Luku 9 - FỊAFỊA BAỊBỤLỤ

Jizọsị Ò Ḍukamẹnjị Oyi Maa apụ Finji Ma Fịrịma Pakamam

¹ Jizọsị ò Ḍukamẹnjị Oyi Maa apụ Finji ma sịn kobiri tẹ kụrọ kẹ ịn pịrịm ịn kẹ oru dee sin tẹ pịkị obi gwọọ.

² Anịtẹso ọ̀ nwẹnị ịn fịrịma pakama mịnẹ in mu Tamụnọ Ama-da mẹ gbolomaye ḍuko tomi pịrị tẹ pịkị obi apụ gwọọ.

³ Ò mie ḍuko ịn pịrịm, “Ọ́ nwẹn muarị ye mẹ gberie-sọ ọ́ kẹ sụa mu ma, anị ḅọrọ mkpara-o, ye ḅii akpa-o, fịye-o, igbigi-o, ḍima kapa kịngẹ sọ, ọmịnị ọkị ma.

⁴ Ó mu tẹ ini ọ́ daa-ọkị anga ḅẹḅẹ ọmịnị anị warị sime nwenii ọmịnị anị ama mẹ koroma so sakị la.

⁵ Kụma tomi ọ́ daa-ọkịa anga goyegoye ọmịnị ama mẹ koroma so, tẹ ọmịna aḅụọ oḅolo onwin sọ gugu sara, tẹ kẹ ḅeri-nụnụye sọma ịn pịrịị.”

⁶ Jizọsị ḍukamẹnjịapụ ma nwẹnị mu ama-ama mamgba la tẹ Iḅi Oku mẹ ḍuko, tẹ pịkị obiapụ gwọọ.

Ẹrọdị Ḅioḅẹngbọ Pikirim

⁷ Anịtẹso Ẹrọdị, Galili da ḅọ ḅe, paka aị mamgba naa sakị, arị kpọma ò ḅioḅẹngbọ pikirimam, anie jen-apụ ḅẹẹm mịnẹ Minji Sara Jọnị fị-ḅụ-saakị tẹ ẹrẹsị.

⁸ Osi apụ mẹẹ Ịlayịja pịkịma ḅo tẹ; anga mẹẹ elemu ịkịankoroapụ ma ḅẹ ḅọ fị-ḅụ-saakị tẹ.

⁹ Ẹrọdị kụma ori mẹẹ, “Yẹrị kọkọ Jọnị sịḅị pẹlẹ-siin, à nwẹn kẹ ẹrẹ naarị ḅọ ḅe pịkị tụḅọ?” Ọ̀ nwẹnị ọ̀ mịẹ tẹ Jizọsị ẹrị ḅẹ ḅara ḍọkị lama.

Jizọsị Fịye Kẹ Kịnị Oyi Maa Ẹndẹ Finji Na Kịnị Oyia Asi Na Pịrị Fịm

¹⁰ Jizọsị fịrịmẹnjịapụ ma nwẹnị pịkịma ḅo tẹ ịn kọrị ye goyegoye ḍuko ọ̀ pịrị. Tẹ ori na ini na ngẹrị nwẹnị so Bẹtịsayịda nwẹn-sịn ama mu.

¹¹ Tomina-ogbo-ogbo ma ḅo ọ̀ mẹnjịarị ḅara naa tẹso, ịn nwẹnị ò ḍuka-mu. Tẹ ọ̀ nwẹnị ịn daa-ọkị tẹ Tamụnọ Ama-da mẹ gboloma ye ḍuko ịn pịrị, tẹ pịkị gwọọ ḅii apụ gwọ.

¹² Ḅoḅiri ịrụa tuuideriarị ogbo, ò Ḍukamẹnjị Oyi Maa apụ Finji ma ḅo Jizọsị la tẹ ḅẹẹm, “Tomi ma ḅẹẹ ịn sọ-mu mị iri ḅụ ama aḅio na ḍụọ akiri na ḅụ ye ḍọkị fị tẹ mono, mịanga mẹ kịnị anga-a anga ḅẹ sakị.”

