Matiyo 10 - FỊAFỊA BAỊBỤLỤ

Jizọsị Oyi Maa Fịrịmẹnjịapụ Finji Sẹlẹm

¹ Jizọsị nwẹnị ò Ḍukamẹnjị Oyi Maa apụ Finji ma sịn kobiri, tẹ kụrọ kẹ ịn pịrị, ịn kẹ si-atẹmẹ dee-pakamaa tomina ḅụụ ḅio, pịkị kẹ ịna ḅụụ ḅio sime ḅụụ kụrọ-a na obi goyegoye na gwọọ.

² Nwẹn go ḅarị apụ ma anie oyi maa fịrịmẹnjịapụ finji ma: Tarịḅọ, Sayịmọnị (ịn kẹ Pita sịn ḅọ ḅe) na ori iyimbere Anduru na; Jemusị na ori iyimbere Jọnị na, anie Zẹbidi awọmẹ ma;

³ Filipu na Batolomiyo na; Tọmọsị na Matiyo ama-igbigi da ḅọ ḅe na; Jemusị, Alịfịyọsị tụḅọ ḅe na Tadịyọsị na;

⁴ Sayịmọnị, ama ḅẹlẹmaḅọ ḅe na Judasị Isikarịyọtị, anie tọrọkọ Jizọsị kẹ dẹrịma ḅọ ḅe na.

Oyi Maa Fịrịmẹnjịapụ Finji Ma Tamụnọ Ẹkwẹn Kọnm

⁵ Jizọsị mịna oyi maa fịrịmẹnjịapụ finji ma fịrịma pakamam, ọ̀ mị oloko mẹ sụa ịn pịrị tẹso: “Ja asịẹ ḅẹ apụ na Sameriya ḅẹ apụ na ama ma ọ́ laa ma.

⁶ Anie nakara Izirẹlị ḅẹ fatẹ anana ma mie ọ́ dama-mu ḅarịye.

⁷ Ó mu tẹ ịn ḅẹẹ, ‘Tamụnọ Ama-da mẹ ḅo kpeki tẹẹ!’

⁸ Ọmịnị obi apụ gwọọ, fịtẹ-apụ saakịma-a, sofịnị-obi kọn-arị apụ gwọọ, tẹ pịkị tomina ḅụụ ḅio oru dee-dee pakamaa. Ye gbẹẹ-a ḅara kẹ ọ́ nyana ye mẹ ọmịnị sọ gbẹẹ-ye ọkị-a ḅara kẹ anị kẹ kịnị pịrịị.

⁹ Ọmịnị igbigi kẹ akpa ḅio sụa tẹ mu ma, anị ḅọrọ golu igbigi-o, seleḅa igbigi-o, ojo igbigi-o.

¹⁰ Ó muarị sakị, ye ḅii akpa sọ ọmịnị amụ tẹ mu ma, ọ́ pịkị ḍima kapa na okuro na ọkị ma; mkpara sọ ọmịnị ọlọ ma. Kọrịnama-kọrịḅọ ḅe kẹ anga ḅẹ ye mẹ ịn kẹ ọ̀ pịrị-a so so-a.

¹¹ “Ọ́ la ama, ḅọrọ opu ama-o, kala-ama-o, ọ́ sọ ama mẹ ḅio muu, tẹ minini tẹ ọ́ da warị suu ḅẹ ḅọ ḍọkị-ẹrị tẹ mḅọ na anga, nwenii ọmịnị anị ama mẹ koroma-so sakị la.

¹² Ọ́ warị sọ tẹ ḅẹḅẹ ọ́ ḅẹẹ, ‘Dein sime ọ́ pịrịị.’

¹³ Anị warị ḅẹ apụ ma ọ́ da warị suu, suu, ọ́ karị ịn pịrị dein mẹ ini na simee; kụma ini ọ́ da warị suu-a, suu-a, ọmịna dein na ọmịnị na soo.

¹⁴ Tẹ gbọrụ warị, anịanịa ama, nwẹnị ọ́ daa-ọkịa, pịkị ọ́ kẹ mu oku mẹ poki ḍụkụ-a ḅẹḅẹ, ọmịnị anịanga mẹ koroma-soo, tẹ ó soarị sakị ọmịna aḅụọ oḅolo fọọn sọ ó gugu sara tẹrẹmẹ ó soo.

¹⁵ Ó nimi mịnẹ Tamụnọ tomikiri mẹ kọn ḅarị Ene mẹ ḅụ ori ọkụrụkụrụ nyana Sọdọmụ na, Gomora na pịrị anị ama mẹ ḅẹ atomi ma nẹngị ḅa!

In Ḅaa-Ḅọkọ Kẹ Jizọsị Minini apụ Ḍọkị Ḅa

¹⁶ “Ó pokii! À nwẹn kẹ ọ́ fịrịma pakamarị mẹ, à gbala ḅọrọ ọ́ kẹ anana kun pẹị-pẹị anama ogboku fịrịmarị ọkụ! Ọmịnị ododo aka tii tii ḅara kẹ aka tii tẹ olosịkịya ye kẹ kịnị lama lama-a ḅara mẹ simee, tẹ ye kẹ gbọrụḅọ-sọ lama ma.

