Matiyo 19 - FỊAFỊA BAỊBỤLỤ

Jizọsị Siya Gbolomaye Tolumam

¹ Jizọsị ò ḍuko sime aị ma ḍuko fama tẹso, ọ̀ Galili ḅụ so Jodanị Tọrụ saḅa-koro ḅụ Judiya ibe mum.

² Opu tomina-ogbo-ogbo ò ḍuka mu tẹ ọ̀ pịkị ịna ḅụ obi apụ gwọm anịanga ḅụ.

³ Farịsiiapụ ma ḅẹ apụ ọ̀ dama-ḅo tẹ ọ̀ ḅịḅị paka ḅẹ ye ḍọkị gotẹ, ò gbelam, “Wamịna Oloko mẹ anị minini owiḅọ pịrị, mịnẹ ọ̀ ta kẹ ọ̀ mịẹ si, mịẹ si, ò ḅii-ḅii ori inetẹ á siya ḅẹ?”

⁴ Kẹ ịn pakịrị ḅụ Jizọsị nwẹnị gbela, “Fịafịa Ḍiri mẹ ḍuko ye ó go-a, mịnẹ ye sukuyọ-saakị ḅụ tomi ma Tẹmẹḅọ ḅe, owi na ịyọrọ na mie ọ̀ tẹmẹ ye ḅara?

⁵ Tẹ Tamụnọ ḅẹẹm, ‘Miemẹ ẹrẹsị owiḅọ ḅe amịna ḍaḅọ na, iyingiḅọ na koroma so tẹ mu amịna taḅọ na oḅoloma ḅa, tẹ ini maa apụ ma gberie mịẹ ḅa.’

⁶ Mie ḅụ ini ḅarị maa apụ-a, kụma gbọrụḅọọ. Ọkọẹrẹsị Tamụnọ kpọọ gboloma tẹ apụ ma tomḅọ in puama.”

⁷ Farịsiiapụ ma nwẹnị ò gbela, “Ọkọ ḅẹ kụma, Mozizi tiegotẹ oloko sụa mịnẹ owiḅọ siya ḍiri kẹẹ tẹ kẹ amịna taḅọ pịrị tẹ á ḅẹẹ tẹ á so?”

⁸ Jizọsị nwẹnị pakịrị, “Mozizi gotẹ ọmịnị ọmịna ereme siya minini ọ́ pịrị ye, ọmịnị ma ye kẹ ó tolumaḅọ ḅụụ-fụkama ḅakam. Kụma tomikiri mẹ tarị tẹmẹ sakị ye ọkọ sime-a.

⁹ Ọkọ ẹrẹsị, à ḍuko ọ́ pịrịarị, mịnẹ owiḅọ tẹ amịna taḅọ siya ḅọ, siya ḅọ, á jen owiḅọ na kọn na-iḅi-a mẹnjị kọn sikima, mḅọ jen ẹrẹḅọ sime-sime, mḅọ sẹfị tẹ.”

¹⁰ Ò ḍukamẹnjịapụ ma nwẹnị ọ̀ ḅẹẹ, “Mie owiḅọ na amịna taḅọ na ogboku ye sime-ḅara ḅẹḅẹ, ẹrẹḅọ sime-a iḅi ẹrẹḅọ sime nẹngịm.”

¹¹ Jizọsị nwẹnị pakịrị, “Mị tolumaye mẹ sime ḅẹḅọ-ḅẹḅọ pịrị-a, kụma Tamụnọ anị kẹ pịrị apụ kịngẹ mie anị sime pịrị ye.

¹² Kẹ gotẹ ọkọ ḅẹẹarị, tomi gotẹ inetẹ ere-sime ḅịa aị kịrị-kịrị wararị: ja apụ ini iyi ḅara ḅụ ini ẹrẹḅọ sime ḅịa; ja apụ ịna pembema atomi ere-sime ḅịa ḅara mẹ kẹ ịn wẹrịm; tẹ ja apụ Tamụnọ Ama-da mẹ gotẹ amịna ḅụụ kẹ ere-sime ḅịa ḅara mẹ wẹrịm. Yee inetẹ mị tolumaye mẹ ọkị ḅẹ ḅọ anị ọkị.”

Jizọsị Kala Awọmẹ Bomam

¹³ Kịnị nwẹnị ḍọkọḍọkọ-awọmẹ kẹ Jizọsị pịrị tẹ ọ̀ ḅara kẹ ịna ọgọnọ gbana tẹ tẹkẹ ịn pịrị ḅẹ ḅo, kụma ò ḍukamẹnjịapụ ma tomi ma ḍiki-ịganịm.

¹⁴ Tẹ Jizọsị nwẹnị ḅẹẹ, “Yee awọmẹ ma ị̀ ḍọkụma-ḅo, ọmịnị in kiki ma, kẹ gotẹ ọkọ ḅẹẹarị, Tamụnọ Ama-da mẹ anị sime in sime-ḅara ḅẹ atomi pịrịm.”

¹⁵ Tẹ ori amịna aḅara kẹ ịna ọgọnọ gbana fama tẹso, ọ̀ nwẹnị mẹnjị so.

