Makị 3 - FỊAFỊA BAỊBỤLỤ

Jizọsị Gbọrụ Ḅara Fịtẹ Tomḅọ Gwọm

¹ Anịtẹso Jizọsị pịkịma ama-warị mẹ mu tẹ anịanga ḅara kpọlịtẹ gbọrụ owiḅọ ẹrịm.

² Anịanga sime apụ ma ḅẹ ja apụ mịẹkọn kẹ Jizọsị sịḅị sẹịn ḅẹ tẹ simem; mie ḅụ ini ori ẹbị lamam Ịnyọsara-Ene mẹ ḅụ ò tomḅọ ḅe gwọ ḅarị ḅoto.

³ Jizọsị nwẹnị tomḅọ ḅe ḅẹẹ, “Iwo mịanga tọrọkọ ḅoo.”

⁴ Anịtẹso ò tomi ma gbelam, “Ịnyọsara-Ene mẹ ḅụ wamịna Oloko minini wa pịrị tẹ wa mịẹ ḅẹ ye tiye? Ḅarasụa mụnọọ, ye kẹ kịnị lama? Tomḅọ ḍumo ḅọrọma mụnọọ, anị guluguluma?” Kụma gberie-sọ in ḍuko-a.

⁵ Jizọsị in ḍiki ikelema tẹso, ọ̀ nwẹnị ịganị, kụma anị gbọrụ sakị mẹ ḅụ ọ̀ pịkị in ḍiki sịḅị-jịrịm, ịn kpọma kọngọ-kụrọma tẹ pịkị kuraye mịẹ-a ẹrẹsị. Anịtẹso ò tomḅọ ḅẹ ḅẹẹm, “Ị́ ḅara sụn-pakamaa.” Ori anị sụn-pakama tẹ anị gwọ tẹ tarị anị sime-ḅara simem.

⁶ Mie ḅụ Farịsiiapụ ma ama-warị mẹ koroma sọ-mu Ẹrọdị ogbo ḅẹ apụ na in Jizọsị ḅaa ḅẹ ḅẹrẹ-ḅiyam.

Jizọsị Tamụnọ Ẹkwẹn Kọn Inweni-ogbo Pịrịm Galili Tọrụ Akaka Ḅụ

⁷ Jizọsị na, ò ḍukamẹnjịapụ na so Galili Tọrụ akaka mẹ mu tẹ, gbọrụ opu inweni-ogbo ò ḍuka-mum. In sime tẹ ḅo anga Galili na, Judiya na,

⁸ Jeruselemu na, pịkị Idumiya iri ḅụ na, Jodanị tọrụ akaka ḅụ ịrụa-saakịarị-anga anga mẹ ḅẹ iri ḅụ na, Taya na Sayịdọnị na opu ama ma ikelema iri mẹ ḅụ na. Mịna apụ mamgba gotẹ Jizọsị dama-mu ye ini ọ̀ kọrị tẹ aị gbolomaye naa wẹrị tẹ ẹrẹsị.

⁹ Tomina-ogbo mẹ ḍụḅa la ḅara ḅụ Jizọsị ḍuko ò ḍukamẹnjịapụ ma pịrịm mịnẹ ini arụ tẹlẹma ọ̀ wẹrịmaa, mịẹtẹ ọ̀ ḅụkụlọ tẹ tomi ma ḅarị ḅo ò ponoma ḅịa ḅara.

¹⁰ Ọ̀ tọnwa-apụ gwọ tẹ anị ḅụ, obi apụ mamgba puu, puu sọ mum, ḅara kẹ ọ̀ lama ḅẹ ḅara.

¹¹ Tẹ si-atẹmẹ ḅụụ ḅio sime apụ ori ẹrị sakị, sakị, ini ọ̀ tọrọkọ ḅịkị-koro tẹ kararama-olokuarị, “Ị́yẹrị anie Tamụnọ Tụḅọ ḅee!”

¹² Jizọsị nwẹnị tọn kụrọma si-atẹmẹ ma pịrị mịnẹ ini ori tụḅọ mọ ḅẹẹ ye ḍuko gbọrụḅọ-sọ pịrị ma.

Jizọsị Oyi Maa Fịrịmẹnjịapụ Finji Sẹlẹm

¹³ Anịtẹso Jizọsị nwẹnị tụndụ kpọlị tẹ ori ḅarana ḅii owiapụ sịn ọ̀ ḅụụ pịrị. Ini ọ̀ dama-ḅom,

¹⁴ tẹ ori oyi maa apụ finji sẹlẹ-ọkị tẹ fịrịmẹnjịapụ kẹ ịn sịnm. Ọ̀ nwẹnị ḍuko ịn pịrị, “Àrị ọ́ sẹlẹ-ọkị tẹ, ọmịnị ị̀ na sime ḅẹ ḅara. À pịkị ọ́ fịrịma pakama tẹ ọ́ Tamụnọ ẹkwẹn kọn ḅa,

¹⁵ tẹ ọ́ kụrọ nyana tẹ tomina ḅụụ ḅio oru dee pakama ḅa.”

¹⁶ Mịna apụ ma mie ọ̀ sẹlẹ-ọkị oyi maa apụ finji ma: Sayịmọnị (Jizọsị ọ̀ sịnm Pita).

