Matiyo 14 - FỊAFỊA BAỊBỤLỤ

Ẹrọdị Minji-sara Jọnị Ḅaam

¹ Anị sakị mẹ ḅụ Ẹrọdị, Galili da ḅọ ḅe nwẹnị Jizọsị gboloma ye naa.

² Tẹ ọ̀ nwẹnị ḍuko ò suku-ḅio simearị opu afịrịmẹnjịapụ ma pịrị tẹ ḅẹẹ, “À nwẹn ẹrẹ naarị ḅọ ḅe Minji-sara Jọnị tẹ à ḅaa ḅọ ḅe orii. Ọ̀ fị-ḅụ-saakị tẹẹ. Anie mịẹtẹ ọ̀ nwẹn sime kụrọ nyana tẹ kẹ ḅụụ-buama-aị mịẹarị.”

³ Kẹ gotẹ ọkọ ḅẹẹarị, Ẹrọdị tẹrẹmẹ ḅo mị sakị la tọn tẹ ịn Jọnị ọlọ tẹ, ikoli kẹ ọ̀ sụa tẹ ọ̀ kẹ ikoli ḅio suu wararị. Ò miemẹ mịẹm ori iyimbere Filipu ta Ẹrodiyasị sịḅị gotẹ.

⁴ Ori arị ọkị ọ̀ ta sọmarị sakị Minji-sara Jọnị ḍuko ọ̀ pịrịm, “Ị́ Ẹrodiyasị ma ọkị simearị mẹ kura-a!”

⁵ Ẹrọdị ḅiim ori ọ̀ ḅaa, kụma ò Juu-ḅẹ-apụ ma ḍiki-ḅalafaam, ịn Jọnị kẹ ịkịankoroḅọ ḅara ọkị wararị ẹrẹsị.

⁶ Tẹ Ẹrọdị iyi ene ḅẹ alalị nwẹnị koro, tẹ Ẹrodiyasị ada kọn wararị sẹkị nwẹnị bebe kobiri-ogbo mẹ tọrọkọ kpọma Ẹrọdị ḅioḅẹlẹma,

⁷ tẹ ọ̀ nwẹnị minini á pịrị, “À minini ị́ pịrịarị, ị́ ị̀ ḅara ḅii ye, ḅii ye à kẹ ị́ pịrị ḅa.”

⁸ Á iyingi nwẹnị á toluma tẹ á ḅii, “Mịanga, mị gbọrụ kirikiri, Minji-sara Jọnị sịḅị kẹ opu ẹfẹrẹ ḅio sụa ḅo ị̀ pịrịị.”

⁹ Miemẹ nwẹnị amadaḅọ ḅe kururuma, kụma ò ye karị ḅara kẹ minini á pịrị ḅara mẹ na, ọ̀ sịn ḅo kobiri wararị inweni-ogbo mẹ na ẹrẹsị ọ̀ tọnm mịnẹ ini á ḅii ḅara mịẹ á pịrịị.

¹⁰ Mie ḅụ ọ̀ fịrịma mu ikoli-warị mẹ ḅio Jọnị sịḅị pẹlẹ-siinm.

¹¹ Ịn nwẹnị sịḅị mẹ kẹ opu ẹfẹrẹ ḅio sụa tẹ kẹ mu ẹrẹḅọtụḅọ ma pịrị, tẹ á nwẹnị anị kẹ mu á iyingi pịrị.

¹² Tẹ Jọnị ḍukamẹnjịapụ ma mu tẹ ori oju akpakpa mẹ ọkị ḍiḅim; anịtẹso ịn nwẹnị mu paka ye mẹ ḍuko Jizọsị pịrị.

Jizọsị Fịye Kẹ Tọnwa-tọnwa Atomi Pịrị Fịm

¹³ Jizọsị ḅo Jọnị fị mẹ gbolomaye naa sakị, ori anị anga koroma som, arụ ḅio ḅụ, tẹ mu yaụ-sime wararị anga ḅụ ngẹrị simem. Tomi ma anị gbolomaye naa tẹ ịna ama ma ḅụ saakị tẹ kiri ọgọnọ ọ̀ pẹlẹma mum.

¹⁴ Jizọsị mu sọma tẹ kiri koro sịẹ tẹ opu inweni-ogbo mẹ ẹrị sakị, ịna ọkụrụkụrụ ọ̀ ḅaa tẹ ori ịna ḅụ obi apụ ma gwọm.

¹⁵ Anị ḅoḅiri anga ḅụ ò ḍukamẹnjịapụ ma Jizọsị dama-mu tẹ ḅẹẹm, “Ene gbaịn famarị, mịanga mẹ pịkị kịnị anga-a anga. Tomi ma ḅẹẹ in so, tẹ mu kala-ama ma ḅio fịye fẹẹ fị.”

¹⁶ Jizọsị nwẹnị pakịrị, “In so na-iḅi-a, ọmịnị ḅarana fịye kẹ ịn pịrị fị.”

¹⁷ In pakịrịm, “Wa nyana aị mamgba gboloma fịturu sọnọ akpo na inji maa mgbọ na kịngẹ.”

¹⁸ Jizọsị nwẹnị ḅẹẹ, “Ọkọ ḅẹḅẹ ọmịnị arị kẹ mịanga ḅo ị̀ pịrịị.”

