Makị 11 - FỊAFỊA BAỊBỤLỤ

Jizọsị Owu Ḅara Iḅi-ḅọ Ḅara Kẹ Jeruselemu Sọ-mum

¹ In ḅo Jeruselemu kpeki tẹ, Bẹtịfeji na Bẹtani na ama ma lam Olivu Tụndụ mẹ akaka ḅụ. Anịanga ḅụ Jizọsị ò ḍukamẹnjịapụ ma ḅẹ maa apụ kẹ tọrọkọ tarị fịrịmam,

² ọ̀ mịna aị ma tẹ ịn mịẹ ḅẹ aị ma ḍuko ịn pịrịm mịnẹ, “Ọmịnị ọmịna tọrọkọ-jụ ḅio simearị kala-ama mẹ muu. Ọmịnị anịanga laarị, laarị, ọmịnị ẹrị ḅa ịn gbọrụ kala yedogi-nama kpọ wẹrị wararị, jen sakị kịnị amụ kpọlịtẹ kẹ mẹnjị-a ye. Ọmịnị ò fima tẹ kẹ mịanga ḅoo.

³ Tẹ gbọrụḅọ ó gotẹ anị ḅara mịẹarị ye kẹ ó gbela-gbela, ó ḍuko mḅọ pịrị mịnẹ Sịḅịdaḅọ ḅe ò ḅiiarị, tẹ ala-a sakị ḅụ ọ̀ pịkị ọ̀ kẹ fịrịma ḅa.”

⁴ Anie ḅụ ịn mu tẹ etela ḅụ gbọrụ warị ḅọkọ anga kpọọ wararị gbọrụ kala yedogi-nama ẹrịm. Ini ò fimarị ogbo,

⁵ anịanga sịẹsime wararị apụ ma ḅe apụ in gbelam, “Ó tiye mịẹarị, ọ́ nwẹn kẹ kala yedogi-nama ḅe fimarị ye mẹ?”

⁶ Ịn nwẹnị Jizọsị ḍuko ịn pịrị tẹ gbọrụ ḅara mẹ kẹ ịn pakịrị, tẹ tomi ma nwẹnị ịn wẹrịso tẹ in so.

⁷ Ịn nwẹnị kala asụ ḅe ọkị-ḅo Jizọsị pịrị, tẹ ịna ọgọnọ ḅẹ akapa kẹ nama ḅe ọgọnọ anya, tẹ Jizọsị nwẹnị ori ọgọnọ lẹgị.

⁸ Tọnwa-apụ ịna ọgọnọ ḅẹ akapa kẹ etela mẹ dẹẹm, osi apụ piri-ḅio sịn aḅara pẹlẹ pẹlẹ tẹ kẹ etela mẹ dẹẹarị sakị.

⁹ Tọrọkọ sime apụ na ọḅụjụ in ḍuka-muarị apụ na nwẹnị saakị oloku, “Ọ́ Tamụnọ tokinii! Tamụnọ KỊNỊNYANAḄỌ ḅe ẹrẹ ḅụ ḅoarị ḅọ ḅe bomaa!

¹⁰ Tamụnọ wamịna ḍaḅọ Devidi Ama-da mẹ tẹ ḅoarị ye mẹ bomaa! Ọ́ Tamụnọ tokinii!”

¹¹ Jizọsị nwẹnị Jeruselemu mẹ ḅio sọ, Tamụnọ-warị mẹ mu tẹ ye goyegoye ḍiki ikelema. Kụma ene kpọma mu lama tẹ ẹrẹsị, ori ò Ḍukamẹnjị Oyi Maa apụ Finji ma na paka-so Bẹtani mum.

Jizọsị Ịla Sịn Worim

¹² Anị ḅẹ ene-ḅaa ḅụ, ịn Bẹtani ḅụ sime tẹ pịkị ḅoarị ogbo ḅuru nwẹnị Jizọsị tarị.

¹³ Ala-jụ ḅụ ọ̀ gbọrụ ịnyịnya sụa puruku wararị ịla sịn ẹrị tẹ mu ḍikim ori anị ọgọnọ mgbọlụ ẹrị ḅarị ḅoto. Kụma ò ḅo anị la sakị ịnyịnya kịngẹ anie ori ẹrị ye, sakị mẹ amụ ḅo ịla sịnmgbọlụ sụa-sụa karakara sakị la-a ẹrẹsị.

¹⁴ Jizọsị nwẹnị ịla sịn mẹ ḅẹẹ, “Gbọrụḅọ sọ ḅarị jen kẹ ị́ ḅụ paka ịla mgbọlụ fị ḅịa!” Tẹ ò ḍukamẹnjịapụ ma ò ḍuko ye mẹ naam.

Jizọsị Tamụnọ-warị Mẹ Mum

¹⁵ In ḅo Jeruselemu ḅio sọ sakị Jizọsị Tamụnọ-warị mẹ mu tẹ ye fẹ sime apụ na dẹrị-apụ mamgba na dee pakamam. Ori igbigi ḍima apụ ma adẹbịlẹ ma pịkị iḅom, pịkị nwẹẹrẹsị dẹrị-apụ ma ịkasiye ma sọ,

¹⁶ tẹ ọ̀ ḍụkụ tẹ gbọrụḅọ-sọ ye dogi tẹ kẹ Tamụnọ-warị mẹ ḅẹ ogigo mẹ ḅio mẹnjị ḅọrọ-a.

