Makị 4 - FỊAFỊA BAỊBỤLỤ

Jizọsị Ye-ḍiḅiḅọ Egberi Gbaam

¹ Jizọsị mu sin Galili Tọrụ akaka ḅụ saakị ye tolumam. Ò gbori-ikelema tomina-ogbo mẹ ḍụḅa la ḅara mịẹtẹ ori arụ ḅụkụlọ tẹ lẹgị-simem. Arụ mẹ pọkụ-ḅọkọ mẹ ḅụ ḅele tẹ simearị sakị tomina-ogbo mẹ pọkụ-ḅọkọ sịẹsime wararị.

² Ori egberi gbaa-gbaa tẹ kẹ tọnwa aị kẹ in tolumam, ḅẹẹ mịnẹ:

³ “Ó pokii! Gbọrụ sakị gbọrụ tomḅọ mbịaka ḍiḅi ḅẹ tẹ paka-mum.

⁴ Ori mgbọlị ma kẹ wakị gala-gala sakị jaị mẹnjị-ḅọrọ-anga saram, tẹ feni ḅo arị gbọn-fịm.

⁵ Ja aị ḍụḅarị kiri ọgọnọ saram, lọkọ kiri boowa anga. Ḍiḅi aị ma ala-a puu-pakam lọkọ kiri mẹ pokolo sọ-mu-a ẹrẹsị.

⁶ Anịtẹso, ịrụa paka sakị, anị ịwọma so-paka aị ma fọị ḅaam; kuno ma amụ iḅiọkụ lọkọ kiri ḅio sọ-mu-a ẹrẹsị, ịwọma so-paka aị ma ala-a samụnọm.

⁷ Mgbọlị ma ḅẹ jaị nangị asịn sime kiri ḅụ saram, tẹ nangị asịn ma so-paka tẹ ịwọma pakarị aị ma temi ḅaam, tẹ arị mbịaka gbọrụmgbọ-sọ sụa-pakama ḅo-a.

⁸ Kụma mgbọlị ma ḅẹ jaị iḅi kiri ḅụ sara tẹ so-paka tẹ mbịaka sụa-pakama ḅom; jaị suei sụam, osi-aị tesi, osi-aị pịkị sọnọa si.”

⁹ Tẹ Jizọsị ḍuko gbaịnm, “Ọkọẹrẹsị, ó pokii, ḅeri nyana tẹ kẹ ye naarị ḅọ, naa.”

Egberi Ma Gotẹ Gbaa Ye

¹⁰ Jizọsị ngẹrị kọn tẹso, ò ḍuko ye naa apụ ma ḅẹ ja apụ na ò Ḍukamẹnjị Oyi Maa apụ Finji ma na ọ̀ dama-mu tẹ ḅiim ori egberi ma puu-finjii.

¹¹ Jizọsị nwẹnị pakịrị, Tamụnọ Ama-da mẹ ḅẹ ḅọịye mẹ ịn kẹ ó ḍie tẹẹ. Kụma anị gboloma-a apụ ma ḅụ ye mamgba ḅọị tẹ egberima-aị sọ wararị,

¹² anie mịẹ ẹrẹsị, in ḍiki-ḍiki-ḍikiarị sọ ini ẹrị-a; in poki-poki-pokiarị sọ, ini anị fiearị ye naa-a. Kẹ gotẹ ọkọ ḍukoarị, ini ọkọ mịẹ namịna, mimgbe ịn pịkị Tamụnọ da tẹ ori ịna si-wẹrịso tẹ.

Jizọsị Ye-ḍiḅiḅọ Egberi Mẹ Puu-finjim

¹³ Anịtẹso Jizọsị in ḅiim, “Mị egberi mẹ fiearị ye ọ́ naa-a? Ọkọ kụma ndẹẹ ọ́ mịẹtẹ egberima-ẹkwẹn fiearị ye naa ḅẹ ḅara?

¹⁴ Ḍụọ ḍiḅiḅọ ḅe Tamụnọ oku mẹ ḍiḅiarị.

¹⁵ Ja atomi mẹnjị-ḅọrọ-anga sara mgbọlị ma kịkarị, ini oku mẹ naa tẹ soarị, soarị, Ekwesu ḅo anị ọkị soarị.

