Makị 7 - FỊAFỊA BAỊBỤLỤ

Atẹngịapụ Ma Tolumaye Mẹ

¹ Farịsiiapụ ma ḅẹ ja apụ na, Oloko toluma apụ ma ḅẹ apụ na Jeruselemu ḅụ sime tẹ ḅo Jizọsị gbori-ikelemam.

² Ini ẹrịm mịnẹ ò ḍukamẹnjịapụ ma, ama-anganga-ḅara ḅụ fịafịa-a aḅara kẹ ye fịarị, anie fiearị mịnẹ ịn Farịsiiapụ ma ḅẹẹm kịnị ḅara sịkịrị tẹrẹmẹ fịye fị nwẹn ḅẹẹ ḅara kẹ amụ ịna aḅara sịkịrị-a.

³ (Anị gotẹ ọkọ paka ye anie, Farịsiiapụ ma-o, kirikọn osi Juu-ḅẹ-apụ ma-o, ịna atẹngịapụ tolumaye mie ini ọkị tẹ ḍukamẹnjịarị: in fịye fị-fịa ịn karakara ḅọkọ mẹ ḅụ ịna aḅara sịkịrị-a ogbo;

⁴ ịn ogumaḅiri mu tẹ ḅo sọ, ini ịn fẹ ḅo ye mẹ sịkịrị-a sime-ogbo, ini anị fị-fịa. Tẹ ịn pịkị ja tọnwa oloko sọ daa-ọkịm, anie kọpụ na, ḅẹlẹ na, ojo ye-sụa-aị na, mono aị na, sịkịrị sịkịrị karakara ḅara.)

⁵ Mie ḅụ Farịsiiapụ ma na Oloko toluma apụ ma na Jizọsị gbelam, “Tiye ẹrẹsị í ḍukamẹnjịapụ ma wamịna atẹngịapụ ma koroma so wa pịrị tolumaye mẹ ḍukamẹnjị-a, kụma anie nakara ini ama-anganga-ḅara ḅụ fịafịa-a aḅara kẹ ye fịarị?”

⁶ Jizọsị nwẹnị ịn pakịrị, Ọmịnị Ayịzaya ọmịna ḅụ kuro ịkịan mẹ kura ḅara ḍikii! Ọmịnị mịẹ kịnị ḍie atomi, anie ọ̀ kẹẹ gbọrụ ḅara mẹ: Tamụnọ ḅẹẹarị, mịna apụ ma ẹkwẹn-ḅịḅị ḅụ mie ini ị̀ kụn-arị ye, kụma ịna ḅioḅẹngbọ karakara ḅara kẹ ị̀ ḅụ ḅele fa wararị.

⁷ In sunsin ị̀ pịrịarị ye mẹ papaaye, tomi sụa oloko ma mie in tolumarị ẹrẹsị, tẹ arị kẹ Tamụnọ oloko ma kiri ḍimarị!

⁸ “Ọ́ Tamụnọ tọn koroma ye mẹ saakị anga pịrị tẹ tomina atoluma-aị ma poki tẹ mịẹarị.”

⁹ Jizọsị pịkị ḅẹẹm, “Ọmịnị aka nyana wararị ọ́ kẹ Tamụnọ oloko mẹ sịkịarị ye, mịẹtẹ ọmịnị ọmịna atoluma-aị ọlọ-sịẹma ḅarị ḅara.

¹⁰ Gbala Mozizi Oloko ḅẹẹm, ‘Ị́ ḍa na í iyingi na kụn’, na pịkị, ‘Ḅịḅị kẹ ḍaḅọ anịanịa iyingiḅọ lama ḅọ, lama ḅọ ini mḅọ ḅaa.’

¹¹ Kụma ọmịnị tolumarị mịnẹ gbọrụḅọ nyana tẹ kẹ ḅarasụa mḅọ ḍaḅọ, anịanịa iyingiḅọ pịrị ḅẹ ye emi, kụma ḅẹẹarị, ‘Miemẹ Kobanị’ (mie fiearị, anị sime Tamụnọ pịrịm),

¹² mḅọ kẹ ḅarasụa ḍaḅọ, anịanịa iyingiḅọ pịrị ḅẹ onyo mẹ mḅọ sịḅị so tẹ.