¹³ Kụma Jizọsị ịn ḅẹẹm, “Ọmịnị ḅarana fịye ḍọkị tomi ma pịrị fị.” Ịn nwẹnị pakịrị, “Fịturu sọnọ akpo na inji amẹngbọ na ngẹrị mịẹ wamịna aḅara emi ye. Ị́ ḅii wa mu mị bebe tomina-ogbo mẹ pịrị fị ḅẹ fịye fẹ?”

¹⁴ (Anịanga sime atomi kịnị oyi maa ẹndẹ finji na kịnị oyia asi na lam.) Jizọsị nwẹnị ò ḍukamẹnjịapụ ma ḅẹẹ, “Yee tomi ma kpo kpo ḅụ lẹgị, kịnị amesi oyi finji gbọrụ kpo, gbọrụ kpo.”

¹⁵ Jizọsị ḍukamẹnjịapụ ma ọkọ kẹ tomi ma lẹgịma tẹso,

¹⁶ Jizọsị nwẹnị fịturu sọnọ akpo ma na inji amẹngbọ ma na ọkị tẹ tọrụ saakị so ḍiki, tẹ arị gotẹ ịmịẹtẹ kẹ Tamụnọ ḅẹẹ, ọ̀ nwẹnị arị paịn tẹ kẹ ò ḍukamẹnjịapụ ma pịrị mịnẹ in ḍie tomi ma pịrịị.

¹⁷ Inimgba fị furo ḅinmam, tẹ kọn aị ma ò ḍukamẹnjịapụ ma arị tan oyi maa akana finji ḅinmam.

Jizọsị Gbolomaye Ḅụ Pita Ḍuko Pakama ye

¹⁸ Gbọrụ ene ḅụ, Jizọsị ngẹrị tẹkẹarị ogbo ò ḍukamẹnjịapụ ma ḅo ọ̀ lam. Ọ̀ nwẹnị in ḅii, “Tomi ma ini ị̀ kẹ tụḅọ sịn-arị?”

¹⁹ Ịn nwẹnị pakịrị, “Ja apụ ị́ kẹ Minji-sara Jọnị sịn-arị; jen-apụ pịkị ị́ kẹ Ịlayịja sịn-arị, tẹ jen-apụ pịkị ḅẹẹarị elemu fịị ḅọrọ tẹ ịkịankoroapụ ḅẹ gbọrụḅọ ḍima ḅo tẹ.”

²⁰ Ọ̀ nwẹnị in gbela, “Ọmịnị ḅọrọ tọ ḅara? Ọmịnị ị̀ kẹ tụḅọ sịn-arị?” Pita nwẹnị pakịrị, “Ị́yẹrị anie Tamụnọ Mẹsaya ḅee.”

Jizọsị Ọ̀ Tọrụsiẹrị Na Fịị Na Gbolomaye Ḍukom

²¹ Anịtẹso Jizọsị nwẹnị tọn kụrọma ịn pịrị mịnẹ ịn miemẹ ḍuko gbọrụḅọ-sọ pịrị ma.

²² Ọ̀ pịkị ịn ḅẹẹm, “Tomḅọ Tụḅọ ḅe ẹrị ḅarị tọrụsiẹrị ḅakam, tẹ ama ḅẹ omongiapụ ma na, agbamịẹapụ ma na, Oloko Tolumapụ ma na ọ̀ sịkị ḅa. Ini ọ̀ ḅaa ḅa, kụma tẹra aḍin karama ene ḅụ Tamụnọ ọ̀ saakịma tẹ ò ḍumo ḅa.”

²³ Tẹ ọ̀ nwẹnị inimgba ḅẹẹ, “Gbọrụḅọ nwẹnị ì ḍukamẹnjị ḅẹ-ḅiiarị ḅẹḅẹ, mịẹ ḅara, mịẹ ḅara sọ, mḅọ amịna ḅụụ kẹ ḅioḅọrọma tẹ ene ḅaa ene, ḅaa ene mḅọ amịna ẹngbẹsẹ-sịn saakị dogi, tẹ ì ḍuka ḅoo.

²⁴ Ḅẹḅọ-ḅẹḅọ tẹ amịna ḍumo ḅọrọma ḅẹ ḅiiarị ḅọ, anị fama ḅa, kụma ḅẹḅọ-ḅẹḅọ tẹ ì gotẹ amịna ḍumo famarị ḅọ anị ḅọrọma ḅa.

