Matiyo 25 - FỊAFỊA BAỊBỤLỤ

Jizọsị Oyia Ḅụụ-gboloa Ereme Egberi Gbaam

¹ “Tamụnọ Ama-da sakị mẹ, mie anị kịka ḅarịye. Gbọrụ sakị oyia ḅụụ-gboloa ereme ḍin ḅụ tọnjọ ọkị tẹ paka ere-ịyaḅọ na bịama ḅẹ mum.

² Ịna ḅụ sọnọ apụ ye-nimia, kụma osi sọnọ apụ ye-nimim.

³ Ye-nimia-apụ ma ịna atọnjọ ọkịm, kụma in jen pulo kẹ ye ḅio sụa tẹ kẹ ḅarasụa mu-a,

⁴ tẹ ye-nimiapụ ma jen pulo kẹ ye ḅio sụa ḅinma tẹ kẹ ḅarasụa mum.

⁵ Ere-ịyaḅọ ḅe iḅi sakị ḅo-a, anie ḅụ ereme ma nwẹnị sịngẹ tẹ mono ḅọrọ so.

⁶ “Anị ḅo ḍin-ogbo la tẹso, kịnị nwẹnị oloku pakama, ‘Ḅie ere-ịyaḅọ ḅee! Ó ḅo ori na bịamaa!’

⁷ Oyia ereme ma nwẹnị naa-saakị, tẹ ịna atọnjọ tẹlẹma.

⁸ Anịtẹso ye-nimia-apụ ma nwẹnị ye-nimiapụ ma ḅẹẹ, ‘Ọmịna pulo mẹ ḅụ ọ́ kẹlẹ kẹ wa pịrịị, wamịna atọnjọ ma biin ḅẹ-yearị.’

⁹ Ye-nimiapụ ma nwẹnị pakịrị, ‘Gbala-gbala, wa ḍụkụ-a. Wa nyana pulo ọmịnị na wamịnị na kara ḅịa. Ó mu tẹ ịn pulo dẹrịarị anga fẹẹ ọkị.’

¹⁰ Anie ḅụ ye-nimia-apụ ma nwẹnị pulo mẹ fẹẹ ḅẹ mu; tẹ in mu wararị ogbo ere-ịyaḅọ ḅe nwẹnị ḅo la. Tẹlẹma sime wararị sọnọ ereme ma nwẹnị ori na so ere-ịya-alalị mẹ fị ḅẹ warị mẹ ḅio mu, tẹ nwẹnị ḅọkọ mẹ gbaịn.

¹¹ “Anị ḅịrị ḅọrọ tẹso, osi ereme ma nwẹnị ḅo la tẹ oloku, ‘Wa nyanaḅọ! Wa nyanaḅọ! Yee wa sọ ḅo!’

¹² Ere-ịyaḅọ ḅe nwẹnị pakịrị, ‘Karakara-ḅara-ḅụ, ọ́ sọ-ḅo ḅịa. Àrị ó nimi-a.’ ”

¹³ Tẹ Jizọsị nwẹnị ẹkwẹn gbaịn, “Ọkọẹrẹsị, ọmịnị ẹbị nyana ḅụụ pịrịị, ọmịnị ene nimi-a, pịkị sakị sọ nimi-a ẹrẹsị.”

Jizọsị Tẹra Fịrịmẹnjịapụ Egberi Gbaam

¹⁴ “Tamụnọ Ama-da sakị mẹ, mie anị kịka ḅarịye. Gbọrụ sakị ḅụ, gbọrụḅọ so ye mu ḅẹ tẹ ori afịrịmẹnjịapụ sịn ḅo tẹ ori ngọ kẹ ịna aḅara sụam.

