Luku 5 - FỊAFỊA BAỊBỤLỤ

Jizọsị Inia Inji-ḅaapụ Sịn Ọkịm

¹ Gbọrụ ene ḅụ, ḅụ Jizọsị Gẹnẹsarẹtị tọrụ akaka sịẹ wararị ogbo, tomi jụmọ-jụmọ sukuruma ma-mu ọ̀ lam, ịn Tamụnọ ẹkwẹn mẹ poki ḅẹ ḅara.

² Tẹ ọ̀ tọrụ pịkị ḅẹ sakị ọ̀ pọkụ-ḅọkọ ḅụ maa sọma wararị arụ ẹrị tẹ. Arụ ma nyana inji-ḅaapụ ma arị koroma-so mu ịna ịgbọ sịkịrịarị.

³ Jizọsị arụ ma ḅẹ gberie ḅụkụlọm, anị arụ mẹ Sayịmọnị nye, tẹ Jizọsị nwẹnị ọ̀ ḅẹẹ mịnẹ ọ̀ kẹlẹ pọkụ-ḅọkọ mẹ ḅụ arụ mẹ sukuruma pakamaa. Jizọsị nwẹnị anị ḅio lẹgị tẹ ye kẹ tomina-ogbo mẹ toluma.

⁴ Ori ẹkwẹn fama tẹso, ọ̀ nwẹnị Sayịmọnị ḅẹẹ, “Arụ mẹ sukuruma pakama mu owolo sime anga la, tẹ ị́ arụ ḅẹ apụ na ị́ na ịgbọ ma sara-a, ọmịnị inji kun ḅa.”

⁵ Sayịmọnị nwẹnị pakịrị, “Sịḅịdaḅọ, bebe ḍin mẹ ḅụ wa ine-ḅara, ine-ḅara mịẹ tẹẹ, gbọrụ inji sọ wa ḅaa-a. Kụma ị́ ḅẹẹm ịgbọ ma sara ḅẹḅẹ àrị ọkọ mịẹ ḅa.”

⁶ Ịn nwẹnị ịgbọ ma koroma tẹ tọnwa inji kun, kẹlẹ kọnm ịna ịgbọ ma kaan tẹ.

⁷ Mie ḅụ ịn nwẹnị ḅara kẹ osi arụ ḅẹ apụ fẹngụma in ḅo ḅarasụa ịn pịrịị. In ḅo la tẹso, ịn nwẹnị maa arụ ma sẹịn tẹụma, tẹ kẹlẹ kọnm arụ ma ḅile tẹ.

⁸ Sayịmọnị Pita mie ẹrị sakị, ò mu Jizọsị suku kparakị tẹ ḅẹẹm, “KỊNỊNYANAḄỌ, ị́ ḅụụ kẹ ì kpekima ma! Yẹrị si-ḅọọ!”

⁹ Ịn kun inji ma kịẹn-ḅịḅị ḍụḅa la ḅara nwẹnị Sayịmọnị na ori na sime apụ ma na ḅụụ-buama.

¹⁰ Anị gbọrụ ḅara anie anị pịkị kẹ Zẹbidi awọmẹ Jemusị na Jọnị na, tẹ Sayịmọnị na ḍuka ma-mu apụ ma sọ ḅụụ-buama ḅara. Jizọsị nwẹnị Sayịmọnị ḅẹẹ, “Ḅalafa ma, mịọkụ saakị tọrọkọ mu í tomi kun kun-ḅo ḅa.”

¹¹ Tẹ ịn nwẹnị arụ ma sọma tẹ ye goyegoye ḅụ ḅara-siin tẹ Jizọsị ḍukamẹnjị.

Jizọsị Sofịnị-Obi Kọn Owiḅọ Gwọm

¹² Gbọrụ sakị ḅụ Jizọsị mu gbọrụ ama lam, tẹ sofịnị-obi-kọnḅọ anị ama mẹ ḅụ simem. Obi ḅọ ḅe Jizọsị ẹrị tẹso, ọ̀ nwẹnị ọ̀ ḅụụ sẹma-kiri-gbin, tẹ Jizọsị tẹkẹ, “Ị̀ Nyanaḅọ, ị́ ḍụkụ ḅẹ kụma í inetẹ ị̀ gwọ ḅa.”

