Makị 1 - FỊAFỊA BAỊBỤLỤ

Minji-sara Jọnị Tamụnọ Ẹkwẹn Kọnm

¹ Mie Jizọsị Kịrayịsị, Tamụnọ Tụḅọ ḅe gboloma Iḅi-Oku mẹ.

² Ịkịankoro Ayịzaya kẹẹ ye mẹ mie anị kẹ Suku-saakị ye: Tamụnọ ḅẹẹm, “Àrị ị̀ fịrịmẹnjịḅọ kẹ ị́ tọrọkọ tarị fịrịma ḅa, kẹ etela mẹ tẹlẹma ị́ pịrị.”

³ Gbọrụḅọ ịkpa mẹ ḅio sime tẹ olokuarị, “Ọmịnị etela mẹ tẹlẹma KỊNỊNYANAḄỌ ḅe pịrịị; ọmịnị ọ̀ mẹnjị-ḅọrọ ḅarị anga mẹ mịẹ gono-gonomaa!”

⁴ Mie ḅụ Jọnị ịkpa mẹ ḅio tolu-pakam, minji kẹ tomi ma sara, saratẹ pịkị Tamụnọ ẹkwẹn kọnm. Ò ḍuko ịn pịrịm, “Ọmịnị ọmịna asi ḅụ pịkị tẹ in minji kẹ ọ́ sara, anịsakị Tamụnọ ọmịna asi ma wẹrịso ọ́ pịrị ḅa.”

⁵ Judiya ibe mẹ ḅụ na, Jeruselemu mẹ ḅụ na tọnwa apụ Jọnị poki ḅẹ tẹ paka-mum. Ini ịna asi ma goo gootẹ ò minji kẹ ịn saram Jodanị tọrụ mẹ ḅio.

⁶ Jọnị ḅe nambulo oju ḅẹ isuke kẹ ḍori kapa anie ọ̀ sụa tẹ nama oju apara kẹ ò ḅiri pono yee, anịsakị igurube na piri-ḅio-ḅẹ ḅẹm na anie ọ̀ kẹ fịye sọma tẹ fị yee.

⁷ Ò ḍuko wasama tomi ma pịrịm “Ị̀ ọḅụjụ ḅo ḅarị ḅọ ḅe ị̀ nẹngị lama wararị. Àrị iḅima tuu tẹ ọ̀ ḅụọ ḅẹ okuro aḍigi fima sọ la-a.

⁸ Yẹrị papaa minji mie à kẹ minji kẹ ọ́ sararị, kụma ori Fịafịa Tẹmẹ ḅe mie ọ̀ kẹ minji kẹ ọ́ sara ḅarịye.”

Minji-sara Jọnị Minji Kẹ Jizọsị Saram Jizọsị Pịkị Ḅuru-ịmọm Tẹ Ekwesu Ọ̀ Daaḍikim

⁹ Amụ ala-a ogbo Jizọsị nwẹnị Galili ibe ḅẹ Nazarẹtị ḅụ sime tẹ ḅo, tẹ Jọnị nwẹnị Jodanị tọrụ mẹ ḅio minji kẹ ọ̀ sara.

¹⁰ Jizọsị minji mẹ ḅio sime tẹ iwo ḅo gbọrụ sakị ori ẹrịm so finjiarị tẹ Fịafịa Tẹmẹ ḅe olosịkịya kịka tẹ fiin paka-ḅo ori ọgọnọ gbanarị.

¹¹ Tẹ gbọrụ pọkọ nwẹnị So-ḅio ẹkwẹn tẹ ḅẹẹ, “Ị́yẹrị anie ì ḅụụ yela iḅi Tụḅọ. Ị́ mịẹye ị̀ ḅụụ-ḅẹlẹm.”

¹² Anị gbọrụ-kirikiri Fịafịa Tẹmẹ ḅe ọ̀ mịẹtẹ ori ịkpa mẹ ḅio mum,

¹³ anịanga ḍin amesi ọ̀ nwẹn sime tẹ Ekwesu ọ̀ daaḍikim. Piri-ḅio-ḅẹ anama sọ anịanga simem, kụma enjẹlị apụ ḅo ḅarasụa ọ̀ pịrịm.

Jizọsị Ọ̀ Kọrịnama Saakịm Galili Ḅụ Anịanga Ori Inia Inji-ḅaapụ Sịn Ọkịm

¹⁴ Ịn Jọnị kun ikoli suu tẹso, Jizọsị Galili mu tẹ Tamụnọ ḅara ḅo Iḅi-Oku mẹ ḍukom.

