Matiyo 16 - FỊAFỊA BAỊBỤLỤ

In Jizọsị Ḅara Ḅụụ-buamaye Ḅiim

¹ Farịsiiapụ ma na, Sadusiiapụ ma na ḅụ ḅẹ ja apụ Jizọsị ḅịḅị paka ḅẹ ye ḍọkị ḅẹ mum, mie ḅụ ịn nwẹnị ọ̀ ḅara ḅụụ-buamaye ḅii, ịn kẹ Tamụnọ kẹ ọ̀ kẹ ye-sịnm nwẹn ḅẹẹ ye nimi ḅarịye.

² Kụma Jizọsị pakịrịm, “Ịrụa mẹ tuuideriarị sakị ḅụ ọ́ ḅẹẹ ḅẹẹm, ‘So mẹ iḅi ḅa, So-tọrụ mẹ pulo-pulo ḅịyarị ẹrẹsị.’

³ Tẹ Dede-funfun ḅụ ọ́ pịkị ḅẹẹ ḅẹẹm, ‘Eene koro ḅa, So-tọrụ mẹ pulo pulo ḅịya-a tẹ kpiti tẹ ẹrẹsị.’ Ó So-tọrụ ḍiki ḅụ inetẹ ene mẹ sime ḅarị ḅara nimi tẹ ḍukoarị, kụma ọmịnị inetẹ mịọkụ pakarị aị ma ḅụ ḅọrọtẹ sakị mẹ simearị ḅara lekiri-a.

⁴ Mị sakị mẹ ḅẹ atomi ma Tamụnọ nimi-a si-mịẹapụ ḅara ḍikii! Ọmịnị ị̀ ḅara ḅụụ-buamaye ḅiiarị aro? Ọmịnị ọkọ sime ye nyana ḅịa! Jona ḅụụ-buamaye mẹ kịngẹ mie ịn kẹ ọ́ pịrị ḅarịye.” Mie ḅụ ọ̀ nwẹnị in koroma tẹ mẹnjị so.

Farịsiiapụ Na Sadusiiapụ Na Fịturu Sunmaye Mẹ

⁵ Jizọsị ḍukamẹnjịapụ ma tọrụ mẹ saḅa mu osi pakịrị anga la sakị in ḅo nimi tẹ mịnẹ ịn fịturu kẹ ḅioḅọrọmam.

⁶ Jizọsị ịn ḅẹẹm, “Ọmịnị ẹbịị; ọ́ ḍụkụ tẹ Farịsiiapụ ma na Sadusiiapụ ma na fịturu sunmaye mẹ ó gboloma ma.”

⁷ Ịn nwẹnị saakị ini-ini-ini ogboku ḅịḅị ọkị-a tẹ ḅẹẹ, “Wa fịturu kẹ ḅo-a ye mẹ mie ó gotẹ miemẹ ḍukoarị.”

⁸ Jizọsị ịn kọn sime ẹkwẹn mẹ nimi tẹ in gbelam, “Ó tiegotẹ ọmịnị-ọmịnị ogboku ọ́ fịturu nyana-a ẹkwẹn kọn-arị? Ọ́ nyana minini boowa ḅara ḍikii!

⁹ Amụ ọ́ paa yefieye naa-a? Ọ́ kẹ ḅiokoroma-a, à fịturu sọnọ akpo paịn tẹ kẹ kịnị oyi ẹndẹ na kịnị oyia asi na pịrị fị sakị mẹ? Kirikọn-aị ma ọ́ tan nda akana ḅinma?

¹⁰ Tẹ anị pịkị tọ-ḅara paka à fịturu sọnọma akpo kẹ kịnị oyi ẹndẹ ma pịrị fị sakị? Kirikọn-aị ma nda akana ọ́ nwẹn sụa ḅinma?

¹¹ Ndẹẹ ó gotẹ à fịturu gbolomaye ḍuko ọ́ pịrị-a ḅara nimi-a ye? Ọmịnị ọmịna ḅụụ ẹbịị, Farịsiiapụ ma na Sadusiiapụ ma na ye-sunmaye mẹ ḅụ.”

¹² Anịtẹso Jizọsị ḍukamẹnjịapụ ma nwẹnị naa-ḅo mịnẹ ori ịn kẹ fịturu mịẹ-mịẹ ye-sunmaye ḅụ ḅụụ ẹbị gbolomaye ḍuko-a, kụma Farịsiiapụ ma na, Sadusiiapụ ma na tolumaye mẹ mie ọ̀ ḅẹẹ ye.

Jizọsị Gbolomaye Ḅụ Pita Ḍuko Pakama Ye

¹³ Jizọsị Sizariya Filipayị ama pakịrị anga mẹ mu tẹso, ọ̀ nwẹnị ò ḍukamẹnjịapụ ma gbela, “Tomi Tomḅọ Tụḅọ ḅe kẹ tụḅọ sịn-arị?”

¹⁴ Ịn nwẹnị pakịrị, “Ja apụ mẹẹ, Minji-sara Jọnị. Osi apụ mẹẹ, Ịlayịja; kirikọn-apụ ḅẹ jen-apụ mẹẹ, Jerimaya, anịanịa ịkịankoro apụ ma ḅẹ gbọrụḅọ.”

¹⁵ Jizọsị nwẹnị in gbela, “Ọmịnị ḅọrọ tọ-ḅara? Ọmịnị mẹẹ yẹrị tụḅọ?”

