Matiyo 12 - FỊAFỊA BAỊBỤLỤ

Ịnyọsara-Ene Mẹ Gbolomaye Mẹ

¹ Ḍuko ḅọrọtẹ aị ma ḍuko tẹ amụ ala-a ogbo, Jizọsị Ịnyọsara-Ene mẹ ḅụ mbịaka aḍụọ ogboku tolu-ḅọrọ ò muarị anga muarị ogbo, ò ḍukamẹnjịapụ ma nwẹnị mbịaka anyịma-anyịma tẹ pịnị tẹ ẹsịma fị, ḅuru ịn tarịm ẹrẹsị.

² Farịsiiapụ ma ini ọkọ mịẹ ye mẹ ẹrị tẹ Jizọsị ḅẹẹm, “Í ḍukamẹnjịapụ mịẹarị ye ḍiki; ini Ịnyọsara-Ene mẹ ḅẹ Oloko mẹ kan-arị!”

³ Jizọsị nwẹnị pakịrị, “Jene ḅuru Devidi na ori atomi na tarị tẹ ịn mịẹ ye gbolomaye Fịafịa Ḍiri mẹ ḅio amụ ó go-a?

⁴ Ọ̀ Tamụnọ-warị mẹ ḅio sọ-mum, tẹ ori na ori atomi ma na ịn kẹ agba mịẹ Tamụnọ pịrị tẹ kẹ Tamụnọ-warị ḅio dẹbịlẹ ọgọnọ gbana wẹrị fịturu mẹ ọkị fịm, anie karakaraye, Oloko mẹ ḅẹẹ ḅara ḅụ, gbọrụḅọ-sọ fị-fịa fịturu mẹ, agbamịẹapụ ma sikima.

⁵ Anịanịa jene amụ ó go-a, Mozizi Oloko mẹ ḅio, mịnẹ Ịnyọsara-Ene goyegoye agbamịẹapụ ma Tamụnọ-warị ḅio mẹ ḅụ sime tẹ Ịnyọsara-Ene mẹ kan-arị, tẹ oloko ini ọlọ-a ḅara mẹ?

⁶ À ḍuko ọ́ pịrịarị mịnẹ mịanga simearị ye ḍụḅa Tamụnọ-warị mẹ nẹngịm.

⁷ Fịafịa Ḍiri mẹ ḅẹẹm, ‘Tomi na iḅi anga kọn mie à ḅiiarị, nama kẹ mịẹ agba-a.’ Ọ́ nwẹnị miemẹ fiearị ye nimim namịna ọ́ ḅẹrẹ-ḅarasii pẹlẹ mịẹye-ofori apụ pịrị-a so tẹ;

⁸ kẹ gotẹ ọkọ ḅẹẹarị, Tomḅọ Tụḅọ ḅe anie Ịnyọsara-Ene mẹ Nyanaḅọ!”

Jizọsị Gbọrụ Ḅara Fịtẹ Tomḅọ Gwọm

⁹ Jizọsị anịanga so sakị ọ̀ gbọrụ ama-warị mum,

¹⁰ tẹ anịanga ḅụ gbọrụ ḅara fịtẹ tomḅọ simem. Anịanga sime atomi ma ḅẹ ja apụ ḅiim in Jizọsị mịẹ irima ḅẹ ye ẹrị tẹ ḅẹrẹ kẹ ọ̀ sịḅị sẹịn, mie ḅụ ịn nwẹnị ò gbela, “Ịnyọsara-Ene mẹ ḅụ obiḅọ gwọ mẹ wamịna Oloko na tụḅụrụ?”

¹¹ Jizọsị nwẹnị pakịrị, “Ọmịnị ọmịna ḅụụ kẹ tọnmaa. Ọmịna ḅụ gbọrụḅọ anana ḅịkị olulu ḅio koro kụma Ịnyọsara-Ene mẹ ḅụ, mḅọ tuuideri tẹ ọ̀ nụnụ pakama-ḅo ḅịa?

¹² Anịsakị tomḅọ yela anana nẹngị ḅara ḅaka wararị! Miemẹ ẹrẹsị wamịna Oloko mẹ minini wa pịrị wararị mịnẹ wa ḅarasụa kịnị pịrịị Ịnyọsara-Ene mẹ ḅụ.”

¹³ Anịtẹso ọ̀ nwẹnị gbọrụ ḅara fịtẹ ḅọ ḅe ḅẹẹ, “Ị́ ḅara mẹ sụn-pakamaa.” Ọ̀ nwẹnị anị sụn-pakama, tẹ anị nwẹnị iḅi tẹ osi ye sime-ḅara sime.

¹⁴ Anịtẹso Farịsiiapụ ma nwẹnị so tẹ Jizọsị ḅaa ḅẹ ḅẹrẹ-ḅiya.