²⁵ Tomḅọ ḅọrọ sọye nyana ḅẹ bebe tomikiri mẹ mḅọ nye sọ tẹ mḅọ ḅioju nwẹnị fa kụma? Gbala-gbala, gbọrụ sọye sọ mḅọ nyana-a.

²⁶ Ì ḅioju na ì tolumaye na nwẹnị gbọrụḅọ ḅụụ-jịrịmarị ḅẹḅẹ, mḅọ Tomḅọ Tụḅọ ḅe sọ ḅụụ-jịrịma ḅa, ò ḅo ori ebube ḅio na Ḍaḅọ ḅe na ori fịafịa enjẹlị ma na ebube ḅio sọ sakị.

²⁷ Mịẹ ḅarịye mie à ḍuko ọ́ pịrịarị, mịnẹ mịanga simearị ja apụ fịị ḅịa nwenii ịn tọrụngbọ kẹ Tamụnọ Ama-da mẹ ẹrị sakị la ḅa.”

Jizọsị Ḅụụ-ḍima Mẹ

²⁸ Ọ̀ mịna aị ma ḍuko tẹ sọnọma aḍin ḅọrọ tẹso Jizọsị nwẹnị Pita na, Jọnị na, Jemusị na ọkị tụndụ ọgọnọ tẹkẹ ḅẹ mu.

²⁹ Ọ̀ tẹkẹarị ḅe sakị ọ̀ tọrụkuḅu ḍima tẹ, ọ̀ kapa sọ weema tọrụ sọ ḅara kẹ ḅịya tẹ.

³⁰ Anị gbọrụ-kirikiri maa apụ, anie Mozizi na Ịlayịja na nwẹnị ḅo ori na ẹkwẹn-ma.

³¹ So-ḅio ḅẹ ebube ḅụ mie in ḅo yee. Tẹ ịn nwẹnị Tamụnọ tọn ye mịẹ ḅẹ ḅara ḅụ, ala-a sakị Jeruselemu ḅụ ọ̀ fịị ḅẹ ye mẹ gboloma ye kẹ Jizọsị na ẹkwẹn.

³² Anị sakị Pita na osi apụ ma na mono ḅọrọ-so wararị, tẹ ịn naa saakị sakị in Jizọsị ebube mẹ na osi ori na sịẹ wararị maa apụ ma na ẹrịm.

³³ Tomi ma Jizọsị koroma soarị ogbo mie Pita ọ̀ ḅẹẹ ye, “Ị̀ Nyanaḅọ, anị kpọma iḅim wa mịanga emi ye mẹ. Wa tẹra warị nama ḅa. Ị́yẹrị gberie, Mozizi gberie, Ịlayịja pịkị gberie.” (Kụma karakaramatẹ ò ḍukoarị ye ò nimi-a).

³⁴ Ọ̀ paa ẹkwẹn-arị ogbo mie so kpiti ḅo ịn gbaịn ye, tẹ Jizọsị ḍukamẹnjịapụ ma nwẹnị so kpiti ḅo ịn gbaịn ye mẹ gotẹ ḅalafa.

³⁵ Tẹ gbọrụ pọkọ nwẹnị kpiti so mẹ ḅio ḅẹẹ, “Ḅie à sẹlẹ ọkị Tụḅọ ḅe, ọmịnị ò pokii!”

³⁶ Ịn ḅarị pọkọ mẹ naa-a sakị Jizọsị ngẹrị kirikọntẹ. Ò ḍukamẹnjịapụ ma, nwẹn pembe ye ẹrị ye mẹ, in ḍuko gbọrụḅọ-sọ pịrị-a anị sakị mẹ ḅụ.

Jizọsị Si-tẹmẹ Ḅụụ Ḅio Sime Owiḅọtụḅọ Gwọm

³⁷ Anị ḅẹ ene-ḅaa ḅụ Jizọsị na ò ḍukamẹnjị tẹra apụ ma na nwẹnị tụndụ mẹ ọgọnọ koro-ḅo, tẹ gbọrụ opu tomina-ogbo nwẹnị ḅo Jizọsị na bịama.