¹⁵ Ọrụḅọ-ọrụḅọ ịnyọ la ḅara mie ò ḍikitẹ ngọ mẹ kẹ mḅọ ḅara sụa ḅara: ò seleḅa igbigi oyi maa ẹndẹ finji na oyia asi na kẹ gbọrụḅọ pịrịm, ọ̀ sọnọa ẹndẹ kẹ jụmọ pịrịm, tẹ ọ̀ pịkị maa ẹndẹ oyia asi finji kẹ jụmọ pịrịm. Anịtẹso ọ̀ nwẹnị so ò mu ḅẹ anga mẹ mu.

¹⁶ Igbigi oyi maa ẹndẹ finji na oyia asi na da ḅọ ḅe mu anị gbọrụ kiri igbigi mẹ kẹ tuḅo ḅụ suu, tẹ oyi maa ẹndẹ finji na oyia asi na sọye mịẹm.

¹⁷ Anị gbọrụ ḅara mẹ ḅụ sọnọ ẹndẹ da fịrịmẹnjịḅọ ḅe sọ jen sọnọ ẹndẹ sọye mịẹm.

¹⁸ Kụma igbigi maa ẹndẹ oyia asi finji da fịrịmẹnjịḅọ ḅe nwẹnị so mu tẹ kiri soku tẹ ọ̀ nyanaḅọ ḅe igbigi mẹ kẹ kiri-ḅio ḍiḅi.

¹⁹ “Sakị ḅọrọ lama tẹso, arị afịrịmẹnjịapụ ma nyanaḅọ ḅe pịkịma ḅo tẹ ini na ye kịẹnm.

²⁰ Igbigi oyi maa ẹndẹ finji na oyia asi na da fịrịmẹnjịḅọ ḅe ḅo tẹ oyi maa ẹndẹ finji na oyia asi ma na saḅama ọ̀ nyanaḅọ ḅe ḅara sụa tẹ ḅẹẹm, ‘Ị̀ nyanaḅọ, oyi maa ẹndẹ finji na oyia asi na mie ị́ kẹ ị̀ pịrị ye. Ḍikii! Mịanga jen oyi maa ẹndẹ finji na oyia asi na emi, à sọye ḅụ nyana ḅo ye.’

²¹ Ọ̀ Nyanaḅọ ḅe nwẹnị ḅẹẹ, ‘Mịẹ ḅaka, iḅi tẹ ḅioḅẹngbọ-kẹ-sịrẹrẹ-niḅi fịrịmẹnjịḅọọ! Ị́ karakara ḅara kẹ boowa igbigi ḍikiḍiki ye mẹ ḅụ, àrị ị́ kẹ tọnwa igbigi ḍikiḍikiḅọ mịẹ ḅa. Sọ-ḅoo, tẹ ị̀nịna ḅioḅẹlẹẹ!’

²² “Anịtẹso ori igbigi sọnọ ẹndẹ kẹ pịrị fịrịmẹnjịḅọ ḅe sọ ḅo tẹ ḅẹẹm, ‘Ị̀ nyanaḅọ, igbigi sọnọ ẹndẹ mie ị́ kẹ ị̀ pịrị ye. Ḍikii! Mịanga jen sọnọ ẹndẹ emi, sọye ḅara ḅụ à nyana ḅo ye.’

²³ Ọ̀ nyanaḅọ ḅe nwẹnị ḅẹẹ, ‘Mịẹ ḅaka! Iḅi na ḅioḅẹngbọ-kẹ-sịrẹrẹ-niḅi fịrịmẹnjịḅọọ! Ị́ karakara ḅara kẹ boowa igbigi ḍikiḍiki tẹ ye mẹ ḅụ àrị ị́ kẹ tọnwa igbigi ḍikiḍikiḅọ mịẹ ḅa. Sọ-ḅoo, tẹ ị̀nịna ḅioḅẹlẹẹ!’

