Matiyo 13 - FỊAFỊA BAỊBỤLỤ

Jizọsị Ye-ḍiḅiḅọ Egberi Gbaam

¹ Anị gbọrụ ene mẹ ḅụ, Jizọsị ye-toluma ḅẹ tẹ warị ḅio mẹnjị paka mu tọrụ akaka ḅụ lẹgị-simem.

² Ḅo ò gbori-ikelema inweni-ogbo mẹ ḅaka ḅara ẹrẹsị ọ̀ nwẹnị arụ ḅụkụlọ tẹ anị ḅio lẹgị-sime, tẹ inweni-ogbo mẹ tọrụ akaka mẹ ḅụ sịẹsimem.

³ Egberi mie ọ̀ gbaa-gbaa tẹ tọnwa aị kẹ in toluma ye. Ori mẹẹ, “Gbọrụ sakị gbọrụḅọ mbịaka ḍiḅi ḅẹ tẹ paka mum.

⁴ Ịna ama ịn mịẹ-mịẹ ḅara ḅụ, ọ̀ nwẹnị mbịaka mgbọlị ma kẹ wakị-wakị sara wasama ḍụọ mẹ ḅio, tẹ arịḅẹ jaị nwẹnị kịnị mẹnjị-ḅọrọarị anga koro, tẹ feni amẹẹ nwẹnị arị gbọn-fị fama.

⁵ Arịḅẹ jaị pịkị ịkụ kiri ọgọnọ korom, anie lọkọ kiri boowa anga. Ḍiḅi aị ma nwẹnị sarama puu paka ḅo, lọkọ kiri mẹ pokolo sọ mu-a ẹrẹsị.

⁶ Kụma ịrụa paka tẹso, anị ịwọma pakarị mbịaka asịn ma fọị ḅaam; anị gotẹ ọkọ paka ye kuno ma iḅiọkụ kiri sọ-mu-a, tẹ so-pakatẹ aị ma nwẹnị kpatụ fama.

⁷ Ọ̀ kẹ wakị sara wasama mgbọlị ma ḅẹ jaị nangị asịn simearị kiri ḅụ korom, tẹ ḍiḅi aị ma paka ḅoarị kụma nangị ma nwẹnị arị temi ḅaa sịn.

⁸ Kụma mgbọlị ma ḅẹ jaị iḅi kiri korom, tẹ arị nwẹnị so-paka tẹ mbịaka sụa; jaị sọnọa si, sọnọa si sụam, osi-aị tesi-tesi, osi-aị pịkị suei-suei.”

⁹ Tẹ Jizọsị ẹkwẹn gbaịn tẹ ḅẹẹm, “Ọkọẹrẹsị, ọ́ naa ḅẹ-ḅiiarị ḅẹḅẹ ó pokii!”

Jizọsị Gotẹ Egberi Gbaarị Ye

¹⁰ Anịtẹso Jizọsị Ḍukamẹnjịapụ ma nwẹnị ọ̀ dama-ḅo tẹ ò gbela, “Tiye ẹrẹsị ị́ egberi egberi kẹ ẹkwẹn tomi ma pịrịarị?”

¹¹ Jizọsị nwẹnị pakịrị, “Tamụnọ Ama-da mẹ ḅẹ ḅọị aị ma nimi mẹ ịn kẹ ọ́ pịrị tẹ, kụma ini ịn kẹ ịn pịrị-a.

¹² Kẹ gotẹ ọkọ ḅẹẹarị, ye nyana ḅọ mẹ mie ịn ye kẹ pịrịarị, mịẹtẹ mḅọ nyana wama ḅẹ ḅara; kụma gberie-sọ nyana-a ḅọ mẹ mḅọ ọlọ wararị kalịye mẹ sọ mḅọ ḅara ini anị ọkị ḅa.

