Makị 14 - FỊAFỊA BAỊBỤLỤ

In Ḅiya Jizọsị Pịrị Ḅaa-Ḅẹrẹ Mẹ

¹ Anị sakị mẹ ḅụ maa aḍin kọnm Saḅaḅọrọ-Alalị mẹ na Sun-a Fịturu Mịẹye mẹ na la ḅa. Tẹ agbamịẹapụ ma na Oloko mẹ tolumapụ ma na ḅọị ḅara kẹ Jizọsị kun mu ḅaa ḅẹ ḅọkọ ḍọkịm.

² Ini mẹẹ, “Gbala-gbala wa alalị mẹ ḅụ anị mịẹ ḅịa, ọkọ-a kụma tomi ma ḅofa ye-yọ fiema.”

Bẹtani Ḅụ Ịn Olo Kẹ Jizọsị Sịḅị Saram

³ Bẹtani ḅụ Jizọsị Sayịmọnị nwẹn-sịn ḅọ warị bịanm, anie sofịnị-obi kọn sime tomḅọ ḅe. Ori anịanga yefịarị ogbo, gbọrụ ẹrẹḅọ nwẹnị alabasịta nwẹn-sịn ḍụḅarị ololo kẹ sọ-ḅo. Anị ḅio opu igbigi la nadị nwẹn-sịn ye kẹ mịẹ sẹntị emi. Á nwẹnị ḍụḅarị ololo mẹ ḅaa tẹ sẹntị mẹ kẹ Jizọsị sịḅị ḅama sara.

⁴ Anịanga sime apụ ma ḅẹ ja apụ nwẹnị ịganị tẹ jụmọ-jụmọ ḅẹẹ, “Papaa sẹntị mẹ fama mẹ anị tọ sọye nyana?

⁵ Ini inetẹ anị kẹ seleḅa pakịrị jeia si nẹngị ye dẹrị tẹ igbigi mẹ kẹ igoin-apụ pịrị ḅarị ya!” Ịn nwẹnị kụrọma á mịẹ ye mẹ na tụḅụrụ ḅara kẹ ẹkwẹn á pịrị.

⁶ Kụma Jizọsị ḅẹẹm, “Ọmịnị á wẹrịsoo! Ó tiegotẹ á ḅụụ-fụkamarị? Árị iḅi tẹ tọrụ-gbẹ ye mịẹ ị̀ pịrị tẹẹ.

⁷ Sakị mamgba ọmịnị igoin-apụ nyana ḅa, tẹ ó ḅii sakị, ḅii sakị, ọmịnị inetẹ ḅarasụa ịn pịrị ḅa. Yẹrị kụma ọmịnị inetẹ sakị mamgba ị́ nyana ḅịa.

⁸ Árị árị ịnyọ la ḅara mịẹm; á sẹntị mẹ kẹ ì oju saram, kẹ anị tẹlẹma ḍiḅi sakị wẹrịmam.

⁹ Mịọkụ, à mịẹ tẹ ó nimiarị, mịnẹ ini iḅi-oku mẹ ḍuko anga, ḍuko anga, bebe tomikiri mẹ ḅụ, á mịẹ ye mẹ ini anị ḍuko tẹ anị á kẹ ḅiokoroma ye sọ ḅa.”

Judasị Mininim Ò Jizọsị Kẹ Dẹrịma Ḅa

¹⁰ Anịtẹso, Judasị Isikarịyọtị, Jizọsị Ḍukamẹnjị Oyi Maa apụ Finji ma ḅẹ gbọrụḅọ, mẹnjị so agbamịẹapụ ma dama-mum, ò Jizọsị kẹ ịna ḅara-ḅio dẹrịma ḅẹ ḅara.

¹¹ Ò ḍuko ịn pịrị ye mẹ ịna ḅioḅẹlẹma tẹ ini igbigi minini ọ̀ pịrịm. Anie ḅụ Judasị saakị iḅi ḅẹ ḅọkọ ḍọkịm, ọ̀ Jizọsị saḅama ịn pịrị ḅẹ ḅara.