¹³ Mị ḅọkọ ḅụ ọ́ da saḅama ja apụ ja apụ pịrịarị tolumaye mẹ Tamụnọ ẹkwẹn mẹ kẹ papaa ye mịẹarị. Anịsakị tọnwa ja aị tẹ miemẹ kịka tẹ ọ́ mịẹarị aị sọ emi.”

Mịẹtẹ Tomḅọ Fịafịa-a Ḅọ Sọarị Aị Ma

¹⁴ Anịtẹso Jizọsị sin jen kẹ tomina-ogbo mẹ sịn ọ̀ ḅụụ pịrị tẹ ịn ḅẹẹm, “Ọmịnị-mgba ó poki tẹ anị fiearị ye naa.

¹⁵ Gberie sọ ofori tomḅọ ḅụụ ḅio sọ-mu tẹ mḅọ kẹ fịafịa-a ḅọ sọma ḅẹ ye, ama-anganga-ḅara ḅụ. Anie nakara mḅọ ḅụụ ḅio sime tẹ paka-ḅoarị ye mie mḅọ kẹ fịafịa-a ḅọ mịẹarị.” [

¹⁶ Ọkọẹrẹsị ó poki tẹ naa, ó ḅeri nyana ḅẹḅẹ.]

¹⁷ Ò tomina-ogbo mẹ koroma sọ tẹ mu warị sọ tẹso, ò ḍukamẹnjịapụ ma nwẹnị ọ̀ ḅara ḅii mịnẹ ori ò ḍuko ye mẹ puu-finjii.

¹⁸ Jizọsị nwẹnị ịn ḅẹẹ, “Ọ́ ḅarị ye nimi osi apụ ma nẹngị-a?. Anị fiearị ye ọ́ naa-a? Karakara-ḅara-ḅụ, gberie-sọ ofori, tẹ tomḅọ oju ḅụ sime-a tẹ sọ-mu tẹ inetẹ mḅọ mịẹtẹ mḅọ fịafịa ḅịa ye,

¹⁹ anị mḅọ ḅioḅẹngbọ sọ-mu-a ẹrẹsị, kụma mḅọ furo ḅio mie anị sọ-muarị, tẹ sọ-mu mḅọ oju ḅio paka-soarị.” (Miemẹ ḍuko ḅụ, Jizọsị ḍuko pakama tẹ mịnẹ fị-fịaị mamgba fị na-iḅim.)

²⁰ Tẹ ọ̀ paa ẹkwẹn tọrọkọ mu tẹ ḅẹẹm, “Tomḅọ ḅụụ ḅio sime tẹ paka-ḅoarị ye mie mḅọ mịẹ tẹ mḅọ fịafịa-a ḅọ sọarị.

²¹ Kẹ gotẹ ọkọ ḍukoarị, ḅioju ḅụ, tomḅọ mẹ ḅioḅẹngbọ ḅụ, mịẹ si akuroma tẹ mḅọ dogi-mu si-amịẹaị ḅụ suuarị aị ma, sime tẹ paka-ḅoarị, kụrọ-tọrụ kẹ jụmọ nye ọkị, kịnị ḅaa,

²² sẹfị, opu pọkọ-ḅẹngbọ sụa na, kịrị-kịrị asi amịẹaị mịẹ na; oḅori-kẹ-kịnịsịn, tọrụ-gbẹ-a amịẹaị mie, afana, jụmọ ḍuko sima mḅọ ọḅụjụ ḅụ, ḅụụ-gelema na oḅori amịẹaị na:

²³ mịna si-aị mamgba tomḅọ ḅụụ ḅio mie arị sime tẹ paka-ḅo tẹ mḅọ kẹ fịafịa-a ḅọ mịẹarị.”

Gbọrụ Ẹrẹḅọ Nyana Minini

²⁴ Anịtẹso Jizọsị anịanga koroma sọ-mu Taya opu ama mẹ na kpeki wararị anga lam. Ọ̀ nwẹnị gbọrụ warị ḅio sọ-mu, tẹ ḅii-a mịnẹ kịnị ò sime anga nimi, kụma ori inetẹ ḅọị ḅẹ ọkụ ofori.