¹³ À gotẹ egberi egberi kẹ ẹkwẹn ịn pịrịarị ye anie mie, mịnẹ in ḍikiarị, kụma ini ẹrị-a, tẹ in pokiarị kụma ịn naa-a, anịanịa ini ịna ḅeri ọgọnọ ḅụ naarị ye mẹ fiearị ye in nimi-a.”

¹⁴ Mie ḅụ, Ayịzaya koro ịkịan mẹ ịna ḅụụ paka tẹ: “Mịna atomi ma in poki-poki-poki ḅa, kụma anị fiearị ye ịn naa ḅịa; in ḍiki-ḍiki-ḍiki ḅa, kụma ini ẹrị ḅịa;

¹⁵ ịna akuroma sarasara-a ẹrẹsị, ịn pịkị ịna aḅeri suke pụnma tẹ, pịkị ịna atọrụngbọ gbaịn tẹ. Ọkọ-a kụma ịna atọrụngbọ ma ḅofa ye ẹrị, ịna aḅeri ma ḅofa ye naa, ịna akuroma ma ḅofa ye fiearị ye nimi, tẹ in ḅofa pịkịma ị̀ dama-ḅo, anie Tamụnọ ḅẹẹarị ḅara, tẹ arị ịn gwọ.”

¹⁶ “Ọmịnị ma kụma, ọ́ kpọma iḅi fụḅara sụam! Ọmịna atọrụngbọ ma ye ẹrịarị, ọmịna aḅeri ma pịkị ye naarị.

¹⁷ À mịẹtẹ ó nimiarị mịnẹ tọnwa ịkịankoroapụ na, tọnwa Tamụnọ atomi na ḅii lamam ini ọmịnị ma ẹrịarị aị ma ẹrị, kụma ini ẹrị-a som; tẹ pịkị ọ́ naarị aị ma naa, kụma ịn naa-a som.

Jizọsị Ye-ḍiḅiḅọ Egberi Mẹ Puu-finjim

¹⁸ “Ó pokii, tẹ ye-ḍiḅiḅọ egberi mẹ fiearị ye ḍawọọ.

¹⁹ Ini tẹ Tamụnọ ama-da tẹ ḅẹrẹtọn-arị mẹ ḅẹ oku mẹ naa tẹ anị fiearị ye nimi-a apụ ma anie mẹnjị-ḅọrọ-anga sara mgbọlị ma. Ekwesu ḅe ḅo tẹ ḍiḅi aị ma nụnụ sin-arị.

²⁰ Ịkụ kiri ḅụ koro aị ma anie, ịn naa gbọrụ kiri ḅioḅẹlẹ ḅara kẹ oku mẹ daa-ọkị apụ.

²¹ Kụma anị ịna ḅụụ ḅio sọ ḍiḅi-a ẹrẹsị in sime ene la-a. Mie ḅụ, ḅụụ-fụka ḅo, anịanịa tomi oku mẹ gotẹ ḅaa-ḅọkọ kẹ ịn ḍọkị gbọrụ sakị ini anị ḅụ ḅara sin tẹ.

²² Nangị asịn ogboku koro mgbọlị ma fiearị ye anie, ini tẹ oku mẹ naa apụ, kụma mị ḍumo mẹ ḅẹ ḅụụ-ḅalaḅala na ngọ ḅẹlẹma na oku mẹ temi ḅaa sin tẹ ịn ḅarị mgbọlụ sụaa.

²³ Anịsakị iḅi kiri koro mgbọlị ma anie oku mẹ naa tẹ anị fie ye nimi apụ; ini ma ini mgbọlụ sụarị, ja apụ sụa mu sọnọa si laarị, osi apụ tesi, osi apụ pịkị suei.”

Jizọsị Ḍụọ Ḅio So-pakarị Asịra Egberi Gbaam

²⁴ Jizọsị pịkị jen egberi gbaa ịn pịrịm. Ori mẹẹ: Tamụnọ Ama-da sakị mẹ mie anị kịkarị ye. Gbọrụḅọ iḅi asịn mgbọlị kẹ ọ̀ ḍụọ ḅio ḍiḅim.