Jizọsị Ò Ḍukamẹnjịapụ Ma Na Saḅa-ḅọrọ Fịye Mẹ Fịm

¹² Sun-a Fịturu Alalị mẹ ḅẹ tarị ene mẹ ḅụ, anie Saḅa-ḅọrọ fịye mẹ ḅẹ anana ma ḅaa-ḅaa ene mẹ, Jizọsị ḍukamẹnjịapụ ma ò gbelam, “Ndẹẹ í ḅiiarị anga mịnẹ wa mu tẹ Saḅa-ḅọrọ fịye mẹ tẹlẹma ị́ pịrị?”

¹³ Anịtẹso Jizọsị ini ḅẹ maa apụ fịrịma tẹ mịna ịn mịẹ ḅẹ aị ma ḍuko ịn pịrịm: “Ọmịnị ama mẹ sọ-muu, minji kuku dogi wararị owiḅọ ọmịnị na bịama ḅa. Ọmịnị ò ḍuka muu,

¹⁴ ọ̀ sọ warị sọọ, tẹ warị nyanaḅọ ḅe ḅẹẹ: ‘Ye-tolumaḅọ ḅe mẹẹ, Ndẹẹ ḅio mẹ tẹ ì ḍukamẹnjịapụ ma ị̀ na Saḅa-ḅọrọ fịye mẹ fị ḅẹ anga mẹ?’

¹⁵ Anịsakị ò ḅekin-warị ọgọnọ-jụ gbọrụ opu ḅio kẹ ò ḍie ḅa, tẹlẹma tẹ ḅirima wararị, anịanga ó ye goyegoye tẹlẹma wa wẹrịma ḅa.”

¹⁶ Jizọsị ḍukamẹnjịapụ ma nwẹnị so opu ama mẹ mu tẹ Jizọsị ḍuko ịn pịrị gbọrụ ḅara mẹ kẹ ye goyegoye ḍọkị-ẹrị; tẹ ịn Saḅa-ḅọrọ fịye mẹ tẹlẹmam.

¹⁷ Anị ḅo ḅoḅiri la sakị, Jizọsị ò Ḍukamẹnjị Oyi Maa apụ Finji ma na ḅom.

¹⁸ Tẹ in dẹbịlẹ suku lẹgị tẹ ye fịarị ogbo, Jizọsị ḅẹẹm, “À ḍuko ọ́ pịrịarị, mịnẹ ọmịna ḅụ ḅẹ gbọrụḅọ, ị̀ na ḅara gboloma tẹ ye fịarị ḅọ ị̀ kẹ dẹrịma ḅa.”

¹⁹ Ò ḍukamẹnjịapụ ma ḅioḅẹngbọ si tẹ gbọrụḅọ, gbọrụḅọ, saakị ò gbelam, “Piki-pikiye-ofori ḅara ḅụ ị́ ị̀ ḅẹẹ mụnọọ, ị́ ị̀ ḅẹẹ-a?”

²⁰ Jizọsị nwẹnị pakịrị, “Anị ọmịnị oyi maa apụ finji ma ḅụ ḅẹ gbọrụḅọ-sọ ḅa, ị̀ na gbọrụ ẹfẹrẹ ḅio fịturu kẹ gbọn-fịarị ḅọ ḅe.

²¹ Tomḅọ Tụḅọ ḅe ọ̀ fịị ḅa, Fịafịa Ḍiri mẹ ḅẹẹarị ọ̀ fịị ḅa nwẹn ḅẹẹ ḅara mẹ; kụma anị kpọma ḅalafama ḅara sime anị tomḅọ mẹ tẹ Tomḅọ Tụḅọ ḅe kẹ dẹrịmarị ḅọ mẹ pịrịm! Mimgbe mḅọ gbala-gbala iyi-a iḅi mḅọ miemẹ mịẹ nẹngịm!”

KỊNỊNYANAḄỌ Ḅe Ḅoḅiri Fịye Mẹ

²² In ye fịarị ogbo, Jizọsị fịturu kpoo ọkị tẹ ịmịẹtẹ ḅẹẹ tẹkẹ kọnm. Ọ̀ nwẹnị paịn tẹ kẹ ò ḍukamẹnjịapụ ma pịrị, tẹ ḅẹẹ, “Ọ́ daa, mie ì oju.”

