Makị 6 - FỊAFỊA BAỊBỤLỤ

Ịn Nazarẹtị Ḅụ Jizọsị Sịkịm

¹ Jizọsị anịanga so ori ama mum, tẹ ò Ḍukamẹnjị Oyi Maa apụ Finji ma sọ ò pono mum.

² Ịnyọsara-Ene mẹ ḅụ ọ̀ saakị ye tolumam ịna ama-warị ḅio. Tọnwa apụ anịanga simem; tẹ ini ò ḍuko ye naa sakị, inimgba ḅụụ-gbiripum. Ịn nwẹnị gbela, “Mie-mẹmgba tọ-anga ọ̀ nyana ḅo? Mie ḅọrọ tọ-ḅara sime nimi tẹ ịn kẹ ọ̀ pịrị? Ndẹẹ ọ̀ mịẹtẹ ḅụụ-buama-aị mịẹarị ḅara?

³ Ḅie akanịḅọ ḅe ori-a, Meri tụḅọ ḅe, tẹ Jemusị na, Josẹfụ na, Judasị na, Sayịmọnị na iyimbere ḅe ori-a? Ori eremịna amịnapụ ma in mịanga anga-a?” Anie ḅụ ini ọ̀ sịkịm.

⁴ Jizọsị nwẹnị ịn ḅẹẹ, “Ịkịankoroḅọ kụn nyana, nyana-a anga ofori, ori ama na, ori ere-furo na, ọ̀ warị-ḅio na sikima.”

⁵ Anịanga ori inetẹ gbọrụ ḅụụ-buamaye sọ mịẹ-a, ọ̀ ḅara kẹ boowa obiapụ ọgọnọ gbana tẹ ịn gwọ ye sikima.

⁶ Tomi ma minini nyana-a ye mẹ kpọma ọ̀ ḅụụ-buamam. Anịtẹso Jizọsị anịanga ikelema-koro ḅụ sime kala-ama ma mu, mu tẹ ye kẹ tomi ma tolumam.

Jizọsị Ò Ḍukamẹnjị Oyi Maa apụ Finji Ma Fịrịma Pakamam

⁷ Ori ò Ḍukamẹnjị Oyi Maa apụ Finji ma sịn kobiri tẹ ịn fịrịma pakamam, maa apụ maa apụ. Ò si-atẹmẹ nẹngịma kụrọ kẹ ịn pịrịm

⁸ tẹ tọn ịn pịrịm, “Ó muarị ye mẹ gberie-sọ ọ́ kẹ sụa mu ma, mkpara sikima fịturu-o, ye ḅii akpa-o, igbigi kịngẹ sọ ọ́ kẹ kapa akpa ḅio sụa mu ma.

⁹ Ọ́ ḅụọ ọgọnọ gbaịn-a okuro sụa, kụma ó jen kapa kẹ ḅarasụa mu ma.”

¹⁰ Ọ̀ pịkị ḅẹẹm, “Ini ọ́ da warị suu anga, suu anga ọmịnị anị gbọrụ warị mẹ ḅio sime nwenii ọmịnị anịanga koroma so sakị la.

¹¹ Ó ḅo gbọrụ ama la tẹ tomi ma ọ́ daa-ọkịa, anịanịa ó ḍuko ḅẹ ye poki ḅịa ḅẹḅẹ, ọmịnị ọmịna aḅụọ ḅẹ fọọn gugu sara tẹ soo. Anie mẹ ḅeri nụnụ ye sọ ịn pịrị ḅa!”

¹² Mie ḅụ ịn paka mu tẹ Tamụnọ ẹkwẹn kọnm, mịnẹ tomi ịna asi ḅụ pịkịị.

¹³ Ịn tọnwa oru dee pakamam tomina aḅụụ ḅio, pịkị olivu olo kẹ tọnwa obiapụ tan, tan tẹ ịn gwọm.

Ẹrọdị Minji-Sara Jọnị Ḅaam

¹⁴ Anị sakị mẹ ḅụ Ama-da Ẹrọdị sọ anị gboloma aị mamgba naam, Jizọsị ereso mẹ wasama mu anga, anga la fama tẹ ẹrẹsị. Ja apụ ḅẹẹ simem, “Minji Sara Jọnị fị-ḅụ-saakị tẹẹ! Mie ẹrẹsị ọ̀ kụrọ nyana tẹ ḅụụ-buama-aị mịẹarị.”

