Makị 8 - FỊAFỊA BAỊBỤLỤ

Jizọsị Fịye Kẹ Tọnwa-tọnwa Atomi Pịrị Fịm

¹ Sakị amụ ḅọrọ ḅaka-a ogbo jen tomina-ogbo ḅo kobirim. Ịn fị ḅẹ fịye kalịye sọ ḅarị ofori sakị Jizọsị ò ḍukamẹnjịapụ ma sịn ḅụụ pịrị tẹ ịn ḅẹẹm,

² “À mịna atomi ma ḍiki-sịḅị-kụrụkụrụarị, tẹra aḍin na gbasị ye ịn nwẹn kẹ ị̀ na sime tẹ ḅarị ịn fị ḅẹ fịye kalịye sọ nyana-a ẹrẹsị.

³ À fịye kẹ ịn pịrị fị-a ḅara kẹ ịn ḅẹẹ tẹ in so warị mu kụma, in soarị ogbo ịn naịn-ḅọrọ ḅa, ini ḅẹ ja apụ sime tẹ ḅo anga ala wararị ẹrẹsị.”

⁴ Ò ḍukamẹnjịapụ ma ò gbelam, “Mị ịkpa mẹ ḅio ndẹẹ tomḅọ inetẹ mịna tomi mamgba na-iḅi ḅẹ fịye ḍọkị-ẹrị ḅẹ anga?”

⁵ Jizọsị nwẹnị in gbela, “Ndẹẹ ọ́ nyana fịturu la ḅara?” Ịn nwẹnị pakịrị, “Sọnọma akpo.”

⁶ Ọ̀ tọn tomina-ogbo mẹ pịrị tẹ ịn kiri-ḅio lẹgị-simem. Anịtẹso ọ̀ nwẹnị fịturu sọnọma akpo ma ọkị, ịmịẹtẹ kẹ Tamụnọ ḅẹẹ, arị paịn, tẹ kẹ ò ḍukamẹnjịapụ ma pịrị ịn ḍie tomi ogbo mẹ pịrịị, tẹ ò ḍukamẹnjịapụ ma ọkọ mịẹm.

⁷ Ịn pịkị boowa inji kalịye sọ nyanam. Jizọsị arị gotẹ ịmịẹtẹ ḅẹẹ tẹ kẹ ò ḍukamẹnjịapụ ma pịrịm, ini arị sọ ḍie ịn pịrịị.

⁸ Ọrụḅọ-ọrụḅọ mḅọ na-iḅi ḅara fịm. Anịtẹso ò ḍukamẹnjịapụ ma ịn fịarị tẹ kọsị-sara aị ma tan sọnọma akana ḅinmam.

⁹ Owiapụ oyi ẹndẹ pembe apụ sime tẹ fịye mẹ fịm.

¹⁰ Tẹ ọ̀ ḅaaḅaa kẹ ịn ḅẹẹ tẹ anị gbọrụ kiri ò ḍukamẹnjịapụ ma na, ori na arụ ḅụkụlọ tẹ so Dalịmanuta ibe mẹ mum.

Farịsiiapụ Ma Ḅụụ-buamaye Ẹrị Ḅiim

¹¹ Farịsiiapụ ma ḅẹ ja apụ Jizọsị dama-ḅo tẹ ori na ye-nụnụa ḅara kẹ ẹkwẹnm. Ịn mịẹ ḅẹ ḅii ye, ò tuu koroma, mie ḅụ ini ọ̀ ḅara ḅiim ọ̀ ḅụụ-buamaye mịẹ tẹ kịnị nimi mịnẹ Tamụnọ ọ̀ kẹ ye-sịnm.

¹² Kụma Jizọsị opu ịnyọsara tẹ ḅẹẹm, “Tiye ẹrẹsị mị ḅụọ ḅẹ apụ ma ḅụụ-buamaye ḅiiarị? Ẹn-ẹn, à ḍuko ọ́ pịrịarị! Ọkọsime gbọrụ elekima sọ ịn kẹ mịnapụ ma pịrị ḅịa!”

¹³ Ori in koroma so tẹ pịkị mu arụ ḅụkụlọ tẹ saḅa osi saḅa-anga mum.