¹⁶ Sayịmọnị Pita nwẹnị pakịrị, “Ị́yẹrị anie Mẹsaya ḍumo wararị Tamụnọ ḅe Tụḅọ ḅee.”

¹⁷ Jizọsị nwẹnị pakịrị, “Sayịmọnị, Jona tụḅọ, tomḅọọ! Kẹ gotẹ ọkọ ḅẹẹarị, mị karakara mẹ gbọrụḅọ-sọ anị kẹ í toluma-a, kụma ị̀ Ḍa So-ḅio simearị ḅọ ḅe ḅara ḅụ mie anị da-da ḅo ị́ ḅara la ye.

¹⁸ Ọkọẹrẹsị à ḍuko Ị̀ pịrịarị, Pita; ịkụụ, tẹ mị ịkụ mẹ ọgọnọ mie arị ị̀ sọsị mẹ nama ḅarị ye, tẹ fị kụrọ sọ inetẹ anị nẹngịma ḅịa.

¹⁹ Tẹ à Tamụnọ Ama-da mẹ sọ-mu ḅẹ ḅọkọ asambị ma kẹ ị́ ḅara sụa ḅa; tomikiri ḅụ í kiki ḅọ kiki ḅọ, So-ḅio sọ ini mḅọ kiki ḅa; tẹ tomikiri ḅụ ị́ da-suu ḅọ da-suu ḅọ, So-ḅio sọ ini mḅọ da-suu ḅa.”

²⁰ Anịtẹso Jizọsị tọn ò ḍukamẹnjịapụ ma pịrịm mịnẹ in ḍuko gbọrụḅọ-sọ pịrị ma mịnẹ ori anie Mẹsaya ḅẹ.

Jizọsị Ọ̀ Tọrụsiẹrị Na Fịị Na Gbolomaye Ḍukom

²¹ Anị sakị mẹ ḅụ saakị tọrọkọ mu Jizọsị saakị giregire ḅara kẹ ḍuko ò ḍukamẹnjịapụ ma pịrịm, “Mịẹ ḅara, mịẹ ḅara sọ à Jeruselemu mu ḅa, tẹ ama ḅẹ omongiapụ ma na, agbamịẹapụ ma na, Oloko Tolumapụ ma na ḅara ḅụ kpọma tọrụsiẹrị da ḅa. Ini ị̀ ḅaa ḅa, kụma tẹra aḍin karama ene ḅụ à saakị tẹ ḍumo ḅa.”

²² Pita nwẹnị ọ̀ kpọmbị sikima tẹ saakị ò ḍiki ịganị, tẹ ḅẹẹ, “KỊNỊNYANAḄỌ, Tamụnọ ọkọsime ye ḍụkụ ma! Ọkọsime ye gotẹ ị́ ḅụ paka, paka ye ofori!”

²³ Jizọsị nwẹnị vuunma pịkị Pita da tẹ ọ̀ ḅẹẹ, “Ekwesu, ị̀ ḅụụ ḅụ ini ị́ fọnọ ḅelemaa! Ị́ ì etela kikiarị ḅọ sọ tẹ, í kuromarị aị ma Tamụnọ ḅara ḅo-a, kụma tomḅọ ḅara ḅom.”

²⁴ Anịtẹso Jizọsị nwẹnị ò ḍukamẹnjịapụ ma ḅẹẹ, “Gbọrụḅọ nwẹnị ị̀ na sọ tẹ mẹnjị ḅarị ḅẹḅẹ, mḅọ amịna ḅụụ kẹ ḅioḅọrọmaa, tẹ amịna ẹngbẹsẹ-sịn saakị dogi, tẹ ì ḍuka ḅoo.

²⁵ Kẹ gotẹ ọkọ ḅẹẹarị, ḅẹḅọ-ḅẹḅọ tẹ amịna ḍumo koko ḅụụ pịrị ḅẹ-ḅiiarị ḅọ, anị fama ḅa; kụma ḅẹḅọ-ḅẹḅọ tẹ ị̀ sịḅị ẹrẹsị amịna ḍumo famarị ḅọ anị ḍọkị-ẹrị ḅa.

²⁶ Yee à paa ó gbela, tomḅọ bebe tomikiri mẹ nyana ọkị ḅẹ tẹ amịna ḍumo fama kụma ndẹẹ mḅọ nyana ḅarị sọye? Karakara-ḅara-ḅụ gbọrụ sọye sọ ofori! Ori inetẹ pịrị pakama tẹ kẹ ò ḍumo pakịrị ọkị ḅẹ gberie-sọ ofori.

²⁷ Gbala Tomḅọ Tụḅọ ḅe ori enjẹlị ma na ọ̀ Ḍa ḅe ebube mẹ ḅụ ḅo ḅẹ-yearị, tẹ ò ḅo sakị ọ̀ nwẹnị ọrụḅọ-ọrụḅọ kọrị aị ḍikitẹ gbẹẹ-ye kẹ mḅọ pịrị ḅa.

²⁸ Ó nimi mịnẹ mịanga simearị apụ ma ḅẹ ja apụ amụ fịị-a ogbo Tomḅọ Tụḅọ ḅe Amadaḅọ ḅara kẹ ḅo tẹ kịnị ori ẹrị ḅa.”