¹⁵ Anị sime-ḅara, sime-ḅara sọ, ja apụ mẹẹ, “Ori Ịlayịja.” Osi apụ mẹẹ, “Ori ịkịankoroḅọ, tẹ iḅere-iḅerea kụra-ḅio ḅẹ ịkịankoro apụ ma ḅẹ gbọrụḅọ kịkarị.”

¹⁶ Kụma anị mu Ẹrọdị ḅeri la sakị, ọ̀ ḅẹẹm, “Ḅie Minji Sara Jọnị ḅe orii! Yẹrị ọ̀ sịḅị pẹlẹ-siinm, kụma ò ḅo siin ḍumo tẹ!”

¹⁷ Ẹrọdị ḅarana tọn tẹ ịn Jọnị kun tẹ, ikoli kẹ ori ịkasị tẹ, ọ̀ kẹ ikoli-warị ḅio wẹrịm. Ori iyimbere Filipu ta Ẹrodiyasị, tẹ ori ọkị sime ẹrẹḅọ ma, sịḅị mie Ẹrọdị gotẹ miemẹ mịẹ ye.

¹⁸ Minji Sara Jọnị ḍuko-ḍuko Ẹrọdị pịrịm, “Ị́ í iyimbere ta ọkị simearị ye mẹ kura-a!”

¹⁹ Mie ḅụ Ẹrodiyasị ma si ḅioḅẹngbọ sụa Jọnị pịrị tẹ ọ̀ ḅaa ḅẹ ḍọkịm, kụma árị ine-a Ẹrọdị gotẹ.

²⁰ Ẹrọdị ḅe ọ̀ Jọnị ḍiki-ḅalafa simem, ò nimim Jọnị ḅe iḅi tẹ fịafịa tomḅọ ẹrẹsị, mie ḅụ ori ọ̀ kẹ wẹrị kpaịnmam. Jọnị ẹkwẹn mẹ Ẹrọdị anị poki ḅẹlẹmam, karakaraye ori ọ̀ naa sakị, naa sakị anị kpọma ọ̀ tẹmẹ ḅalaḅalamam sọ.

²¹ Anị ḅẹ kunoma ḅụ Ẹrodiyasị sakị ḅo laa á pịrịm. Anie Ẹrọdị iyi ene ḅẹ alalị ḅụ, ò fịye mịẹ ḅẹrẹtọn opu fịrịmẹnjịapụ na, ọmụ alapụ na, Galili ibe mẹ ḅẹ opu apụ na, pịrị sakị.

²² Tẹ Ẹrodiyasị ẹrẹḅọtụḅọ nwẹnị sọ ḅo tẹ sẹkị, tẹ anị Ẹrọdị na, ọ̀ sịn ḅo apụ ma na tọrụ ḅẹlẹmam. Mie ḅụ amadaḅọ ḅe ẹrẹḅọtụḅọ ma ḅẹẹm, “Í tiye ḅiiarị? Í ḅii ye, ḅii ye à kẹ ị́ pịrị ḅa.”

²³ Ọ̀ tọnwa ḅara kẹ ye karị, karị tẹ á ḅẹẹm, “À karị tẹ ḍukoarị mịnẹ í ḅii ye, ḅii ye à kẹ ị́ pịrị ḅa, anị ḅọrọ à daarị ama mẹ kẹ maa anga ḍiya ḅẹ gbọrụ anga sọ!”

²⁴ Mie ḅụ tụḅọ ma paka mu á iyingi gbelam, “À tiye ḅii ḅẹ?” Á iyingi ma nwẹnị pakịrị, “Minji Sara Jọnị sịḅị.”

²⁵ Anị gbọrụ kiri tụḅọ ma nwẹnị mangị pịkị amadaḅọ ḅe dama-mu tẹ ḅii, “À ḅiiarị mịanga mịọkụ ḅụ í Minji Sara Jọnị sịḅị kẹ opu ẹfẹrẹ ḅio sụa tẹ kẹ ị̀ pịrị!”

²⁶ Miemẹ amadaḅọ ḅe kururuma lamam, kụma ọ̀ sịn ḅo apụ ma tọrọkọ ḅụ ọ̀ wẹrịtẹ ye karị karị tẹ minini á pịrị tẹ ḅara gotẹ, ọ̀ sịkị ḅẹ ọkụ ḅarị ofori.