¹³ Jizọsị nwẹnị ḅara sụn-pakama tẹ kẹ ọ̀ lama tẹ ḅẹẹ, “À ḍụkụm, gwọọ.” Anị gbọrụ sakị ḅụ sofịnị-obi mẹ nwẹnị ọ̀ ḅụụ so.

¹⁴ Jizọsị nwẹnị tọn ọ̀ pịrị mịnẹ ò ḍuko kịnị pịrị ma, kụma ọ̀ da-da mu ḅụụ kẹ agbamịẹḅọ ḅe ḍie, tẹ ori ò pekele-ḍiki fama tẹ ḅẹḅẹ, ọ̀ nwẹnị Mozizi tọn koroma agba mẹ mịẹ, tẹ tomi nimi mịnẹ ọ̀ fịafịa tẹ.

¹⁵ Kụma Jizọsị paa ereso ma-muarị, tẹ tomina-ogbo-ogbo ọ̀ dama-ḅo, tẹ ori ẹkwẹn naa tẹ pịkị ịna obi ḅụ gwọ ḅẹm.

¹⁶ Kụma ori ḅiim ọ̀ ḅụụ-yaụ-anga mu tẹ tẹkẹ.

Jizọsị Ngụrọ-kọn Owiḅọ Gwọm

¹⁷ Gbọrụ ene ḅụ, Jizọsị ye tolumarị sakị, Galili na Judiya na ama goyegoye ḅụ na, Jeruselemu na ḅụ sime tẹ ḅo Farịsiiapụ ḅẹ ja apụ na Oloko toluma apụ na anịanga lẹgị-sime wararị. KỊNỊNYANAḄỌ ḅe kụrọ Jizọsị ḅụ simem kẹ obi apụ gwọ.

¹⁸ Ja atomi nwẹnị ngụrọ-kọnḅọ kẹ iḅila na dogi Jizọsị pịrị gwọ ḅẹ ḅo. Ịn ḅụụkụrọma tẹ ọ̀ kẹ mu Jizọsị tọrọkọ koroma ḅẹm.

¹⁹ Kụma inweni-ogbo mẹ ḅin ḅara gotẹ ini inetẹ tolu mu Jizọsị la-a. Ọkọẹrẹsị ịn nwẹnị obiḅọ ḅe dogi warị isun mẹ kpọlị, tẹ Jizọsị na karakara anga ḅụ isun mẹ kan finji tẹ obiḅọ ḅe na iḅila na kẹ toluma Jizọsị tọrọkọ koroma, tomi ma ogboku ḅụ.

²⁰ Jizọsị tomi ma minini ẹrị tẹso, ọ̀ nwẹnị tomḅọ ḅe ḅẹẹ, “Ì ikiaḅọ, ị́ asi ịn wẹrịso ị́ pịrị tẹ!”

²¹ Oloko mẹ toluma apụ ma na, Farịsiiapụ ma na nwẹnị ini aḅụụ ḅẹẹ, “Ḅie ḅọrọ tọ-anga ḅoarị tomḅọ, tẹ nwẹn kẹ Tamụnọ kẹ kpọọtiarị? Tamụnọ sikima inetẹ si-wẹrịso kịnị pịrị ḅẹ ḅọ ofori!”

²² Jizọsị ịna akuroma nimim ẹrẹsị ori ịn ḅẹẹm, “Ó tiegotẹ nwẹn sime aị kuromarị?

²³ ‘Ị́ asi ịn wẹrịso ị́ pịrị tẹ’ ḅẹẹ na ‘saakị tẹ mẹnjịị’ na tiye sarasara osi ye nẹngị?

²⁴ Mịọkụ à kẹ ó ḍie ḅa, mịnẹ mị tomikiri ḅụ Tomḅọ Tụḅọ ḅe si-wẹrịso kụrọ nyana wararị ḅara.” Mie ḅụ ọ̀ nwẹnị tomḅọ ḅe ḅẹẹ, “Yẹrị ị́ ḅẹẹarị saakị sịẹ tẹ Í iḅila ọkị tẹ so warị muu.”

²⁵ Anị gbọrụ sakị ḅụ, inimgba tọrọkọ, tomḅọ ḅe nwẹnị saakị sịẹ tẹ ọ̀ kẹ ḅọlọlọ sime iḅila mẹ ọkị tẹ Tamụnọ tokini ma so warị mu.

