Matiyo 15 - FỊAFỊA BAỊBỤLỤ

Atẹngịapụ Ma Tolumaye Mẹ

¹ Anịtẹso Farịsiiapụ ma na Oloko Tolumapụ ma na ḅẹ ja apụ nwẹnị Jeruselemu ḅụ sime tẹ Jizọsị dama-ḅo, tẹ ò gbela,

² “Tiye mịẹtẹ í ḍukamẹnjịapụ ma wamịna atẹngịapụ ma koroma-so wa pịrị wararị ama anga-anga aḅara ma koko-a? Ịn karakara ḅara kẹ ịna aḅara sịkịrị, sịkịrị-a tẹ ye fịarị!”

³ Jizọsị nwẹnị pakịrị, “Anịsakị ọmịnị ḅọrọ tiegotẹ Tamụnọ oloko mẹ kan, kan tẹ ọmịnị ḅarana tolumarị ye rẹ ḍukamẹnjịarị?

⁴ Kẹ gotẹ ọkọ ḍukoarị, Tamụnọ ḅẹẹm, ‘Ị́ ḍa na í iyingi na kụn’ tẹ ‘Nume mgbọ sin tẹ kẹ amịna ḍaḅọ, anịanịa iyingiḅọ woriḅọ-woriḅọ ini mḅọ ḅaa.’ ”

⁵ Kụma ọmịnị tolumarị mịnẹ tomḅọ kẹ ḅarasụa mḅọ ḍaḅọ, anịanịa iyingiḅọ, pịrị ḅẹ ye, tẹ mḅọ “Miemẹ sime Tamụnọ pịrịm” ḅẹẹ

⁶ kụma, mḅọ kẹ ḍaḅọ ḅe kụn kụn ye ḅarị ofori. Mị ḅọkọ mie ọ́ ḅọrọ tẹ Tamụnọ tọn koroma ye mẹ kẹ ḅarịye sịn-a ye, mịẹtẹ ọmịnị ọmịna ḅara kuḅu ḅẹ tolumaye koko ḅẹ ḅara.

⁷ Ọmịnị anie mịẹ kịnị ḍie atomii! Ayịzaya ọmịna ḅụ koro ịkịan mẹ kura ḅara ḍikii!

⁸ Tamụnọ ḅẹẹm, “mịna atomi ma, ḅịḅị apara ngẹrị mie ịn kẹ ị̀ kụn-arị, kụma ịna aḅioḅẹngbọ ị̀ ḅụụ ḅele la jụ iḅerea.

⁹ In sunsin ị̀ pịrịarị nwẹn ḅẹẹ ye mẹ sọ papaa ye, in tomi tọn koroma aị kẹ ì oloko ma kiri ḍima tẹ tolumarị mẹ ẹrẹsị!”

Mịẹtẹ Tomḅọ Fịafịaḅọ Sọarị Aị Ma

¹⁰ Anịtẹso Jizọsị tomina-ogbo mẹ sịn ọ̀ ḅụụ pịrị tẹ ịn ḅẹẹm, “Ó poki tẹ anị fiearị ye naa!

¹¹ Tomḅọ mịẹ tẹ mḅọ Tamụnọ tọrọkọ fịafịaḅọ sọarị ye, mḅọ kẹ ḅịḅị-ḅio sụa fịarị ye-a; anie nakara mḅọ ḅịḅị-ḅio paka-ḅoarị ye rẹ mie mḅọ kẹ Tamụnọ tọrọkọ fịafịaḅọ sọmarị.”

¹² Anịtẹso ò ḍukamẹnjịapụ ma ọ̀ dama-ḅo tẹ ḅẹẹm, “Ị́ kọkọ nimi, mịnẹ í ḍuko ye mẹ Farịsiiapụ ma ḅụụ-ḅẹsọm?”

¹³ Jizọsị nwẹnị pakịrị, “Ị̀ Ḍa So-ḅio simearị ḅọ ḅe ḅarana ḍiḅi-a sịn goyegoye, in suku-na-suku-na anị nụnụ pakama-ḅo ḅa.