²⁴ “Anịtẹso maa ẹndẹ oyia asi finji da ḅọ ḅe ḅo tẹ ḅẹẹm, ‘Ị̀ nyanaḅọ, àrị í nimi wararị, anie ḅụụ-fụkama tomḅọ; í ye ḍiḅi-a anga mie í ye soku-soku yee; tẹ ị́ fịaị mgbọlị kẹ sara wẹrị-a anga mie í kobiri ọkị-ọkị yee.

²⁵ À ḅalafaam ẹrẹsị àrị í igbigi mẹ kẹ kiri-ḅio ḅọịm. Ḍikii! Mie í nye mẹ.’

²⁶ “Ọ̀ nyanaḅọ ḅe nwẹnị ḅẹẹ, ‘Ị́yẹrị kọrịnama ịnyọ nyana-a si fịrịmẹnjịḅọ! Í nimi wararị, mịnẹ à ye ḍiḅi-a anga mie à ye soku-soku ye, tẹ à fịaị mgbọlị kẹ sara wẹrị-a anga mie à kobiri ọkị-ọkị ye?

²⁷ Iḅim, ọkọ ḅẹ sakị, mimgbe í ì igbigi mẹ kẹ igbigi wẹrị anga ḅụ suu tẹ à pịkịma-ḅo sakị arị anị ḅẹ sọye mẹ kẹ anị na sụa ọkị ḅarị ya.

²⁸ Mịọkụ ọmịnị ọ̀ ḅara igbigi mẹ pụkọ-ọkị tẹ kẹ oyi maa ẹndẹ finji nyanaḅọ ḅe pịrịị.

²⁹ Kẹ gotẹ ọkọ ḍukoarị, ye ḅara ḅụ sime ḅọ mẹ mḅọ nyana waama ḅa, kụma ye ḅara ḅụ ofori ḅọ mẹ mḅọ ọlọ wararị kalịye mẹ sọ ini mḅọ ḅara anị ọkị ḅa.

³⁰ Ḅie gberie ḅụ sọ ofori fịrịmẹnjịḅọ ḅe kịngẹ kụma, ọmịnị ò sukuruma etela pakama, ò mu kanakana ḅio sime; anịanga ḅụ ori owu-owu tẹ aka farị ḅa.’

Kunoma Ḅẹrẹkọn Mẹ

³¹ “Tomḅọ Tụḅọ ḅe enjẹlịapụ mamgba na ḅo tẹ ama-da ḅarị sakị mẹ ḅụ, ori ori ama-da emine ọgọnọ lẹgị-sime ḅa,

³² tẹ tomikiri ḅẹ asịẹ mamgba ḅụ simearị atomi ma ḅo ọ̀ tọrọkọ kobiri ḅa. Anịtẹso ori ịn kẹ maa anga ḍiya ḅa, anie anana-ḍikiḍikiḅọ oḅori ma ḅụ amịna anana sẹlẹ sikima ḅara.

³³ Ọ̀ karakaraye-mịẹapụ ma kẹ ori ama-ḅara anga koroma ḅa, tẹ si-mịẹapụ ma kẹ ori ere-ḅara anga koroma ḅa.

³⁴ Anịtẹso Amadaḅọ ḅe ori ama-ḅara anga sime apụ ma ḅẹẹ ḅa, ‘Ó ḅoo, ọmịnị ị̀ Ḍa boma tẹ apụ! Ó ḅọ tẹ tomikiri mẹ bịan tẹmẹ kụra-ḅio ọ̀ tẹlẹma ọ́ pịrị wararị ama mẹ ọkị ọmịna nye sọmaa.

³⁵ Ḅuru ị̀ tarị tẹ ọ́ fịye kẹ ị̀ pịrị fịm; minji ị̀ pọkọ tarị tẹ ó minji kẹ ị̀ pịrị ḅuum; à kịnị tọrụ nimi-a ḅọ ḅara kẹ ḅo tẹ ọmịnị ị̀ da warị suum;

³⁶ à paụ wararị tẹ ọ́ ḅịtẹ kẹ ị̀ ịnwaịnm; àrị obi tẹ ọmịnị ì ḍikiḍikim; tẹ àrị ikoli-warị ḅio simearị tẹ ó ḅo ì ḍikim.’