²³ Anịtẹso ọ̀ kọpụ mẹ ọkị tẹ ịmịẹtẹ kẹ Tamụnọ ḅẹẹ tẹ anị kẹ ịn pịrịm; tẹ inimgba anị ḅio sime ye mẹ ḅuum.

²⁴ Jizọsị nwẹnị ḅẹẹ, “Mie ị̀ ọmbie, ọsụ tọnwa-apụ pịrị ye mẹ, ị̀ ọmbie tẹ Tamụnọ ọḅọkụ mẹ mịẹ kụrọmarị ye mẹ.

²⁵ À ḍuko ọ́ pịrịarị, à ḅarị mị kụrọ mẹ ḅẹ iru mẹ ḅuu ḅịa nwenii à Tamụnọ Ama-da yọ mẹ ḅụ ịwọ kụrọ iru mẹ ḅuu sakị la ḅa.”

²⁶ Anịtẹso ịn Tamụnọ boma nume su pẹlẹ tẹso, ịn nwẹnị paka-so Olivu Tụndụ mẹ mu.

Jizọsị Ḍukom Pita Ò Pịkị Ḅa

²⁷ Jizọsị ịn ḅẹẹm, “Ọmịnị-mgba ì koroma mangị-so ḅa, Fịafịa Ḍiri mẹ ḅẹẹarị ḅara ḅụ, ‘Tamụnọ anana-ḍikiḍikiḅọ ḅe ḅaa ḅa, tẹ anana mamgba gala-gala ḅa.’

²⁸ Kụma Tamụnọ fịị ḅụ ị̀ saakịma sakị, Yẹrị tarị ọ́ ḅọrọ mu Galili la ḅa.”

²⁹ Pita nwẹnị pakịrị, “Yẹrị gbala-gbala àrị í koroma so ḅịa, kirikọn-apụ mamgba ọkọ mịẹ sọ!”

³⁰ Tẹ Jizọsị Pita ḅẹẹm, “À ḍuko ị́ pịrịarị, tẹrẹmẹ maaịn karama ọḅọkọ paan mị ḍin, ị́ tẹra sakị kẹ ḅẹẹ ḅa mịnẹ í ì nimi-a.”

³¹ Pita nwẹnị pakịrị tẹ ḍuko kụrọma, “Gbala-gbala yẹrị anie ḅẹẹ ḅịa, àrị ị́ na sọ fịị ḅẹ sọ!” Tẹ osi Jizọsị ḍukamẹnjịapụ mamgba anị gbọrụ ye mẹ ḅẹẹm.

Jizọsị Gẹtịsimani Ḍụọ Ḅụ Tẹkẹm

³² Jizọsị na ò ḍukamẹnjịapụ ma na ḅo Gẹtịsimani nwẹn-sịn anga la tẹ ori ịn ḅẹẹm, “Ọ́ mị anga lẹgị-simee, à mu tẹkẹarị ogbo.”

³³ Ò Pita na, Jemusị na, Jọnị na ọkị ọ̀ ḅụụ sụam. Ḅụụ-ḅeliḅeli na ḅalaḅala na ḅo ọ̀ gbaịnm,

³⁴ tẹ ori ịn ḅẹẹm, “Ị̀ ḅioḅẹngbọ sọ wararị kururu ḍụḅa la ḅara ḅụ anị ị́ ḅaa ḅẹ-yearị. Ọ́ mịanga sime tẹ koruu.”

³⁵ Ọ̀ nwẹnị kẹlẹ mẹnjị tọrọkọ mu tẹ kiri koro tẹ tẹkẹ, mịnẹ anị inetẹ mịẹ ḅarị namịna, mimgbe ọ̀ ḅarị anị akụye mẹ da-a so tẹ.

