Matiyo 24 - FỊAFỊA BAỊBỤLỤ

Jizọsị Ịn Tamụnọ-warị Mẹ Kaan-sara Ḅẹ Ye Ḍukom

¹ Jizọsị Tamụnọ-warị mẹ ḅụ sime tẹ paka soarị ogbo, ò ḍukamẹnjịapụ ma nwẹnị anịanga nama wararị awarị ma kẹ ò ḍie.

² Ọ̀ nwẹnị ḅẹẹ, “Inn, arị ẹrị tẹ; ọ́ nwẹn kẹ arị ḍikiarị ḅara mẹ si-a, kụma à miemẹ ḍuko ọ́ pịrịarị: sakị ḅoarị, tẹ mịna aḍụḅarị ma jen ḅarị jen ọgọnọ gbana sime ḅịa, arị ḅụ gberie, gberie ịn nwẹn sukuruma-gbin fama ḅa.”

Ḅụụ-fụka Na Ḅaa-aḅọkọ Kẹ Minini apụ Ḍọkị Ḅo Ḅa

³ Jizọsị Olivu Tụndụ ọgọnọ lẹgị-sime wararị ogbo, ò ḍukamẹnjịapụ ma ọ̀ dama-ḅo tẹ, ja apụ ofori ḅara ḅụ, ọ̀ ḅẹẹm, “Mie-mẹmgba mịẹ ḅẹ sakị na, paka tẹ wa kẹ í ḅoo mẹ na, mị ḅụọ mẹ kunoma mẹ na, nimi ḅarị aị na ḍuko wa pịrịị.”

⁴ Jizọsị nwẹnị pakịrị, “Ọmịnị ẹbị nyana ọmịna ḅụụ pịrịị, tẹ ḍụkụ tẹ gbọrụḅọ-sọ oḅori kẹ ọ́ sịn ma.

⁵ Tọnwa atomi ị̀ ẹrẹ kẹ ẹkwẹn ḅẹ ḅo tẹ ḅẹẹ ḅa, ‘Yẹrị anie Mẹsaya ḅẹẹ’, tẹ oḅori kẹ tọnwa apụ sịn ḅa.

⁶ Kpeki anga ḅụ ọmịnị ọmụ fiearị ye naa ḅa, tẹ sụma-jụ ḅụ ọmụ ịba pịkị ḅo ọ́ la ḅa; kụma anị ọmịna ḅụụ-ḅalaḅalama ma. Ọkọsime aị ma paka-a so ḅịa, kụma arị aị ma fie-a mịnẹ kunoma mẹ ḅo la tẹ.

⁷ Tomikiri ḅẹ asịẹ ma, jen na, jen na owu sọ ḅa; gbọrụ amadaḅọ suku-ḅio simearị apụ pịkị owu kẹ osi-ḅọ suku-ḅio simearị apụ paka ḅa. Anga-anga ḅụ ḅuru ḅaa na kiri jike na paka ḅa.

⁸ Mịna aị mamgba kịkarị ye anie iyi latẹ ẹrẹḅọ tarị da-da akụ aị.

⁹ “Anịsakị ini ó kun tẹ ọ́ saḅama tomi pịrị tẹ in fomu-ḅara kẹ ọ́ pịrị tẹ ọ́ ḅaa ḅa. Ị̀ sịḅị gotẹ tomḅọ nwẹn-sịn tomḅọ ó ḍiki-ḅioḅu ḅa.

¹⁰ Anị sakị mẹ ḅụ tọnwa-apụ ịn nyana minini ḅụ ḅara-siin ḅa; tomi jụmọ-jụmọ kẹ ja apụ ḅara-ḅio dẹrịma, tẹ jụmọ-jụmọ ḍiki-ḅioḅu ḅa.

¹¹ Anịsakị tọnwa iruo ịkịankoroapụ amịna aḅụụ ḍie-pakama tẹ oḅori kẹ tọnwa-apụ sịn ḅa.

¹² Si ọkọ kẹ ḅaka ḅarị ḅara gotẹ tọnwa atomi nyana ja apụ pịrị ḅẹlẹma oḅoku ḅa.

