Luku 6 - FỊAFỊA BAỊBỤLỤ

In Ịnyọsara-Ene Gbolomaye Kẹ Jizọsị Gbelam

¹ Ịnyọsara-Ene mẹ ḅụ Jizọsị mbịaka aḍụọ ḅio mẹnjị-ḅọrọarị ogbo ò ḍukamẹnjịapụ ma mbịaka anyịma-anyịma tẹ ẹsịma fịm.

² Farịsiiapụ ma ḅẹ ja apụ nwẹnị gbela, “Ó tiegotẹ wamịna Oloko ḅẹẹarị Ịnyọsara-Ene ḅụ mịẹ ma ḅẹ ye mịẹarị?”

³ Jizọsị nwẹnị ịn pakịrị, “Jen sakị ḅuru Devidi na ori atomi na tarị tẹ ọ̀ mịẹ ye mẹ, amụ ó go-a?

⁴ Ọ̀ Tamụnọ-warị mẹ sọ mu tẹ ịn kẹ Tamụnọ pịrị tẹ fịturu mẹ ọkị fị tẹ pịkị kẹ ori atomi ma sọ pịrị fị ye mẹ, kụma wamịna ama anga-anga ḅara ḅụ agbamịẹapụ sikima jụmọ mị fịturu mẹ fị fị-a.”

⁵ Tẹ Jizọsị nwẹnị ḍuko gbaịn, “Tomḅọ Tụḅọ ḅe anie Ịnyọsara-Ene mẹ nyanaḅọọ.”

Jizọsị Gbọrụ Ḅara Fịtẹ Tomḅọ Gwọm

⁶ Jen Ịnyọsara-Ene ḅụ Jizọsị nwẹnị gbọrụ ama-warị ḅio sọ mu tẹ ye toluma. Anịanga ḅụ amịna ama-ḅara fịtẹ gbọrụḅọ simem.

⁷ Anịanga sime Oloko toluma apụ na Farịsiiapụ na ḅẹ ja apụ nwẹnị Jizọsị ẹbị lama, Ịnyọsara-Ene mẹ ḅụ ori obi gwọm ḅẹḅẹ ini anị kẹ oloko kẹ ori ọlọ ḅẹ ḅara.

⁸ Kụma Jizọsị ịna akuroma nimi wararị ḅara ḅụ ọ̀ nwẹnị tomḅọ ḅe ḅẹẹ, “Saakị sịẹ tẹ mẹnjị mịanga tọrọkọ ḅoo.” Tomḅọ ḅe nwẹnị saakị tẹ mu anịanga sịẹsime.

⁹ Anịtẹso Jizọsị ịn ḅẹẹm, “Yee àrị ó ḅii, Ịnyọsara-Ene mẹ ḅụ wa mịẹ na-iḅi ye tẹ wamịna Oloko ḍuko ye tiye? Ḅarasụa tomi pịrị mụnọọ, ye kẹ ịn lama? Tomḅọ ḍumo ḅọrọma mụnọọ anị fama?”

¹⁰ Ori in ḍiki ikelema tẹso, ọ̀ nwẹnị tomḅọ ḅe ḅẹẹ, “Ị́ ḅara sụn-pakamaa.” Tomḅọ ḅe nwẹnị ọkọ mịẹ, tẹ ọ̀ ḅara nwẹnị gwọọ.

¹¹ Tomi ma nwẹnị ịganị tẹmẹ lama tẹ ịn kẹ Jizọsị mịẹ ḅẹ ye kẹ ḅịḅị ọkị-a.

Jizọsị Oyi Maa Fịrịmẹnjịapụ Finji Sẹlẹm

¹² Anị sakị ḅụ Jizọsị tụndụ kpọlị iwo tẹ anịjụ bebe ḍin kẹ Tamụnọ tẹkẹm.

¹³ Ene finji tẹso, ọ̀ nwẹnị ò ḍukamẹnjịapụ ma sịn ọ̀ ḅụụ pịrị, tẹ ịna ḅụ oyi maa apụ finji sẹlẹ-ọkị tẹ fịrịmẹnjịapụ kẹ ịn sịn:

¹⁴ Sayịmọnị (anie ò Pita kẹ sịn ḅọ ḅe) na ori iyimbere Anduru na; Jemusị na Jọnị na; Filipu na Batolomiyo na.