³⁶ Ọ̀ nwẹnị tẹkẹ tẹ ḅẹẹ, “Ḍa, ị̀ Ḍa, í inetẹ mịẹ ḅịa ye ofori. Mị akụye kọpụ mẹ saakị ḅelema ị̀ ḅụụ. Anịsọ yẹrị ḅiiarị ye-a, kụma ị́yẹrị ḅiiarị ye mịẹ.”

³⁷ Anịtẹso ọ̀ pịkị-ḅo tẹ ò ḍukamẹnjị tẹra apụ ma ḍọkị-ẹrịm in monoarị. Ọ̀ nwẹnị Pita ḅẹẹ, “Sayịmọnị í monoarị aro? Í inetẹ gbọrụ sakị kịngẹ sọ kẹ mono-a tẹ koru-a?”

³⁸ Tẹ ọ̀ nwẹnị ịn ḅẹẹ, “Ó koruu, tẹ tẹkẹẹ mịẹtẹ ọ́ daaḍiki ḅio ḅịkị ḅịa ḅara. Tẹmẹ mẹ minini wararị, kụma meni-oju mẹ ḅụụ-lọkọarị.”

³⁹ Ọ̀ nwẹnị jen gbọrụ sakị kẹ mẹnjị so mu tẹ tẹkẹ, paa gbọrụ ẹkwẹn ma kọn ḅụ.

⁴⁰ Anịtẹso ọ̀ pịkị ò ḍukamẹnjịapụ ma dama-ḅo tẹ ịn ḍọkị-ẹrịm in monoarị; ini inetẹ ịna atọrụngbọ sọ finji-a. Tẹ in ḍuko ọ̀ pịrị ḅẹ ye sọ in nimi-a.

⁴¹ Ọ̀ tẹra sakị karama ye kẹ pịkị ịn dama-ḅo sakị, ori ịn ḅẹẹm, “Ọ́ paa monotẹ ịnyọsararị? Iḅi tẹ! Sakị mẹ laa tẹ! Ḍikii, mịọkụ in Tomḅọ Tụḅọ ḅe saḅama si-mịẹapụ kụrọ ḅara-ḅio suuarị!

⁴² Ọ́ saakịị, ó yee wa so. Ḍikii, ḅie tomḅọ ḅe, ị̀ kẹ tomina ḅara-ḅio dẹrịmarị ḅọ ḅe!”

In Jizọsị Kunm

⁴³ Jizọsị paa ẹkwẹn-arị ogbo Judasị, Jizọsị Ḍukamẹnjị Oyi Maa apụ Finji ma ḅẹ gbọrụḅọ, ḅo lam. Gbọrụ tomina-ogbo tẹ okologie na, mgbele na dogi tẹ agbamịẹapụ ma na, Oloko toluma apụ ma na, omongiapụ ma na kẹ fịrịma apụ na, ọ̀ ḅụ sọ tẹ ḅom.

⁴⁴ Ọ̀ kẹ dẹrịma ḅọ ḅe gbọrụ elekima kẹ tomina-ogbo mẹ pịrị wẹrị tẹ: “À ḅẹlẹma ḅara ḅụ ekpe kẹ fịnama ḅarị ḅọ ḅẹ anie ò ḅiiarị ḅọ ḅee; ọmịnị ò kun soo, ori ẹbị ḅara ḅụ.”

⁴⁵ Judasị ḅo la gbọrụ-kirikiri, ọ̀ da-da mẹnjị Jizọsị dama-mu tẹ ḅẹẹm, “Ye-tolumaḅọ!” tẹ nwẹnị ḅẹlẹma ḅara ḅụ ekpe kẹ ọ̀ fịnama.

⁴⁶ Anie ḅụ in Jizọsị kun tẹ ori ọlọ kụrọmam.

⁴⁷ Kụma anịanga sịẹ sime apụ ma ḅẹ gbọrụḅọ nwẹnị amịna okologie wọrọ-pakama-ḅo tẹ kẹ Sịḅịda-Agbamịẹḅọ ḅe omoniḅọ ḅeri pẹlẹ sin.

