Matiyo 20 - FỊAFỊA BAỊBỤLỤ

Kụrọ Ḍụọ Mẹ Ḅẹ Namakọrịapụ

¹ “Mie Tamụnọ Ama-da sakị mẹ kịkarị ye. Gbọrụ sakị gbọrụ tomḅọ dede-funfun ḅụ paka mu kịnị ọkọ tẹ ini ọ̀ girepu-ḍụọ ḅio kọrịnama kọrị ḅẹm.

² Ori ini na ḅịḅị-kẹ-ogbosọm mịnẹ, kẹ gbọrụ ene ḅẹ kọrịnama-kọrịḅọ gbẹẹ-gbẹẹ ye ọ̀ nwẹn kẹ gbọrụḅọ, gbọrụḅọ gbẹẹ ḅa, anie gbọrụ seleḅa igbigi gbọrụ ene ḅụ; tẹ ọ̀ nwẹnị ịn kẹ fịrịma mịnẹ in mu kụrọ ḍụọ mẹ ḅio kọrịnama kọrịị.

³ Sakị ḅo esenia aso la tẹso, ọ̀ nwẹnị pịkị paka mu tẹ ogumaḅiri ḅụ gberie-sọ mịẹ-a tẹ papaa sịẹsime wararị owiapụ ẹrị,

⁴ mie ḅụ ori ịn ḅẹẹm, ‘Ọmịnị sọ ó mu kụrọ ḍụọ mẹ ḅio kọrịnama kọrịị, tẹ kẹ ọ́ gbẹẹ na-iḅi ye à nwẹn kẹ ọ́ gbẹẹ ḅa.’

⁵ Mie ḅụ ịn nwẹnị mu. Anịtẹso, oyi maa aso finji na tẹra so na ḅụ sọ ori anị gbọrụ ḅara mẹ mịẹm.

⁶ Sakị ḅo ḅoḅiri ḅẹ sọnọ aso la ḅẹ-yearị ogbo, ọ̀ nwẹnị pịkị ogumaḅiri mẹ mu tẹ ja owiapụ ẹrị, ini anịanga sịẹsime wararị. Ọ̀ nwẹnị in gbela, ‘Tiye paka tẹ ọ́ gbọrụ kọrịnama sọ kọrị-a tẹ bebe ene mẹ papaa faarị ḅara?’

⁷ Ịn nwẹnị pakịrị, ‘Gbọrụḅọ-sọ kọrịnama kẹ wa pịrị kọrị-a.’ Ọ̀ nwẹnị ịn ḅẹẹ, ‘Ọkọ ḅẹḅẹ, iḅim, ọmịnị sọ mu girepu-ḍụọ mẹ ḅio kọrịnama kọrịị.’

⁸ “Ene ḅoḅiri tẹso, ḍụọ nyanaḅọ ḅe nwẹnị ọ̀ fịrịmẹnjịapụ sịḅịdaḅọ sịn tẹ ọ̀ ḅẹẹ, ‘Kọrịnama kọrị apụ ma sịn tẹ ịna gbẹẹ aị kẹ ịn gbẹẹ. Kunoma ḅụ wa ọkọ apụ ḅụ saakị gbẹẹ ma mu wa tarị ọkọ apụ ma la.’

⁹ Sọnọ aso ḅụ saakị kọrịnama kọrị apụ ma, gbọrụḅọ seleḅa igbigi mie ịn kẹ ịn gbẹẹ-ye.

¹⁰ Mie ḅụ tarị ini ọkọ apụ ma ịna gbẹẹ-ye ọkị ḅẹ ḅo sakị in kuromam mịnẹ ịn kẹ ịn gbẹẹ ḅarịye osi apụ nye nẹngị ḅa; kụma ini sọ gbọrụḅọ, gbọrụḅọ gbọrụ seleḅa igbigi mie ịn kẹ ịn gbẹẹ-ye.

¹¹ Ini ịna igbigi mẹ ọkị tẹso, ịn saakị mbụrụmbụrụ ini ọkọ ḅọ ḅe pịrịm.