¹⁴ Ọmịnị ịn bala ma! Ini ma anie tọrụngbọ-pụụntẹ-apụ tẹ jen tọrụngbọ-pụụntẹ-apụ tọrọkọ-tarị apụ; tẹ tọrụngbọ-pụụntẹḅọ jen tọrụngbọ-pụụntẹḅọ tọrọkọ-tarị sakị goyegoye, ini maa apụ ma mu ḅịkị olulu ḅio sọ ḅa.”

¹⁵ Pita nwẹnị ẹkwẹn pakama, “Ị́ nwẹn ḍukoarị ye mẹ puu finji wa pịrịị.”

¹⁶ Jizọsị nwẹnị ịn ḅẹẹ, “Amụ ọ́ paa ye nimi osi apụ ma nẹngị-a.

¹⁷ Anị fiearị ye ọ́ naa-a aro? Ḅẹẹye-ḅẹẹye tẹ tomḅọ ḅịḅị-ḅio sọ-mu ye, mu ye ḅọrọ mu mḅọ ịla ḅio koroarị, tẹso, anị pịkị mḅọ oju ḅio paka-ḅoarị.

¹⁸ Kụma tomḅọ ḅịḅị-ḅio paka-ḅoarị aị ma, mḅọ ḅioḅẹngbọ mie arị sime tẹ paka-ḅoarị, tẹ mịna aị ma mie Tamụnọ tọrọkọ mḅọ kẹ fịafịa-aḅọ sọmarị aị ma.

¹⁹ Kẹ gotẹ ọkọ ḍukoarị, mḅọ ḅioḅẹngbọ ḅụ mie si akuroma, tẹ mḅọ sukuruma mu kịnị ḅaa na, sẹfị na, ja si amịẹaị na ḅụ suuarị aị ma sime tẹ paka-ḅoarị; furu na, iruo na ja apụ wori-sima na sọ, paa anị gbọrụ ḅara mẹ.

²⁰ Mịna aị ma mie tomḅọ kẹ fịafịa-a ḅọ sọmarị aị ma. Kụma Juu-ḅẹ-apụ ma ḅiiarị ḅara kẹ ḅara sịkịrị-a tẹ ye fị rẹ tomḅọ kẹ Tamụnọ tọrọkọ fịafịa-a ḅọ sọma-a.”

Gbọrụ Ẹrẹḅọ Nyana Minini

²¹ Jizọsị nwẹnị anịanga ḅụ so Taya na, Sayịdọnị na opu ama ma na kpeki anga mu.

²² Kenanị ḅẹ ẹrẹḅọ anịjụ anga simem. Á nwẹnị Jizọsị dama-ḅo tẹ oloku ḅụ ọ̀ ḅẹẹ, “Devidi Tụḅọ! Ọkụrụkụrụ nyana ị̀ pịrịị. Oru ḅalafama ḅara kẹ ị̀ ẹrẹḅọtụḅọ ọlọ koroma wararị.”

²³ Kụma Jizọsị ḅịḅị fie á pịrị-a. Ò ḍukamẹnjịapụ ma ọ̀ dama-ḅo tẹ ḅẹẹm, “Sisi, á ḅẹẹ á so! Á wa ḍukamẹnjị-mẹnjị tẹ oloku wamịna ḅụụ fụkamarị!”

²⁴ Anịtẹso Jizọsị nwẹnị pakịrị, “Izirẹlị ḅẹ atomi, tẹ fatẹ anana ma, kịngẹ mie ini ị̀ kẹ fịrịma apụ.”

²⁵ Ori ọkọ ḍuko sakị ẹrẹḅọ ma ḅo ọ̀ ḅụọ suku á ḅụụ sẹma-kiri-gbin tẹ nwẹnị ḅẹẹ, “Ị̀ nyanaḅọ, paa ḅarasụa ị̀ pịrịị!”

²⁶ Jizọsị nwẹnị pakịrị, “Awọmẹ fị ḅẹ fịye kẹ wakị obiri pịrị mẹ kuraye mịẹ ye-a.”