¹³ Kụma inema mu kunoma la ḅọ, la ḅọ ḅọrọma ḅa.

¹⁴ Tẹ Tamụnọ Ama-da tẹ ḅẹrẹtọn-arị mẹ ḅẹ Iḅi Oku mẹ, ini anị ḍuko bebe tomikiri mamgba wasama tẹ, anị elekima sọ tomikiri ḅẹ atomi mamgba pịrị ḅa; anịtẹso kunoma mẹ nwẹnị ḅo ḅa.

Ḅalafama Siye Mẹ

¹⁵ “Ịkịankoro Danẹlị ḍuko wararị Ḅalafama Siye mẹ mịẹ ḅẹ sakị ọmịnị ẹrị ḅa. Fịafịa anga mẹ ḅụ mie anị sịẹ ḅarịye anie Jeruselemu mẹ fama ḅẹ apụ ama mẹ ọkị ḅarị sakị mẹ (Miemẹ goarị ḅọ, goarị ḅọ, anị fiearị ye naa ọkịị.)

¹⁶ Anị ḅo ọkọ paka tẹ ḅẹḅẹ, Judiya ḅụ sime apụ mangị sọ-mu tụndụ ma kpọlịị.

¹⁷ Amịna warị isun ọgọnọ sime ḅọ ḅẹḅẹ, mḅọ koro warị ḅio mu amịna aị ọkị ḅẹ ḅara ḍọkị ma.

¹⁸ Piri-ḅio sime-ḅọ ḅẹḅẹ, mḅọ so warị mu mḅọ ọgọnọ ḅẹ kapa ọkị ma.

¹⁹ Arị ene ma kpọma si furatẹ-ereme na, ndo-ndo-awọmẹ ọlọ ereme na, pịrị ḅa!

²⁰ Ọ́ Tamụnọ tẹkẹẹ, mịnẹ ọ́ mangị paka ḅarị sakị mẹ oḅoku sakị, anịanịa Ịnyọsara-Ene, sọma.

²¹ Kẹ gotẹ ọkọ ḅẹẹarị, anị sakị mẹ ḅụ ḅo ḅarị ḅụụ-fụka mẹ, kẹ anị tọnma ḅẹ ye jen sakị amụ paka-a, tomikiri mẹ bịan saakị kụra-ḅio, ḅo mịmgba ḅẹ eneḅaka mẹ la. Tọrọkọ-jụ sọ anị pembema ye ḅarị pịkị paka ḅịa.

²² Kụma Tamụnọ ḅarana anị sime mu la ḅarị ene ma kịẹn-ḅịḅị mẹ kpụlụma kụra-ḅio iḅerea; ori ọkọ mịẹ-a namịna, kpọkpọ gbọrụ tomḅọ sọ kirikọn ḅịa. Ọ̀ sẹlẹ ọ̀ ḅụụ pịrị tẹ atomi ma gotẹ, Tamụnọ ene ma kịẹn-ḅịḅị mẹ kpụlụma ḅa.

²³ “Anịtẹso, gbọrụḅọ ḅọrọ ḅo ọ́ ḅẹẹm, ‘Ḍikii, Mẹsaya ḅe mịanga emi!’ anịanịa ‘Anịanga ori emi!’ ḅẹḅẹ — ọmịnị mḅọ minini ma.

²⁴ Kẹ gotẹ ọkọ ḅẹẹarị, iruo Amazaya na, iruo ịkịankoroapụ na, ḅụụ pakama ḅa; ini opu ḅụụ-buama-aị na, ḅụụ-gbiripuma-aị na, mịẹ tẹ oḅori kẹ Tamụnọ sẹlẹ-ọkị tẹ atomi ma sọ sịn ḅẹ ḅii ḅa, anị inetẹ ọkọ mịẹ ḅẹ kụma.

²⁵ Ó pokii! À tarị miemẹ ḍuko ọ́ pịrị wẹrị, tẹrẹmẹ sakị mẹ ḅo la.