²⁵ Gbọrụ ḍin, ọrụḅọ-ọrụḅọ monoarị ogbo, si kẹ ọ̀ tọn ḅọ nwẹnị mu asịra kẹ ḍụọ mẹ ḅio mbịaka ma, tẹ ori ḍiḅi tẹ aị ma ogboku ḍiḅi, tẹ mẹnjị so.

²⁶ Iḅi aị ma so-paka tẹ saakị mbịaka sụa sakị, osuka asịra ma sọ tolu-paka-ḅo tẹ.

²⁷ Tomḅọ ḅe fịrịmẹnjịapụ nwẹnị ọ̀ dama-ḅo tẹ ḅẹẹ, “Wa nyanaḅọ, iḅi mgbọlị mie ị́ kọkọ kẹ ị́ ḍụọ mẹ ḅio ḍiḅi ye, osuka asịra ma tọ-anga ḅo?”

²⁸ Ọ̀ nwẹnị pakịrị, “Iḅi kẹ ị̀ tọn-a tomḅọ mie, miemẹ mịẹ wararị.” Ịn nwẹnị ò gbela, “Í ḅii wa mu osuka asịra ma nụnụ siin?”

²⁹ Ọ̀ nwẹnị pakịrị, “Ẹn-ẹn, ọmịnị osuka asịra ma nụnụ sin-arị ogbo ó ḅofa asịra mbịaka ma sọ kẹ sụa soku sin.

³⁰ Yee mbịaka ma na, osuka asịra ma na gbọrụ ḅụ kẹ so-paka, nwenii tẹ ḍiḅi aị ma soku sakị la. Anị sakị ḅụ à ḍuko fịye soku kọrịnama kọrị apụ ma pịrị tẹ ịn tarị asịra ma nụnụ sin tẹ, kẹ poku, poku fịna tẹ dọkịma ḅa, anịtẹrẹmẹ ini mbịaka ma kobiri mu ị̀ fịaị koko warị ḅio suu wẹrị ḅa.”

Jizọsị Mọsịtadị Nwẹn-sịn Sịnmgbọlị Egberi Gbaam

³¹ Jizọsị pịkị jen egberi gbaa ịn pịrịm. Ori mẹẹ, “Tamụnọ Ama-da sakị mẹ mie anị kịkarị ye. Gbọrụḅọ nwẹnị ịn kẹ mọsịtadị sịn-arị sịn mgbọlị ọkị tẹ kẹ amịna ḍụọ ḅio ḍiḅi.

³² Anị ḅẹ mgbọlị mẹ ịrụ tẹịnm ḍụọ mẹ ḅio simearị kala asịn mamgba ḅẹ mgbọlị ma ḅụ, kụma anị so-paka sakị anị ḅo gburo-gburo tẹịn sịn sọ tẹ feni amẹẹ ma ḅo anị aḅara ọgọnọ ịna awarị nama mẹ.”

Jizọsị Fịturu Sunmaye Egberi Gbaam

³³ Jizọsị paa pịkị jen egberi gbaa ịn pịrịm. Ori mẹẹ, “Tamụnọ Ama-da sakị mẹ anị kịkarị ye anie mie. Gbọrụ ẹrẹḅọ fịturu sunmaye ọkị tẹ kẹ à kẹ fịturu mịẹ ḅẹ fịlawa opu kpoo ḅio suu wẹrịtẹ anị nwẹnị bebe kpoo mẹ sunma tenderema.”

Jizọsị Egberi Ma Kẹ Mịẹ Ye

³⁴ Egberi egberi mie Jizọsị kẹ ẹkwẹn tomina-ogbo ma pịrị ye; egberi ḅụ sikima tẹ ò giregire ḅara kẹ gberie-sọ ḍuko ịn pịrị-a.