Tamụnọ Sẹlẹ-ọkị Tẹ Fịrịmẹnjịḅọ

¹⁵ Jizọsị tomi ma ọ́ ḅaa ḅẹ ḅẹrẹ-ḅiya ye mẹ nimi tẹso, ọ̀ nwẹnị anịanga ḅụ so. Tẹ opu tomina-ogbo ò ḍuka mu tẹ ori ịna ḅụụ obiapụ mamgba gwọm,

¹⁶ tẹ ḍuko ịn pịrị kụrọmam mịnẹ ini ọ̀ sịḅị kẹ ama sịn ma.

¹⁷ Ò gotẹ mị-ḅara mịẹ ye, Tamụnọ ịkịankoro Ayịzaya ḅụ ḅọrọ tẹ ḍuko ye mẹ paka tẹ ye sọ ḅẹ ḅara:

¹⁸ “Ḅie ị̀ fịrịmẹnjịḅọ tẹ yẹrị ḅarana sẹlẹ-ọkị ḅọ ḅee, arị ọ̀ ḅẹlẹmarị, ọ̀ mịẹye pịkị ị̀ ḅụụ-ḅẹlẹarị. Arị ị̀ Tẹmẹ ḅe fịrịma mu ori ọgọnọ gbana ḅa, tẹ ọ̀ nwẹnị ị̀ ḅẹrẹkọn mẹ ḍuko wasama tomikiri ḅẹ asịẹ ma pịrị ḅa.

¹⁹ Ọ̀ kịnị na ye-nụnụa ma-ḅọrọ ḅịa, ọ̀ pịkị oloku ḅịa; etela-ogbo ma ḅụ sọ ori oloku-oloku ẹkwẹn ḅịa.

²⁰ Ori ịnyọ nyana-a apụ ma na lọkọma lọkọma mịẹ ḅa, tẹ ọ̀ pịkị iḅi-anga kẹ ḅarasụa pịrị apụ nyana-a apụ ma na kọn ḅa. Anị ḅara mie ọ̀ mịẹ nwenii jụmọ-jụmọ inoma kunoma ḅarịye,

²¹ anịsakị tomikiri ḅẹ atomi mamgba ọ̀ kẹ ḅiokpọma ḅa.”

Jizọsị Na Bẹlịzibulu Na

²² Anịtẹso kịnị nwẹnị tọrụngbọ-pụụntẹ, oru sịḅị ḅio emi ẹrẹsị inetẹ ẹkwẹn-a ḅọ, kẹ ḅo Jizọsị pịrị. Jizọsị tomḅọ ḅe gwọọtẹ ori inetẹ ẹkwẹn tẹ pịkị ye ẹrịm.

²³ Tomina-ogbo-ogbo mamgba Jizọsị kọrị ye mẹ ẹrị tẹ ḅụụ-buam. Ịn nwẹnị gbela, “Ḅieḅe inetẹ Devidi Tụḅọ ḅe sọ ḅịa aro?”

²⁴ Farịsiiapụ ma nwẹnị tomi ma pakịrị, “Bẹlịzibulu, oru ma sịḅịdaḅọ ḅe kẹ ọ̀ pịrị kụrọ mie ọ̀ kẹ mị-ḅara kẹ oru ma dee-dee pakamarị ye.”

²⁵ Jizọsị nwẹnị in kuroma sime ye mẹ nimi tẹ ịn ḅẹẹ, “Sịẹ tẹ amịna ḅụụ kẹ pakịrị, pakịrị puu tẹ ama owu sọarị sịẹ ala ḅịa anị ḅịkị ḅa. Tẹ gbọrụ ama, anịanịa warị nwẹnị pakịrị, pakịrị puu tẹ owu sọarị ḅẹḅẹ, anị kaan-sara ḅa.

²⁶ Mie ḅụ, Ekwesu daarị ama ḅụ gbọrụ pakịrị ḅẹ apụ osi apụ na owu sọarị ḅẹḅẹ, miemẹ fiearị mịnẹ anị pakịrị, pakịrị puu tẹ, ala-a anị kaan-sara ḅa.

²⁷ Ọmịnị mẹẹ Bẹlịzibulu mie kụrọ kẹ ị̀ pịrị tẹ à kẹ oru dee, dee pakamarị. Iḅim, ọkọ kụma tụḅọ ḅọrọ kụrọ kẹ ò ḍukamẹnjịarị apụ ma pịrị tẹ ịn kẹ si-atẹmẹ dee, dee pakamarị? Ó ḍukamẹnjịapụ ma ḅarana ó ḍukoarị ye mẹ papaa ye ḅara mẹ ḍie-pakama tẹ!

