Luku 3 - FỊAFỊA BAỊBỤLỤ

Minji-sara Jọnị Tamụnọ Ẹkwẹn Kọnm

¹ Tayịberiyasị Romu tomikiri mẹ da tẹ jei karama kụra ḅụ; Pọnịtịyọsị Payịleti anie Judiya ḅụ ḅẹrẹtọnḅọ, anie pịkị Ẹrọdị Galili da sime sakị, tẹ ori iyimbere Filipu, Ituriya na Tarakonayịtisi na iri mẹ ḅụ ḅẹrẹtọn-arị sakị, tẹ Lisaniyasị pịkị Abilini ḅẹ ḅẹrẹtọnḅọ,

² tẹ Anasị na Kayafasị na anie Sịḅịda-Agbamịẹapụ. Anị gbọrụ sakị mẹ ḅụ Tamụnọ ẹkwẹn tẹ kẹ Jọnị, Zẹkaraya tụḅọ ḅe pịrịm ịkpa mẹ ḅio.

³ Mie ḅụ Jọnị nwẹnị bebe Jodanị tọrụ mẹ la anga, la anga mu tẹ Tamụnọ ẹkwẹn kọn tomi ma pịrị; ori mẹẹ, “Ọmịnị ọmịna asi ḅụ pịkị tẹ minji sara-a, Tamụnọ ọmịna asi wẹrịso ọ́ pịrị ḅa.”

⁴ Mị-ḅara anie ịkịankoro Ayịzaya ḍiri ḅio anị kẹẹ ḅara: “Gbọrụḅọ ịkpa mẹ ḅio olokuarị: ‘Ọmịnị etela mẹ tẹlẹma KỊNỊNYANAḄỌ ḅe pịrịị; Ọmịnị ọ̀ mẹnjị ḅọrọ ḅarị anga mẹ mịẹ gono-gonomaa!

⁵ Ó pokolo anga goyegoye sara pakama-ḅoo, tẹ tụndụ ma na tụndụ ma na ḅaa gbasịmaa. Ọ́ fangala-fangalatẹ etela ma mịẹ gono-gonomaa, ọ́ pịkị gbima-gbimatẹ etela ma mịẹ lẹsẹrẹmaa.

⁶ Anịsakị tomi mamgba Tamụnọ ḅọrọma mẹ ẹrị ḅa!’ ”

⁷ Tomina-ogbo-ogbo Jọnị ḅara minji sara ḅẹ ḅo tẹso, ọ̀ nwẹnị ịn ḅẹẹ, “Ọmịnị ododo amẹẹ, tẹ ịn ḅaa ḅẹ ye ḅụ mangị-soarị aị kịkarị apụ, tụḅọ ḍuko ọ́ pịrị mịnẹ ọmịnị inetẹ Tamụnọ kẹ ó fomu ḅarị fomuye mẹ ḅụ mangị-so ḅẹ?

⁸ Ọmịna asi ḅụ ọ́ pịkị tẹ mẹ ḍie-pakama ḅẹ amịẹaị ọ́ nwẹn mịẹ, tẹ ḅarị ḅẹẹ ma mịnẹ Ebira-amụ anie ọmịna atẹngịḅọ. À ḍuko ọ́ pịrịarị mịnẹ Tamụnọ inetẹ mịna aḍụḅarị ma kẹ awọ sọma Ebira-amụ pịrị ḅa!

⁹ Ó nimi mịnẹ ịn kumbu farị sịn ma wẹrịma tẹ; iḅi mgbọlụ sụaa sịn, ini anị pẹlẹ-gbin ḅa kuno ḅụ, tẹ anị kẹ kọrị fịnị ḅio gbin suu dọkịma ḅa.”

¹⁰ Tomi ma nwẹnị ò ḅii, “Anịsakị, wamịnị mịẹ ḅẹ ye ḅọrọ tiye?”

¹¹ Ọ̀ nwẹnị pakịrị, “Maa kapa nyanaḅọ gberie kẹ nyana-a ḅọ pịrịị. Fịye nyanaḅọ kẹ fị ḅẹ ye ofori ḅọ na ḍiee.”