⁴⁸ Anịtẹso Jizọsị ẹkwẹn pakama tẹ ịn ḅẹẹm, “Ọmịnị okologie na mgbele na dogi tẹ ḅo ì kun ḅẹm aro, gbala yẹrị oloko koko-koko-a tẹ mangị faarị ḅọ ọkụ?

⁴⁹ Ene gbarịma-a ḅara à kọkọ nwẹn kẹ Tamụnọ-warị mẹ ḅio sime tẹ ye-toluma sime, tẹ ọmịnị ì kun-a. Kụma Fịafịa Ḍiri mẹ ḅio kẹẹ wararị ye mẹ paka-a so ḅịa.”

⁵⁰ Anịtẹso ò ḍukamẹnjịapụ mamgba ò koroma mangị-som.

⁵¹ Gbọrụ asatụḅọ, pịna-pịna iḅila dẹẹ ḅịtẹ kịngẹ kẹ ḅụụ gbaịn ḅọ, Jizọsị ḍuka mu simem. Ini ò kun ḅẹ ḍọkịm,

⁵² kụma ọ̀ paụ kẹ mangị tẹ ḅịtẹ mẹ koroma som.

In Jizọsị Kẹ Sịẹ-Kobiri Tọrọkọ Mum

⁵³ Anịtẹso in Jizọsị kẹ Sịḅịda-Agbamịẹḅọ ḅe warị mum, agbamịẹapụ mamgba na, omongiapụ ma na, Oloko Tolumapụ ma na kobiri wararị ogbo.

⁵⁴ Pita tombi kẹ ịn pịrị-pịrị mu nwenii tẹ Sịḅịda-Agbamịẹḅọ ḅẹ warị mẹ ḅẹ ogigo ḅio sọ mum. Anịanga ori anị yọ mẹ ḍikiḍikiapụ ma na lẹgị tẹ fịnị temim.

⁵⁵ Tẹ agbamịẹ opu alapụ ma na bebe Ḅẹrẹ-siri mẹ na ḅụụkụrọma tẹ ḅẹrẹ kẹ Jizọsị sịḅị sẹịn ḅẹ ḍọkịm, mịẹtẹ ini ọ̀ ḅaa ḅarị ḅara, kụma ini inetẹ gberie-sọ ḍọkị ḅo-a.

⁵⁶ Tọnwa apụ ḅẹrẹ-kiri sime apụ ḅara kẹ iruo aị ḍuko Jizọsị sịḅị sẹịnm, kụma in ḍuko aị ma gbọrụ ḅụ mu-a.

⁵⁷ Anịtẹso ja atomi saakị sịẹ tẹ mị iruo ye mẹ ḍuko Jizọsị ọgọnọ gbanam.

⁵⁸ “Wa naam ọ̀ ḅẹẹarị, ‘À mie tomi ḅara kẹ nama wararị Tamụnọ-warị mẹ kan sara tẹ tẹra aḍin ḅọrọtẹ so tomi nama-a ye nama ḅa.’ ”

⁵⁹ Anị sime-ḅara, sime-ḅara sọ, ini sọ inetẹ in ḍuko aị ma mịẹ tẹ arị gbọrụ ḅụ mu-a.

⁶⁰ Tẹ Sịḅịda-Agbamịẹḅọ ḅe nwẹnị inimgba tọrọkọ saakị sịẹ tẹ Jizọsị gbela, “In ḍuko ị́ sịḅị gbanarị aị ma ị́ pakịrị-ḅịḅị nyana arị pịrị-a?”

⁶¹ Kụma Jizọsị gbọsime tẹ gbọrụ ẹkwẹn sọ kọn ḍụkụ-a. Tẹ Sịḅịda-Agbamịẹḅọ ḅe pịkị siin ò gbelam, “Mẹsaya, Bomatẹ Tamụnọ ḅe Tụḅọ ḅe?”

⁶² Jizọsị nwẹnị pakịrị, “Yẹrịị, tẹ ọmịnị-mgba Tomḅọ Tụḅọ ḅe ẹrị ḅa, ọ̀ Kụrọmamgba Nyanaḅọ ḅe ama-ḅara anga lẹgị tẹ So-tọrụ ḅẹ oḅuto na koro-ḅoarị!”

