Makị 5 - FỊAFỊA BAỊBỤLỤ

Jizọsị Si-Atẹmẹ Ḅụụ Ḅio Sime Owiḅọ Gwọm

¹ Jizọsị na, ò ḍukamẹnjịapụ ma na nwẹnị mu Galili Tọrụ ḅụ osi saḅa-anga mẹ la, Gẹrasa iri mẹ ḅụ.

² Jizọsị arụ mẹ ḅio koro kiri sịẹ gbọrụ kiri ọ̀ ḍụẹịn ḍiḅi piri-ḅio sime tẹ paka-ḅo gbọrụ owiḅọ na bịamam. Ḅị tomḅọ ḅe ò si-tẹmẹ nyanam ọ̀ ḅụụ ḅio ḅụ,

³ tẹ ḍuḅu ma ogboku ḅụ angam. Gbọrụḅọ-sọ ḅarị inetẹ ikoli kẹ ori ịkasị koroma-a;

⁴ tọnwa sakị ịn nwẹn kẹ ikoli kẹ ori aḅụọ na ori aḅara na ịkasị tẹ, kụma ini ọkọ mịẹ sakị, mie sakị ori ori aḅụọ ḅụ ikoli ma anyịma tẹ ikulele ma gulugulumarị. Ọ̀ kụrọ ḅẹḅọ-ḅẹḅọ nẹngị ḅaka ḅara ẹrẹsị gbọrụḅọ-sọ inetẹ ori ọlọ-sịẹma-a.

⁵ Ḍin na eneḅaka na ḅụ ò ḍuḅu ma ogboku na tụndụ ma ọgọnọ na mẹnjị-mẹnjị ikelekele tẹ kararama-oloku-oloku tẹ ḍụḅarị kẹ amịna oju pẹlẹ pẹlẹm.

⁶ Ò Jizọsị ẹrị sakị mẹ ò sime anga kẹlẹ sụma wararị; mie ḅụ ọ̀ nwẹnị mangị mu Jizọsị tọrọkọ kparakị,

⁷ tẹ gele pọkọ kẹ kararama-oloku, “Jizọsị, Geletẹịn Tamụnọ ḅe Tụḅọ! Ị́ ị̀ kẹ tiye mịẹ ḅẹ? Tamụnọ ẹrẹ ḅụ, àrị ị́ tẹkẹm, ị̀ kẹ tọrụsiẹrịma ma!”

⁸ Ò gotẹ miemẹ ḍuko ye Jizọsị ḅẹẹ simem, “Si-tẹmẹ, ḅị tomḅọ ḅe ḅụụ ḅio paka-ḅoo!”

⁹ Mie ḅụ Jizọsị nwẹnị ò gbela, “Tiye ị́ ẹrẹ?” Tomḅọ ḅe pakịrịm, “Ị̀ ẹrẹ ‘Igurube’, wamịnị tọnwa apụ!”

¹⁰ Tẹ ọ̀ nwẹnị sịkọpẹlẹ-a ḅara kẹ Jizọsị tẹkẹ mịnẹ ori anị iri mẹ ḅụ sime si-atẹmẹ ma dee jen anga mu ma.

¹¹ Anị sakị mẹ ḅụ anịanga mẹ kpeki ḅụ opuropo ogbo sime tẹ tụndụ mẹ akaka ye kọn fịarị.

¹² Mie ḅụ tẹmẹ ma nwẹnị Jizọsị tẹkẹ, “Sisi wa kẹ opuropo ma fịrịma, tẹ wa ịna ḅụụ ḅio sọ-mu.”

¹³ Ori ịn wẹrịso tẹ in mum, tẹ si-atẹmẹ ma nwẹnị tomḅọ ḅe ḅụụ ḅio paka-ḅo tẹ opuropo ma aḅụụ ḅio sọ-mu. Bebe opuropo ogbo mẹ arịmgba opuropo sọnọ ẹndẹ pembe ye — nwẹnị mangị gbere-gberema mu tụndụ mẹ ḅẹ agba anga ḅụ ideri tọrụ mẹ ḅio koro tẹ sombi fịị.