²⁶ Inimgba kpọma ḅụụ-buam. Ḅalafa pịkị ịna ḅụụ sọ ḅin tẹ ịn Tamụnọ tokini tẹ ḅẹẹm, “Mịmgba wa ḅụụ-buama-aị ẹrị tẹ.”

Jizọsị Livayị Sịn Ọkịm

²⁷ Mie ḅọrọ tẹso, Jizọsị nwẹnị paka mu tẹ Livayị nwẹn-sịn ama-igbigi da ḅọ ẹrị, ọ̀ lẹgị tẹ nama kọrịarị. Jizọsị nwẹnị ọ̀ ḅẹẹ, “Ì ḍukamẹnjịị.”

²⁸ Livayị nwẹnị saakị tẹ ye goyegoye ḅụ ḅara-siin tẹ ò ḍukamẹnjị.

²⁹ Anịtẹso Livayị nwẹnị ọ̀ warị ḅụ opu ḅara kẹ fịye mịẹ Jizọsị pịrị. Livayị sịn apụ ḅụ tọnwa ama-igbigi da apụ sọ simem, na ja atomi na.

³⁰ Farịsiiapụ ḅẹ ja apụ na ịna Oloko toluma apụ ḅẹ ja apụ na nwẹnị ḍuko sụa Jizọsị ḍukamẹnjịapụ ma pịrị tẹ ḅẹẹ, “Ó tiegotẹ ama-igbigi da apụ na ama sịkịtẹ apụ na gboloma tẹ fị-na-ḅuu-naarị?”

³¹ Jizọsị nwẹnị ịn pakịrị, “Obi-a apụ ḅịrịḅọ ḍọkị ḍọkị-a, kụma obi apụ ngẹrị mie ḅịrịḅọ ḍọkịarị ye.

³² À ḅo iḅi-apụ sịn pịkị ḅẹ ḅo-a, kụma ama sịkịtẹ apụ ma, mịẹtẹ in si ḅụ pịkị ḅẹ ḅara.”

In Ḅuru-ịmọ Gbolomaye Kẹ Jizọsị Gbelam

³³ Kịnị nwẹnị ḅo Jizọsị ḅẹẹ, “Jọnị ḍukamẹnjịarị apụ ma na Farịsiiapụ ma ḍukamẹnjịarị apụ ma na sakị, sakị ḅụ ḅuru-ịmọ tẹ tẹkẹarị, kụma í ḍukamẹnjịapụ ma fị-na-ḅuu-naarị.”

³⁴ Jizọsị nwẹnị pakịrị: “Ọ́ sịn-arị ere-ịya-alalị mu apụ fịye fị-a ḅara kẹ sime ḅẹ, ere-ịyaḅọ ḅe ini na emi ogbo? Tọn-tọnm!

³⁵ Kụma tomi ịna ḅara ere-ịyaḅọ ḅe ọkị so ḅẹ sakị ḅo ḅa, anị sakị rẹ mie in ḅuru-ịmọ ḅarịye.”

³⁶ Jizọsị nwẹnị pịkị mị egberi mẹ gbaa ịn pịrị, “Ịwọ kapa ḅụ ye kan sin tẹ kẹ elemu ye tụrọ-tụrọ gbọrụḅọ-sọ ofori. Mḅọ ọkọ mịẹ kụma ịwọ ye mẹ sọ kan tẹ, anịtẹrẹmẹ anị pịkị elemu ye mẹ na kura ḅịa.

³⁷ Gbọrụḅọ-sọ pịkị ịwọ iru kẹ ḅuutẹ iru sụa ḅaḅa ḅio sụa sụa-a. Mḅọ kẹ sụa kụma ịwọ iru mẹ ḅaḅa mẹ puu tẹ ọsụ fa tẹ ḅaḅa mẹ sọ gulugulu ḅa.

³⁸ Anie nakara ịwọ iru sụa ḅaḅa anie ịwọ iru gbẹẹ-ye.

³⁹ Elemu iru ḅuu lama tẹ ḅọ ḅarị ịwọ iru ḅuu ḅẹ ḅii ḅịa, mḅọ ḅẹẹ ḅa, ‘Elemu ye mẹ iḅi osi ye nẹngịm.’ ”