³⁵ Ò gotẹ miemẹ mịẹ ye, kẹ mịẹtẹ ịkịankoroḅọ ḅe ḍuko ḅọrọma tẹ ye mẹ paka tẹ ye sọ ḅẹ ḅara, “Arị ẹkwẹn ịn pịrị ḅarị sakị, arị egberi gbaa ḅa; à ḍuko ḅarị aị ma tomikiri bịan tẹmẹ kụra-ḅio kịnị amụ nimi-a aị.”

Jizọsị Ḍụọ Ḅio So-paka Asịra Egberi Mẹ Puu-finjim

³⁶ Jizọsị tomina-ogbo mẹ koroma so tẹ warị sọ tẹso, ò ḍukamẹnjịapụ ma ḅo ọ̀ ḅẹẹm, “Ye ḍiḅi wararị ḍụọ ḅio so-paka osuka asịra ma egberi mẹ puu-finji wa pịrịị.”

³⁷ Jizọsị nwẹnị pakịrị, “Iḅi mgbọlị mẹ ḍiḅi ḅọ ḅe anie Tomḅọ Tụḅọ ḅee;

³⁸ tomikiri mẹ anie ḍụọ mẹ; iḅi mgbọlị mẹ anie Ama-da mẹ suku-ḅio emi tẹ ọ̀ ḅẹrẹtọn pịrịarị apụ ma; asịra ma anie sime Ekwesu ḅe pịrị apụ ma;

³⁹ anịsakị si kẹ ḍụọ mẹ nyanaḅọ ḅe tọn tẹ asịra ma kẹ mu ḍiḅi ḅọ ḅe anie Ekwesu ḅee. Ḍiḅi ye soku sakị mẹ anie tomikiri mẹ ḅẹ kunoma mẹ, tẹ ḍiḅi aị soku fịrịmẹnjịapụ ma anie enjẹlị apụ.

⁴⁰ Ini osuka asịra ma kobiri mu fịnị ḅio suu dọkịma gbọrụ ḅara mẹ mie anị pịkị mịẹ ḅarị ḅara tomikiri mẹ ḅẹ kunoma ḅụ;

⁴¹ Tomḅọ Tụḅọ ḅe ori enjẹlị apụ fịrịma pakama mu ori Ama mẹ ḅio sime tẹ ja apụ mịẹtẹ in si mịẹarị apụ mamgba na, osi-apụ mamgba tẹ si amịẹaị mịẹarị apụ ma na kobiri,

⁴² tẹ ịn kẹ biin-biin-a fịnị ḅio gbin suu tẹ ini anịanga owu-owu tẹ ịna aka farị ḅa.

⁴³ Anịtẹrẹmẹ Tamụnọ atomi ma ịna Ḍaḅọ ḅe ama mẹ ḅio sime tẹ ịrụa ḅịya ḅara ḅịya ḅa. Ọkọẹrẹsị, ọ́ naa ḅii, ḅii ó pokii!

Jizọsị Ḅọị Wararị Ngọ Egberi Gbaam

⁴⁴ “Tamụnọ Ama-da sakị mẹ mie anị kịkarị ye. Gbọrụḅọ piri-ḅio ḅọị wararị ngọ biinm. Ọ̀ nwẹnị siin anị gbaịn wẹrị, tẹ ḅioḅẹlẹma so mu ọ̀ nyana-ye nyana-ye dẹrị tẹ kẹ pịkịma mu anị piri mẹ fẹẹ ọkị.

Jizọsị Pahalị Nwẹn-sịn Yela Ḍụḅarị Egberi Gbaam

⁴⁵ “Ọ́ pịkị pokii. Tamụnọ Ama-da sakị mẹ anị kịkarị ye anie gbọrụ tuḅokọnḅọ tẹ pahalị nwẹn-sịn iḅi-fịtẹ yela ḍụḅarị ḍọkịarị ọkụ.