²⁷ Anie ḅụ ọ̀ nwẹnị anị gbọrụ kiri tọn ò ḍikiḍikiarị gbọrụ ọmụḅọ pịrị mịnẹ ò mu Jọnị sịḅị ọkị-ḅo. Ò ḍikiḍikiarị ọmụḅọ ḅe nwẹnị mu ikoli-warị mẹ ḅio Jọnị sịḅị pẹlẹ-siin;

²⁸ tẹso, ori anị kẹ opu ẹfẹrẹ ḅio sụa tẹ kẹ ḅọ ẹrẹḅọtụḅọ ma pịrị tẹ á kẹ mu á iyingi pịrịm.

²⁹ Jọnị ḍukamẹnjịapụ ma anị gbolomaye naa tẹso, ịn mu ori oju akpakpa mẹ ọkị ḍiḅim.

Jizọsị Fịye Kẹ Tọnwa-tọnwa Atomi Pịrị Fịm

³⁰ Fịrịmẹnjịapụ ma nwẹnị pịkịma-ḅo tẹ Jizọsị na kobiri, tẹ ịn mịẹ aị na, in toluma aị mamgba na, ḍuko ọ̀ pịrị.

³¹ Tọnwa, tọnwa atomi ḅo na, so na nwenii sakị Jizọsị na ò ḍukamẹnjịapụ ma na ḅarị fịye fị-fị sakị kịngẹ sọ nyana-a. Mie ḅụ Jizọsị nwẹnị ịn ḅẹẹ, “Ó yee wa so ḅụụ-yaụ-anga mu, tẹ anị anga paa kẹlẹ kẹ ịnyọsara.”

³² Anie ḅụ ini arụ ḅụkụlọ tẹ ini ngẹrị so ḅụụ-yaụ-anga mum.

³³ Anịsọ in soarị sakị ini ẹrị apụ ḅẹ tọnwa apụ in lekirim; anie ḅụ tomi nwẹnị ama mamgba ḅụ paka mu tẹ kiri ọgọnọ mangị Jizọsị na ò ḍukamẹnjịapụ na pẹlẹma tẹ tarị mu in mu sime anga mẹ la.

³⁴ Jizọsị arụ mẹ ḅio koro kiri sịẹ sakị, ọ̀ mị opu tomina-ogbo mẹ ẹrịm, tẹ ọkụrụkụrụ nwẹnị in gotẹ ò ḅioḅẹngbọ ḅin, in ḍikiḍikiḅọ ofori anana gala-gala ḅara gala-galam ẹrẹsị. Anie ḅụ ọ̀ nwẹnị saakị tọnwa aị kẹ in toluma.

³⁵ Ene gbaịn ḅẹ-yearị ogbo, ò ḍukamẹnjịapụ ma ọ̀ dama-ḅo tẹ ḅẹẹm, “Ene ḅẹrẹ fa famarị, tẹ mịanga mẹ pịkị kịnị anga-a yọ.

³⁶ Tomi ma ḅẹẹ in so, tẹ mu kpeki wararị aḍụọ-kiri na ama aḅio na fịye fẹẹ fị.”

³⁷ Jizọsị nwẹnị pakịrị, “Ọmịnị ḅarana ye kẹ ịn pịrị fị.” Ịn nwẹnị gbela, “Í ḅiiarị wa mu fịye kẹ ịn pịrị fị gotẹ seleḅa igbigi pakịrị oyia asi fịturu fẹ?”

³⁸ Anie ḅụ Jizọsị in gbelam, “Ọ́ fịturu nda kpo nyana? Ó mu ḍikii.” Ịn ḍọkị nimi sakị in ḍuko ọ̀ pịrịm, “Fịturu sọnọ akpo na inji maa mgbọ na.”

³⁹ Jizọsị nwẹnị ḍuko ò ḍukamẹnjịapụ ma pịrị ịn mịẹtẹ tomi mamgba ịna aḅụụ ḍiema tẹ ogbo, ogbo ḅụ ịwọ osuka mẹ ọgọnọ lẹgị-sime.

⁴⁰ Anie ḅụ tomi ma nwẹnị ọrụ-ọrụ ḅụ lẹgị-sime, ogbo-ogbo ma ḅụ, jaị kịnị sọnọa si sọnọa si, jaị pịkị kịnị amesi oyi finji-finji.

⁴¹ Anịtẹso Jizọsị fịturu sọnọa akpo ma na, inji maa amgbọ ma na ọkị tẹ tọrụ saakị so da tẹ ịmịẹtẹ kẹ Tamụnọ ḅẹẹm. Ọ̀ fịturu kpo, kpo ma paịn-paịntẹ kẹ ò ḍukamẹnjịapụ ma pịrịm in ḍie tomi ma pịrịị. Ọ̀ pịkị inji maa mgbọ ma sọ ḍie inimgba pịrịm.