Farịsiiapụ Ma Na Sadusiiapụ Ma Na Fịturu Sunmaye Mẹ

¹⁴ Jizọsị ḍukamẹnjịapụ ma kẹ ḅioḅọrọmam tẹ ini na-iḅi ḅẹ fịturu sẹịn-a, fịturu gbọrụ kpo sikima tẹ arụ mẹ ḅio jen ofori.

¹⁵ Jizọsị nwẹnị ịna ḅeri nụnụarị tẹ ḅẹẹ, “Ọmịnị ẹbịị, tẹ Farịsiiapụ ma ye-sunmaye na, Ẹrọdị ye-sunmaye na ḅụ ọmịna aḅụụ wẹrị ḅelemaa.”

¹⁶ Ini-ini-ini nwẹnị ịna ogboku ẹkwẹnma-ẹkwẹnma tẹ ḅẹẹ, “Wa gbọrụ fịturu sọ nyana-a mịẹ ò gotẹ miemẹ ḍukoarị.”

¹⁷ Jizọsị in ḍuko sime ye mẹ nimi tẹso, ori in gbelam, “Ó tiegotẹ ọ́ fịturu nyana-a ẹkwẹn kọn-arị? Amụ ọ́ paa nimi nyana tẹ yefieye naa-a? Ọmịna akuroma paa amụ naa-saakị-a?

¹⁸ Ọ́ kọkọ tọrụngbọ nyana wararị — ọmịnị inetẹ ye ẹrị-a? Ọ́ kọkọ ḅeri nyana wararị — ọmịnị inetẹ ye naa-a? Ọ́ kẹ ḅiokoroma-a

¹⁹ à fịturu sọnọ akpo paịn tẹ kẹ kịnị oyi maa ẹndẹ finji na kịnị oyia asi na pịrị sakị mẹ? Ịn fị kọnma aị ma ọ́ tan nda akana ḅinma?” Ịn nwẹnị pakịrị, “Oyi maaịn finji.”

²⁰ Jizọsị pịkị gbelam, “Anịsakị à fịturu sọnọma akpo ma paịn tẹ kẹ kịnị oyi ẹndẹ ma pịrị sakị, nda akana ọ́ nwẹn tan ḅinma, in fị kọnma aị ma ḅụ?” Ịn nwẹnị pakịrị, “Sọnọma.”

²¹ Ọ̀ nwẹnị in gbela, “Amụ ọ́ paa anị fiearị ye naa ḅo-a?”

Jizọsị Tọrụngbọ-Pụụntẹ Owiḅọ Gwọm Bẹtịsayịda Ḅụ

²² In ḅo Bẹtịsayịda lam, anịanga ḅụ kịnị nwẹnị tọrụngbọ-pụụntẹ gbọrụ owiḅọ kẹ Jizọsị dama-ḅo tẹ ọ̀ tẹkẹ mịnẹ ọ̀ ḅara kẹ ọ̀ lamaa.

²³ Jizọsị ḅara kẹ tọrụngbọ-pụụntẹ owiḅọ ḅe ọlọ tẹ ọ̀ kẹ ama mẹ ḅio mẹnjị pakam. Jizọsị fịla kẹ owiḅọ ḅe atọrụngbọ isi tẹso, ọ̀ nwẹnị ḅara kẹ ori ọgọnọ gbana tẹ ò gbela, “Ị́ kọkọ inetẹ ye ẹrịarị?”

²⁴ Owiḅọ ḅe nwẹnị tọrụ saakị ọgọnọ ḍiki tẹ ḅẹẹ, “Àrị inetẹ kịnị ẹrịarị, kụma ịn mẹnjịma-mẹnjịmarị opu asịn kịkarị.”

²⁵ Jizọsị sin ori aḅara kẹ owiḅọ ḅe atọrụngbọ gbanam. Mị sakị mẹ owiḅọ ḅe iḅiọkụ ye ḍiki sakị ò ḅo ye ẹrị tẹ, tẹ banabana ḅara kẹ ye goyegoye ẹrịm.

²⁶ Anịtẹso Jizọsị ọ̀ kẹ ori ama fịrịmarị tẹ tọn ọ̀ pịrịm, “Pịkịma kala-ama mẹ ḅio sọ-mu ma.”

