mẹ ḍukom mịnẹ anị ọkọ paka ḅa ḅẹẹ ye mẹ mịẹ tẹ ye sọ ḅẹ ḅara?”

⁵⁵ Anịtẹso Jizọsị ẹkwẹn tomina-ogbo mẹ pịrịm, “Ọmịnị okologie na mgbele na ọlọ tẹ paka-ḅo ì kun ḅẹm aro, gbala yẹrị ama oloko kan tẹ mangịarị ḅọ ọkụ? Ene-ḅaaene-ḅaaene à kọkọ Tamụnọ-warị mẹ ḅio lẹgị-lẹgị tẹ ye toluma, tẹ ọmịnị ì kun-a.

⁵⁶ Kụma mie mẹmgba paka tẹ, mịẹtẹ ịkịankoroapụ ma Fịafịa Ḍiri mẹ ḅio kẹẹ koroma wararị aị ma karakara aị sọ ḅẹ ḅara.” Anịtẹso ò ḍukamẹnjịapụ mamgba ò koroma mangị-som.

In Jizọsị Kẹ Sịẹ-Kobiri Mẹ Tọrọkọ Mum

⁵⁷ Jizọsị kun apụ ma nwẹnị ọ̀ kẹ Kayafasị, Sịḅịda-Agbamịẹḅọ ḅe, warị mu, anie Oloko toluma apụ ma na omongi apụ ma na kobiri wararị anga mẹ.

⁵⁸ Pita tombi kẹ tomi ma pịrị-pịrị mu Sịḅịda-Agbamịẹḅọ ḅe onu ḅọkọ mẹ lam. Ọ̀ nwẹnị sọ-mu tẹ ḅọkọ-koruapụ ma na lẹgị, ò ye paka ḅẹ ḅara nimi ḅẹ gotẹ.

⁵⁹ Agbamịẹapụ ma na bebe ḅẹrẹ-siri mẹ na ini inetẹ ḅara, inetẹ ḅara mịẹtẹ iruo ye kẹ Jizọsị sịḅị sẹịn tẹ ini ọ̀ ḅaa ḅẹ apụ ḍọkịm;

⁶⁰ kụma ini inetẹ gbọrụḅọ-sọ ḍọkị-ẹrịa, karakara ye tọnwa-apụ paka mu tẹ ịna ḅịḅị sọ iruo aị, iruo aị kẹ ọ̀ sịḅị sẹịnm ḅẹ sọ. Kunoma ḅụ maa apụ tolu-sịẹ

⁶¹ tẹ ḅẹẹm, “Ḅị tomḅọ ḅe ḅẹẹm, ‘Àrị inetẹ Tamụnọ-warị mẹ kaan-sara tẹ tẹra aḍin ḅụ anị nama sịẹma ḅa.’ ”

⁶² Sịḅịda-Agbamịẹḅọ ḅe nwẹnị saakị sịẹ tẹ Jizọsị gbela, “Ịn kẹ nwẹn ị́ sịḅị sẹịn-arị aị ma ḅụ ị́ pakịrị ḅẹ ye ofori?”

⁶³ Kụma Jizọsị nwẹnị gbọsime. Sịḅịda-Agbamịẹḅọ ḅe nwẹnị siin ẹkwẹn ọ̀ pịrị, “Mịọkụ à ḍumo wararị Tamụnọ ḅe ẹrẹ kẹ ye kẹ ị́ karị tẹ: ḍuko wa pịrị, ị́yẹrị Mẹsaya, Tamụnọ Tụḅọ ḅe ḅẹḅẹ.”

⁶⁴ Jizọsị nwẹnị ọ̀ pakịrị, “Anie ị́yẹrị ḍuko ḅara. Kụma à ḍuko ọmịnị-mgba pịrịarị: mị sakị mẹ ḅụ saakị mu ó Tomḅọ Tụḅọ ḅe ẹrị ḅa, ọ̀ Kụrọmamgba Nyanaḅọ ḅe ama-ḅara anga lẹgị-sime wararị, tẹ So-tọrụ ḅụ oḅuto ọgọnọ sime tẹ ḅoarị!”