³⁸ Tẹ gbọrụ owiḅọ nwẹnị inweni-ogbo mẹ ḅio oloku, “Ye-tolumaḅọ, sisi paa ị̀ tụḅọ ḅe ḍiki, ò sikima tẹ à jen tụḅọ iyi-a!

³⁹ Gbọrụ tẹmẹ ori ọlọ-ọlọm; ori ò kun tẹ ḅẹḅẹ ọ̀ bẹkẹma oloku tẹ fụm tẹ, tẹ fiko pịkị ọ̀ ḅịḅị bụrọ tẹ. Ò ye kẹ ọ̀ lama ma ḅọrọarị, tẹ ḅụụ-fụkama lama tẹrẹmẹ ori ọ̀ ḅụụ ḅara sin-arị.

⁴⁰ Àrị í ḍukamẹnjịapụ ma tẹkẹm ini ò dee sin, kụma ini ine-a.”

⁴¹ Jizọsị nwẹnị pakịrị, “Ọmịnị minini nyana-a tẹ pịkị karakara kuroma-a apụ! Ọ́ sịn-arị àrị ọmịnị na sime tọ sakị la ḅẹ? Ndẹẹ àrị ọmịna amịẹaị ma inema la ḅẹ sakị?” Anịtẹso ọ̀ nwẹnị tomḅọ ḅe ḅẹẹ, “Ị́ tụḅọ ḅe kẹ mịanga ḅoo.”

⁴² Tụḅọ ḅe ḅoarị ogbo, oru ḅe ò sukuruma kiri gbin tẹ ò fomum. Jizọsị nwẹnị tọn si-tẹmẹ ḅe pịrị tẹ tụḅọ ḅe gwọ, tẹ ọ̀ kẹ ọ̀ ḍa pịrị.

⁴³ Tamụnọ opu kụrọ mẹ nwẹnị inweni-mgba ḅụụ-buama. Jizọsị ḍuko aị ma paa tomi ma ḅụụ-buamarị ogbo ori ò ḍukamẹnjịapụ ma ḅẹẹm,

Jizọsị Pịkị Sin Ọ̀ Fịị Gbolomaye Ḍukom

⁴⁴ “Ọmịnị à ḍuko ọ́ pịrị ḅẹ-yearị ye mẹ kẹ ḅioḅọrọma ma! In Tomḅọ Tụḅọ ḅe kẹ tomina kụrọ ḅara-ḅio suu ḅẹ tẹẹ.”

⁴⁵ Kụma ò ḍukamẹnjịapụ ma miemẹ fie ye naa-a. Mịẹtẹ ịn naa-a ye, anị ịna ḅụụ kikima ye sọm, tẹ ye mẹ kẹ ò gbela pịkị ịna ḅalafamam.

Tụḅọ Tẹịn?

⁴⁶ Jizọsị ḍukamẹnjịapụ ma nwẹnị ini-ini-ini ogboku gburo-gburo tẹịn ḅọ nụnụa.

⁴⁷ Tẹ Jizọsị in kuromarị ye nimi tẹso, ọ̀ nwẹnị gbọrụ tụḅọ ọkị tẹ ọ̀ kẹ ori akaka sịẹma,

⁴⁸ tẹ ịn ḅẹẹ, “Ị̀ ẹrẹ ḅụ ḅị tụḅọ ḅe daa-ọkị ḅọ ọkị ḅọ, ị̀ daa-ọkị tẹẹ; tẹ ị̀ daa-ọkị ḅọ ọkị ḅọ, pịkị ị̀ kẹ fịrịmaḅọ ḅe daa-ọkị tẹẹ. Ọmịna ḅụ iderima tẹịn ḅọ anie ọmịnị-mgba ḅụ tẹịn ḅọ.”

Ọmịnị Na Tụḅụrụ-aḅọ Tụḅụrụ-aḅọ Anie Ọmịna Jụ Ḅẹ Ḅọ

⁴⁹ Jọnị nwẹnị ḅẹẹ, “Sịḅịdaḅọ, wa gbọrụḅọ ẹrịm ori ị́ ẹrẹ kẹ oru dee-dee sin-arị, kụma ori wamịna ogbo ḅẹ ḅọ-a ẹrẹsị wa ọ̀ dasịẹmam.”

