Makị 15 - FỊAFỊA BAỊBỤLỤ

In Jizọsị Kẹ Payịleti Tọrọkọ Ḅom

¹ Dede-funfun ḅụ agbamịẹapụ ma nwẹnị fọnya ḅara kẹ omongiapụ ma na, Oloko Tolumapụ ma na, bebe Ḅẹrẹ-siri mẹ na kobiri, tẹ ịn mịẹ ḅẹ aị kẹ ọrụtọn wẹrị. Ịn nwẹnị ikoli kẹ Jizọsị ịkasị, tẹ ọ̀ kẹ so mu, tẹ ọ̀ saḅama Payịleti pịrị.

² Payịleti ò gbelam, “Juu-ḅẹ-apụ amadaḅọ ḅe ị́yẹrị?” Jizọsị nwẹnị pakịrị, “Anie ị́yẹrị ḅẹẹarị ḅara.”

³ Agbamịẹapụ ma tọnwa aị tan, tan Jizọsị sịḅị sẹịnm,

⁴ mie ḅụ Payịleti sin ò gbelam, “Ị́ ị́ ḅịḅị ḍuko ḅịa? Ịn tan, tan ị́ sịḅị sẹịn-arị aị ma pokii!”

⁵ Jizọsị paa ḍụkụ tẹ gbọrụ ẹkwẹn sọ kọn-a ye mẹ nwẹnị Payịleti ḅụụ-gbiripuma.

Payịleti Ḅaa-Ḅẹrẹ Pẹlẹ Jizọsị Pịrịm

⁶ Saḅaḅọrọ-Alalị sakị goyegoye ḅụ Payịleti gbọrụ ikoliḅọ ḅụ ḅara-siin siinm, anie tomi ma ḅii ḅọ.

⁷ Anị sakị ḅụ Barabasị nwẹn-sịn gbọrụḅọ ikoli ḅio simem, ori na kọngọ kụrọma ḅẹrẹtọn apụ pịrị tẹ gbiri-gbiri-gbiri amịẹaị mịẹarị tẹ kịnị ḅaa apụ na.

⁸ Tomina-ogbo mẹ kobiri tẹ saakị Payịleti ḅara ọ̀ mịẹ ịn pịrị-pịrị ye mẹ ḅii sakị,

⁹ ori in gbelam, “Ó ḅiiarị à Juu-ḅẹ-apụ amadaḅọ ḅe ḅụụ ḅara-siin ọ́ pịrị?”

¹⁰ Ò gotẹ ọkọ kẹ in gbela ye, ò nimim mịnẹ agbamịẹapụ ma afana nyana Jizọsị pịrịm ẹrẹsị ini ọ̀ saḅama ọ̀ pịrịm.

¹¹ Kụma agbamịẹapụ ma tomina-ogbo mẹ jikemam, mịnẹ Jizọsị nakara ịn Payịleti ḅara ḅii tẹ ọ̀ Barabasị ḅụ ḅara-siin ịn pịrị.

¹² Payịleti nwẹnị jen kẹ ẹkwẹn tomina-ogbo mẹ pịrị, “Ọkọ kụma, ó ḅiiarị à tọ-ḅara kẹ ọ́ kẹ Juu-ḅẹ-apụ amadaḅọ sịn-arị ḅọ ḅe na mịẹ?”

¹³ Ịn nwẹnị kụrọma oloku “Ọ̀ kẹ ẹngbẹsẹ-sịn ḅụ ḅakụụ!”

¹⁴ Payịleti nwẹnị gbela, “Kụma ori mịẹ siye ḅọrọ tiye?” Ịn nwẹnị oloku pakama ḅaka, “Ọ̀ kẹ ẹngbẹsẹ-sịn ḅụ ḅakụ!”

¹⁵ Payịleti tomina-ogbo mẹ ḅụụ-ḅẹlẹ ḅẹ ye mịẹ ḍọkịm gotẹ, ọ̀ Barabasị ḅụ ḅara-siin ịn pịrịm. Anịtẹso ò Jizọsị fomu tẹ ọ̀ saḅama ịn pịrịm ini ọ̀ kẹ ẹngbẹsẹ-sịn ḅụ ḅakụụ.

Romu Ọmụapụ Ma Jizọsị Kẹ Kpọọtiim

¹⁶ Ọmụapụ ma Jizọsị ọkị ḅẹrẹtọnḅọ ḅe opu-warị mẹ ḅẹ ogigo mẹ ḅio mu tẹ ịna ogbo ḅẹ apụ ḅụ kirikọn-apụ sịn kobirim.

¹⁷ Ịn nwẹnị awụ tọrụ sụa vọrọrọ-kapa kẹ Jizọsị sụa, tẹ nangị asịn ịkpangị kẹ ama-da sun ḍikima mịẹ tẹ kẹ ọ̀ sịḅị gbana.