¹⁷ Ọ́ ḅụụ ẹbị lama, kẹ gotẹ ọkọ ḅẹẹarị, tomi ó kun ḅẹrẹkọn mu ḅa, tẹ ama-awarị ḅio ini ó fomu ḅa.

¹⁸ Ị̀ sịḅị ẹrẹsị ini ọ́ kẹ ḅẹrẹtọn apụ na, ama-da apụ na tọrọkọ ḅo ḅa, tẹ ọmịnị Iḅi Oku mẹ ḍuko ini na Ja asịẹ ḅẹ apụ ma na pịrị ḅa.

¹⁹ Ini ọ́ kẹ ḅẹrẹkọn ḅo sakị, ọ́ ḅụụ-ḅalaḅala nyana ó ḍuko ḅẹ ye na, ọ́ kẹ anị ḍuko ḅẹ ḅara na pịrị ma; sakị mẹ la sakị ó ḍuko ḅarịye ịn kẹ ọ́ pịrị ḅa.

²⁰ Kẹ gotẹ ọkọ ḅẹẹarị, ọ́ kọọn ḅarị ẹkwẹn mẹ ọmịna ḅara-kuḅu ḅẹ ye-a, ọmịna Ḍaḅọ ḅe Tẹmẹ ḅe ḅara mie ọ́ kọọn ḅarị ẹkwẹn mẹ ḅo ḅarịye, gbala ori ọmịna ḅụ ḅọrọtẹ ẹkwẹn-arị.

²¹ “Tomi ịna amịnapụ pakama-ḅo tẹ ini ịn ḅaa ḅa, tẹ anị gbọrụ ḅara mie ḍapụ sọ kẹ ịna awọmẹ mịẹ ḅarị ḅara; awọmẹ ịna ḍapụ-na-iyingiapụ-na tụḅụrụ tẹ ẹrị ḅa mịnẹ ini ịn ḅaam.

²² Ị̀ sịḅị ẹrẹsị ḅẹḅọ-ḅẹḅọ ó ḍiki-ḅioḅu ḅa. Kụma inema nwenii mu kunoma la ḅọ mẹ ḅọrọma ḅa.

²³ In gbọrụ ama ḅụ ḅaa-ḅọkọ kẹ ọ́ ḍọkịarị ḅẹḅẹ ọ́ mangị jen ama muu. Ó nimi mịnẹ ọmịnị inetẹ Izirẹlị ḅẹ ama mamgba la tẹ ọ́ kọrị ḅẹ ye kọrị fama ḅịa ogbo Tomḅọ Tụḅọ ḅe ḅo ḅa.

²⁴ “Ye ḍawọarịḅọ mḅọ tolumarịḅọ nẹngị-a; omoniḅọ pịkị mḅọ nyanaḅọ nẹngị-a.

²⁵ Mie ḅụ, ye ḍawọarịḅọ mḅọ tolumarịḅọ kịka tẹ ḅẹḅẹ anị mḅọ na iḅi na-iḅim; tẹ anie anị pịkị omoniḅọ na sime ḅẹ ḅara, ori ọ̀ nyanaḅọ na kịka tẹ ḅẹḅẹ. Ịn nwẹnị Bẹlịzibulu kẹ warị-nyanaḅọ ḅe sịn-arị kụma, ndẹẹ in si-tẹịn ẹrẹ kẹ warị ḅẹ apụ ma sịn ḅịa ḅara?

Tomḅọ Ḍiki-ḅalafaa Na-iḅi Ḅọ

²⁶ “Ọkọẹrẹsị ó tomi gotẹ ḅalafa ma. Mịọkụ ḅụ ḅẹẹye-ḅẹẹye tẹ gbaịn wararị ye, ini anị finji ḅa, tẹ ḅọị wararị ye goyegoye pịkị paka-ḅo ogbo la tẹ tomi anị nimi ḅa.

²⁷ Yẹrị ḍin ḅụ ḍuko ọ́ pịrị ye mẹ, ọmịnị anị gbọrụ ye mẹ ḍuko tomi pịrị nyanam eneḅaka fịafịa ogbo ḅụ, tẹ jen-apụ ofori tẹ ọ́ naa ye mẹ ọmịnị anị kẹ ama olokuu.

²⁸ Oju akpakpa mẹ ngẹrị ḅaa tẹ ḅarị inetẹ tẹmẹ mẹ ḅaa ḅịa apụ ma, ọmịnị in gotẹ ḅalafa ma; anie nakara Tamụnọ mie ó mangịma ḅarị ḅọ, anie inetẹ ẹlị ḅio oju akpakpa mẹ na, tẹmẹ na ḅaa guluguluma ḅẹ ḅọ ḅe.