⁴⁶ Ò mu gbọrụ iḅi-fịtẹ yela ye ẹrị tẹso, ọ̀ nwẹnị so tẹ ọ̀ nyana aị mamgba dẹrị tẹ igbigi mẹ kẹ pahalị mẹ fẹẹ.

Jizọsị Fọnọ Ịgbọ Egberi Gbaam

⁴⁷ “Ọ́ pịkị ọkịị, Tamụnọ Ama-da sakị mẹ anị miemẹ na kịkarị. Inji ḅaa apụ tọrụ paka tẹ ịna ịgbọ sara pakama tẹ anị inji ḅara-ḅara kun-arị.

⁴⁸ Ịgbọ mẹ ḅin tẹ ḅẹḅẹ ini anị fọnọ kiri ḅo tẹ lẹgị tẹ inji ma sẹlẹarị: iḅi aị ma ịn kẹ kana ḅio sụarị, tẹ si-aị ma kẹ wakị ngumarị.

⁴⁹ Mie anị sime ḅarị ḅara tomikiri mẹ kunoma ḅụ: enjẹlị apụ ma paka mu tẹ si-mịẹapụ ma sẹlẹ sikima kobirima ḅa, iḅi-apụ ma ogboku,

⁵⁰ tẹ ịn kẹ biin-biin-a fịnị ḅio gbin suu ḅa, tẹ anịanga ini owu-owu tẹ ịna aka farị ḅa.”

Ịwọ Karakara Aị Na Elemu Aị Na

⁵¹ Jizọsị nwẹnị ịn gbela, “Mịna aị ma fiearị aị ó nimi tẹ?” Ịn nwẹnị pakịrị, “Wa nimi tẹẹ.”

⁵² Mie ḅụ ori nwẹnị pakịrị, “Ọkọ ḅẹḅẹ, miemẹ fiearị mịnẹ Oloko Tolumaḅọ, tẹ Tamụnọ Ama-da mẹ ḅẹ gbọrụḅọ sọ ḅọ, mḅọ gbala warị nyanaḅọ tẹ amịna ngọ-koko-ḅio ḅụ ịwọ ngọ na elemu ngọ na ḅụ ye pakama-pakama-ḅoarị ḅọ kịka tẹẹ.”

Ịn Nazarẹtị Ḅụ Jizọsị Sịkịm

⁵³ Jizọsị mịna egberi ma gbaa tomi ma pịrị fama tẹso, ori anịjụ koroma so,

⁵⁴ tẹ pịkị-so ori ama mum. Ori ama mẹ ḅụ ọ̀ nwẹnị ịna ama-warị ḅio ye-toluma, tẹ ò toluma ye naa apụ nwẹnị ḅụụ-bua. Ịn nwẹnị gbela, “Ọ̀ ḅọrọ tọ-anga nwẹn sime ye-nimi nyana ḅo? Ndẹẹ ori inetẹ ọ̀ mịẹarị ḅụụ-buama-aị ma mịẹarị ḅara?

⁵⁵ Ḅie akanịḅọ ḅe tụḅọ ḅe ori-a? Ò iyingi Meri nwẹn-sịn ẹrẹḅọ ma árị-a? Anịsakị Jemusị na Josẹfụ na, Sayịmọnị na, Judasị na, anie ori owiapụ-amịnapụ ma-a?

⁵⁶ Ori eremịna mịnapụ mamgba mị ama wamịnị na angarị apụ ma inia? Ò mu mie mẹmgba nyana ḅo anga tọ-anga?”

⁵⁷ Tẹ ịn nwẹnị miemẹ gotẹ ọ̀ sịkị. Jizọsị nwẹnị ịn ḅẹẹ, “Ịkịankoroḅọ kụn nyana nyana-a gbọrụ anga sọ ofori, ọ̀ paka ama na, ò furo-ḅẹ-apụ ogboku na sikima tẹ.”

⁵⁸ Ịn minini nyana-a ẹrẹsị ọ̀ tọnwa ḅụụ-buama-aị mịẹ-a anịanga.