¹⁶ Osi atomi ma ḍụḅarị kiri ọgọnọ sara mgbọlị ma kịkarị. Ini oku mẹ naa tẹ soarị, soarị, in ḅioḅẹlẹ ḅara kẹ anị daa-ọkịarị.

¹⁷ Kụma anị ịna aḅụụ ḅio sọ ḍiḅi-a, tẹ ịn ḅarị anị ḅụ sime alama-a. Mie ḅụ oku mẹ gotẹ ḅụụ-fụka anịanịa ḅaa-ḅọkọ ḅo gbọrụ kiri ini anị ḅụ ḅara-siin tẹ.

¹⁸ Osi atomi ma nangị asịn ogboku ḍiḅi mgbọlị ma kịkarị. Mịna apụ ma anie oku mẹ naa tẹ,

¹⁹ kụma ḍumo ḅalaḅala na, ngọ ḅẹlẹma na, tomi nyana ḅẹ ḅiiarị ja kịrị-kịrị aị na, gbiima ịna aḅioḅẹngbọ sọ mu tẹ oku mẹ temi ḅaarị, tẹ ịn ḅarị mgbọlụ sụa-a.

²⁰ Osi apụ iḅi kiri ḍiḅi mgbọlị ma kịkarị. Ini oku mẹ naa, anị ọkị, tẹ mgbọlụ sụarị: jaị suei, jaị tesi, jaị pịkị sọnọa si.”

Opu Ẹfẹrẹ Kẹ Jụụ Tọnjọ

²¹ Jizọsị paa ẹkwẹnm, “Tụḅọ gbọrụḅọ tọnjọ kẹ warị sọ tẹ opu ẹfẹrẹ kẹ anị jụụ, anịanịa anị kẹ monoye suku-ḅio suu wẹrị, wẹrị? Mḅọ anị kẹ tọnjọ-gbanaye ọgọnọ gbana ḅịa?

²² Ḅọị wararị ye goyegoye paka-ḅo ogbo la ḅa, tẹ gbaịn wararị ye goyegoye ịn pịkị anị finji ḅa.

²³ Ọkọẹrẹsị ó pokii, ó ḅeri nyana tẹ kẹ ye naarị ḅẹḅẹ!”

²⁴ Ọ̀ pịkị ịn ḅẹẹm, “Ọ́ tẹmẹ kẹ ọ́ naarị ye mẹ ọgọnọ gbanaa! Ọ́ nyana tẹ kẹ ja apụ kọn-arị gbọrụ ọrụ mẹ mie Tamụnọ ḍiki tẹ kẹ ọ́ kọn ḅarịye, kụma ọ̀ kẹ ọ́ kọn ḅarị ḅara kụrọ ịna nye nẹngị ḅa.

²⁵ Ye ḅara-ḅio sime ḅọ mẹ in jen kẹ sụa mḅọ pịrị ḅa, tẹ gberie-sọ nyana-a ḅọ mẹ, mḅọ ḅara simearị kalịye mẹ sọ ini mḅọ ḅara ọkị so ḅa.”

So-pakarị Sịnmgbọlị Egberi Mẹ

²⁶ Jizọsị paa sin ẹkwẹnm, “Tamụnọ Ama-da mẹ mie anị kịkarị ye. Gbọrụḅọ amịna ḍụọ ḅio sịnmgbọlị ḍiḅim.

²⁷ Ḍin ḅụ ò monoarị, tẹ ene ḅaka ḅụ ọ̀ saakị tẹ ọ̀ mẹnjị kọn-arị, tẹ mịna sakị mamgba ḅụ mgbọlị ma puu-paka tẹ so-pakarị. Anịsọ anị mịẹarị ḅara ò nimi-a.

²⁸ Lọkọ kiri mẹ ḅarana mịẹtẹ ḍiḅi ye mẹ so-paka tẹ mgbọlụ sụarị; tarị panga-ḅaa anịtẹrẹmẹ, anị mbịaka sụarị, tẹ kunoma ḅụ bebe mbịaka gbọrụmgbọ mẹ.