²⁹ Kẹ gotẹ ọkọ ḅẹẹarị, Í inetẹ gbọrụ igbigi kịngẹ kẹ nwẹẹrẹsị maa mgbọ fẹ ḅa, anịsọ ịna ḅụ gberie-sọ fiin-arị ogbo sin kiri koro ḅịa, ọmịna Ḍaḅọ ḅe ḍụkụ sikima.

³⁰ Ọmịnị kụma, ọmịna sịḅị-ḅẹ-inume ma kịngẹ sọ ọ̀ kịẹn nimi fama wararị.

³¹ Ọkọẹrẹsị, ọ́ ḅalafa ma, ọ́ kpọma ọ̀ ḅụụ yela kịẹnkịẹn-ọkụ-ofori wẹẹrẹsị gboloma nẹngịm!

Kịrayịsị Ḍuko-Pakama Na Ọ̀ Sịkị Na

³² “Ama-karakara-ogbo ḅụ ì ḍuko-pakamaḅọ, mịnẹ mḅọ sime ị̀ pịrịm nwẹn ḅẹẹ ḅọ, arị anị gbọrụ ḅara mẹ mịẹ mḅọ pịrị ḅa ị̀ Ḍa So ḅio simearị ḅọ ḅe tọrọkọ.

³³ Kụma gbọrụḅọ nwẹnị ama-karakara-ogbo ḅụ ị̀ sịkịm ḅẹḅẹ, arị mḅọ sịkị ḅa ị̀ Ḍa So ḅio simearị ḅọ ḅe tọrọkọ.

Jizọsị Ḅẹẹm Ò Dein Kẹ Ḅo-a Kụma Okologie

³⁴ “Ó kuroma ma mịnẹ à dein kẹ tomikiri mẹ pịrị ḅẹ ḅom. Ẹn-ẹn, à dein kẹ ḅo-a, kụma okologie mie à kẹ ḅo ye.

³⁵ À ḅo ye mịẹtẹ owiapụ-awọmẹ na ịna ḍapụ na tụḅụrụm; eremịna-awọmẹ na ịna iyingiapụ na tụḅụrụm; ereme na ịna diapụ iyingiapụ na tụḅụrụm,

³⁶ anịsakị, si kẹ tomḅọ tọn tẹịn apụ mḅọ warị ḅio mie ini emi ye.

³⁷ “Ḅẹḅọ-ḅẹḅọ tẹ mḅọ ḍaḅọ anịanịa mḅọ iyingiḅọ ḅẹlẹma ị̀ nẹngị ḅọ, ị̀ ḍukamẹnjị gbẹẹ-a; ḅẹḅọ-ḅẹḅọ tẹ amịna owiḅọtụḅọ, anịanịa ẹrẹḅọtụḅọ ḅẹlẹma ị̀ nẹngị ḅọ ị̀ ḍukamẹnjị gbẹẹ-a.

³⁸ Ḅẹḅọ-ḅẹḅọ tẹ amịna ẹngbẹsẹ-sịn saakị dogi tẹ à mẹnjịarị ḅara ḍiki mẹnjị-a ḅọ ị̀ ḍukamẹnjị gbẹẹ-a.

³⁹ Ḅẹḅọ-ḅẹḅọ tẹ amịna ḍumo wẹrị kpaịnma ḅụụ pịrịarị ḅọ, anị fama ḅa; kụma ḅẹḅọ-ḅẹḅọ tẹ ị̀ sịḅị ẹrẹsị amịna ḍumo famarị ḅọ anị nyana ọkị ḅa.

Ḅarasụa Tamụnọ Oku-mẹnjịḅọ Pịrị Gbẹẹ-aị

⁴⁰ “Ọ́ da warị suu ḅọ, ị̀ da warị suu tẹ, tẹ ị̀ da warị suu ḅọ pịkị ị̀ kẹ fịrịma ḅọ ḅe da warị suu tẹ.

⁴¹ Ḅẹḅọ-ḅẹḅọ tẹ, Tamụnọ kẹ oku fịrịmaḅọ ẹrẹsị tomḅọ da warị suu ḅọ mẹ, Tamụnọ oku-mẹnjịḅọ gbẹẹ-ye sime mḅọ pịrịm. Tẹ ḅẹḅọ-ḅẹḅọ tẹ tomḅọ karakara tomḅọ ẹrẹsị mḅọ da warị suu ḅọ, sime karakara tomḅọ ḅe pịrị gbẹẹ-ye sime mḅọ sọ pịrịm.

⁴² Ọmịnị inetẹ nimi na-iḅim, mịnẹ ḅẹḅọ-ḅẹḅọ tẹ oḅoku minji mọngị sụa ì ḍukamẹnjịapụ ma ḅụ iderima tẹịnḅọ pịrị ḅuu ḅọ, anị ḅọ mẹ ì ḍukamẹnjịḅọ gotẹ, piki-pikiye-ofori ḅara ḅụ mḅọ gbẹẹ-ye nyana ḅa.”