Luku 4 - FỊAFỊA BAỊBỤLỤ

Jizọsị Ḅuru-ịmọm Tẹ Ekwesu Ọ̀ Daaḍikim

¹ Jizọsị Jodanị tọrụ mẹ ḅụ pịkịma som, Fịafịa Tẹmẹ ḅe ọ̀ ḅụụ sọ ḅin wararị ḅara ḅụ. Tẹ Tẹmẹ ḅe nwẹnị ọ̀ kẹ ịkpa ḅio mu.

² Anịanga ḅụ Ekwesu ḅe ḍin amesi na gbasị ye kẹ ọ̀ daaḍikim. Bebe ḍin amesi mamgba ḅụ ò fịye fị-a, tẹ ḍin ma ḅọrọ tẹso, ḅuru nwẹnị ọ̀ tarị.

³ Ekwesu ḅe nwẹnị ọ̀ ḅẹẹ, “Ị́yẹrị Tamụnọ Tụḅọ ḅẹḅẹ, tọn mị ḍụḅarị mẹ pịrị tẹ anị fịturu ḍi.”

⁴ Kụma Jizọsị pakịrịm, “Fịafịa Ḍiri mẹ ḅẹẹm, ‘Tomi inetẹ fịye ngẹrị fị tẹ ḍumo ḅịa.’ ”

⁵ Anịtẹso Ekwesu ḅe mịẹtẹ Jizọsị iwo gele yọ mum tẹ tọrụ gbaịn finji ḅụ tomikiri ḅẹ asịẹ mamgba kẹ ò ḍie famam.

⁶ Tẹ Ekwesu ḅe nwẹnị ọ̀ ḅẹẹ, “Mị kụrọ mẹmgba na mị ebube mẹmgba na à kẹ ị́ pịrị ḅa; arịmgba ịn saḅama ị̀ pịrị tẹẹ. Àrị inetẹ kẹ à ḅii ḅọ ḅii ḅọ pịrị ḅa.

⁷ Mie-mẹmgba í nye sọ ḅa, ị́yẹrị paa sunsin ị̀ pịrị kụma.”

⁸ Jizọsị nwẹnị pakịrị: “Fịafịa Ḍiri mẹ ḅẹẹm, ‘Ị́ Nyana Tamụnọ ḅe ngẹrị mie í sunsin pịrị tẹ pịkị fịrịmẹnjị pịrị ḅarị ḅọ!’ ”

⁹ Anịtẹso Ekwesu ḅe nwẹnị mịẹtẹ ọ̀ Jeruselemu mum, tẹ Tamụnọ-warị mẹ ḅụ geletẹịn anga ḅụ sịẹsimem. Ọ̀ nwẹnị Jizọsị ḅẹẹ, “Ị́yẹrị Tamụnọ Tụḅọ ḅẹḅẹ, mịanga sime tẹ ḍosi-koroo.

¹⁰ Fịafịa Ḍiri mẹ kọkọ ḅẹẹ wararị, ‘Tamụnọ ori enjẹlị apụ ḅẹẹ tẹ ini í ḍikiḍiki kpaịnma ḅa.’

¹¹ Anị pịkị ḅẹẹ wararị, ‘Ini í dogi ḅa ịna aḅara ḅio ḅụ, ḍụḅarị ma sọ ị́ aḅụọ bịan tẹ ye ị́ la ḅịa ḅara.’ ”

¹² Kụma Jizọsị nwẹnị pakịrị, “Fịafịa Ḍiri mẹ ḅẹẹm, ‘Ị́ Nyana Tamụnọ ḅe daaḍiki ma.’ ”

¹³ Ekwesu ḅe kịrị-kịrị ḅọkọ kẹ Jizọsị daaḍiki fama tẹso, ọ̀ nwẹnị anị sakị mẹ kẹ ọ̀ wẹrịso.

Jizọsị Ọ̀ Kọrịnama Saakịm Galili Ḅụ

¹⁴ Anịtẹso Jizọsị nwẹnị pịkịma so Galili mu, Fịafịa Tẹmẹ ḅe kụrọ ọ̀ ḅụụ ḅio sime-ḅara ḅụ. Ò gboloma ye nwẹnị anị iri mamgba kana-koro.

¹⁵ Ọ̀ nwẹnị ama-awarị ma ḅio ḅụ ye-toluma, tẹ naa ḅọ, naa ḅọ ò tokinim.

