Makị 9 - FỊAFỊA BAỊBỤLỤ

¹ Tẹ ọ̀ paa ẹkwẹn tọrọkọ mu tẹ ḅẹẹm, “À ḍuko ọ́ pịrịarị, mịanga ja apụ emi tẹ fịị ḅịa nwenii ịn Tamụnọ Ama-da mẹ kụrọ ḅụ ḅọ ḅarị sakị mẹ ẹrị ḅa.”

Jizọsị Ḅụụ-ḍima Mẹ

² Sonio aḍin ḅọrọ tẹso, Jizọsị nwẹnị Pita na, Jemusị na, Jọnị na ọkị ọ̀ ḅụụ sụa tẹ tọrọkọ sụn mu gbọrụ geletẹ tụndụ kpọlị tẹ ini ngẹrị nwẹnị anịanga sime. In ḍikiarị kụma Jizọsị ḍimarị,

³ tẹ ọ̀ kapa ḅo pịna fa tẹ anị ḅẹ pịna mẹ ḅịya tomikiri ḅụ kịnị inetẹ sịkịrị ḅịyama ḅẹ aị nẹngịtẹ.

⁴ Anịtẹso Jizọsị ḍukamẹnjị tẹra apụ ma nwẹnị Ịlayịja na, Mozizi na ẹrị in Jizọsị na ẹkwẹn-arị.

⁵ Pita nwẹnị ẹkwẹn pakama tẹ Jizọsị ḅẹẹ, “Ye-tolumaḅọ, bebure wa mịanga emi! Wa tẹra warị nama ḅa, gberie í nye, Mozizi gberie, Ịlayịja pịkị gberie.”

⁶ Tẹmẹ-naịn-naịn ori na osi apụ ma na ḅụụ sọ ḅara ḅụ ò ḍuko ḅẹ gberie-sọ ò nimi-a.

⁷ Anịtẹso oḅuto ḅo ịn gbaịn tẹ in sime anga mẹ kpitim, tẹ pọkọ nwẹnị oḅuto mẹ ḅio fie paka-ḅo, “Ḅie ị̀ soku-ḅẹ iḅi Tụḅọ ḅe, ọmịnị ò pokii!”

⁸ Ịn nwẹnị sarama ḍiki ikelema kụma in jen gbọrụḅọ sọ ẹrị-a Jizọsị ngẹrị mie ini na emi ye.

⁹ Ini tụndụ mẹ ọgọnọ sime tẹ koro-ḅoarị ogbo Jizọsị tọn ịn pịrịm, “Ọmịnị ẹrị ye mẹ ó ḍuko gbọrụḅọ-sọ pịrị ma, nwenii Tomḅọ Tụḅọ ḅe fị-ḅụ-saakị sakị la.”

¹⁰ Ịn nwẹnị ọ̀ ḅịḅị poki, kụma ini-ini-ini ogboku ḅụ ịn saakị ḅẹrẹ mẹ kẹ ẹkwẹnma-ẹkwẹnmarị, “Mie ‘fị-ḅụ-saakị’ mẹ ḅọrọ tiye fiearị?”

¹¹ Tẹ ịn nwẹnị Jizọsị gbela, “Oloko Tolumapụ ma tiegotẹ ḅẹẹarị mịnẹ Ịlayịja tarị ḅo ḅẹ?”

¹² Ọ̀ kẹ ịn pakịrị ye anie, “Tomi-juḅẹye, Ịlayịja tarị ḅoarị, mịẹtẹ ò ye goyegoye kẹ ọrụtọn wẹrị ḅẹ ḅara. Anịsọ Fịafịa Ḍiri mẹ paa ḅẹẹarị mịnẹ Tomḅọ Tụḅọ ḅe ḅo tẹ tọrụsiẹrị lama tẹ ịn pịkị ọ̀ sịkị ḅẹ?

¹³ Anị sime-ḅara, sime-ḅara, à ḍuko ọ́ pịrịarị mịnẹ Ịlayịja ò ḅo la tẹ, tomi pịkị ịna ḅụụ-ḅẹlẹ ḅara kẹ ọ̀ mịẹ tẹ, Fịafịa Ḍiri mẹ ò gbolomaye ḅụ ḅẹẹarị ḅara ḅụ.”