³⁷ “Anịtẹso karakaraye-mịẹapụ ma nwẹnị ò gbela ḅa, ‘KỊNỊNYANAḄỌ, tọ sakị ḅuru ị́ tarịarị tẹ wa fịye kẹ ị́ pịrị fị, anịanịa minji ị́ pọkọ-tarịarị tẹ wa minji kẹ ị́ pịrị ḅuu?

³⁸ Tọ sakị ị́ kịnị tọrụ nimi-a ḅọ ḅara kẹ ḅo tẹ wa ị́ ẹrị tẹ ị́ da wamịna awarị suu, anịanịa ị́ paụ wararị tẹ ḅịtẹ kẹ ị́ ịnwaịn?

³⁹ Tọ sakị í obiarị, anịanịa ikoli ḅio simearị tẹ wa ḅo í ḍiki?’

⁴⁰ Amadaḅọ ḅe nwẹnị pakịrị ḅa, ‘À ḍuko ọ́ pịrịarị, ó miemẹ mịẹ tẹ kẹ mịna ị̀ amịnapụ ma ḅụ tomi kẹ ye-sịn-a apụ ma ḅụ iderima-tẹịn ḅọ mẹ pịrị sakị, pịrị sakị, ọ́ mịẹ ị̀ pịrị tẹẹ!’

⁴¹ “Anịtẹso ori ori ere-ḅara anga sime apụ ma ḅẹẹ ḅa, ‘Ini ọ́ fọnọ sikimaa, ị̀ tọrọkọ, ọmịnị Tamụnọ woritẹ apụ! Ini ọ́ fọnọ mu sime gbamaso kọrị-fịnị, tẹ ịn tọnọ Ekwesu ḅe na ori enjẹlịapụ na pịrị ye mẹ ḅio suu!

⁴² Ḅuru ị̀ tarịm, kụma ọ́ fịye kẹ ị̀ pịrị fị ḍụkụ-a, minji ị̀ pọkọ tarịm, kụma ó minji kẹ ị̀ pịrị ḅuu ḍụkụ-a;

⁴³ à kịnị tọrụ nimi-a ḅọ ḅara kẹ ḅom, kụma ọmịnị ị̀ da ọmịna awarị ḅio suu ḍụkụ-a, à paụm kụma ọ́ ḅịtẹ kẹ ị̀ ịnwaịn ḍụkụ-a, àrị obi tẹ pịkị ikoli-warị ḅio simem, kụma ó ḅo ì ḍiki ḍụkụ-a.’

⁴⁴ “Anịtẹso ini nwẹnị ò gbela ḅa, ‘KỊNỊNYANAḄỌ, tọ sakị wa ḅuru ị́ tarịarị, anịanịa minji ị́ pọkọ tarịarị, anịanịa ị́ kịnị tọrụ nimi-a ḅọ ḅara kẹ ḅo, anịanịa paụ wararị, anịanịa obiarị, anịanịa ikoli-warị ḅio emi, tẹ wa ḅarasụa ị́ pịrị ḍụkụ-a?’

⁴⁵ Amadaḅọ ḅe nwẹnị pakịrị ḅa, ‘À ḍuko ọ́ pịrịarị, ọ́ ḍụkụ tẹ ḅarasụa mịna, tomi kẹ ye-sịn-a apụ ma ḅụ ḅẹ iderima tẹịnḅọ mẹ pịrị-a sakị goyegoye, ọ́ pịkị ḍụkụtẹ ḅarasụa yẹrị sọ pịrị-a.’

⁴⁶ Ọkọẹrẹsị, mịna apụ ma ini ịn kẹ sime gbamaso fomu-ḅara fịrịma ḅa, kụma karakaraye-mịẹapụ ma sime gbamaso ḍumo nyana ḅa.”