¹⁵ Mat na Tọmọsị na, Jemusị, Alịfịyọsị tụḅọ ḅe na, Sayịmọnị (ịn kẹ ama ḅẹlẹmaḅọ sịn ḅọ ḅe) na.

¹⁶ Judasị, Jemusị tụḅọ ḅe na, Judasị Isikarịyọtị, anie tọrọkọ Jizọsị kẹ dẹrịma ḅọ ḅe na.

Jizọsị Ye Toluma Tẹ Pịkị Obi Gwọm

¹⁷ Jizọsị fịrịmẹnjịapụ ma na tụndụ mẹ ọgọnọ koro ḅo lẹsẹrẹ-kiri la tẹso, anịanga ò ḍukamẹnjịapụ ḅẹ ja apụ ori na sịẹsimem. Tẹ gbọrụ opu tomina-ogbo, tẹ Judiya na, Jeruselemu na, pịkị Taya na Sayịdọnị na, anie tọrụ akaka ḅẹ opu ama ma, ḅụ ḅo apụ na;

¹⁸ ini ori ẹkwẹn poki tẹ pịkị gwọọ ḅẹ ḅom. Si tẹmẹ ḅụụ ḅio sime apụ sọ ḅo tẹ gwọm.

¹⁹ Tomi mamgba ini inetẹ ḅara, inetẹ ḅara mịẹ tẹ mu ḅara kẹ ọ̀ lamam, tẹ ọ̀ ḅụụ kụrọ paka mu, mu tẹ inimgba gwọm.

Ḅioḅẹlẹ Na Kururu Na

²⁰ Jizọsị ò ḍukamẹnjịapụ ma ḍiki tẹ ḅẹẹm, Ọmịnị igoin-apụ, ó boma tẹẹ; Tamụnọ Ama-da mẹ sime ọ́ pịrịm!

²¹ Mịọkụ ḅuru pọkọ-tarịarị apụ, ó boma tẹẹ; ọmịna furo ḅin ḅa! Mịọkụ owuarị apụ, ó boma tẹẹ; ọ́ ḍẹrị ḅa!

²² Tomi Tomḅọ Tụḅọ ḅe gotẹ ó ḍiki-ḅioḅu, tẹ ọ́ sịkị, ó wori sima tẹ ḅịḅị ḅẹ sọye, sọye kẹ ọ́ ḅẹẹarị ḅẹḅẹ, ó boma tẹẹ!

²³ Ye ḅo ọkọ paka tẹ ḅẹḅẹ, ó ḍereku tẹ sẹkịị, ḅioḅẹlẹ ḅụ, kẹ gotẹ ọkọ ḅẹẹarị, ye, So-ḅio opu gbẹẹ-ye sime ọ́ pịrị wararị. Ịna atẹngịapụ ma sọ mị gbọrụ ḅara mẹ kẹ ịkịankoroapụ ma mịẹm.

²⁴ Kụma mịọkụ ngọ-kọn wararị apụ ọ́ tẹkẹlẹ tẹẹ; ọmịna tọrụ-ḅẹlẹ ọ́ nyana fama tẹẹ!

²⁵ Mịọkụ fị furo ḅinma tẹ apụ, ọ́ tẹkẹlẹ tẹẹ; ḅuru ọ́ tarị ḅa! Mịọkụ ḍẹrịarị apụ, ọ́ tẹkẹlẹ tẹẹ; ó kururu tẹ owu ḅa!

²⁶ “Tomi mamgba ọ́ kẹ iḅiye fiearị ḅẹḅẹ, ọ́ tẹkẹlẹ tẹẹ; ma gbọrụ aị ma mie ịna atẹngịapụ ma iruo ịkịankoroapụ ḅụ ḍuko aị ma.”

Jizọsị Si Kẹ Wa Mịẹ Apụ Ḅẹlẹma Tolumam

²⁷ “Kụma à ḍuko ọ́ pịrịarị, ọmịnị ì pokiarị apụ: ó si kẹ ọ́ tọn apụ ḅẹlẹmaa, tẹ iḅi kẹ ó ḍiki-ḅioḅuarị apụ mịẹ,

²⁸ ó siye karị ọ́ pịrịarị apụ bomaa, tẹ tẹkẹ si ḅara kẹ ọmịnị na mịẹarị apụ pịrịị.