⁴² Ọrụḅọ-ọrụḅọ fị furo ḅinmam.

⁴³ Anịtẹso ò ḍukamẹnjịapụ ma nwẹnị fịturu mẹ na, inji mẹ na ḅụ kirikọn-aị ma tan oyi maa akana finji ḅinma.

⁴⁴ In fịye mẹ kẹ pịrị fị owiapụ ma kịẹn-ḅịḅị kịnị oyi maa ẹndẹ finji na kịnị oyia asi na.

Jizọsị Minji Ọgọnọ Mẹnjịm

⁴⁵ Anị gbọrụ kiri Jizọsị mịẹtẹ ò ḍukamẹnjịapụ ma arụ ḅụkụlọm, ini tarị mu Bẹtịsayịda, tọrụ mẹ ḅẹ osi saḅa-anga mẹ la ḅẹ ḅara, anie ori tomina-ogbo mẹ kẹ warị fịrịma sime sakị.

⁴⁶ Ọ̀ ḅaaḅaa kẹ tomi ma ḅẹẹ fama tẹso, ò so gbọrụ tụndụ ọgọnọ tẹkẹ ḅẹ mum.

⁴⁷ Anị ḅo ḅoḅiri-so la sakị arụ mẹ mu tọrụ ogbo la tẹ, anịsakị Jizọsị ngẹrị kiri ọgọnọ kọnm.

⁴⁸ Ori ẹrịm mịnẹ ò ḍukamẹnjịapụ ma dọkụ fịịarị, kụma fẹrụ tụḅụrụ ḍụkụ tẹ arụ mẹ ḅọrọ-a, anie ḅụ ḅaaso ḅiri, sokịẹnye tẹra so na sonio aso na ogboku ḅụ, ọ̀ nwẹnị minji mẹ ọgọnọ mẹnjị mu. Ọ̀ mẹnjị ịn ḅọrọ ḅẹ yem,

⁴⁹ kụma ini ori ẹrịm ò minji mẹ ọgọnọ mẹnjịarị. Ịn nwẹnị kụrọma kararama-oloku tẹ ḅẹẹ, “Mie Ḍụẹịn!”

⁵⁰ Ini ori ẹrị sakị inimgba kpọma tẹmẹ-naịn-naịnm. Anị gbọrụ kiri Jizọsị nwẹnị ẹkwẹn ịn pịrị, ori mẹẹ, “Ó ḅiokpọọ! Yẹrịị. Ọ́ ḅalafa ma!”

⁵¹ Anịtẹso ori arụ mẹ ḅụkụlọ tẹ ịna ḅụụ sọ, tẹ fẹrụ mẹ biin yaụm. Ò ḍukamẹnjịapụ ma kpọma ḅaka ḅara kẹ ḅụụ-gbiripu lamam,

⁵² amụ in karakara ḅara kẹ ò fịye kẹ kịnị oyi maa ẹndẹ finji na kịnị oyia asi ma pịrị ye mẹ fie ye naa-a ẹrẹsị ịna akuroma inetẹ anị ḅẹ sime-ḅara kuroma nimi-a.

Jizọsị Obiapụ Gwọm Gẹnẹsarẹtị Ḅụ

⁵³ Ịn tọrụ mẹ saḅa-koro mu Gẹnẹsarẹtị ama kiri la tẹ arụ mẹ kpọọ wẹrịm.

⁵⁴ Ini arụ mẹ ḅio koro kiri sịẹ gbọrụ-kirikiri, tomi ma nwẹnị Jizọsị lekiri.

⁵⁵ Mie ḅụ ịn mangị anị iri mẹmgba ikelema tẹ ḍuko tẹ naa apụ mamgba obiapụ tẹ iḅila ḅọlọlọ wararị apụ kẹ mu ọ̀ lam.

⁵⁶ Tẹ Jizọsị mu la anga, la anga, anị ḅọrọ opu ama-o, kala ama-o, pịkị ḍụọ-kiri sọ, tomi ma oju iḅi-a apụ kẹ mu ogumaḅiri ḅụ koroma tẹ ọ̀ tẹkẹm ọ̀ paa ḍụkụụ ịn ḅara kẹ ọ̀ kapa suku kịngẹ sọ lama, tẹ anị lama apụ mamgba oju iḅim.