¹⁵ Ori mẹẹ, “Tamụnọ Ama-da mẹ kpeki tẹẹ! Ọmịnị ọmịna asi ḅụ pịkị tẹ Iḅi-Oku mẹ mininii!”

¹⁶ Jizọsị Galili Tọrụ akaka mẹnjịarị ogbo, ọ̀ maa inji-ḅaapụ ẹrịm, Sayịmọnị na ori iyimbere Anduru na, ini ịgbọ kẹ inji ḅaarị.

¹⁷ Jizọsị nwẹnị ịn ḅẹẹ, “Ọmịnị ì ḍuka-ḅoo, tẹ à tomi kun-kun ḅara kẹ ó toluma ḅa.”

¹⁸ Anị kirikiri ini ịna ịgbọ ma wẹrịso tẹ ò ḍuka-mum.

¹⁹ Ọ̀ kẹlẹ mẹnjị tọrọkọ mu tẹso, ò jen maa amịnapụ ẹrịm, Jemusị na, Jọnị na, Zẹbidi owiapụ-awọmẹ ma. Ini ịna arụ ḅio sime tẹ ịna ịgbọ ma tẹlẹma simem.

²⁰ Jizọsị ini ẹrị gbọrụ kiri, ọ̀ nwẹnị ịn sịn; ịn nwẹnị ịna ḍaḅọ Zẹbidi na ori ọkọ tẹ kọrịnama kọrị ọ̀ pịrịarị apụ na koroma-so arụ mẹ ḅio, tẹ Jizọsị ḍuka-mu.

Jizọsị Si-tẹmẹ Ḅụụ Ḅio Sime Tomḅọ Gwọm

²¹ Jizọsị na ò ḍukamẹnjịapụ na ḅo Kepanọmụ ama mẹ lam, tẹ jen Ịnyọsara-Ene ḅụ Jizọsị nwẹnị mu ịna ama-warị ḅio saakị ye toluma.

²² Ò tolumaye mẹ naa apụ ma ọ̀ kẹ ye mẹ toluma ḅara gotẹ ḅụụ-buam, ò toluma ḅara na Oloko toluma apụ ma ye toluma ḅara na kịka-a ẹrẹsị; anie nakara, kụrọ nyana ḅara anie ọ̀ kẹ toluma ye.

²³ Anịtẹso ala-a kụma si-tẹmẹ ḅụụ ḅio sime tomḅọ ama warị mẹ ḅio sọ ḅo tẹ kararama-oloku tẹ ḅẹẹ,

²⁴ “Nazarẹtị ḅẹ Jizọsị, ị́ wamịnị na tọ mịẹye nyana gboloma? Í ḅo wa ḅaa guluguluma ḅẹ tẹ mịanga? Àrị í nimi wararị — ị́yẹrị anie Tamụnọ fịafịa oku-mẹnjịḅọ!”

²⁵ Jizọsị nwẹnị tọn tẹmẹ ḅe pịrị, “Gbọsimee, tẹ tomḅọ ḅe ḅụụ ḅio paka-ḅoo!”

²⁶ Si tẹmẹ ḅe nwẹnị kụrọma tomḅọ ḅe jike, kụrọma kararama-oloku, tẹ ọ̀ ḅụụ ḅio paka-ḅo.

²⁷ Miemẹ kẹ anịanga sime apụ ma ḅụụ-buama la ḅara ḅụ ịn saakị jụmọ-jụmọ gbelam, “Mie ḅọrọ tiye? Miemẹ ḅọrọ ịwọ tolumaye mụnọọ? Ḅị tomḅọ ḅe ọ̀ kụrọ nyana wararị kẹ tọn si-atẹmẹ pịrị tẹ ini ọ̀ ḅịḅị poki!”

²⁸ Anịtẹso Jizọsị gbolomaye mẹ nwẹnị sarasarama mu Galili ibe ḅụ anga-anga mamgba la.

Jizọsị Tọnwa Obiapụ Gwọm

²⁹ Jizọsị na ò ḍukamẹnjịapụ ma na, Jemusị na Jọnị na sọ ịna ḅụ simem, tẹ ama-warị mẹ wẹrịso tẹ da-da Sayịmọnị na Anduru na warị mum.

³⁰ In mu la sakị Sayịmọnị ta iyingi akọm kọn-arị tẹ iḅila ọgọnọ ḅọlọlọ wararị, tẹ Jizọsị warị mẹ sọ-mu gbọrụ kiri, ini anị gbolomaye ḍuko ọ̀ pịrịm.