Jizọsị Si-tẹmẹ Ḅụụ Ḅio Sime Owiḅọtụḅọ Gwọm

¹⁴ In ḅo Jizọsị ḍukamẹnjịapụ ma ḅụ kirikọn-apụ ma ḅụ sọ sakị ini ẹrịm gbọrụ opu tomina-ogbo ini ikelema wararị, tẹ Oloko Tolumapụ ma ḅẹ ja apụ ini na ye na ịgbanịyarị.

¹⁵ Tomi ma Jizọsị ẹrị sakị anị kpọma ịna ḅụụ-buama ḅara simem, tẹ ịn mangị mu sịn-ḅịḅị kẹ ọ̀ pịrịm.

¹⁶ Jizọsị nwẹnị ò ḍukamẹnjịapụ ma gbela, “Ó tiye gbolomaye kẹ ini na ịgbanịyarị?”

¹⁷ Tomina-ogbo mẹ ḅio gbọrụ tomḅọ ọ̀ pakịrịm, “Ye-tolumaḅọ àrị ì owiḅọtụḅọ kẹ ị́ dama-ḅom, si-tẹmẹ ọ̀ ḅụụ ḅio emi gotẹ, tẹ ọ̀ pịkị inetẹ ẹkwẹn-a.

¹⁸ Tẹmẹ ḅe ọ̀ ḅụ owi sakị goyegoye, anị ọ̀ sẹma-kiri-gbin-arị, tẹ fiko ọ̀ ḅịḅị bụrọarị, ori aka farịarị, tẹ ò bebe oju mẹ sụnjụmarị. Àrị í ḍukamẹnjịapụ ma tẹkẹm ịn si-tẹmẹ ḅe dee pakamaa, kụma ini ine-a.”

¹⁹ Jizọsị nwẹnị ịn ḅẹẹ, “Amụ ọ́ paa minini nyana-a ḅara ḍikii! À ḅọrọ ọmịnị na sime mu tọ-sakị la ḅẹ? À ḅọrọ ọmịna amịẹaị ma inema mu tọ-sakị la ḅẹ? Ọ́ tụḅọ ḅe ọkị-ḅo ị̀ pịrịị!”

²⁰ Ịn nwẹnị ọ̀ kẹ ḅo Jizọsị pịrị. Si-tẹmẹ ḅe Jizọsị ẹrị gbọrụ sakị, ọ̀ tụḅọ ḅe sụnjụmam, anie ḅụ ọ̀ nwẹnị ḅịkị kiri koro tẹ mbelembele, fiko ọ̀ ḅịḅị bụrọarị.

²¹ Jizọsị nwẹnị ḍaḅọ ḅe gbela, “Tọ-sakị mị obi mẹ ọ̀ ḅụụ saakị?” Ọ̀ nwẹnị pakịrị, “Ọ̀ kala-sakị kụra-ḅio.

²² Tọnwa asakị si-tẹmẹ ḅe ọ̀ ḅaa ḅẹ ḍọkị tẹ, ọ̀ kẹ fịnị ḅio na, minji ḅio na gbin suu ḅụ. Ọkụrụkụrụ nyana wa pịrị tẹ ḅarasụa wa pịrịị, í inetẹ mịẹ ḅẹ ḅọkọ emi-emii!”

²³ Jizọsị nwẹnị ḅẹẹ, “Inn, inetẹ ḅarị ḅẹḅẹ! Minini nyanaḅọ ḅụ ye goyegoye anị mịẹ ḅẹ ḅọkọ nyana wararị.”

²⁴ Anị gbọrụ kiri ḍaḅọ ḅe oloku pakamam, “À minini nyana wararị, kụma boowa. Ḅarasụa ị̀ pịrị tẹ à nyana ọkọ nẹngịma!”

²⁵ Jizọsị ẹrị tẹ mịnẹ tomina-ogbo mẹ ḅo ịn bịan ḅẹ-yearị ye ḅụ, ọ̀ tọn si-tẹmẹ ḅe pịrịm, “Ị́yẹrị ye naa-a, pịkị ẹkwẹn-a tẹmẹ, yẹrị tọn ị́ pịrịarị, tụḅọ ḅe ḅio paka-soo, tẹ ḅarị gbala-gbala jen kẹ ọ̀ ḅụ ḅio sọ-mu ma.”