²⁹ Gbọrụḅọ ị́ amgba gbọrụ pakịrị anga ḅọrọ ḅẹḅẹ, yee mḅọ pịkị osi pakịrị sọ ḅọrọ; gbọrụḅọ ị́ sụa wararị ọgọnọ ḅẹ kapa siin-ọkị-ọkii, yee mḅọ pịkị suku-ḅio ḅẹ ye sọ kẹ sụa ọkị.

³⁰ Ị́ ḅara ye ḅiiḅọ-ḅiiḅọ mḅọ pịrịị; tomḅọ í nye ọkị-ọkịị mḅọ ḅara anị ḅii ọkị ma.

³¹ Í ḅiiarị ja apụ mịẹ ị́ pịrị ḅẹ ḅara sọ ọkọ mịẹ ịn pịrịị.”

³² “Ị́ nwẹnị ị́ ḅẹlẹma apụ kịngẹ ḅẹlẹma kụma, Tamụnọ gotẹ í boma ḅẹ ye tiye? Si apụ sọ kọkọ ọkọ kẹ ịn ḅẹlẹma apụ ḅẹlẹmarị!

³³ Tẹ ị́ nwẹnị iḅi kẹ iḅi kẹ ị́ mịẹ apụ kịngẹ mịẹ kụma, Tamụnọ gotẹ í boma ḅẹ ye tiye? Si apụ sọ kọkọ anị ḅara mịẹarị!

³⁴ Tẹ í ye kẹ í ḅiokpọ wararị inetẹ kẹ ḅo ị́ pịrị ḅẹ apụ kịngẹ ḅọlọarị kụma, Tamụnọ gotẹ í boma ḅẹ ye tiye? Si apụ sọ kọkọ ye kẹ ịna pembema si-mịẹapụ ḅọlọarị, anị gbọrụ igbigi ḅịḅị mẹ pịkị ḅo ịna ḅara la ḅẹ ḅara!

³⁵ Gbala-gbala! Si kẹ ị́ tọn apụ ḅẹlẹma, tẹ iḅi kẹ ịn mịẹ; ye kẹ kịnị ḅọlọ, tẹ ịn pịkịma ḅo tẹ anị kẹ ị́ pịrị ḅẹ gbọrụ ḅọkọ sọ nwẹn kẹ ḅio tọnma. Ọkọ rẹ mie ọmịnị opu gbẹẹ-ye nyana tẹ pịkị Geletẹịn Tamụnọ ḅe awọmẹ sọ ḅarịye. Kẹ gotẹ ọkọ ḍukoarị ye, ori iḅi mẹ mu ịmịẹtẹ ḅẹẹ ḅẹẹ-a apụ na, si-sịḅịḅio-sụapụ na sọ laarị.

³⁶ Ọmịnị ọkụrụkụrụ nyana tomi pịrịị, anie ọmịna Ḍaḅọ ḅe sọ ọkụrụkụrụ nyana ḅara.”

Jizọsị Kịnị Sọkịrị Gbolomaye Tolumam

³⁷ “Ọ́ jen-apụ ḅụụ si ḍọkị ma, Tamụnọ sọ ọmịna ḅụụ si ḍọkị ḅịa. Ó jen tomḅọ si fama tẹ ḅẹẹ ma, Tamụnọ sọ ó si fama tẹ kẹ ọ́ ḅẹẹ ḅịa; ó si-wẹrịso ja apụ pịrịị, Tamụnọ sọ ọmịna si-wẹrịso ḅa.

³⁸ Ó ye ḍie ja apụ pịrịị, Tamụnọ sọ ye ḍie ọ́ pịrị ḅa. Tomi-juḅẹye, ó ḅintẹ ḅara nyana ḅa, ḅara sarasara lama tẹ ḍiepịrịye ịn nwẹn kẹ ọmịna aḅara kuḅu sara ḅa, ọmịnị inetẹ ọlọ ḅẹ ḅara anie Tamụnọ kẹ sụa ọ́ pịrị ḅarịye. Ọ́ kẹ ye tọn sụa jen-apụ pịrị ye ḍụḅa la ḅara, anie Tamụnọ ḍiki tẹ tọn sụa ọ́ pịrị ḅarịye.”