²⁶ “Anịanịa, kịnị ḍụkụ-a tẹ ḅo ḍuko ọ́ pịrị, pịrị, ‘Ḍikii, ori ịkpa mẹ ḅio emi!’ ḅẹẹm ḅẹḅẹ, anịanga ó mu ma; anịanịa ịn ḅẹẹm, ‘Ḍikii, ọ̀ mịanga ḅọị wararị!’ ḅẹḅẹ, ọmịnị anị minini ma.

²⁷ Kẹ gotẹ ọkọ ḅẹẹarị, Tomḅọ Tụḅọ ḅe ḅoo mẹ kịka ḅarịye anie, So-tọrụ ḅalapụ tẹ ịrụa mẹ saakị pakarị pakịrị anga kọrị saḅa mu anị tuuideriarị anga mẹ la ḅara.

²⁸ “Ọkpa sime anga, sime anga mie ẹdẹlẹ kobiri ḅarịye.

Tomḅọ Tụḅọ Ḅe Pịkịma-ḅo Ḅa

²⁹ “Arị ene ma ḅẹ ḅụụ-fụka mẹ ḅọrọtẹ soarị, soarị, ịrụa mẹ kanakana sọ ḅa, akalụ mẹ ḅarị ḅịya ḅịa, tẹ lolia ma So-tọrụ ḅụ sime tẹ siin-koro ḅa, tẹ So-tọrụ ḅẹ akụrọ mamgba gboloki ḅa.

³⁰ Anịtẹso Tomḅọ Tụḅọ ḅe elekima mẹ ḅụụ pakama ḅa, So-tọrụ ḅụ, tẹ tomikiri ḅẹ atomi mamgba owu ḅa, ịn Tomḅọ Tụḅọ ḅe So-tọrụ ḅụ kụrọ na, opu ebube na, kẹ oḅuto ọgọnọ sime tẹ ḅoarị ye kẹ ori ẹrị sakị.

³¹ Opu ọdụ mẹ fie ḅa, tẹ ori ori enjẹlị apụ fịrịma pakama tẹ in tomikiri ḅẹ ini ịkọlị ma ḅụ ọ̀ sẹlẹ-ọkị tẹ atomi ma kobiri ḅo ḅa, tomikiri mẹ mu la anga, la anga ḅụ.

Jizọsị Ịla Sịn Mẹ Ḅẹ Ḍawọye Tolumam

³² “Yee ịla sịn mẹ ye kẹ ó toluma. Anị ḅẹ ịkpangị ma ḅo ịwọ ḅara sime tẹ, ịwọ ịnyịnya saakị pakarị ḅẹḅẹ, ó nimi tẹ mịnẹ ịrụa kụra laa ḅẹ tẹ.

³³ Anị gbọrụ ḅara ḅụ, ọ́ mịna aị mamgba ẹrị tẹ ḅẹḅẹ, ó nimi ḅa mịnẹ sakị mẹ ḅo kpeki tẹ, anị saakị ḅẹ tẹ.

³⁴ Ọ́ kẹ ḅiokoromaa, mịna aị mamgba paka tẹrẹmẹ mịọkụ ḍumo wararị atomi mamgba fịị fama sakị la ḅa.

³⁵ So na Kiri na ḅọrọ so ḅa, kụma ị̀ ẹkwẹn ma gbala-gbala ḅọrọ so ḅịa gbamasom.

Gbọrụḅọ-sọ Jizọsị Pịkịma-ḅo Ḅarị Ene Na Sakị Na Nimi-a

³⁶ “Anị sime-ḅara ḅụ, gbọrụḅọ-sọ Tomḅọ Tụḅọ ḅe ḅo ḅarị ene mẹ na, sakị mẹ na nimi-a — So-ḅio simearị enjẹlị apụ ma sọ nimi-a, Tụḅọ ḅe sọ nimi-a; Ḍaḅọ ḅe sikima nimi jụmọ ofori.

³⁷ Tomḅọ Tụḅọ ḅe ḅoo mẹ Noha ene ḅaka paka ye na kịka ḅa.