¹² Ama-igbigi da apụ ḅẹ ja apụ nwẹnị minji sara ḅẹ ḅo, tẹ ò gbela, “Ye-tolumaḅọ, wamịnị wa tiye mịẹ na-iḅi?”

¹³ Ọ̀ nwẹnị ḍuko ịn pịrị, “Ịn tọn ọ́ pịrị igbigi ḅịḅị nẹngị ye tomina ḅara ọ́ nwẹn oso ma.”

¹⁴ Ọmụapụ ma ḅẹ ja apụ sọ ò gbelam, “Wamịna jụ tọ-ḅara? Ndẹẹ wa mịẹ na-iḅi ye?” Ọ̀ nwẹnị ịn ḅẹẹ, “Ọ́ kụrọ-ḅara kẹ gbọrụḅọ sọ ḅara igbigi ọkị ma, ọ́ pịkị tomḅọ nimi-a ye kẹ mḅọ sịḅị sẹịn ma. Ịn kẹ ọ́ gbẹẹarị ye ọmịnị na iḅi.”

¹⁵ Tomi nwẹnị saakị ḅio-sẹsẹ tẹ jụmọ-jụmọ gbela, Jọnị ḅe ḅọrọ Mẹsaya ḅe ḅoto.

¹⁶ Mie ḅụ Jọnị nwẹnị inimgba ḅẹẹ, “Yẹrị minji kịngẹ mie à kẹ ọ́ sararị, kụma ị̀ nẹngị lama ḅọ ḅoarị. Anị ḅọ ḅe ḅụọ ḅẹ okuro ḍiki kịngẹ sọ à fima gbẹẹ-a. Tamụnọ Fịafịa Tẹmẹ ḅe na kọrị-fịnị na mie ọ̀ kẹ minji kiri ḍima tẹ kẹ ọ́ sara ḅarịye.

¹⁷ Ori mbịaka gugu kana ọ̀ ḅara emi, ọ̀ kẹ ẹsịma tẹ mbịaka ma gugu tẹ kobiri fịye koko anga suu ḅa, kụma ò fun ma kẹ biin-biin-a fịnị ḅio dọkịma ḅa.”

¹⁸ Jọnị Iḅi Oku mẹ ḍuko tomi ma pịrị sakị kịrị-kịrị aḅọkọ ọ̀ nwẹn kẹ ẹkwẹn kụrọma ịn pịrịm, mịnẹ ini ịna si amịẹaị ma ḍima.

¹⁹ Kụma Jọnị pịkị Ẹrọdị, Galili da ḅọ ḅe ḍiki-ịganịm, ori Ẹrodiyasị, ori iyimbere ta ma ọkị sime ye mẹ gotẹ, pịkị ja si-aị tẹ ọ̀ mịẹ tẹ aị na.

²⁰ Anịtẹso Ẹrọdị nwẹnị pịkị sii arị aị ma nẹngị ye mịẹ; anie ọ̀ Jọnị kun ikoli ḅio suu ye mẹ.

Minji-sara Jọnị Minji Kẹ Jizọsị Saram

²¹ Jọnị minji kẹ tomi mamgba sara fama tẹso, ọ̀ pịkị minji kẹ Jizọsị sọ saram. Tẹ Jizọsị tẹkẹarị ogbo so ḅọkọ nwẹnị finji,

²² tẹ Fịafịa Tẹmẹ ḅe koro ḅo tẹ olosịkịya ḍi tẹ ori ọgọnọ gbanam. Tẹ gbọrụ pọkọ nwẹnị So-ḅio ẹkwẹn tẹ ḅẹẹ: “Ị́yẹrị ì iḅi Tụḅọọ, ị́ ị̀ ḅụụ-ḅẹlẹm.”