¹² Ini mẹẹ, ‘Mịna atomi ma tẹ kunoma ị́ ọkọ apụ ma gbọrụ awa kọrịnama ngẹrị mie ịn kọrị ye, wamịnị nwẹnị bebe ene mẹ ḅẹ ịrụa mẹ da tẹ kọrịnama kọrị — anịsọ ị́ ịn kẹ wamịnị na gbasịma gbẹẹ tẹ!’

¹³ “Ḍụọ nyanaḅọ ḅe nwẹnị ịna ḅụ ḅẹ gbọrụḅọ pakịrị, ‘Ikiaḅọ, pokii, amụ àrị ị́ inoma-a. Ye paka ḅara kẹ ye ḍiki ḅụ, í mininim í bebe ene ḅẹ kọrịnama kọrị tẹ ḅẹḅẹ à gbọrụ seleḅa igbigi kẹ ị́ gbẹẹ ḅa.

¹⁴ Ọkọẹrẹsị, ị́ gbẹẹ-ye ọkị tẹ so warị muu. À ḅiiarị mịnẹ àrị à kẹ ị́ pịrị ḅara kẹ kunoma ḅụ àrị ọkọ ḅọ ḅe sọ pịrị.

¹⁵ À kụrọ nyana-a, ì igbigi kẹ ì ḅiotọn ḅara mịẹ? Anịanịa, à ḅara sarasara tẹ iḅi mịẹarị ye mẹ ị́ ḅụụ-ḅẹsọarị ḅoto?’ ”

¹⁶ Anịtẹso Jizọsị nwẹnị ẹkwẹn gbaịn ḅụ ḅẹẹ, “Mie ḅụ, kunoma apụ ma ḅo tarị apụ sọ ḅa, tẹ tarị apụ ma kunoma apụ sọ ḅa.”

Jizọsị Tẹra Sakị Karamaye Kẹ Ọ̀ Fịị Gbolomaye Ḍukom

¹⁷ Jizọsị iwo Jeruselemu muarị ogbo, ori ò Ḍukamẹnjị Oyi Maa apụ Finji ma sịn sikima tẹ, ja apụ ofori anga ḅụ, in mẹnjị ma-muarị sakị, ẹkwẹn ịn pịrịm;

¹⁸ Ò ḍuko ịn pịrịm, “Ó pokii, wa iwo Jeruselemu muarị, tẹ anịanga ḅụ in Tomḅọ Tụḅọ ḅe kun tẹ kẹ mu agbamịẹapụ ma na, Oloko Tolumapụ ma na pịrị ḅa. Ịn ḅaa-ḅẹrẹ pẹlẹ ọ̀ pịrị ḅa,

¹⁹ anịtẹso ini ọ̀ saḅama Ja asịẹ ḅẹ apụ ma pịrị tẹ ini ò kombo ḅa, ò fomu ḅa, tẹ ọ̀ kẹ ẹngbẹsẹ-sịn ḅụ ḅakụ ḅa; kụma tẹra aḍin ḅọrọ tẹso, Tamụnọ fịị ḅụ ọ̀ saakịma tẹ ò ḍumo ḅa.”

Jọnị Na Jemusị Na Iyingi Jizọsị Ḅara Ye Ḅiim

²⁰ Anịtẹso Zẹbidi ta ma árị maa owiapụ-awọmẹ kẹ Jizọsị dama-ḅo tẹ ọ̀ tọrọkọ kparakị tẹ ọ̀ ḅara ye ḅiim.

²¹ Jizọsị nwẹnị á gbela, “Í tiye ḅiiarị?” Á nwẹnị pakịrị, “Minini ị̀ pịrị mịnẹ, mịna ị̀ maa owiapụ-awọmẹ ma, í ḅo Amadaḅọ sọ sakị, gbọrụḅọ ị́ ama-ḅara anga, osi ḅọ í ere-ḅara anga lẹgị ḅa.”