¹⁸ Anịtẹso ịn kombo ḅara kẹ ọ̀ ḅẹẹm, “Nangwọ ḍumo sime Juu-ḅẹ-apụ Amadaḅọ ḅe pịrị!”

¹⁹ Ịn nwẹnị sịn kẹ ọ̀ sịḅị fomu, fịla kẹ ori isi, tẹ kparakị tẹ sịḅị-tuu ọ̀ pịrị.

²⁰ Ini anị ḅara mẹ kẹ ọ̀ kẹ kpọọtii fama sakị, ini awụ vọrọrọ-kapa mẹ sin tẹ ò soku-ḅẹ kapa kẹ sin ọ̀ sụam. Anịtẹso ini ọ̀ kẹ paka ẹngbẹsẹ-sịn ḅụ ḅakụ ḅẹ mum.

In Jizọsị Kẹ Ẹngbẹsẹ-sịn Ḅụ Ḅakụ Ḅaam

²¹ In muarị ogbo ịn Sayịmọnị nwẹn-sịn ḅọ, tẹ piri ọgọnọ-jụ sime tẹ opu ama mẹ sọ ḅo sime ḅọ, na bịamam, tẹ ọmụapụ ma kụrọ-ḅara kẹ ori ọlọ tẹ ò Jizọsị ẹngbẹsẹ-sịn mẹ dogim. (Sayịmọnị ḅe Sayịrini sịẹ ḅụ ò ḅom, ori pịkị Alẹkịzanịda na Rufọsị na ḍa.)

²² In Jizọsị kẹ Gọlịgọta nwẹn-sịn anga mum, (Gọlịgọta mẹ) fiearị ye, “Arịapụ sịḅịkọ.”

²³ Anịanga ịn maa nwẹn-sịn ḍiri kẹ gwa tẹ iru kẹ ọ̀ pịrị ḅuu ḅẹ ḍọkịm, kụma Jizọsị ḅuu ḍụkụ-a.

²⁴ Anịtẹso ịn nwẹnị ọ̀ kẹ ẹngbẹsẹ-sịn ḅụ ḅakụ, tẹ ori akapa ḍiema ọkị ịna ogboku, ịn tarị ọrụḅọ-ọrụḅọ ọkị ḅẹ ye nimi ḅẹ gotẹ apịan sụam.

²⁵ Dede-ḅio esenia so ḅụ mie ini ọ̀ kẹ ẹngbẹsẹ-sịn mẹ ḅụ ḅakụ ye.

²⁶ Kịnị ịn kẹ ọ̀ sịḅị sẹịn tẹ ọ̀ kẹ ẹngbẹsẹ-sịn mẹ ḅụ ḅakụ ye nimi ḅẹ ẹrẹsị ịn miemẹ kẹẹ tẹ kẹ sololom: “Juu-ḅẹ-apụ ma Amadaḅọ.”

²⁷ Piri-ḅio kịnị ḅara ye fọịn fọịn maa apụ sọ ịn nwẹn kẹ Jizọsị na gbọrụ sakị ẹngbẹsẹ-sịn ḅụ ḅakụm, gbọrụḅọ ori ama-ḅara anga, osi-ḅọ ori ere-ḅara anga. [

²⁸ Mị ḅọkọ ḅụ Fịafịa Ḍiri mẹ ḍukoarị ye mẹ ḅo karakaraye sọ tẹ, “Si amịẹaị mịẹarị apụ ḅụụ paka-paka ye ọ̀ ḅụụ pakam.”]

²⁹ Mẹnjị ḅọrọarị apụ ịna asịḅị jike jike tẹ gọlị ẹkwẹn tan-tan Jizọsị ọgọnọ saram: “Ẹnhẹn! Ị́ kọkọ Tamụnọ-warị mẹ kan sara tẹ tẹra aḍin kẹ sin anị nama sịẹma ḅẹ tọn!

³⁰ Mịọkụ ẹngbẹsẹ-sịn mẹ ọgọnọ koro ḅo tẹ ị́ ḅụụ ḅọrọmaa!”

³¹ Anị gbọrụ ḅara mẹ anie agbamịẹapụ ma na Oloko Tolumapụ ma na sọ kẹ Jizọsị kombo ḅara, jụmọ-jụmọ ḅẹẹarị, “Ọ̀ ja apụ ḅọrọmam, kụma ori inetẹ amịna ḅụụ ḅọrọma-a!

³² Ó yee wa Mẹsaya, Izirẹlị ḅẹ amadaḅọ ḅe, mịọkụ ẹngbẹsẹ-sịn mẹ ọgọnọ koro-ḅoarị ye ẹrị, anịsakị wa ò minini ḅa!” Tẹ in Jizọsị na kẹ gbọrụ sakị ẹngbẹsẹ-sịn ḅụ ḅakụ maa apụ ma sọ ọ̀ mịẹ-simam.