²⁷ Ẹrẹḅọ ma nwẹnị pakịrị, “Ị̀ nyanaḅọ, anie karakara ye, kụma obiri ma sọ, paa warị nyanaḅọ ḅe ye fịarị dẹbịlẹ ḅụ kiri kọn tẹ siin-koro afịaị ma fị fịm.”

²⁸ Mie ḅụ Jizọsị nwẹnị á pakịrị, “Ẹrẹḅọ, ị́ nyana minini ḍụḅam! Í ḅiiarị ye mẹ anị mịẹ ị́ pịrị tẹ ye sọ ḅa.” Tẹ anị gbọrụ kiri á tụḅọ ma nwẹnị gwọọ.

Jizọsị Tọnwa Atomi Gwọm

²⁹ Jizọsị anịjụ mẹ ḅụ sọ-mu Galili Tọrụ akaka ḅụ mẹnjịm. Tẹ ọ̀ gbọrụ tụndụ kpọlị tẹ lẹgị-simem.

³⁰ Opu tomina-ogbo-ogbo, ekeliapụ na, tọrụngbọ-pụụntẹ-apụ na, ngụrọ-kọnapụ na, oḅu amẹẹ na, pịkị tọnwa ja obi apụ na ịn nwẹn ọkị-ḅo Jizọsị ḅụọ suku koromam; tẹ ọ̀ nwẹnị ịn gwọ.

³¹ Tomi ma ḅo oḅu amẹẹ ma ẹkwẹn-arị ye na, ngụrọ-kọnapụ ma gwọ ye na, ekeliapụ ma mẹnjịarị ye mẹ na, tọrụngbọ pụụn sime apụ ma ye ẹrịarị ye mẹ na, ẹrị tẹso ịn ḅụụ-bua tẹ, Izirẹlịapụ tẹkẹarị Tamụnọ ḅe tokinim.

Jizọsị Fịye Kẹ Tọnwa-tọnwa Atomi Pịrị Fịm

³² Jizọsị ò ḍukamẹnjịapụ ma sịn ọ̀ ḅụụ pịrị tẹ ḅẹẹm, “Mịna atomi ma àrị in ḍiki-sịḅị-kụrụkụrụarị, kẹ gotẹ ọkọ ḍukoarị tẹra aḍin ịn nwẹn kẹ ị̀ na sime tẹ, mịọkụ ịn ḅarị fịye nyana-a. À ḅii-a àrị ịn nwẹn ye fị-a ḅara mẹ kẹ ịn ḅẹẹ tẹ in so, in so warị muarị ogbo in ḅofa naịn-ḅọrọ etela ogbo.”

³³ Ò ḍukamẹnjịapụ ma nwẹnị ò gbela, “Mie kịnị sọ anga-a yọ mẹ ḅụ ndẹẹ wa mị inweni-ogbo mẹ na iḅi ḅẹ fịye ḍọkị-ẹrị ḅẹ anga?”

³⁴ Jizọsị nwẹnị gbela, “Ọ́ fịturu nda akpo nyana?” Ini mẹẹ, “Sọnọma akpo na boowa inji na.”

³⁵ Mie ḅụ Jizọsị inweni-ogbo mẹ ḅẹẹ tẹ in kiri-ḅio lẹgịm.

³⁶ Anịtẹso ọ̀ fịturu sọnọma akpo ma na inji mẹ na ọkị tẹ ịmịẹtẹ kẹ Tamụnọ ḅẹẹ tẹ arị paịn-paịntẹ kẹ ò ḍukamẹnjịapụ ma pịrị, tẹ ini nwẹnị kẹ tomi ma pịrị.

³⁷ Inimgba fị furo ḅinmam. Anịtẹrẹmẹ ò ḍukamẹnjịapụ ma tomi ma fị kọnma aị ma tan sọnọma akana ḅinmam.

³⁸ Ye mẹ fị owiapụ ma kịẹn-ḅịḅị, ereme na, awọmẹ na kẹ sụa kịẹn-a ḅara ḅụ, kịnị oyi ẹndẹ.

³⁹ Anịtẹso Jizọsị tomi ma ḅẹẹ tẹ in so tẹ ori arụ ḅụkụlọ tẹ so Magadanị ama pakịrị anga mum.