²² Jizọsị nwẹnị owiapụ-awọmẹ ma pakịrị, “Ó ḅiiarị ye mẹ sime-ḅara ó nimi-a. Ọmịnị inetẹ yẹrị ḅuu ḅẹ-yearị tọrụsiẹrị mọngị mẹ ḅio simearị ye mẹ ḅuu ḅẹ?” Ịn nwẹnị pakịrị, “Wa inetẹ ḅa.”

²³ Jizọsị nwẹnị ḍuko ịn pịrị, “Karakara-ḅara-ḅụ ị̀ mọngị mẹ ḅio simearị ye mẹ ọmịnị inetẹ ḅuu ḅa, kụma ị̀ ama-ḅara na ì ere-ḅara na ḅụ lẹgị ḅẹ apụ sẹlẹ kụrọ mẹ ìnye-a. Ma akiri ma sime Ị̀ Ḍa ḅe arị tẹlẹma pịrị apụ pịrịm.”

²⁴ Osi oyi apụ ma miemẹ gbolomaye naa sakị ini ịganị nyana maa amịnapụ ma pịrịm.

²⁵ Mie ḅụ Jizọsị inimgba sịn kobiri tẹ ḅẹẹm, “Ó nimi wararị ḅara ḅụ, oru nimi apụ ma ḅẹ ḅẹrẹtọn-apụ ma ịna suku-ḅio simearị apụ ma ḅụ kụrọ nyana wararị, ịna sịḅịdapụ ma pịkị kiki ofori opu sọ ịn pịrịarị.

²⁶ Ye sime-ḅara, sime-ḅara sọ, ọmịna ogboku ḅụ anị ḅara anie ye sime na-iḅi ḅara-a. Ọmịna ḅụ ḅẹ gbọrụḅọ ḅiiarị mḅọ opuḅọ sọ ḅẹḅẹ, mḅọ rẹ kirikọn-apụ fịrịmẹnjịḅọ sọọ;

²⁷ tẹ ọmịna ḅụ ḅẹ gbọrụḅọ ḅiiarị mḅọ tarịḅọ sọ ḅẹḅẹ, mḅọ rẹ ọmịna omoniḅọ sọọ

²⁸ Anie anị sime Tomḅọ Tụḅọ ḅe pịrị ḅara mẹ, ọ̀ ja apụ fịrịmẹnjị ọ̀ pịrị ḅẹ go ḅo-a, kụma ori rẹ fịrịmẹnjị ja apụ pịrị tẹ ò ḍumo kẹ tọnwa atomi pakịrị-ḅo ye sọma ḅẹm.”

Jizọsị Tọrụngbọ-Pụụntẹ Maa Owiapụ Gwọm

²⁹ Jizọsị na ò ḍukamẹnjịapụ ma na Jeriko koroma soarị sakị, gbọrụ opu tomina-ogbo in ḍuka-mum.

³⁰ Tẹ tọrụngbọ-pụụntẹ maa owiapụ, tẹ Jizọsị mẹnjị ḅọrọarị etela mẹ akaka lẹgị-sime apụ, nwẹnị naa mịnẹ Jizọsị anịanga mẹnjị-ḅọrọarị. Mie ḅụ ịn nwẹnị saakị oloku “Devidi Tụḅọ! Ọkụrụkụrụ nyana wa pịrịị!”

³¹ Tomina-ogbo mẹ nwẹnị ịn ḍiki-ịganị tẹ ịn dedema, mịnẹ ịn yaụ-simee. Kụma ịn paa oloku kụrọma ḅakam, “Devidi Tụḅọ! Ọkụrụkụrụ nyana wa pịrịị!”

³² Jizọsị nwẹnị daasịẹ tẹ ịn sịn tẹ ịn gbela, “Ó ḅiiarị à tiye mịẹ ọ́ pịrị?”

³³ Ịn nwẹnị pakịrị, “Wa nyanaḅọ, wa ḅiiarị ị́ mịẹtẹ wa ye ẹrị!”

³⁴ Tẹ Jizọsị nwẹnị ịn ḍiki tọrụ-kụrụkụrụ, tẹ ḅara kẹ ịna atọrụngbọ lama; anị gbọrụ kiri ịn nwẹnị inetẹ ye ẹrị, tẹ ò ḍukamẹnjị.