Jizọsị Kunoma Ọwụ Sara Tẹ Fịịm

³³ Anị ḅo eneḅaka ogbo la sakị kanakana ḅo bebe ama mẹ gbaịn tẹ ọkọ sime nwenii ḅo tẹra awa lam.

³⁴ Anị ḅo tẹra so la sakị Jizọsị kpọma geletẹ pọkọ kẹ oloku pakamam, “Ẹli, Ẹli, lẹma Sabakitani?” Anie fiearị ye, “Ị̀ Tamụnọ, ị̀ Tamụnọ, tiye ẹrẹsị ị́ ị̀ kẹ gbin koroma tẹ so?”

³⁵ Anịanga sime apụ ḅẹ ja apụ ò ḍuko ye mẹ naa tẹ ḅẹẹm, “Ó pokii, ori Ịlayịja sịn-arị!”

³⁶ Ini ḅẹ gbọrụḅọ mangị mu minji nọnjị ọkịarị ye ọkị tẹ kẹ kpọọ tẹ iru ḅio taụ, tẹ kẹ sịn ḅịḅị sololom. Anịtẹso ori anị saakị-gelema mu Jizọsị ḅịḅị bịan tẹ ḅẹẹm, “Koruu! Ó yee wa ḍiki Ịlayịja ẹngbẹsẹ-sịn mẹ ọgọnọ ò koroma ḅo ḅẹ ḅoarị ḅoto!”

³⁷ Jizọsị gele pọkọ kẹ oloku tẹ fịịm.

³⁸ Tamụnọ-warị ḅio ḅẹ kiki-pẹlẹ-ḅịtẹ mẹ nwẹnị maaịn puu, ọgọnọ-jụ ideri-ḅo suku la.

³⁹ Ọmụ-alaḅọ ḅe tẹ anịanga ẹngbẹsẹ-sịn mẹ tọrọkọ sịẹsime sime ḅọ ḅe tẹ Jizọsị fịị ḅara ẹrị ye ḅụ ọ̀ ḅẹẹm, “Karakara-ḅara-ḅụ ḅieḅe Tamụnọ Tụḅọọ!”

⁴⁰ Ja ereme anịanga sime tẹ sụma-jụ sime tẹ ḍiki simem. Ịna ogboku ḅụ Meri Magidalini na, Kala Jemusị na Josẹfụ na iyingi Meri na, Salomi na sọ simem.

⁴¹ Jizọsị Galili ḅụ sime sakị ini ò ḍukamẹnjị tẹ ḅarasụa ọ̀ pịrịm. Tọnwa ja ereme tẹ ori na ḅo Jeruselemu la apụ sọ simem.

Arịmatiya Ḅẹ Josẹfụ Ò Ḍuḅu Ḅio Jizọsị Ḍiḅim

⁴² Juu-ḅẹ-apụ kẹ Ḅụụ-tẹlẹma Ene sịn ene mẹ ḅụ mie Jizọsị fịị ye (anie ḅaa kụma Ịnyọsara-Ene mẹ la ḅẹ ene mẹ). Anie ḅụ ene-ḅoḅiriarị ogbo

⁴³ Arịmatiya ḅẹ Josẹfụ, Sịẹ-Kobiri mẹ ḅẹ opuḅọ, ò ḅioju sọ Tamụnọ Ama-da sakị mẹ koru simem, nwẹnị ḅiokpọ tẹ Payịleti dama-mu tẹ Jizọsị oju akpakpa mẹ ḅii.

⁴⁴ Payịleti ḅụụ-buam ò Jizọsị fịtẹ mẹ naa sakị. Ọ̀ nwẹnị ọmụ-alaḅọ ḅe sịn tẹ ò gbela Jizọsị ịnyọ biin sakị alatẹ ḅoto.

⁴⁵ Ọmụ-alaḅọ ḅe ọ̀ kẹ ye ẹrị ḅara ḍuko ọ̀ pịrị tẹso, Payịleti ḍuko Josẹfụ pịrịm mịnẹ ori inetẹ oju-akpakpa mẹ ọkị ḅa.

⁴⁶ Josẹfụ nwẹnị iḅi pịna-fa ḅịtẹ fẹ ḅo, tẹ oju mẹ sin koroma, tẹ ḅịtẹ mẹ kẹ anị fangala tẹ kẹ ḍuḅu ḅio koromam, anie ịkụ ḅio ịn sọkị so mu ḍuḅu. Anịtẹso ò gbọrụ opu ḍụḅarị kpo mbelembele mu ḍuḅu mẹ ḅịḅị gbaịnm.

⁴⁷ Arị aị ma mịẹarị sakị Meri Magidalini na Josẹfụ iyingi Meri na ḍiki tẹ kẹ elekima sụarị, tẹ ịn nwẹnị in Jizọsị oju-akpakpa mẹ kẹ koroma anga mẹ ẹrị.