¹⁹ Ọ̀ nwẹnị tọn tomi ma pịrị mịnẹ ini osuka mẹ ọgọnọ lẹgị-simee; anịtẹso ọ̀ nwẹnị ịna ḅara fịturu sọnọ akpo ma na inji maa mgbọ ma na daa-ọkị, tọrụ saakị so da, tẹ ịmịẹtẹ kẹ Tamụnọ ḅẹẹ. Ọ̀ nwẹnị fịturu kpo-kpo ma paịn-paịntẹ kẹ ò ḍukamẹnjịapụ ma pịrị, tẹ ini nwẹnị kẹ tomi ma pịrị.

²⁰ Ọrụḅọ-ọrụḅọ fị furo ḅinmam. Anịtẹso Jizọsị ḍukamẹnjịapụ ma nwẹnị ịn fị kọnma aị ma kolokolo oyi maa kana finji ḅinma.

²¹ Ye mẹ fị owiapụ ma kịẹn-ḅịḅị, ereme na awọmẹ na kẹ sụa kịẹn-a ḅara ḅụ, ḅo oyi maa ẹndẹ finji na oyia asi na lam.

Jizọsị Minji Ọgọnọ Mẹnjịm

²² Anịtẹso Jizọsị ò ḍukamẹnjịapụ ma ḅẹẹm ini arụ ḅụkụlọ tẹ tarị saḅa tọrụ mẹ ḅụ osi pakịrị anga muu, ori ḅaaḅaa kẹ tomi ma ḅẹẹarị ogbo.

²³ Ò tomi ma ḅẹẹ tẹ in so fama tẹso, ori nwẹnị ngẹrị iwo tụndụ mẹ ọgọnọ tẹkẹ ḅẹ mu. Ene ḅo ḅoḅiri sakị Jizọsị paa ngẹrị ò sime anga mẹ ḅụ emi;

²⁴ tẹ sakị mẹ ḅo ọkọ la sakị arụ mẹ dọkụ mu lama tẹ tọrụ mẹ ḅụ, tẹ ọnụngọ anị ḅakụ, ḅakụ ikelekelearị, erise fẹrụ kụrọma fie anị na tụḅụrụm ẹrẹsị.

²⁵ Anị ḅo tarị ọḅọkọ paan na ene finji na ogboku ḅiri la sakị Jizọsị minji mẹ ọgọnọ mẹnjị mu ò ḍukamẹnjịapụ ma la tẹ.

²⁶ Ini ori ọkọ kẹ minji mẹ ọgọnọ mẹnjịarị mẹ nwẹn ẹrị sakị, tẹmẹ gbọrụmgbọ-sọ ḅarị ịna ḅụụ ofori. Tẹ ịn nwẹnị ḅalafa ḅụ kararama-oloku tẹ ḅẹẹ, “Ḍụẹịn mie nwẹn kẹ mẹnjị ḅoarị!”

²⁷ Anị gbọrụ kiri Jizọsị ẹkwẹn ịn pịrị tẹ ḅẹẹm, “Ó ḅiokpọọ! Yẹrịị. Ọ́ ḅalafa ma!”

²⁸ Anịtẹso Pita nwẹnị ẹkwẹn pakama, “KỊNỊNYANAḄỌ, karakaraye ị́yẹrị ḅẹḅẹ, kụrọ kẹ ị̀ pịrị à minji mẹ ọgọnọ mẹnjị ị́ dama-ḅo.”

²⁹ Jizọsị nwẹnị pakịrị, “Ḅoo!” Mie ḅụ Pita arụ mẹ ḅio koro tẹ minji mẹ ọgọnọ mẹnjị Jizọsị dama-muarị ogbo,

³⁰ ọ̀ nwẹnị kụrọ fẹrụ mẹ ẹrị tẹ ḅalafa ḅẹ sakị ọ́ saakị ḅile sọ muarị. Ọ́ nwẹnị oloku, “KỊNỊNYANAḄỌ, ị̀ ḅọrọmaa!”

³¹ Anị gbọrụ kiri Jizọsị nwẹnị ọ̀ ḅara sụn pakama tẹ Pita kaịn ọkị tẹ ori ọlọ-sịẹma tẹ ḅẹẹ, “Ị́ nyana minini boowa ḅara ḍikii! Í tiegotẹ ḅio-maaịn-tọn nyana?”

³² Ini maa apụ ma nwẹnị arụ mẹ ḅụkụlọ, tẹ fẹrụ mẹ nwẹnị dein koro.

³³ Anịtẹso arụ mẹ ḅio ḅụ, Jizọsị ḍukamẹnjịapụ ma kparakị tẹ ọ̀ tẹkẹm. Ịn nwẹnị oloku pakama, “Karakara-ḅara-ḅụ ị́yẹrị anie Tamụnọ Tụḅọ ḅee!”

Jizọsị Obiapụ Gwọm Gẹnẹsarẹtị Ḅụ

³⁴ Ịn nwẹnị tọrụ mẹ saḅa-koro ḅo Gẹnẹsarẹtị ama ḅẹ kiri ḅụ sọma,

³⁵ tẹ anịanga ḅẹ atomi ma Jizọsị lekirim. Mie ḅụ ịn nwẹnị ḅịḅị kẹ obiapụ tẹ anị ama iri mẹmgba ḅụ sime apụ fịrịma, tẹ ini ọkị-ḅo Jizọsị pịrị.

³⁶ Tẹ ịn nwẹnị ọ̀ ḅara ḅii mịnẹ jen-a jen-a sọ, ọ̀ paa ḍụkụ tẹ obi apụ ma ḅara kẹ ọ̀ kapa suku ngẹrị sọ lama; ọkọ kẹ ḅara mẹ kẹ anị lama apụ mamgba ini oju iḅim.