²⁶ Tẹmẹ ḅe nwẹnị kararama-oloku tẹ si ḅara kẹ tụḅọ ḅe sụnjụma tẹ paka so. Tụḅọ ḅe nwẹnị ḍiki-tọrụ ḅụ ḍụẹịn kịka, tẹ ḅẹḅọ-ḅẹḅọ ḅẹẹm, “Ọ̀ fịị tẹ!”

²⁷ Kụma Jizọsị tụḅọ ḅe ḅara ọlọ tẹ ḅarasụa ọ̀ pịrị tẹ ọ̀ saakị sịẹm.

²⁸ Jizọsị so mu warị sọ tẹso, ò ḍukamẹnjịapụ ma ḅẹ ja apụ ofori sakị ḅụ, ò gbelam, “Tiye ẹrẹsị wamịnị inetẹ si-tẹmẹ ḅe dee pakama-a?”

²⁹ Jizọsị nwẹnị pakịrị, “Tẹkẹ sikima tẹ jen tẹ inetẹ mị si-tẹmẹ ḅara mẹ dee pakama ḅẹ ye ofori.”

Jizọsị Pịkị Siin Ọ̀ Fịị Gbolomaye Ḍukom

³⁰ Jizọsị na ò ḍukamẹnjịapụ ma na anịanga koroma-so tẹ mẹnjị ma-mu Galili tolu-ḅọrọm. Jizọsị ḅii-a mịnẹ kịnị ò sime anga nimi,

³¹ ò ye kẹ ò ḍukamẹnjịapụ ma tolumarị ẹrẹsị: ori mẹẹ, “In Tomḅọ Tụḅọ ḅe saḅama ọ̀ ḅaa ḅẹ atomi pịrị ḅa. Anị sime-ḅara, sime-ḅara sọ, tẹra aḍin sakị ḅụ ọ̀ saakị tẹ ḍumo ḅa.”

³² Kụma mị tolumaye mẹ fieye ịn naa-a, tẹ ò gbela pịkị ịna ḅalafamam.

Tụḅọ Gburo-gburo Tẹịn?

³³ In ḅo Kepanọmụ la tẹ warị sọ tẹso, Jizọsị ò ḍukamẹnjịapụ ma gbelam, “Etela ḅụ ó tiye gbolomaye ịgbanịya sime?”

³⁴ Kụma ini ọ̀ pakịrị ḍụkụ-a, etela ḅụ tụḅọ ịna ogboku tẹịn mọ gboloma ye anie ini ịgbanịya sime ye ẹrẹsị.

³⁵ Jizọsị nwẹnị lẹgị-sime, tẹ ò Ḍukamẹnjị oyi maa apụ finji ma sịn tẹ ịn ḅẹẹ, “Ḅẹḅọ-ḅẹḅọ tẹ ḅiiarị mḅọ tarịḅọ sọọ ḅẹẹ ḅọ, mḅọ amịna ḅụụ kẹ kunoma kiri ḅụ koroma nyanam kịnị mamgba ḅụ, tẹ pịkị kịnị mamgba fịrịmẹnjịḅọ sọọ.”

³⁶ Anịtẹso ọ̀ gbọrụ kalatụḅọ ọkị tẹ kẹ ịna tọrọkọ sịẹmam. Ori amịna aḅara kẹ tụḅọ ḅe fịnama tẹ ịn ḅẹẹm,

³⁷ “Ḅẹḅọ-ḅẹḅọ tẹ ị̀ ẹrẹ ḅụ mịna kala awọmẹ ma ḅẹ gbọrụḅọ daa-ọkị ḅọ, ị̀ daa-ọkịm tẹ ḅẹḅọ-ḅẹḅọ tẹ ị̀ daa-ọkị ḅọ yẹrị ngẹrị daa-ọkịa, kụma mḅọ pịkị ị̀ kẹ fịrịmaḅọ ḅe sọ daa-ọkị tẹ.”

Wamịnị Na Tụḅụrụ-aḅọ tụḅụrụ-aḅọ Anie Wamịna Jụ Ḅẹ Ḅọ

³⁸ Jọnị nwẹnị Jizọsị ḅẹẹ, “Ye-tolumaḅọ, gbọrụ owiḅọ ị́ ẹrẹ ḅụ tomina ḅụụ ḅio oru dee, dee pakamarị tẹ wa ori ẹrịm, tẹ ḍuko ọ̀ pịrịm ọ̀ ḅarị mịẹ ma, ori wamịna jụ ḅẹ ḅọ-a ẹrẹsị.”