Ngọ-Kọnḅọ Ḍumo Gbamaso Ḅẹ Ḅara Gbelam

¹⁶ Gbọrụ sakị, gbọrụ owiḅọ Jizọsị ḍọkụma-ḅo tẹ ò gbelam, “Ye-tolumaḅọ, à tọ iḅiye mịẹ tẹ sime gbamaso ḍumo nyana ḅẹ?”

¹⁷ Jizọsị nwẹnị pakịrị, “Í tiegotẹ iḅiye gbolomaye kẹ ì gbelarị? Gbọrụḅọ ngẹrị anie Iḅi-ḅọọ. Oloko mẹ tọn koroma aị ma mịẹ, í ḍumo ḅio sọ ḅẹ-ḅiiarị ḅẹḅẹ.”

¹⁸ Ọ̀ nwẹnị gbela, “Oloko ma ḅọrọ tọ-aị?” Jizọsị nwẹnị pakịrị, “Kịnị-ḅa ma; sẹfị ma; furu ma; iruoye kẹ gbọrụḅọ sịḅị sọ sẹịn ma;

¹⁹ ị́ ḍa na í iyingi na kụụn; tẹ pịkị ị́ ị́ ḅụụ ḅẹlẹma ḅara kẹ ị́ na kpeki tẹ anga ḅọ ḅẹlẹmaa.”

²⁰ Asatụḅọ ḅe nwẹnị pakịrị, “Ma oloko mamgba ị̀ kala-sakị kụra-ḅio à kokoarị. Jen tẹ ị̀ ḅara kọntẹ à mịẹ na-iḅi ye tiye?”

²¹ Jizọsị nwẹnị ọ̀ ḅẹẹ, “Ị́ kara-gbasị ḅẹ ḅiiarị ḅẹḅẹ, ị́ nyana aị mamgba dẹrị tẹ igbigi mẹ kẹ igoin-apụ ma pịrịị, anịsakị í So-ḅio ngọ nyana ḅa; anịtẹso ḅo tẹ ì ḍukamẹnjịị.”

²² Asatụḅọ ḅe miemẹ naa sakị ò kururu na mẹnjị som, ọ̀ kpọma ngọ-kọn lamam ẹrẹsị.

²³ Anịtẹso Jizọsị nwẹnị ò ḍukamẹnjịapụ ma ḅẹẹ, “À mịẹtẹ ó nimiarị mịnẹ ngọ-kọn apụ ḅo Tamụnọ Ama-da suku-ḅio simearị atomi sọ mẹ ḅụụ-fụkama ḅara ḅakam.

²⁴ À pịkị ḍukoarị mịnẹ ngọ-kọnḅọ ḅo Tamụnọ Ama-da suku-ḅio simearị tomḅọ sọ mẹ, ḅụụ-fụkama ike-sụa-nama laga tọrụngbọ ḅụ tolu-ḅọrọ nẹngịm.”

²⁵ Jizọsị ḍukamẹnjịapụ ma miemẹ naa sakị, anị kpọma ịna ḅụụ-buamam. Ịn nwẹnị gbela, “Ọkọ kụma tụḅọ inetẹ ḅọrọma ḅẹ?”

²⁶ Tẹ Jizọsị da-da in ḍiki tẹ pakịrịm, “Miemẹ tomi ḅụụ anị inetẹ mịẹ ḅịa ḅara sime wararị; Tamụnọ ḅụụ kụma, ye goyegoye inetẹ mịẹ ḅa.”

²⁷ Anịtẹso Pita nwẹnị ẹkwẹn pakama. Ori mẹẹ, “Ḍikii, wa ye goyegoye ḅụ ḅara-siin tẹ í ḍukamẹnjị tẹ. Wamịnị nyana ḅarịye ḅọrọ tiye?”

²⁸ Jizọsị nwẹnị ịn ḅẹẹ, “À mịẹtẹ ọmịnị inetẹ nimi ḅa, mịnẹ Ḅo-ḅarị Ịwọ sakị mẹ, tẹ Tomḅọ Tụḅọ ḅe ori ebube emine ọgọnọ lẹgị ḅarị sakị mẹ ḅụ, ọmịnị ì ḍukamẹnjị oyi maa apụ finji ma sọ, ọkọ kẹ ọrụ emine, emine ọgọnọ lẹgị tẹ Izirẹlị ḅẹ oyi, maa afuro finji ma kọn ḅa.

²⁹ Tẹ ḅẹḅọ-ḅẹḅọ tẹ amịna awarị, anịanịa owiapụ-amịnapụ, anịanịa eremịna amịnapụ, anịanịa ḍaḅọ, anịanịa iyingiḅọ, anịanịa awọ, anịanịa amịna akiri wẹrịso tẹ ì ḍukamẹnjịḅọ, arịḅẹ kiri sọnọa si nẹngị ye nyana ḅa, tẹ Tamụnọ pịkị sime gbamaso ḍumo kẹ mḅọ pịrị ḅa.

³⁰ Kụma tọnwa-apụ tẹ mịọkụ tarị apụ ma ḅo kunoma apụ sọ ḅa, tẹ tọnwa-apụ tẹ mịọkụ kunoma apụ ma ḅo tarị apụ sọ ḅa.