²⁸ Gbala-gbala, Bẹlịzibulu-a, kụma Tamụnọ Tẹmẹ ḅee, ori mie kụrọ kẹ ị̀ pịrị tẹ à kẹ oru dee, dee pakamarị, tẹ miemẹ ḍukoarị mịnẹ Tamụnọ Ama-da mẹ ḅo ọ́ la kụra-ḅio iḅerea.

²⁹ “Gbọrụḅọ-sọ inetẹ kụrọḅọ warị kan sọ-mu tẹ ori aị dogi-so ḅịa, mḅọ tarị kụrọḅọ ḅe fịna koroma sikima; mḅọ ọkọ mịẹ rẹ mie mḅọ inetẹ kụrọḅọ ḅe warị fọịn ḅarịye.

³⁰ “Tomḅọ nwẹnị ị̀ jụ ofori ḅẹḅẹ anị ḅọ mẹ anie karakaramatẹ ị̀ na tụḅụrụ wararị ḅọ mẹ; tomḅọ nwẹnị ḅarasụa ị̀ pịrị tẹ ye kobiri-a ḅẹḅẹ anị ḅọ mẹ anie karakaramatẹ à kobiri tẹ aị ma gala-galamarị ḅọ mẹ.

³¹ Ọkọẹrẹsị à ḍuko ọ́ pịrịarị, tomi mịẹ si, mịẹ si na, ịn kọn si ẹkwẹn, si ẹkwẹn na ịn wẹrịso ịn pịrị ḅa, kụma ḅẹḅọ-ḅẹḅọ tẹ si-aị ḍuko Fịafịa Tẹmẹ ḅe ọgọnọ gbana ḅọ, gbana ḅọ si-wẹrịso pịrị nyana ḅịa.

³² Tomḅọ nwẹnị ye ḍuko Tomḅọ Tụḅọ ḅe ọgọnọ gbana kụma ịn wẹrịso mḅọ pịrị ḅa; kụma ḅẹḅọ-ḅẹḅọ tẹ ye ḍuko Fịafịa Tẹmẹ ḅe ọgọnọ gbana ḅọ, gbana ḅọ mḅọ inetẹ si-wẹrịso pịrị nyana ḅịa mịọkụ-o, ḅẹẹ-sakị ḅẹẹ-sakị-o.

Sịn Na Anị Ḅẹ Mgbọlụ Na

³³ “Í iḅi sịnmgbọlụ nyana ḅẹ-ḅiiarị ḅẹḅẹ, iḅi sịn ḍiḅi; í si sịn ḍiḅi ḅẹḅẹ, si sịnmgbọlụ mie ị́ nyana ḅarịye. Sịn sụarị mgbọlụ ḅụ mie tomi ḅọrọ tẹ anị lekiriarị ye.

³⁴ Ọmịnị ododo amẹẹ — ọmịnị si-mịẹapụ sakị ndẹẹ ọmịnị inetẹ iḅi aị ḍuko ḅẹ ḅara? Kẹ gotẹ ọkọ ḅẹẹarị, ḅioḅẹngbọ mẹ ḅụ ḅin wararị aị ma anie ḅịḅị mẹ ḍuko pakamarị.

³⁵ Iḅi tomḅọ mḅọ ḅioḅẹngbọ koko wararị iḅi aị ma pakama-ḅoarị; si tomḅọ pịkị mḅọ ḅioḅẹngbọ koko wararị si-aị ma pakama-ḅoarị.

³⁶ “Ọmịnị inetẹ nimi ḅa mịnẹ Ḅẹrẹkọn Ene ḅụ ọrụḅọ-ọrụḅọ mḅọ gotẹ mḅọ kọn sara papaa ẹkwẹn ma kọn ye ḍuko ḅa.

³⁷ Ị́ kọn ẹkwẹn ma ḅụ mie ịn ḅọrọ tẹ ị́ kọn tẹ ḅẹrẹ ị́ ḅara iḅim, anịanịa ḅẹrẹ ị́ ḅara siinm pẹlẹ ị́ pịrị ḅarịye.”

In Jizọsị Ḅara Ḅụụ-buamaye Ḅiim

³⁸ Anịtẹso Oloko Tolumapụ ma na Farịsiiapụ ma na ḅẹ ja apụ nwẹnị ẹkwẹn pakama tẹ ḅẹẹ, “Ye-tolumaḅọ, wa ḅiiarị ị́ ḅụụ-buamaye mịẹ wa ḍie.”

³⁹ Jizọsị nwẹnị oloku pakama tẹ ḅẹẹ, “Ọmịnị mị sakị mẹ ḅẹ atomi ma kịngẹ kụma, ọmịnị papaa, lala-si atomi ḅara ḍikii! Ọ́ ḅụụ-buamaye ẹrị ḅẹ-ḅiiarị? Ọkọsime ye ọ́ nyana ḅịa. Ịn kẹ ọ́ pịrị ḅarịye anie ịkịankoro Jona ḅụụ-buamaye mẹ ngẹrị.