⁶³ Sịḅịda-Agbamịẹḅọ ḅe nwẹnị amịna ọgọnọ ḅẹ kapa kan tẹ ḅẹẹ, “Wa ḅarị jaị ḍuko ḅẹ apụ ḅii-a!

⁶⁴ Ó ḅeri kẹ ọ̀ kọn Tamụnọ mịẹ-sima ẹkwẹn mẹ naa tẹ. Ndẹẹ ọmịna ḅẹrẹ-pẹlẹ ḅịḅị?” Inimgba gbọrụ-ḅịḅị kẹ ḅẹrẹ-pẹlẹ ọ̀ ḅara simam: ḅẹrẹ ọ̀ ḅara si tẹ ini ọ̀ ḅaa ḅa.

⁶⁵ Ịna ḅụ ḅẹ ja apụ nwẹnị fịla kẹ Jizọsị isi, tẹ ḅịtẹ kẹ ọ̀ tọrụ fịna tẹ ọ̀ ḅakụ. Ini mẹẹ, “Tọnma tẹ ị́ ḅakụ ḅọ gotẹ!” Tẹ anị yọ mẹ ḍikiḍikiapụ ma ori ọkị tẹ ḅara finji ọ̀ tọrụ ḅọrọm.

Pita Jizọsị Pikim

⁶⁶ Pita paa ogigo mẹ ḅẹ ideri anga ḅụ simearị ogbo Sịḅịda-Agbamịẹḅọ ḅe fịrịmẹnjị-eremịna-awọmẹ ma ḅẹ gbọrụḅọ ḅo ori na kuram.

⁶⁷ Á Pita fịnị temiarị mẹ kẹ ori ẹrị sakị á da-da ò ḍiki tẹ ḅẹẹm, “Ị́yẹrị sọ Nazarẹtị ḅẹ Jizọsị ḅẹ na simem.”

⁶⁸ Kụma ò pikim. Ọ̀ nwẹnị pakịrị, “À nimi-a, í ḍukoarị ye mẹ fiearị ye sọ à naa-a,” tẹ ọ̀ nwẹnị mẹnjị tolu-ḅọrọ anga mẹ mu. Anịtẹso anị gbọrụ sakị mẹ ḅụ ọḅọkọ nwẹnị paan.

⁶⁹ Fịrịmẹnjị-ẹrẹḅọtụḅọ ma anịanga ori ẹrị sakị á ḍuko sịẹsime wararị apụ pịrịm, “Ori ịna ḅụ ḅẹ gbọrụḅọ!”

⁷⁰ Kụma Pita sin anị pikim. Sakị kẹlẹ ḅọrọ tẹso, anịanga sịẹsime apụ ma jen kẹ anị ḍuko Pita sịḅị gbanam, “Í inetẹ pịkị ḅịa mịnẹ ị́yẹrị ịna ḅụ ḅẹ gbọrụḅọ-a, kẹ gotẹ ọkọ ḅẹẹarị, ị́yẹrị sọ Galili ḅụ ḅom.”

⁷¹ Anịtẹso Pita ḅẹẹm, “À ye karị tẹ ḍukoarị mịnẹ karakara mẹ mie à ḍukoarị! Yee Tamụnọ fomu-ḅara kẹ ị̀ pịrị à karakara ḍuko-a ḅẹḅẹ! Ọ́ nwẹn ḅẹẹarị tomḅọ ḅe gboloma ye à nimi-a!”

⁷² Tẹ paa anị gbọrụ sakị mẹ ḅụ ọḅọkọ nwẹnị maa sakị karama sakị kẹ paan, tẹ Pita nwẹnị Jizọsị kẹ ọ̀ ḅẹẹ ḅịḅị mẹ kẹ ḅiokoroma, mịnẹ, “Tẹrẹmẹ ọḅọkọ maa sakị karama sakị kẹ paan, ị́ tẹra sakị kẹ ḅẹẹ ḅa mịnẹ í ì nimi-a.” Tẹ ọ̀ ḅarị inetẹ ọ̀ ḅụụ ọlọ-a tẹ owum.