Matiyo 17 - FỊAFỊA BAỊBỤLỤ

Jizọsị Ọ̀ Ḅụụ-ḍimam Tụndụ Ọgọnọ

¹ Sonio aḍin ḅọrọ tẹso, Jizọsị nwẹnị Pita na, Jemusị na, ò iyimbere Jọnị na ọkị tẹ ịna tọrọkọ sụn tẹ mu gbọrụ geletẹ tụndụ kpọlị, tẹ ini na ngẹrị anịanga sime.

² Ini ò ḍikiarị ogbo mie Jizọsị ọ̀ ḅụụ ḍima yee: ọ̀ tọrụkuḅu nwẹnị ịrụa ḅịya ḅara ḅịya, tẹ ọ̀ kapa nwẹnị weema bele ḅịya ḅara ḅịya paka, tọrụngbọ ḅio sọ ḅara.

³ Anịtẹso Jizọsị ḍukamẹnjị tẹra apụ ma nwẹnị Mozizi na, Ịlayịja na ẹrị, in Jizọsị na ẹkwẹn-arị.

⁴ Mie ḅụ Pita nwẹnị ẹkwẹn pakama tẹ Jizọsị ḅẹẹ, “KỊNỊNYANAḄỌ, anị iḅim wa mịanga sime! Tẹ ị́ ḅụụ-ḅẹlẹ ḅẹ kụma à tẹra obokoro nama, tẹ gberie sime ị́ pịrị, gberie sime Mozizi pịrị, tẹ gberie pịkị sime Ịlayịja pịrị.”

⁵ Ori ẹkwẹn-arị ogbo mie pịna-pịna oḅuto ḅo ịn gbaịn ye, tẹ oḅuto mẹ ḅio gbọrụ pọkọ nwẹnị ḅẹẹ, “Ḅie ị̀ iḅi Tụḅọ ḅe, ọ̀ mịẹye ị̀ ḅụụ ḅẹlẹm, ọmịnị ò pokii!”

⁶ Jizọsị ḍukamẹnjịapụ ma pọkọ mẹ naa sakị ini oju sẹkịm, ḅalafa ḅụ, tẹ ịn nwẹnị ḅịkị kiri koro tẹ iḅo.

⁷ Jizọsị nwẹnị ịn dama-ḅo tẹ ḅara kẹ ịn lama tẹ ḅẹẹ, “Ọ́ saakịị; ọ́ ḅalafa ma!”

⁸ Mie ḅụ ịn tọrụ saakị ḍiki sakị Jizọsị ngẹrị mie ini ẹrị ye.

⁹ Ini tụndụ mẹ ọgọnọ sime tẹ koro-ḅoarị ogbo, Jizọsị nwẹnị tọn ịn pịrị, “Ọ́ mị ịkịan mẹ ḍuko gbọrụḅọ-sọ pịrị ma nwenii Tomḅọ Tụḅọ ḅe fịị ḅụ saakị sakị la.”

¹⁰ Anịtẹso, Jizọsị ḍukamẹnjịapụ ma nwẹnị ò gbela, “Ndẹẹ Oloko Tolumapụ ma ḅẹẹarị ḅara mịnẹ Ịlayịja tarị ḅo ḅẹ?”

¹¹ Jizọsị nwẹnị pakịrị, “Ịlayịja tarị ḅoarị mẹ karakara ye, tẹ ò ye goyegoye tẹlẹma wẹrị ḅa.

¹² Kụma à ḍuko ọ́ pịrịarị, Ịlayịja ò ḅo la kụra-ḅio iḅerea, tẹ tomi ò lekiri-a, kụma ịna ḅụụ ḅẹlẹ-ḅara ḅẹlẹ-ḅara mie ịn kẹ ọ̀ mịẹ yee. Anị gbọrụ si ḅara mẹ mie ịn kẹ Tomḅọ Tụḅọ ḅe sọ mịẹ ḅarị ḅara.”

¹³ Anịtẹso Jizọsị ḍukamẹnjịapụ ma nwẹnị nimi mịnẹ Minji Sara Jọnị gbolomaye mie ò ḍuko ịn pịrị sime ye.

Jizọsị Oru Sịḅị Ḅio Sime Owiḅọtụḅọ Gwọm

¹⁴ Ịn pịkịma tomina-ogbo mẹ dama-ḅo sakị, gbọrụ owiḅọ Jizọsị dama-ḅo tẹ ọ̀ tọrọkọ kparakị,

¹⁵ tẹ ḅẹẹm, “Ị̀ nyanaḅọ, ọkụrụkụrụ nyana ì owiḅọtụḅọ pịrị! Ori ịsịla-obi kọn-arị, tẹ tọnwa sakị ọ̀ ḅalafama ḅara kẹ gbụmgbụm tẹ fịnị, anịanịa minji ḅio ḅịkị koroarị.