³⁹ Jizọsị nwẹnị ḍuko ịn pịrị, “Ọmịnị ọ̀ dasịẹma ḅẹ ḍọkị ma, kẹ gotẹ ọkọ ḍukoarị, gbọrụḅọ-sọ ị̀ ẹrẹ ḅụ ḅụụ-buamaye mịẹ tẹso, ala-a kụma inetẹ ì gboloma asi-aị ḍuko ḅẹ ḅọ ofori.

⁴⁰ Gbala ḅẹḅọ-ḅẹḅọ tẹ wamịnị na tụḅụrụ-aḅọ anie wamịna jụ ḅẹ ḅọ.

⁴¹ À mịẹtẹ ó nimiarị mịnẹ gbọrụḅọ nwẹnị ó sime ị̀ pịrịm ẹrẹsị minji siye kẹ ọ̀ pịrị ḅuu kụma, piki-pikiye-ofori ḅara ḅụ, mḅọ amịna gbẹẹ-ye nyana ḅa.

Tomḅọ Da-Mu Si Ḅio Suuarị Aị

⁴² “Gbọrụḅọ mịẹtẹ mịna ị́ ḅụụ minini nyana wararị kala awọmẹ ma ḅẹ gbọrụḅọ amịna minini fama, fama, iḅi anị ḅọ mẹ pịrị ḅẹẹye-ḅẹẹye nẹngị ye anie ini opu ye gbẹẹ ḍụḅarị kẹ mḅọ kọngọ kpọọ tẹ mḅọ kẹ tọrụ-minji gbin nguma.

⁴³ Mie ḅụ ị́ ḅara mịẹtẹ ị́ nyana minini faarị ḅẹḅẹ, anị pẹlẹ-siin. Ị́ gbọrụ ḅara ofori ḅara kẹ ḍumo ḅio sọ iḅi ị́ ị́ maa aḅara ma kẹ ẹlị ḅio sọ-mu nẹngịm, anị gbala-gbala kọrị biin-biin-a fịnị mẹ. [

⁴⁴ Anịanga ịn pẹịarị angule ma gbala-gbala fịị fịị-a, tẹ ịn dọkịmarị fịnị mẹ sọ pịkị biin-biin-a gbala-gbala.]

⁴⁵ Tẹ ị́ ḅụọ mịẹtẹ í í minini famarị ḅẹḅẹ, anị pẹlẹ-siin! Ị́ gbọrụ ḅụọ ofori ḅara kẹ ḍumo ḅio sọ iḅi ị́ maa aḅụọ nyana tẹ ini ị́ kẹ ẹlị ḅio gbin suu nẹngịm. [

⁴⁶ Anịanga ịn pẹịarị angule ma gbala-gbala fịị fịị-a, tẹ ịn dọkịmarị fịnị mẹ sọ biin-biin-a gbala-gbala.]

⁴⁷ Tẹ ị́ tọrụngbọ mịẹtẹ í í minini famarị ḅẹḅẹ, anị sọkị sin! Ị́ gbọrụ tọrụngbọ kịngẹ kẹ Tamụnọ Ama-da yọ mẹ sọ-mu iḅi ị́ maa atọrụngbọ nyana tẹ ini ị́ kẹ ẹlị ḅio gbin suu nẹngịm.

⁴⁸ Anịanga ịn pẹịarị angule ma gbala-gbala fịị fịị-a, tẹ ịn dọkịmarị fịnị mẹ sọ pịkị biin-biin-a gbala-gbala!”

⁴⁹ Fụn agbamịẹye wẹrị kpaịnmarị ḅara, anie fịnị ḅụ, ini ọrụḅọ-ọrụḅọ wẹrị kpaịnma ḅarị ḅara.

⁵⁰ “Fụn anie iḅiye; kụma anị ḅarị fụn ḅẹlẹ-a ḅẹ kụma, ndẹẹ tomḅọ inetẹ mịẹtẹ anị pịkị-ḅo fụn ḅẹlẹ ḅẹ ḅara? “Ọmịna ogboku ḅụ ọ́ fụn ikia nyana, tẹ dein ḅụ jụmọ-jụmọ na angaa.”