²⁹ Mbịaka mẹ ḅo kpọọ tẹ ḅẹḅẹ, tomḅọ ḅe mbịaka pẹlẹ ogie mẹ kẹ ḅo pẹlẹarị, fịaị soku sakị mẹ la tẹ ẹrẹsị.”

Mọsịtadị Nwẹn-sịn Sịnmgbọlị Mẹ Ḅẹ Egberi Mẹ

³⁰ Jizọsị nwẹnị gbela, “Wa tiye kẹ Tamụnọ Ama-da sakị mẹ tọnma ḅẹ? Wa tọ egberi gbaa tẹ kẹ anị ḍuko giregirema ḅẹ?

³¹ Mie anị kịkarị ye. Gbala gbọrụ tomḅọ ịn kẹ mọsịtadị nwẹn-sịn sịnmgbọlị, anie tomikiri ḅụ ịrụ-tẹịn tẹ sịnmgbọlị mẹ, ọkị tẹ kẹ kiri-ḅio ḍiḅim.

³² Sakị kẹlẹ ḅọrọ tẹso, anị so-paka ḅo sịn mamgba ḅụ ḍụḅatẹịn sịn sọm. Anị sịn-ḅara sụa-sụa wasamam, tẹ feni amẹẹ anị suku-ḅio ịna awarị namam.”

³³ Mịna aị ma kịka ja tọnwa egberi Jizọsị nwẹn gbaa-gbaa tẹ kẹ ori oku mẹ ḍuko tomi ma pịrịm. Ini inetẹ naa ḅo ḅẹ ye la ḅara mie ò ḍiki tẹ ḍuko ịn pịrị ye.

³⁴ Ori egberi gbaa-a ḅara kẹ ẹkwẹn ịn pịrị ḅẹ ḅii-a, kụma ori ngẹrị ò ḍukamẹnjịapụ ma na sime anga, ò ye goyegoye ḍuko finji ịn pịrịm.

Jizọsị Erise Deinmam

³⁵ Anị gbọrụ ene mẹ ḅẹ ḅoḅiri-so ḅụ, Jizọsị ò ḍukamẹnjịapụ ma ḅẹẹm, “Ó yee wa saḅa so tọrụ mẹ ḅẹ osi saḅa-anga mu.”

³⁶ Mie ḅụ ịn nwẹnị tomina-ogbo mẹ koroma-so; ò ḍukamẹnjịapụ ma nwẹnị Jizọsị tarị ḅụkụlọ tẹ lẹgị-sime wararị arụ mẹ ḅụkụlọ tẹ ori na dọkụ paka. Ja arụ sọ anịanga simem.

³⁷ Bẹkẹ-ḅara-ḅụ kụrọ fẹrụ fie tẹ ọnụngọ ḅakụ, ḅakụ arụ mẹ ḅio sọ tẹ minji nwẹnị arụ mẹ ḅin gbẹdẹma.

³⁸ Anị sakị ḅụ Jizọsị ḍukuno ḅẹ pịrị ḅio sịḅị-sakịye kẹ sịḅị saakị tẹ monoarị. Fịrịmẹnjịapụ ma nwẹnị ò jike saakịma tẹ ḅẹẹ, “Ye-tolumaḅọ, wa fịị ḅẹ-yearị mẹ ị́ ḅụụ ḅẹrẹ-a?”

³⁹ Jizọsị nwẹnị saakị-sịẹ tẹ tọn fẹrụ mẹ pịrị, “Yaụụ!” tẹ ori ọnụngọ mẹ ḅẹẹm, “Deinn!” Fẹrụ mẹ biin tẹ bebe tọrụ mẹ kpọma deinm.

⁴⁰ Anịtẹso Jizọsị ò ḍukamẹnjịapụ ma ḅẹẹm, “Tiye ẹrẹsị ọ́ tẹmẹ-naịn-naịn nyanarị? Ọ́ paa minini nyana-a?”

⁴¹ Kụma ịn kpọma ḅalafa tẹ jụmọ-jụmọ ḅẹẹm, “Ḅieḅe gbeke tọ-ḅara sime tomḅọ? Fẹrụ na, ọnụngọ na sọ ọ̀ ḅịḅị pokiarị!”