⁴⁰ Jona tẹra eneḅaka na tẹra aḍin na kẹ opu inji furo ḅio sime gbọrụ ḅara mẹ mie Tomḅọ Tụḅọ ḅe sọ tẹra eneḅaka na tẹra aḍin na kẹ kiri suku-ḅio jụ ḅụ sime ḅarị ḅara.

⁴¹ Ḅẹrẹkọn Ene ḅụ Ninive ḅẹ apụ saakị tẹ ḅẹrẹ kẹ ọmịna sịḅị sẹịn ḅa, anị gotẹ ọkọ mịẹ ḅarịye, ini ma ini ịna si ḅụ pịkịm Jona Tamụnọ ẹkwẹn kọn tẹ ịn naa sakị; tẹ à ḍuko ọ́ pịrịarị mịnẹ ḍụḅa Jona nẹngị ye mịanga emi!

⁴² Ḅẹrẹkọn Ene ḅụ Sẹba ḅẹ Ama-da ẹrẹḅọ ma saakị tẹ ḅẹrẹ ḍuko ọmịna sịḅị sẹịn ḅa, anị gotẹ ọkọ mịẹ ḅarịye árị ma amịna ama jụ ḅio sime tẹ Ama-da Sọlọmọnị ye-nimi tolumaye mẹ poki ḅẹ tẹ saakị ḅom. Ó nimii mịnẹ mịanga ḍụḅa Sọlọmọnị nẹngị ye emi.

Si Tẹmẹ Ḅe Pịkịma-ḅo Mẹ

⁴³ “Si tẹmẹ tomḅọ ḅio sime tẹ paka so sakị ọ̀ mịẹarị ye anie, mẹnjị kpongbo-akiri ma ikelema tẹ sọ tẹ sime tẹ ịnyọ sara ḅẹ anga ḍọkị. Ori inetẹ gbọrụ anga sọ ẹrị-a kụma,

⁴⁴ ori ọ̀ ḅụụ ḅẹẹarị, ‘À pịkịma à sime tẹ so ị̀ warị mẹ mu ḅa.’ Mie ḅụ ó mu tẹ warị mẹ ẹrịm mịnẹ kịnị anị ḅio ofori, tẹ anị pịkị ọfịn fịafịa tẹ kpaịn wararị ḅẹḅẹ,

⁴⁵ ọ̀ paka mu tẹ ja sii ọ̀ nẹngị sọnọma atẹmẹ ọkị amịna ḅụụ sụa tẹ ḅo anịjụ anga ḅa. Tẹ anị ọkọ sime fama tẹ ḅẹḅẹ, si-atẹmẹ ma ḅụụ ḅio sọ-mu tẹ tomḅọ ḅe sime-ḅara ḅo sii tarị ò sime-ḅara nẹngị tẹẹ. Mie anị paka mị sakị mẹ ḅẹ si-mịẹapụ ma pịrị ḅarị ḅara.”

Jizọsị Iyingi Na Ori Amịnapụ Owiapụ Na Ori Ẹrị Ḅẹ Ḅiim

⁴⁶ Jizọsị paa ẹkwẹn tomi ma pịrịarị ogbo ò iyingi na ori amịnapụ owiapụ na ḅo lam. Ịn nwẹnị etela anga sịẹ tẹ ori na ẹkwẹn ḅẹ ḅii.

⁴⁷ Mie ḅụ, anịjụ sime atomi ma ḅẹ gbọrụḅọ nwẹnị ọ̀ ḅẹẹ, “Ḍikii, í iyingi na ị́ amịnapụ owiapụ na etela anga ḅụ sịẹsime tẹ ị́ na ẹkwẹn ḅẹ-ḅiiarị.”

⁴⁸ Jizọsị nwẹnị pakịrị, “Ì iyingi anie tụḅọ? Ị̀ amịnapụ owiapụ anie tọ apụ?”

⁴⁹ Anịtẹso ọ̀ nwẹnị ḅara kẹ ò ḍukamẹnjịapụ ma tụkụma tẹ ḅẹẹ, “Ḍikii! Mịanga simearị apụ ma mie ì iyingi, pịkị ị̀ amịnapụ owiapụ!

⁵⁰ Ḅẹḅọ-ḅẹḅọ tẹ ị̀ Ḍa So ḅio simearị ḅọ ḅe ḅiiarị ye mịẹarị ḅọ, anị ḅọ mẹ anie ị̀ mịnaḅọ owiḅọ, ị̀ mịnaḅọ ẹrẹḅọ, pịkị ì iyingi.”