Ịn Nazarẹtị Ḅụ Jizọsị Sịkịm

¹⁶ Anịtẹso Jizọsị Nazarẹtị mum, kala-sakị kụra-ḅio ori anga paka-ḅo yọ mẹ, tẹ ọ̀ mịẹ-mịẹ ḅara ḅụ ọ̀ nwẹnị ama-warị mẹ mu Ịnyọsara-Ene mẹ ḅụ. Ọ̀ saakị sịẹ tẹ Fịafịa Ḍiri mẹ go ḅẹ tẹso,

¹⁷ ịn nwẹnị ịkịankoro Ayịzaya ḍiri saakị ọ̀ pịrị. Ori anị finji tẹso, ọ̀ nwẹnị miemẹ ẹrị, anị kẹẹ kuro wararị:

¹⁸ “KỊNỊNYANAḄỌ ḅe Tẹmẹ ḅe ị̀ ọgọnọ emi, ori ị̀ sẹlẹ-ọkị tẹ àrị iḅi-oku mẹ ḍuko igoin-apụ ma pịrị ḅẹ ẹrẹsị. Ori ị̀ fịrịmam à mu ḍuko kun-ḅara ḅio sime apụ ma pịrị mịnẹ ịn paka-ḅo ḅa, pịkị tọrụngbọ pụụn tẹ apụ ma ḅẹẹ mịnẹ ịn ye ẹrị ḅa, ja apụ ponomarị apụ ma sọ pụkọ-pakaḅo ḅa.

¹⁹ Tẹ pịkị kpo-kpo gbolo tẹ inweni-mgba naa, mịnẹ sakị mẹ la tẹ, KỊNỊNYANAḄỌ ḅe ori atomi ḅọrọma ḅẹ sakị mẹ.”

²⁰ Jizọsị nwẹnị ḍiri mẹ iko tẹ kẹ ama-warị mẹ ḍikiḍikiarị ḅọ ḅe pịrị, tẹ lẹgị-sime. Ama-warị mẹ ḅio sime apụ mamgba bio-bioma ò ḍikiarị ogbo,

²¹ ori ịn ḅẹẹm, “Mịmgba mị fịafịa ḍiri pamba mẹ ḅẹ ẹkwẹn mẹ ḅo karakara ye sọ tẹ, anị goo sakị ọ́ wẹrị naa ḅara.”

²² Ò giregirema kọn ẹkwẹn ma nwẹnị inimgba ḅụụ koro, tẹ ịn nwẹnị ḅụụ-bua. Ịn nwẹnị ḅẹẹ: “Ḅie Josẹfụ tụḅọ ḅe ori ya?”

²³ Ọ̀ nwẹnị ịn ḅẹẹ, “À nimim ọ́ mị egberi mẹ gbaa ị̀ pịrị ḅa, ‘Ḅịrịḅọ ị́ ḅụụ gwọ.’ Ọ́ pịkị ị̀ ḅẹẹ ḅa mịnẹ ọ́ naam Kepanọmụ ḅụ mịẹ aị ma mị ị̀ ama mẹ ḅụ sọ à mịẹ.”

²⁴ Jizọsị pịkị ịn ḅẹẹm, “À miemẹ ḍuko ọ́ pịrịarị, tomi ịkịankoroḅọ kẹ ye-sịn sịn-a ọ̀ paka ama ḅụ.

²⁵ “Ọmịnị ì pokii: karakara ye Ịlayịja ḍumo wararị sakị ḅụ Izirẹlị ḅụ tọnwa diapụ-fịtẹ-ereme simem, anie eene koro-a nwenii tẹra kụra na pakịrị na la tẹ opu ḅuru-ḅa bebe amakiri mẹ gbaịn koro sakị mẹ.

²⁶ Anịsọ Sayịdọnị iri ḅẹ gbọrụ ama tẹ ịn kẹ Zarẹfatị sịn ama mẹ ḅụ anga gbọrụ diḅọ-fịtẹ-ẹrẹḅọ ngẹrị anie Tamụnọ Ịlayịja kẹ fịrịma ye, ori ọ̀ kẹ Izirẹlị ḅẹ gbọrụḅọ-sọ fịrịma-a.

²⁷ Anị sakị ịkịankoro Ịlayịsa ḍumo wararị ene ḅụ Izirẹlị ḅụ tọnwa-apụ sofịnị-obi kọnm, ọkọ sọ ịna ḅụ gbọrụḅọ-sọ gwọ-a, kụma Nahamanị Siriya ḅẹ ḅọ ḅe kịngẹ.”

²⁸ Ama-warị mẹ ḅio sime apụ ma miemẹ naa sakị ịn nwẹnị kpọma ịganị,

²⁹ tẹ virikama saakị tẹ ama-warị mẹ ḅio Jizọsị nụnụ pakama, tẹ ọ̀ kẹ ịna ama mẹ simearị tụndụ mẹ ḅụ geletẹịn anga mu. Ịn tọnm ini ò sukuruma pokolo yọ mẹ ḅụ gbin ḅa,

³⁰ kụma ọ̀ nwẹnị ịna ogboku gbọịn-gbọịnma mẹnjị-so ò muarị anga mu.