³¹ Ọ̀ nwẹnị mu á la, á ḅara ọlọ, tẹ ḅarasụa á pịrị tẹ á saakị. Akọm mẹ nwẹnị á ḅụụ kaan-so tẹ á saakị fịrịmẹnjị ịn pịrịm.

³² Ịrụa tuukoro tẹ ene ḅoḅiri tẹso, tomi obi apụ mamgba na oru sịḅị ḅio sime apụ na kẹ Jizọsị dama-ḅom.

³³ Ama mẹ ḅẹ apụ mamgba ḅo warị nụngọ mẹ ḅụ kobirim.

³⁴ Jizọsị tọnwa obi apụ gwọm, obi ḅara, ḅara mamgba, ọ̀ pịkị tọnwa oru dee pakamam tomina aḅụụ ḅio. Oru ma ò nimim ẹrẹsị, ọ̀ ḍụkụ tẹ in gberie-sọ ḍuko-a.

Jizọsị Galili ḅụ Tamụnọ Ẹkwẹn Kọnm

³⁵ Ene-ḅaa ḅẹ dede-funfun ḅụ, ene amụ finji koro-a ogbo, Jizọsị warị koroma-som. Ori ama mẹ ḅio mẹnjị paka tẹ mu yaụ-sime wararị anga tẹkẹm.

³⁶ Kụma Sayịmọnị na, ori na mẹnjị apụ na paka-mu ọ̀ ḍọkịm,

³⁷ tẹ ini ọ̀ ḍọkị-ẹrị tẹso, ịn nwẹnị ọ̀ ḅẹẹ, “Ḅẹḅọ-ḅẹḅọ ị́ ẹrị ḅẹ ḍọkịarị.”

³⁸ Kụma Jizọsị pakịrịm, “Wa mẹnjị mu osi ama ma tẹ mị iri ḅụ simearị anga ma sọ la na-iḅim. Àrị ḅio ḅụ sọ à Tamụnọ ẹkwẹn mẹ kọn nyanam, anie mie à gotẹ ḅo ye ẹrẹsị.”

³⁹ Mie ḅụ ọ̀ mẹnjị Galili mamgba kana-koro tẹ ama-awarị ma ḅio Tamụnọ ẹkwẹn kọn, kọn tẹ oru dee, dee pakamam tomina aḅụụ ḅio.

Jizọsị Sofịnị-Obi Kọn Owiḅọ Gwọm

⁴⁰ Sofịnị-obi kọn-arị gbọrụ owiḅọ Jizọsị dama-ḅo tẹ kparakị tẹ ọ̀ tẹkẹm ọ̀ ḅarasụa ọ̀ pịrịị. Ori mẹẹ, “Í ḅii namịna í inetẹ ị̀ mịẹ fịafịama ḅarị ya.”

⁴¹ Jizọsị ọkụrụkụrụ nyana lama ḅara ḅụ, ọ̀ ḅara sụn pakama tẹ kẹ tomḅọ ḅe lama tẹ pakịrịm, “À ḅiim, fịafịaa!”

⁴² Anị gbọrụ kiri obi mẹ tomḅọ ḅe ḅụ so tẹ, ori oju-kiri fịafịam.

⁴³ Anịtẹso Jizọsị ẹkwẹn kụrọma tomḅọ ḅe pịrị tẹ ọ̀ ḅẹẹm ò soo anị gbọrụ sakị mẹ ḅụ,

⁴⁴ tẹso, ò tomḅọ ḅe ḅẹẹm, “Pokii, miemẹ gbolomaye ḍuko gbọrụḅọ-sọ pịrị ma. Kụma da-da agbamịẹḅọ ḅe dama-mu tẹ ori í pekele-ḍiki; anịtẹrẹmẹ kẹ ḅẹḅọ-ḅẹḅọ ḍie mịnẹ ị́ gwọọ tẹẹ, tẹ Mozizi tọn koroma agba mẹ mịẹẹ.”

⁴⁵ Kụma tomḅọ ḅe so tẹ saakị ọ̀ la anga, la anga paka ye mẹ ḍuko wasam. Paka ye ḍuko ḅụ, ori anị kẹ ẹkwẹn la ḅara mịẹtẹ Jizọsị ḅarị inetẹ ama ori ẹrị ḅẹ ḅara kẹ ama mẹ sọ mu-a. Paka ye ḍuko ḅụ, ọ̀ paka mu ḅụụ-yaụ-anga ḅụ simem, tẹ tomi nwẹnị anga anga ḅụ sime tẹ ò dama-ḅo.