¹⁷ Anịtẹso ò ye kẹ tomi ma tolumam, “Fịafịa Ḍiri mẹ ḅio anị kẹẹ koro wararị, mịnẹ Tamụnọ ḅẹẹm, ‘Ị̀ Warị mẹ ịn kẹ anị sịn ḅarịye sịẹ-sịẹ mamgba ḅẹ atomi ma tẹkẹ warị.’ Kụma ọmịnị anị kẹ furuapụ fukuru sọma tẹ!”

¹⁸ Agbamịẹapụ ma na Oloko toluma apụ ma na miemẹ naam, ọkọẹrẹsị ịn nwẹnị saakị Jizọsị ḅaa ḅẹ ḅọkọ ḍọkị. Ori ịna ḅalafamam, bebe tomina-ogbo mẹ ò tolumarị ye mẹ ḅụ ḅụụ-gbiripu nyanam ẹrẹsị.

¹⁹ Ene ḅoḅiri tẹso, Jizọsị na ò ḍukamẹnjịapụ ma na opu ama mẹ koroma som.

Jizọsị Ịla Sịn Mẹ Ḅẹ Ḍawọye Tolumam

²⁰ Jen ene-ḅaa ḅẹ dede-funfun ḅụ ini etela mẹ ḅụ mẹnjị muarị ogbo in ịla sịn mẹ ẹrịm. Anị anị aḅara ma ḅụ saakị fịị mu kuno ma la tẹ.

²¹ Pita paka ḅọrọ tẹ ye mẹ kẹ ḅiokoroma tẹ Jizọsị ḅẹẹm, “Ye-tolumaḅọ, ḍikii, í wori ịla sịn mẹ fịị tẹ!”

²² Jizọsị nwẹnị ịn pakịrị, “Ọ́ Tamụnọ ḅụ minini nyana-a.

²³ À mịẹtẹ ó nimiarị mịnẹ ḅẹḅọ-ḅẹḅọ tẹ mị tụndụ mẹ ḅẹẹ mịnẹ anị soku paka-ḅo tẹ amịna ḅụụ kẹ tọrụ-minji gbin, tẹ ḅio-maaịn-tọn nyana-a, kụma minini wararị mịnẹ mḅọ ḍukoarị ye mẹ paka ḅa ḅẹẹ ḅọ mẹ anị mịẹ mḅọ pịrị ḅa.

²⁴ Miemẹ gotẹ à ḍuko ọ́ pịrịarị; ọ́ tẹkẹ tẹ Tamụnọ ḅara ye ḅiiarị sakị ḅụ, ó mininii mịnẹ anị ọmịna ḅara la tẹ, anịsakị ó ḅii ye, ḅii ye Tamụnọ kẹ ọ́ pịrị ḅa.

²⁵ Anịsakị ọ́ saakị sịẹ tẹ tẹkẹarị sakị ḅụ, tomḅọ kẹ ọ́ mịẹ si, mịẹ si ọ́ wẹrịso mḅọ pịrịị, mịẹtẹ ọmịna Ḍaḅọ So-ḅio simearị ḅọ ḅe sọ ọ́ mịẹ-irima tẹ aị ma wẹrịso ọ́ pịrị ḅarị ḅara.” [

²⁶ Ó si-wẹrịso ja apụ pịrị-a ḅẹḅẹ, ọmịna Ḍaḅọ So-ḅio simearị ḅọ ḅe sọ ọ́ mịẹ-irima tẹ aị ma wẹrịso ọ́ pịrị ḅịa.]

In Jizọsị Gbelam Tụḅọ Kụrọ Kẹ Ọ̀ Pịrị

²⁷ Ịn pịkị sin mu Jeruselemu lam. Tẹ Jizọsị Tamụnọ-warị mẹ ḅio mẹnjịarị ogbo agbamịẹapụ ma na, Oloko toluma apụ ma na, omongi apụ ma na ọ̀ dama-ḅo

²⁸ tẹ ò gbelam, “Ị́ tọ kụrọ nyana tẹ kẹ mịna aị ma mịẹarị? Mị kụrọ mẹ tụḅọ kẹ ị́ pịrị?”

²⁹ Jizọsị ịn pakịrịm, “Gbọrụ ḅii-ḅịḅị kịngẹ mie à nyana tẹ kẹ ó ḅii ḅarịye, tẹ ọmịnị anị pakịrị ị̀ pịrị tẹ ḅẹḅẹ, yẹrị sọ à nyana tẹ kẹ mịna aị ma mịẹarị kụrọ mẹ ḍuko ọ́ pịrị ḅa.

³⁰ Ó ḍuko ị̀ pịrịị, Jọnị nyana tẹ kẹ Minji Sara kụrọ mẹ tọ-anga ḅo: anị Tamụnọ ḅara ḅo mụnọọ tomina aḅara ḅo?”

³¹ Ịn nwẹnị saakị ini-ini-ini ogboku nụnụa, “Wa tiye ḍuko ḅẹ? Wa ‘Tamụnọ ḅara ḅom’ pakịrị-pakịrị, ọ̀ ḅẹẹ ḅa, ‘Ọkọ kụma ó tiegotẹ Jọnị minini-a?’

³² Kụma wa ḅẹẹ, ‘Tomina aḅara ḅom?’ ” (In tomi ma gotẹ ḅalafaam, gbala ọrụḅọ-ọrụḅọ mininim mịnẹ Jọnị anie ịkịankoroḅọ.)

³³ Anie ḅụ ịn kẹ Jizọsị pakịrị ye anie, “Wa nimi-a.” Jizọsị nwẹnị ịn ḅẹẹ, “Ọkọ ḅẹḅẹ, yẹrị sọ à nyana tẹ kẹ mịna aị ma mịẹarị kụrọ mẹ, à ḍuko ọ́ pịrị ḅịa.”