¹⁶ Àrị ọ̀ kẹ í ḍukamẹnjịapụ ma dama-ḅom kụma ini inetẹ ọ̀ gwọ-a.”

¹⁷ Jizọsị nwẹnị pakịrị, “Ọmịnị minini nyana-a tẹ pịkị kuraye mịẹ-a atomi ḅara ḍikii! Àrị ọmịnị na sime mu tọ sakị la ḅẹ? Àrị ọmịnị inema mu tọ sakị la ḅẹ? Tụḅọ ḅe kẹ mịanga ḅo ị̀ pịrịị!”

¹⁸ Tẹ Jizọsị tọn oru ḅe pịrị tẹ ọ̀ nwẹnị tụḅọ ḅe ḅụụ ḅio paka-ḅo, tẹ anị-gbọrụ-kirikiri ọ̀ nwẹnị gwọọ.

¹⁹ Anịtẹso Jizọsị ḍukamẹnjịapụ ma nwẹnị ini na ori na ngẹrị emi sakị ḅụ ò gbela, “Tiye mịẹtẹ wa inetẹ oru ḅe dee pakama-a?”

²⁰ Jizọsị nwẹnị pakịrị, “Ó gotẹ ine-a ye, ọ́ nyana minini boowa. Yẹrị ọ́ ḅẹẹarị, ọ́ nwẹnị ịrụ mọsịtadị nwẹn-sịn sịn mgbọlị mẹ na gbasị minini ngẹrị nyana wararị sọ, ọmịnị inetẹ mị tụndụ mẹ ḅẹẹ ḅa, ‘Mịanga saakị so mu osi anga simee’, tẹ anị mu ḅa. Ọmịnị inetẹ mịẹ ḅịa ye ofori!”

²¹ Kụma tẹkẹ na ḅuru-ịmọ na kịngẹ mie nwẹn pembe ye dee pakama ḅarịye, jen inetẹ ḅịa.

Jizọsị Pịkị Siin Ọ̀ Fịị Gbolomaye Ḍukom

²² Gbọrụ sakị Jizọsị ḍukamẹnjịapụ mamgba mu Galili ḅụ kobiri wararị ogbo ori ịn ḅẹẹm, “In Tomḅọ Tụḅọ ḅe kẹ mu tomina ḅara-ḅio suu ḅẹ-yearị;

²³ tẹ ini ọ̀ ḅaa ḅa; kụma tẹra aḍin ḅọrọ tẹso, ọ̀ saakị tẹ ḍumo ḅa.” Miemẹ kpọma Jizọsị ḍukamẹnjịapụ ma kururumam.

Jizọsị Tamụnọ-Warị Ḅẹ Oso Igbigi Gbẹẹm

²⁴ Jizọsị na ò Ḍukamẹnjịapụ ma na ḅo Kepanọmụ la sakị, Tamụnọ-warị mẹ ḅẹ igbigi da apụ ma Pita dama-ḅo tẹ ò gbelam, “Ọmịna ye-tolumaḅọ ḅe Tamụnọ-warị mẹ ḅẹ oso igbigi mẹ ọ̀ gbẹẹ gbẹẹ-a?”

²⁵ Pita nwẹnị pakịrị, “Ọ̀ gbẹẹ gbẹẹm.” Pita warị sọ mu sakị, amụ ori ẹkwẹn-a ogbo, Jizọsị ò gbelam, “Sayịmọnị, ndẹẹ í kuroma ḅara? Tọ apụ oso Ḅẹrẹtọn-apụ pịrị-pịrị kịrị-kịrị oso aị ma gbẹẹ na-iḅi, ama ḅẹ furo awọmẹ mụnọọ, ja asịẹ ḅẹ apụ tẹ ama mẹ ḅio angarị apụ?”

²⁶ Pita nwẹnị pakịrị, “Ja asịẹ ḅẹ apụ ma tẹ ama mẹ ḅio angarị apụ ma mie gbẹẹ na-iḅi ye.” Jizọsị nwẹnị pakịrị, “Ọkọ ḅẹḅẹ iḅim; anie fiearị ama ḅẹ furo awọmẹ ma ịn gbẹẹ gbẹẹ-a.

²⁷ Kụma wa wamịna atomi ma ịganịma ḅẹ ḅịa. Mie ḅụ, tọrụ mu tẹ arị koromaa. Tarị arị mẹ fị tẹ ị́ nụnụ pakama-ḅo ḅarị inji ḅe ḅịḅị-ḅio í igbigi ẹrị ḅa, ì nye na ọmịna nye na oso la ḅarịye. Ọkị mu wa oso ḅẹ igbigi mẹ gbẹẹ.”