Jizọsị Gbolomaye Ḅụ Pita Ḍuko Pakama Ye

²⁷ Anịtẹso Jizọsị na, ò ḍukamẹnjịapụ ma na so Sizariya Filipayị kpeki kala-ama ma mum. In muarị ogbo ọ̀ nwẹnị in gbela, “Ó ḍuko ị̀ pịrịị, tomi ḅẹẹarị yẹrị tụḅọ?”

²⁸ Ịn nwẹnị pakịrị, “Ja apụ ḅẹẹarị mịnẹ Minji Sara Jọnị, osi apụ ḅẹẹarị mịnẹ Ịlayịja, anịsakị osi apụ ḅẹẹarị mịnẹ ịkịankoro apụ ma ḅẹ gbọrụḅọ.”

²⁹ Ọ̀ nwẹnị in gbela, “Ọmịnị tọ-ḅara ḅẹẹarị, yẹrị tụḅọ?” Pita nwẹnị pakịrị, “Ị́yẹrị anie Mẹsaya ḅee.”

³⁰ Anịtẹso Jizọsị tọn ịn pịrịm “Ọmịnị ì gbolomaye ḍuko gbọrụḅọ-sọ pịrị ma.”

Jizọsị Ọ̀ Tọrụsiẹrị Na Fịị Na Gbolomaye Ḍukom

³¹ Anịtẹso Jizọsị saakị ò ḍukamẹnjịapụ ma tolumam: “Tomḅọ Tụḅọ ḅe kpọma tọrụsiẹrị ḅa, tẹ ama ḅẹ omongi apụ ma na, agbamịẹapụ ma na, Oloko Tolumapụ ma na ọ̀ sịkị ḅa. Ini ọ̀ ḅaa ḅa, kụma tẹra aḍin ḅọrọ tẹso, ọ̀ saakị tẹ ḍumo ḅa.”

³² Miemẹ ò ḍuko giregirema ịn pịrị lamam. Anie ḅụ Pita nwẹnị ori ọkị ḅelema tẹ saakị ò ḍiki-ịganị.

³³ Kụma Jizọsị nwẹnị vuunma pịkị tẹ ò ḍukamẹnjịapụ ma ḍiki, tẹ Pita ḍiki-ịganị, “Ya, Ekwesu, ị̀ ḅụụ ḅelee. Ị́ akuroma ma Tamụnọ ḅara ḅo-a, kụma tomḅọ ḅara ḅom!”

³⁴ Anịtẹso Jizọsị tomina-ogbo mẹ na ò ḍukamẹnjịapụ ma na sịn ọ̀ ḅụụ pịrịm. Ọ̀ nwẹnị ḍuko ịn pịrị, “Gbọrụḅọ ị̀ na mẹnjị ḅẹ-ḅiiarị ḅẹḅẹ, mḅọ ḅụụ kẹ ḅioḅọrọmaa, mḅọ amịna ẹngbẹsẹ-sịn dogi, tẹ ì ḍuka-ḅoo.

³⁵ Kẹ gotẹ ọkọ ḍukoarị, amịna ḍumo ḅọrọma ḅẹ ḅiiarịḅọ, ḅiiarịḅọ, anị fama ḅa, kụma ḅẹḅọ-ḅẹḅọ tẹ yẹrị na iḅi-oku mẹ na gotẹ amịna ḍumo famarị ḅọ mẹ anị ḅọrọma ḅa.

³⁶ Gbọrụḅọ bebe tomikiri mẹ nyana ọkị tẹ amịna ḍumo fama kụma mḅọ tọ sọye nyana? Anị sime-ḅara ḅụ gberie sọ ofori.

³⁷ Mḅọ inetẹ kẹ amịna ḍumo pakịrị ọkị ḅẹ ye ofori.

³⁸ Gbọrụḅọ yẹrị na ì tolumaye mẹ na gotẹ mị Tamụnọ nimi-a si ene mẹ ḅụ ḅụụ-jịrịarị ḅẹḅẹ, anị sakị mẹ ḅụ Tomḅọ Tụḅọ ḅe sọ mḅọ gotẹ ḅụụ-jịrị ḅa, ori ọ̀ Ḍa ḅe ebube ḅụ ọ̀ fịafịa enjẹlị ma na ḅo ḅarị sakị mẹ.”