³⁹ Tẹ Jizọsị mị egberi mẹ gbaa ịn pịrịm: “Tọrụngbọ-pụụntẹḅọ inetẹ jen tọrụngbọ-pụụntẹḅọ ọlọ mẹnjị ḅịa; ọkọ kụma ini maa apụ mamgba ḅịkị olulu ḅio koro ḅa.

⁴⁰ Ye ḍawọarịḅọ ḍụḅa ye kẹ mḅọ tolumarịḅọ nẹngị-a, kụma ḍawọḅọ ḅe ọ̀ ḍawọarị ye mẹ ḍawọ ḍịn tẹ ḅẹḅẹ, ò ḅo ye kẹ ò tolumarịḅọ ḅe sime-ḅara sime tẹẹ.

⁴¹ “Í tiegotẹ ị́ mịnaḅọ tọrụngbọ ḅio simearị fun kalịye mẹ ḍikiarị, tẹ ị́ tọrụngbọ ḅio simearị sịn ikiḅa mẹ kẹ ye-sịn-a?

⁴² Ndẹẹ ị́ ị́ mịnaḅọ ḅe ḅẹẹ ḅẹ ḅara, ‘Sisi, ị̀ mịnaḅọ, yee àrị ị́ tọrụngbọ ḅio simearị fun kalịye mẹ sin,’ í nye ḅio simearị sịn ikiḅa mẹ sọ í inetẹ ẹrị-a sakị? Ị́yẹrị tomina tọrọkọ iḅi ọkị ḍọkịḅọ! Tarị ị́ tọrụngbọ ḅio simearị sịn ikiḅa mẹ sin, anị sakị rẹ mie í inetẹ banabana ḅara kẹ ị́ mịnaḅọ ḅe tọrụ ḅio fun kalịye mẹ ẹrị tẹ siin pakama-ḅo ḅarịye.

Sịn Na Anị Ḅẹ Mgbọlụ Na

⁴³ “Obi-a sịn si mgbọlụ sụa-sụa-a, anie obiarị sịn pịkị iḅi mgbọlụ sụa-sụa-a ḅara.

⁴⁴ Sịn sụarị mgbọlụ mie tomi kẹ anị lekiriarị ye; nangị asịn ḅụ í ịla mgbọlụ kaịn ḅịa, anie pịkị agarara ḅụ ini eleleinda kaịn ḅịa ḅara.

⁴⁵ Iḅi tomḅọ mḅọ ḅioḅẹngbọ koko wararị iḅi aị ma ḅụ iḅi aị pakama-ḅoarị; si tomḅọ pịkị mḅọ ḅioḅẹngbọ koko wararị si-aị ma ḅụ si-aị pakama-ḅoarị. Kẹ gotẹ ọkọ ḅẹẹarị, ḅioḅẹngbọ mẹ ḅio ḅin wararị aị ma mie ḅịḅị mẹ ḅụ paka-ḅoarị.

Ịn Nama Maa Awarị Ḅụ Pakaye

⁴⁶ “Ndẹẹ ó gotẹ ‘KỊNỊNYANAḄỌ, KỊNỊNYANAḄỌ,’ kẹ ị̀ sịn-arị tẹ àrị ọ́ ḅẹẹ ye mịẹ-a ye?

⁴⁷ Ḅẹḅọ-ḅẹḅọ tẹ ḅo ị̀ ẹkwẹn mẹ poki tẹ à ḅẹẹ ḅara mịẹ ḅọ, à kẹ ó ḍie ḅa mḅọ kịkarị ḅọ.

⁴⁸ Mḅọ kịkarị ḅọ anie amịna warị nama ḅẹ tẹ kpọma kiri mẹ soku pokoloma tẹ anị kẹ ịkụ ọgọnọ sịẹma ḅọ. Opu minji sun mu warị mẹ la tẹ sọ anị jike-a, ini anị nama kụrọma lamam ẹrẹsị.

⁴⁹ Kụma ḅẹḅọ-ḅẹḅọ tẹ ị̀ ẹkwẹn ma naa tẹ arị koro ḅara ọkị tẹ mịẹ-a ḅọ mẹ, mḅọ kịkarị ḅọ anie amịna warị namarị tẹ iḅi ḅara kẹ suku-saakị-a ḅọ. Opu minji ḅo warị mẹ la gbọrụ sakị anị nwẹnị ḅịkị tẹ si ḅịkị kọn; anị paịn-gberegedeima saram!”