³⁸ Tẹrẹmẹ opu minji mẹ ḅo, tomikiri ḅẹ atomi fị-na-ḅuu-nam; owiapụ na, ereme na simem, ọkị mu Noha arụ mẹ ḅụkụlọ eneḅaka mẹ lam;

³⁹ anịsọ paka ḅẹ-yearị ye mẹ ịn lekiri-a nwenii opu minji mẹ ḅo ịn gbaịn tẹ ịn fọnọ so sakị lam. Anie anị sime ḅarị ḅara Tomḅọ Tụḅọ ḅe ḅoarị sakị mẹ ḅụ.

⁴⁰ Anị sakị mẹ ḅụ maa owiapụ piri-ḅio sime tẹ kọrịnama kọrịarị ogbo, ịn gbọrụḅọ ọkị tẹ osi-ḅọ koroma so ḅa.

⁴¹ Maa ereme fịye gbẹẹ anga simearị ogbo ịn gbọrụḅọ ọkị tẹ osi-ḅọ koroma so ḅa.

⁴² “Ọkọẹrẹsị, ọmịnị ẹbị nyana ḅụụ pịrịị, ọ́ Nyanaḅọ ḅe ḅo ḅarị ene mẹ ó nimi-a ẹrẹsị.

⁴³ Kẹ tọnma ḅụ, ọmịnị sọ inetẹ nimi ḅara ḅụ, warị nyanaḅọ furuḅọ mḅọ warị ḅo ḅẹ sakị nimim namịna, mḅọ mono ḅịa tẹ koru tẹ, mịẹtẹ furuḅọ ḅe warị mẹ kan sọ-mu ḅịa ḅara.

⁴⁴ Mị-ḅara ḅụ, ọmịnị sọ ọkọ kẹ sakị mamgba tẹlẹma tẹ koruu, kẹ gotẹ ọkọ ḅẹẹarị, Tomḅọ Tụḅọ ḅe ḅo ḅarị sakị mẹ ḅarị ọ́ kẹ ḅiotọn-a sakị sọ ḅịa ḅara.

Iḅiọkụma Fịrịmẹnjịḅọ Na Iḅiọkụma Fịrịmẹnjị-aḅọ Na

⁴⁵ “Ọkọ kụma, iḅiọkụma fịrịmẹnjịḅọ tẹ pịkị ye-nimi wararị ḅọ anie tụḅọ? Ori anie ọ̀ nyanaḅọ kẹ osi ori afịrịmẹnjịapụ ma sịḅị dama tẹ ḅẹẹ tẹ ḅọ, mịnẹ sakị laa sakị, laa sakị, ori ịna fịye kẹ ịn pịrịị.

⁴⁶ Anị fịrịmẹnjịḅọ ḅe tọ-ḅara na gbasị ḅara kẹ ḅioḅẹlẹ ḅa, ọ̀ nyanaḅọ warị ḅo tẹ ẹrị mịnẹ ori ọkọ mịẹarị ọkụma!

⁴⁷ Karakara-ḅara-ḅụ, à ḍuko ọ́ pịrịarị, mịnẹ ọ̀ nyanaḅọ ḅe ọ̀ kẹ ọ̀ nyana aị mamgba ḍikiḍikiḅọ sọma ḅa.

⁴⁸ Kụma ori iḅiọkụma fịrịmẹnjị-aḅọ ḅẹḅẹ, ori ọ̀ ḅụụ ḅẹẹ ḅa mịnẹ ọ̀ nyanaḅọ ḅe sarasarama pịkịma ḅo ḅịa,

⁴⁹ tẹ saakị ò pembema fịrịmẹnjịapụ ma fomu, fomu tẹ iru ḅuu apụ na fị-na-ḅuu-na ḅa.

⁵⁰ Anịtẹso anị fịrịmẹnjịḅọ ḅe nyanaḅọ ḅe ò ḅiotọn-a ene na, ò nimi-a sakị na, ḅụ ḅo ḅa.

⁵¹ Ọ̀ nyanaḅọ ḅe si fịrịmẹnjịḅọ ḅara kẹ ori ọkị, tẹ fịrị ḅụ ọ̀ dasịẹma, tẹ mịẹtẹ si-mịẹapụ ḅụụ paka-paka ye ọ̀ ḅụụ paka ḅa. Anịanga mie ò sime tẹ owu-owu tẹ ori aka farị ḅarịye.