¹⁴ Opuropo ma ḍikiḍiki sime owiapụ ma nwẹnị mangị-so tẹ ama mẹ ḅio na, ḍụọ ma ḅio na pakaye mẹ ḍuko wasama. Kịnị nwẹnị pakaye mẹ ẹrị ḅẹ tẹ paka-mu,

¹⁵ tẹ in ḅo Jizọsị la sakị ini oru ma ḅụụ ḅio sime-sime tomḅọ ḅe ẹrịm. Ori anịanga lẹgị-sime wararị, ọ̀ kapa sụa tẹ pịkị karakara kuroma nyana tẹ; tẹ ịn nwẹnị ḅalafa.

¹⁶ Tọrụngbọ kẹ oru ma ḅụụ ḅio sime-sime tomḅọ ḅe ḅụ pakaye mẹ na, opuropo ma gboloma ye mẹ na ẹrị apụ nwẹnị ḍuko tomi ma pịrị.

¹⁷ Mie ḅụ in Jizọsị ḅẹẹm ori ịna ama iri ḅụ soo.

¹⁸ Jizọsị arụ ḅụkụlọarị ogbo oru ma ḅụụ ḅio sime, sime tomḅọ ḅe ọ̀ tẹkẹm, “Sisi, yee àrị ị́ na so!”

¹⁹ Kụma Jizọsị ḅii-a ori ori na so. Anie nakara ori ọ̀ ḅẹẹm, “Pịkị-so ama ọgọnọ ị́ warị mu tẹ KỊNỊNYANAḄỌ ḅẹ kọrị ị́ pịrị ye ḍụḅa la ḅara na ọ̀ kẹ ị́ mịẹ opu iḅi na ḍuko ịn pịrịị.”

²⁰ Mie ḅụ tomḅọ ḅe so tẹ mu Oyi Ama mamgba la famam, tẹ Jizọsị kọrị ọ̀ pịrị ye mẹ ḍuko-ḍuko ịn pịrịm. Tẹ ò ḍuko ye naa apụ mamgba ḅụụ-gbiripum.

Jizọsị Fịtẹ Ẹrẹḅọtụḅọ Saakịmam Pịkị Ọmbie Ḅụụ Ḅụ Sararị Ẹrẹḅọ Gwọm

²¹ Jizọsị nwẹnị pịkị sin saḅa tọrụ mẹ ḅẹ osi saḅa-anga mu. Anị saḅa-anga mẹ ḅụ opu inweni-ogbo mu kobiri ori ikelema-korom.

²² Anịanga ḅẹ ama-warị mẹ ḅẹ opu fịrịmẹnjịḅọ, Jayịrọsị nwẹn-sịn ḅọ, nwẹnị ḅo la, tẹ ò Jizọsị ẹrị tẹso, ori amịna ḅụụ sẹma-kiri-gbinm ori aḅụọ suku,

²³ tẹ tẹmẹ-la ḅara kẹ ọ̀ tẹkẹm, “Ị̀ ẹrẹḅọtụḅọ kalịye obi lamarị. Sisi ḅo tẹ ị́ aḅara kẹ árị ọgọnọ gbana, mịẹtẹ árị oju iḅi tẹ á ḍumo ḅarị ḅara!”

²⁴ Anịtẹso Jizọsị nwẹnị ori na saakị mẹnjị mu. Tọnwa tomi ḅaka ḅara kẹ Jizọsị na mẹnjị mu sime-ḅara ḅụ pakịrị-pakịrị ḅụ kịnị ọ̀ bịanm.

²⁵ Oyi maa kụra finji kẹ ọmbie si ḅara kẹ ḅụụ ḅio sara obi kọn tọrụsiẹrị lama tẹ ẹrẹḅọ simem,

²⁶ karakaraye tọnwa ḅịrịapụ á gwọ tẹ ḅẹsọ. Árị árị igbigi mamgba fama-fama tẹ, kụma anị iḅi ḅẹ nakara, sakị mamgba á ḅụụ mẹ sii tọrọkọ-tọrọkọ mum.

²⁷ Jen sakị á Jizọsị gbolomaye naa tẹ, mie ḅụ á nwẹnị inweni-ogbo mẹ ḅio puu sọ-mu ori ọḅụjụ la,

²⁸ ó ḅụụ ḅẹẹarị, “À paa ḅara kẹ ọ̀ kapa kịngẹ lama sọ, ì oju iḅi ḅa.”