²⁵ Gbọrụ ẹrẹḅọ, si-tẹmẹ amịna ẹrẹḅọtụḅọ ḅụụ ḅio emi ḅọ, nwẹnị ò gbolomaye naa tẹ ḅo anị-gbọrụ-kirikiri ori aḅụọ suku ḅịkị-koro.

²⁶ Ẹrẹḅọ ma jen sịẹ ḅẹ ḅọ, Siriya ḅẹ Fonisiya pakịrị anga ḅụ iyi ḅọ. Á Jizọsị tẹkẹm mịnẹ ori oru ḅe dee pakamaa á tụḅọ ma ḅụụ ḅio.

²⁷ Kụma Jizọsị pakịrịm, “Ó yee wa tarị fịye kẹ awọmẹ ma pịrị fị. Awọmẹ ma fị ḅẹ fịye kẹ wakị obiri pịrị mẹ kuraye mịẹ ye-a.”

²⁸ Á nwẹnị pakịrị, “Ị̀ Nyanaḅọ, awọmẹ ma fịarị tẹ kọsị-sara aị ma, dẹbịlẹ mẹ suku-ḅio sime tẹ koruarị obiri ma sọ paa fị-fịm!”

²⁹ Mie ḅụ Jizọsị á ḅẹẹm, “Anị pakịrị-ḅịḅị mẹ ẹrẹsị pịkị so warị muu, anịanga ị́ ḍọkị-ẹrị ḅa mịnẹ oru ḅe ị́ tụḅọ ma ḅụụ ḅio paka-so tẹ!”

³⁰ Á mu warị la tẹ ḍọkị-ẹrịm mịnẹ á tụḅọ ma iḅila ọgọnọ ḅọlọlọ wararị; oru ḅe á ḅụụ ḅio paka so tẹ.

Jizọsị Gbọrụ Iningitẹ Oḅu Gwọm

³¹ Anịtẹso Jizọsị nwẹnị Taya iri mẹ ḅụ so tẹ Sayịdọnị mẹnjị tolu-ḅọrọ mu Galili Tọrụ la, Oyia Ama nwẹn-sịn pakịrị anga ḅẹ etela ḅụ ḅọrọ ḅụ.

³² Kịnị nwẹnị iningitẹ pịkị inetẹ ẹkwẹn giregirema-a tomḅọ kẹ Jizọsị dama-ḅo, tẹ tẹkẹ mịnẹ ọ̀ paa ori aḅara kẹ tomḅọ ḅe ọgọnọ gbanaa.

³³ Mie ḅụ Jizọsị nwẹnị tomḅọ ḅe ngẹrị ọkị tẹ tomina-ogbo mẹ ḅụ ḅele, tẹ ḅara-atụngbalị kẹ tomḅọ ḅe aḅeri ḅio suu, tẹ fịla kẹ amịna ḅara-atụngbalị sara tẹ kẹ tomḅọ ḅe ḅẹlẹ lama.

³⁴ Anịtẹso Jizọsị nwẹnị tọrụ saakị So-tọrụ da, opu iningi kọn, tẹ tomḅọ ḅe ḅẹẹ “Ẹfata,” anie fiearị, “Finji sara-a!”

³⁵ Anị gbọrụ kiri tomḅọ ḅe inetẹ ye naam, tẹ pịkị ẹkwẹn giregiremam, tẹ ọ̀ nwẹnị saakị gberie-sọ ọ̀ ḅụụ-fụkama-a ḅara kẹ ẹkwẹn.

³⁶ Anịtẹso Jizọsị tọn tomi ma pịrịm mịnẹ ini anị gbolomaye kẹ ẹkwẹn gbọrụḅọ-sọ pịrị ma; kụma ori ịn ḅẹẹm ini anị kẹ ẹkwẹn kịnị pịrị ma ḅẹẹ, ḅẹẹ, ḅẹẹarị sakị ini anị kẹ ẹkwẹn, ẹkwẹn, ẹkwẹn-arị.

³⁷ Tẹ anị naa apụ mamgba kpọma ḅụụ-buam. Ini oloku pakamam, “Ò ye goyegoye mịẹ iḅima famarị! Ọ̀ mịẹtẹ ḅeri-iningiapụ sọ ye naarị, tẹ oḅu amẹẹ ma sọ ẹkwẹn-arị-ee!”