⁶⁵ Sịḅịda-Agbamịẹḅọ ḅe miemẹ naa ye ḅụ ọ̀ nwẹnị amịna kapa kan tẹ ḅẹẹ, “Tamụnọ fie-sima ẹkwẹn! Wa ḅarị jen ye nimi tẹ ḍuko ḅẹ apụ ḅii-a! Mị gbọrụ sakị mẹ ḅụ ọ̀ kọn Tamụnọ fie-sima ẹkwẹn mẹ ọ́ naa tẹ!

⁶⁶ Ndẹẹ ọmịna kuroma?” Ịn nwẹnị pakịrị, “Ḅẹrẹ ọ̀ ḅara si tẹẹ, ọ̀ fịị nyanam.”

⁶⁷ Anịtẹso ịn fịla kẹ ọ̀ tọrụ isi tẹ ò fomum; tẹ ini tẹ ḅara finji ọ̀ tọrụ ḅọrọ apụ ma

⁶⁸ ḅẹẹm, “Mẹsaya, ḅịrị ẹrị wa pịrịị! Í fomu ḅọ mẹ tọnma ḅoo!”

Pita Jizọsị Pikim

⁶⁹ Pita onu mẹ ḅio etela-ogbo lẹgị wararị ogbo, Sịḅịda-Agbamịẹḅọ ḅe fịrịmẹnjị-eremịna-awọmẹ ma ḅẹ gbọrụḅọ ḅo tẹ ọ̀ ḅẹẹm, “Ị́yẹrị sọ Galili ḅẹ Jizọsị ḅe na simem.”

⁷⁰ Kụma ọ̀ nwẹnị inimgba tọrọkọ anị pịkị, tẹ pakịrị, “Í ḍukoarị ye mẹ fiearị ye tiye-o, tiye-o à nimi-a,”

⁷¹ tẹ ọ̀ nwẹnị mẹnjị paka onu ḅọkọ mẹ ḅụ ḅọrọ sọ-mu anga mẹ la. Jen fịrịmẹnjị-ẹrẹḅọtụḅọ ori ẹrị tẹ anịanga sime atomi ma ḅẹẹm, “Ori na Nazarẹtị ḅẹ Jizọsị ḅe na simem.”

⁷² Pita pịkị anị pịkị tẹ pakịrịm, “À ye karị ị̀ ḅụụ pịrịm, anị tomḅọ ḅe à paa ò nimi, nimi!”

⁷³ Sakị kẹlẹ ḅọrọ tẹso, anịanga sịẹsime sime owiapụ ma ḅo Pita ḅẹẹm, “Piki-pikiye-ofori, ịna ḅụ ḅẹ gbọrụḅọ. Ḍiki ya, ị́ ẹkwẹn-arị ḅara mẹ sọ í ḍuko-pakamarị!”

⁷⁴ Anịtẹso Pita nwẹnị ḅẹẹ, “À ye karị ị̀ ḅụụ pịrị tẹ karakara mẹ ḍukoarị! Yee Tamụnọ fomu-ḅara ḅo ị̀ la, à paa iruoarị ḅẹḅẹ! Anị tomḅọ ḅe àrị ò nimi-a!” Anịtẹso anị gbọrụ sakị ḅụ ọḅọkọ nwẹnị paan,

⁷⁵ tẹ Pita nwẹnị Jizọsị ḍuko ọ̀ pịrị ḅọrọma tẹ ye mẹ kẹ ḅiokoroma: “Tẹrẹmẹ ọḅọkọ paan, ị́ tẹra sakị kẹ ḅẹẹ ḅa mịnẹ í ì nimi-a.” Ọ̀ nwẹnị mẹnjị paka tẹ tẹmẹ-la ḅara kẹ owu.