²⁹ Á nwẹnị ḅara kẹ ori ọgọnọ ḅẹ kapa lama, tẹ á ḅụụ ḅio sara paka-ḅo sime ọmbie mẹ nwẹnị anị gbọrụ kiri daasịẹ; tẹ á nwẹnị á ḅụụ ḅio ḅụ nimi mịnẹ á ḅụụ-fụkama sime obi mẹ ḅụ á gwọ tẹ.

³⁰ Anị gbọrụ sakị ḅụ Jizọsị nimim mịnẹ kụrọ ọ̀ ḅụụ ḅio mẹnjị paka tẹ, anie ḅụ tomina-ogbo mẹ ḅio ọ̀ pịkị ọḅụ ḍiki tẹ gbelam, “Tụḅọ ḅara kẹ ị̀ kapa lama?”

³¹ Ò ḍukamẹnjịapụ ma nwẹnị pakịrị, “Tomi ma gbii-gbiima ḅo ị́ bịan-arị ḅara ị́ ẹrịarị; ndẹẹ ị́ pịkị ḅara kẹ ị́ lama ḅọ gbelarị ḅara?”

³² Kụma Jizọsị paa ḍiki, ḍiki ikelemarị, anị mịẹ ḅọ mẹ ẹrị ḅẹ ḅara.

³³ Ẹrẹḅọ ma nimim á ḅụụ ḅio mịẹ ye mẹ, anie ḅụ á nwẹnị ḅalafa ḅụ oju-sẹkịma ḅo ọ̀ ḅụọ-suku kparakị tẹ ye paka ḅara, paka ḅara ḍuko ọ̀ pịrị.

³⁴ Jizọsị nwẹnị á ḅẹẹ, “Ị̀ ndụḅa, ị́ nyana minini mịẹtẹ í oju iḅi tẹ. Dein na soo, tẹ ị́ ḅụụ-fụkama sime obi mẹ ḅụ gwọọ.”

³⁵ Jizọsị miemẹ ẹkwẹn-arị kụma oku Jayịrọsị warị ḅo tẹ ḍuko ọ̀ pịrị tẹ, “Ị́ tụḅọ ma á fịị tẹ, ị́ pịkị paa tiegotẹ Ye-tolumaḅọ ḅe ḅụụ-fụkamarị?”

³⁶ In ḍuko ye tiye-o, tiye-o, Jizọsị kẹ ye-sịn-a, kụma ò ḍuko Jayịrọsị pịrịm, “Ḅalafa ma, paa minini nyana-a.”

³⁷ Anịtẹso ọ̀ ḍụkụ tẹ jen gbọrụḅọ-sọ ḅarị ori na mẹnjị tọrọkọ mu-a, Pita na, Jemusị na, ori iyimbere Jọnị na sikima tẹ.

³⁸ In mu Jayịrọsị warị mẹ lam, tẹ anịanga Jizọsị gboloki mẹ ẹrị tẹ ini oloku-oloku owuarị ye mẹ naam.

³⁹ Ọ̀ nwẹnị sọ-mu tẹ ịn ḅẹẹ, “Ó tiegotẹ nwẹn kẹ gbolokiarị? Ó tiegotẹ owuarị? Tụḅọ ma á fịị-a, á papaa monoarị!”

⁴⁰ Ịn nwẹnị ọ̀ ḍẹrị, anie ḅụ ori inimgba pakama tẹ tụḅọ ma ḍaḅọ na, iyingiḅọ na, ò ḍukamẹnjị tẹra apụ ma na ọkị tẹ tụḅọ ma ḅọlọlọ sime ḅio mẹ sọ-mum.

⁴¹ Ọ̀ nwẹnị tụḅọ ma ḅara saakị ọlọ tẹ á ḅẹẹ, “Talita-kumi,” anie fiearị, “Kala ẹrẹḅọtụḅọ, yẹrị ị́ ḅẹẹarị saakị sịẹ!”

⁴² Anị gbọrụ kiri á saakị sịẹ tẹ mẹnjị ikelemam. (Oyi maa kụra finji á sịḅị ḅọrọ tẹ). Miemẹ paka sakị ịn ḅụụ ọlọ-a ḅara kẹ ḅụụ-gbiripum.

⁴³ Kụma Jizọsị tọn kụrọma ịn pịrịm in ḍuko gbọrụḅọ-sọ pịrị ma, tẹ ọ̀ ḅẹẹm, “Ó fịye kẹ á pịrị fị.”