⁵⁰ Jizọsị Jọnị na osi ò ḍukamẹnjịapụ ma na ḅẹẹm, “Ọmịnị ọ̀ dasịẹma ḅẹ ḍọkị ma, ọmịnị na tụḅụrụ-aḅọ anie ọmịna jụ ḅẹ ḅọ ẹrẹsị.”

Sameriya Ḅẹ Gbọrụ Kala Ama Jizọsị Sịkịm

⁵¹ Tamụnọ Jizọsị ọkị iwo so mu ḅẹ sakị kpeki tẹso, ọ̀ nwẹnị tọn-pẹlẹ mịnẹ ò Jeruselemu mu ḅa, tẹ nwẹnị saakị mẹnjị.

⁵² Ọ̀ nwẹnị kịnị kẹ tarị fịrịma, mịnẹ in mu Sameriya ḅẹ gbọrụ kala-ama ḅụ ye goyegoye tẹlẹma ọ̀ wẹrịmaa.

⁵³ Kụma ama mẹ ḅụ ḅẹ apụ ma nimim mịnẹ ọ̀ ḅọrọ Jeruselemu muarị gotẹ ini ọ̀ daa-ọkịa.

⁵⁴ Ò ḍukamẹnjịapụ, Jemusị na Jọnị na, mie ẹrị sakị ini mẹẹ, “KỊNỊNYANAḄỌ, í ḅii wa So-ḅio fịnị sịn koroma ḅo ịn dọkịma ḅaa fama?”

⁵⁵ Jizọsị nwẹnị pịkị tẹ in ḍiki ịganị tẹ ḅẹẹ, “Ọmịna aḅụụ simearị tẹmẹ ó nimi-a, gbala Tomḅọ Tụḅọ ḅe tomina aḍumo fama ḅẹ ḅo-a, kụma ịn ḅọrọma ẹrẹsị.”

⁵⁶ Anịtẹso Jizọsị na ò ḍukamẹnjịapụ ma na nwẹnị so jen kala-ama mu.

Jizọsị Ḍukamẹnjị Ḅẹ Ḅii Apụ

⁵⁷ Ịn mẹnjị ma-muarị ogbo gbọrụ owiḅọ nwẹnị Jizọsị ḅẹẹ, “Ị́ mu anga, mu anga àrị í ḍuka mu ḅa.”

⁵⁸ Jizọsị nwẹnị ọ̀ ḅẹẹ, “Pụnụ ma ịḅụkụ nyana wararị, feni ma sọ ịna awarị nyana wararị, kụma Tomḅọ Tụḅọ ḅe ḅọlọlọ tẹ ịnyọsara ḅẹ anga sọ ọ̀ nyana-a.”

⁵⁹ Ori nwẹnị jen gbọrụ tomḅọ ḅẹẹ, “Ì ḍukamẹnjịị.” Kụma anị tomḅọ ḅe mẹẹ, “Ị̀ Nyanaḅọ, yee à tarị mu ị̀ ḍa ḍiḅi tẹ ḅo.”

⁶⁰ Jizọsị nwẹnị pakịrị, “Yee fịtẹ-apụ ma ịna fịtẹ-apụ ma ḍiḅi. Ị́yẹrị paa mu Tamụnọ Ama-da mẹ gboloma oku mẹ ḍuko wasamaa.”

⁶¹ Jen gbọrụ tomḅọ sọ Jizọsị ḅẹẹm, “Ị̀ Nyanaḅọ, àrị í ḍukamẹnjị ḅa, kụma yee à mu tarị ḅaaḅaa kẹ ị̀ warị ḅẹ apụ ḅẹẹ tẹ ḅo.”

⁶² Jizọsị ọ̀ ḅẹẹm, “Ọgụ ọlọ tẹ kẹ ḍụọ kọrịarịḅọ tẹ tọrụ pịkị ọḅụ ḍikiarị tomḅọ mẹ, mḅọ Tamụnọ Ama-da mẹ na mịẹye nyana-a.”