Jizọsị Si-tẹmẹ Ḅụụ Ḅio Sime Tomḅọ Gwọm

³¹ Anịtẹso Jizọsị nwẹnị so Kepanọmụ nwẹn-sịn Galili ḅẹ gbọrụ ama mu, tẹ anịanga ò ye kẹ tomi ma tolumam Ịnyọsara-Ene mẹ ḅụ.

³² Ò ye mẹ toluma ḅara mẹ nwẹnị inimgba ḅụụ-buama, ọ̀ kụrọ nyana ḅara kẹ ẹkwẹn kọnm ẹrẹsị.

³³ Ama-warị mẹ ḅio si oru tẹmẹ ḅụụ ḅio sime gbọrụ tomḅọ nwẹnị kararama-oloku pakama, tẹ ḅẹẹ,

³⁴ “Ẹn-ẹn! Ndẹẹ ị́ wa kẹ mịẹ ḅẹ ḍọkịarị ye, Nazarẹtị ḅẹ Jizọsị? Í gotẹ mị yọ ḅo ye wa ḅaa guluguluma mụnọọ? Àrị í nimi wararị — ị́yẹrị anie Tamụnọ fịafịa oku-mẹnjịḅọ!”

³⁵ Jizọsị nwẹnị tọn tẹmẹ ḅe pịrị, “Ị́ ḅịḅị gbaịn tẹ tomḅọ ḅe ḅụụ ḅio paka-ḅoo!” Oru ḅe nwẹnị tomḅọ ḅe sẹma-kiri-gbin ịna tọrọkọ ḅụ, tẹ ọ̀ ḅụụ ḅio paka-ḅo, gberie-sọ kẹ ọ̀ lama-a ḅara ḅụ.

³⁶ Anịanga sime apụ mamgba nwẹnị ḅụụ-bua tẹ jụmọ-jụmọ ḅẹẹ, “Mịna ẹkwẹn ma ḅọrọ tọ-ḅara sime ẹkwẹn? Opu kụrọ ḅụ mie ḅị tomḅọ ḅe tọn si-atẹmẹ ma pịrị tẹ ịn paka-soarị!”

³⁷ Tẹ Jizọsị gboloma ye mẹ nwẹnị anị iri mẹ ḅụ anga anga la fama.

Jizọsị Tọnwa Obiapụ Gwọm

³⁸ Jizọsị ama-warị mẹ ḅio so tẹso, ọ̀ nwẹnị Sayịmọnị warị mu. Anị sakị Sayịmọnị ta iyingi kụrọtẹ akọm kọn-arị, tẹ ịn nwẹnị á gboloma ye ḍuko ọ̀ pịrị.

³⁹ Ọ̀ nwẹnị mu tẹ á ḅọlọlọ sime wararị iḅila mẹ anga sịẹ tẹ tọn akọm mẹ pịrị tẹ anị nwẹnị á ḅụụ so, tẹ á nwẹnị saakị tẹ fịrịmẹnjị ịn pịrị.

⁴⁰ Ḅoḅiri ịrụa warị sọ tẹso, tomi nwẹnị ịna ikiapụ tẹ obi kịrị-kịrị kọn-arị apụ kẹ ḅo Jizọsị pịrị. Ọ̀ ḅara kẹ ịna ḅụ ọrụḅọ-ọrụḅọ ọgọnọ gbana tẹ inimgba gwọọm.

⁴¹ Oru pịkị tọnwa atomi ḅụụ ḅio som, tẹ oru ma kararama-oloku-oloku tẹ ḅẹẹm: “Ị́yẹrị anie Tamụnọ Tụḅọọ!” Jizọsị nwẹnị tọn oru ma pịrị mịnẹ ini ẹkwẹn ma; ò gotẹ ọkọ ḅẹẹ ye in nimim mịnẹ ori anie Mẹsaya ḅe.

Jizọsị Ama-awarị Ma Ḅio Tamụnọ Ẹkwẹn Kọnm

⁴² Ene finji tẹso, Jizọsị ama mẹ koroma so tẹ ḅụụ-yaụ-anga mum. Tẹ tomi ma ọ̀ ḍọkị nwenii tẹ mu ori ẹrị sakị ịn ḅarị ḍụkụ tẹ ori ịn koroma so-a.

⁴³ Kụma ori ịn ḅẹẹm, “À mu osi ama ma ḅụ sọ Tamụnọ Ama-da mẹ ḅẹ Iḅi-Oku mẹ ḍuko ḅa. Anie mie à mịẹ ḅẹ tẹ Tamụnọ ị̀ kẹ fịrịma ye.”

⁴⁴ Mie ḅụ ọ̀ nwẹnị mu ama-ama la-la tẹ ama-awarị ma ḅio Tamụnọ ẹkwẹn mẹ kọn.