¹⁷ Jemusị na ori iyimbere Jọnị na, Zẹbidi owiapụ-awọmẹ ma (Jizọsị ịn sịnm Bohanajisi, anie fiearị ye, “So-alagba Owiapụ”);

¹⁸ Anduru, na Filipu na, Batolomiyo na, Matiyo na, Tọmọsị na, Jemusị, Alịfịyọsị owiḅọtụḅọ ḅe na, Tadịyọsị na, Sayịmọnị ama ḅẹlẹma ḅọ ḅe

¹⁹ na, Judasị Isikarịyọtị, anie tọrọkọ Jizọsị kẹ dẹrịma ḅọ ḅe na.

Jizọsị Na Bẹlịzibulu Na

²⁰ Anịtẹso Jizọsị nwẹnị so warị mu. Tomina-ogbo mẹ pịkị ḅo kobiri la ḅara ḅụ Jizọsị na ò ḍukamẹnjịapụ ma na sakị nyana tẹ ye fị-a.

²¹ Ọ̀ warị ḅẹ apụ anị gbolomaye naa sakị, ini ori ọkị so ḅẹ tẹ paka-mum, kịnị ḍuko ma-ḅọrọarị, mịnẹ, “Ọ̀ nọmụ tẹ ẹrẹsị!”

²² Oloko mẹ tolumapụ ḅẹ ja apụ tẹ Jeruselemu ḅụ sime tẹ ḅo apụ ḅẹẹ simem, “Bẹlịzibulu nwẹn-sịn oru ḅe ọ̀ ḅụụ ḅio emi! Ori oru ma sịḅịdaḅọ ḅe mie kụrọ kẹ ọ̀ pịrị tẹ ọ̀ kẹ in dee pakamarị.”

²³ Mie ḅụ Jizọsị tomi ma sịn ḅụụ pịrị tẹ egberima-ẹkwẹn kọn ịn pịrịm, “Ndẹẹ Ekwesu inetẹ Ekwesu dee pakama ḅẹ ḅara?

²⁴ Gbọrụ sịẹ amịna ḅụụ kẹ pakịrị, pakịrị puu tẹ ama owu sọarị ḅẹḅẹ, anị sịẹ mẹ kaan-sara ḅa.

²⁵ Gbọrụ warị amịna ḅụụ kẹ pakịrị, pakịrị puu tẹ owu sọarị ḅẹḅẹ anị warị mẹ kaan-sara ḅa.

²⁶ Ọkọẹrẹsị Ekwesu daarị ama amịna ḅụụ kẹ pakịrị, pakịrị puu tẹ ḅẹḅẹ, anị inetẹ sime ene la ḅịa, kụma anị kaan-sara tẹ ḅo anị ḅẹ kunoma la ḅa.

²⁷ “Gbọrụḅọ-sọ inetẹ kụrọ tomḅọ warị sọ-mu tẹ ori aị ọkị so ḅịa, mḅọ tarị kụrọ tomḅọ ḅe fịna koroma sikima; anie rẹ mie mḅọ inetẹ ọ̀ warị mẹ fọịn ḅarịye.

²⁸ “À karakaraye ḍuko ọ́ pịrịarị, Tamụnọ inetẹ tomi mịẹarị asi na, ịn kọn-arị si ẹkwẹn mamgba na wẹrịso ịn pịrị ḅa.

²⁹ Kụma ḅẹḅọ-ḅẹḅọ tẹ si-aị ḍuko Fịafịa Tẹmẹ ḅe ọgọnọ gbanarị ḅọ, gbala-gbala ịn wẹrịso mḅọ pịrị ḅịa, mḅọ sime gbamaso si mịẹ tẹ ẹrẹsị.”

³⁰ Jizọsị gotẹ miemẹ ḍuko ye ja apụ ḅẹẹ simem, “Si tẹmẹ ọ̀ ḅụụ ḅio emi.”

Jizọsị Iyingi Na Ori Amịnapụ Owiapụ Na Ori Ẹrị Ḅẹ Ḅiim

³¹ Anịtẹso Jizọsị iyingi na, ori amịnapụ owiapụ na ḅo lam. Ịn nụngọ ḅụ sịẹsime tẹ fịrịma ọ̀ sịnm.

³² Anị sakị ḅụ tomina-ogbo lẹgị Jizọsị ikelema wararị, tẹ ịn nwẹnị ọ̀ ḅẹẹ, “Ḍikii, í iyingi na, ị́ amịnapụ owiapụ na ereme na nụngọ-ḅọkọ sime tẹ ị́ ẹrị ḅẹ-ḅiiarị.”

³³ Jizọsị nwẹnị pakịrị, “Tụḅọ ì iyingi? Tọ apụ ị̀ amịnapụ owiapụ?”

³⁴ Ọ̀ nwẹnị lẹgị ori ikelema apụ ma ḍiki tẹ ḅẹẹ, “Ḍikii! Mịna apụ ma anie ì iyingi pịkị ị̀ amịnapụ owiapụ!

³⁵ Ḅẹḅọ-ḅẹḅọ tẹ Tamụnọ ḅiiarị mḅọ mịẹ nwẹn ḅẹẹ ye mịẹarị ḅọ anie Ì iyimbere, ị̀ ịyịmbara, na pịkị ì iyingi na.”