Jizọsị Kịrayịsị Atẹngịapụ Ma

²³ Jizọsị saakị ọ̀ kọrịnama kọrị sakị kụra suei pembe ye ọ̀ sịḅị ḅọrọ tẹ. Tomi kuroma ḅara ḅụ ori anie Josẹfụ tụḅọ, anie Heli tụḅọ ḅe,

²⁴ Heli anie Matati tụḅọ, Matati anie Livayị tụḅọ, Livayị anie Mẹliki tụḅọ, Mẹliki anie Janayị tụḅọ, Janayị anie Josẹfụ tụḅọ, Josẹfụ anie

²⁵ Matatayasị tụḅọ, Matatayasị anie Emọsị tụḅọ, Emọsị anie Nahụmụ tụḅọ, Nahụmụ anie Esili tụḅọ, Esili anie Nagayị tụḅọ,

²⁶ Nagayị anie Mati tụḅọ, Mati anie Matatayasị tụḅọ, Matatayasị anie Sẹmẹyini tụḅọ, Sẹmẹyini anie Josẹkị tụḅọ, Josẹkị anie Joda tụḅọ,

²⁷ Joda anie Johananị tụḅọ, Johananị anie Rẹsa tụḅọ, Rẹsa anie Zerubabẹlị tụḅọ, Zerubabẹlị anie Sẹlịtẹlị tụḅọ, Sẹlịtẹlị anie Nẹri tụḅọ,

²⁸ Nẹri anie Mẹliki tụḅọ, Mẹliki anie Adi tụḅọ, Adi anie Kosamụ tụḅọ, Kosamụ anie Ẹlịmadamu tụḅọ, Ẹlịmadamu anie Ẹrị̀ tụḅọ,

²⁹ Ẹrị̀ anie Jọsụwa tụḅọ, Jọsụwa anie Ẹlịyeza tụḅọ, Ẹlịyeza anie Jorimu tụḅọ, Jorimu anie Matati tụḅọ, Matati anie Livayị tụḅọ, Livayị anie

³⁰ Simiyọnị tụḅọ, Simiyọnị anie Juda tụḅọ, Juda anie Josẹfụ tụḅọ, Josẹfụ anie Jonamu tụḅọ, Jonamu anie Ẹlịyakịmụ tụḅọ,

³¹ Ẹlịyakịmụ anie Mẹlẹya tụḅọ, Mẹlẹya anie Mẹna tụḅọ, Mẹna anie Matata tụḅọ, Matata anie Netanị tụḅọ, Netanị anie Devidi tụḅọ,

³² Devidi anie Jese tụḅọ, Jese anie Obẹdị tụḅọ, Obẹdị anie Bohazi tụḅọ, Bohazi anie Salimọnị tụḅọ, Salimọnị anie Nasọnị tụḅọ,

³³ Nasọnị anie Amịnadabụ tụḅọ, Amịnadabụ anie Adimini tụḅọ, Adimini anie Arini tụḅọ, Arini anie Hẹzịrọnị tụḅọ, Hẹzịrọnị anie Pẹrẹzi tụḅọ, Pẹrẹzi anie Juda tụḅọ,

³⁴ Juda anie Jekọbụ tụḅọ, Jekọbụ anie Ayịzịkị tụḅọ, Ayịzịkị anie Ebira-amụ tụḅọ, Ebira-amụ anie Tẹra tụḅọ, Tẹra anie Nahọ tụḅọ,

³⁵ Nahọ anie Sẹrugu tụḅọ, Sẹrugu anie Rehu tụḅọ, Rehu anie Pẹlẹgị tụḅọ, Pẹlẹgị anie Ẹba tụḅọ, Ẹba anie Sẹla tụḅọ;

³⁶ Sẹla anie Kenanị tụḅọ, Kenanị anie Afakịsadi tụḅọ, Afakịsadi anie Sẹmụ tụḅọ, Sẹmụ anie Noha tụḅọ, Noha anie Lamẹkị tụḅọ,

³⁷ Lamẹkị anie Mẹtusẹla tụḅọ, Mẹtusẹla anie Ẹnọkụ tụḅọ, Ẹnọkụ anie Jarẹdị tụḅọ, Jarẹdị anie Mahalalili tụḅọ, Mahalalili anie Kenanị tụḅọ, Kenanị anie

³⁸ Ẹnọsị tụḅọ, Ẹnọsị anie Sẹtị tụḅọ, Sẹtị anie Adamụ tụḅọ, Adamụ anie Tamụnọ tụḅọ.