Luku 24 - FỊAFỊA BAỊBỤLỤ

Jizọsị Fị-ḅụ-saakịm

¹ Sọndị dede-funfun ḅụ ereme ma ịn kẹ oju mẹ tẹlẹma ḅẹ kụnụaị ma ọkị tẹ mu ḍuḅu mẹ suku lam.

² Ịn nwẹnị ẹrị ḍuḅu mẹ ḅịḅị gbaịn sime ḍụḅarị mẹ mbelembele sikima tẹ.

³ Mie ḅụ in sọ-mum, kụma KỊNỊNYANAḄỌ Jizọsị ḅe oju mẹ ini ẹrị-a.

⁴ Tẹ in sịẹsime tẹ ọkọ kẹ anị kẹ kpọma kuromarị ogbo, ḅiotọn-a ḅara ḅụ, pịna-fa kapa sụa maa owiapụ ḅo ịna akaka sịẹm.

⁵ Opu ḅalafa ḅụ ereme ma nwẹnị iḅo, owiapụ ma ịn ḅẹẹarị sakị, “Ó tiegotẹ fịtẹ-apụ ma ogboku ḍumo wararị ḅọ ḍọkịarị?

⁶ Ọ̀ mịanga ofori, Tamụnọ ọ̀ saakịma tẹ. Ò Galili ḅụ simearị sakị ò ḍuko ọ́ pịrị ye mẹ ọ́ nwẹn kẹ ḅiokoromaa:

⁷ ‘In Tomḅọ Tụḅọ ḅe saḅama si-mịẹapụ pịrị ḅa, ini ọ̀ kẹ ẹngbẹsẹ-sịn ḅụ ḅakụ ḅa, tẹ tẹra aḍin sakị ḅụ ọ̀ saakị tẹ ḍumo ḅa.’ ”

⁸ Anịtẹso ereme ma nwẹnị ori ẹkwẹn ma kẹ ḅiokoroma,

⁹ tẹ ḍuḅu mẹ suku pịkịma-so, tẹ mu mịna aị ma ḍuko oyi gbọrụḅọ finji ma na kirikọn-apụ ma na pịrị.

¹⁰ Ereme ma anie Meri Magidalini na, Johana na, pịkị Jemusị iyingi Meri na; ini na sime osi ereme ma na mie ma ma ḅẹlẹma fịrịmẹnjịapụ ma pịrị ye.

¹¹ Kụma fịrịmẹnjịapụ ma ọkịm ereme ma papaaye ḍukoarị ẹrẹsị ini ịn minini-a.

¹² Kụma Pita nwẹnị saakị tẹ mangị mu ḍuḅu mẹ la; ó tuu tẹ ḍiki sakị ḍụẹịn ḅirima aḅịtẹ ma ngẹrị mie ori ẹrị ye, ò jen ẹrị-a. Anịtẹso ọ̀ nwẹnị pịkị so warị mu, tẹ paa ḅụụ-buarị tiye ḅọrọ paka tẹ ḅoto.

Jizọsị Ḍukamẹnjị Maa Apụ Ẹmaọsị Etela Ḅụ Ori Na Bịamam

¹³ Anị gbọrụ ene mẹ ḅụ Jizọsị ḍukamẹnjịapụ ma ḅẹ maa apụ so Ẹmaọsị nwẹn-sịn kala-ama mum, sọnọma atombi pembe ye anị nwẹn kẹ Jeruselemu ḅụ ḅelem,

¹⁴ tẹ in muarị sakị ịn paka aị ma kẹ ẹkwẹn jụmọ-jụmọ pịrịarị.

¹⁵ Ini ọkọ kẹ ẹkwẹn ma muarị ḅẹ sakị Jizọsị ḅioju mẹnjị mu ịna ḅụ sọ tẹ mẹnjị tẹ,

¹⁶ ini ori ẹrịm, kụma ini ò lekiri-a.

¹⁷ Jizọsị nwẹnị in gbela, “Ọ́ ḅọrọ mẹnjị-mẹnjị tẹ tọ aị ẹkwẹn-arị?” Ịn nwẹnị sịẹsime, ini ịna tọrụ-fụrụma fama wararị.

¹⁸ Ini ḅẹ gbọrụḅọ, ori ẹrẹ Kilopasị, nwẹnị ò gbela, “Mị bebe Jeruselemu mẹ ḅụ ị́yẹrị ngẹrị ḅọrọ igoniḅọ mụnọọ, tẹ mịna boowa aḍin ḅụ paka aị ma nimi-a?”

¹⁹ Ori nwẹnị gbela, “Tọ aị?” Ini mẹẹ, “Nazarẹtị ḅẹ Jizọsị ḅụụ paka aị ma. Ḅị tomḅọ ḅe ịkịankoroḅọọ, tẹ Tamụnọ na tomi mamgba na ọkịm ọ̀ kụrọ nyanam, ori ẹkwẹn na ọ̀ kọrịnama na ḅụ.

²⁰ Wamịna agbamịẹapụ ma na ama ḅẹrẹtọn-apụ ma na mẹẹ ini ọ̀ kẹ mu ḅaa ḅẹ tẹ ini ọ̀ kẹ ẹngbẹsẹ-sịn ḅụ ḅakụm.

²¹ Wa ḅiokpọm mịnẹ ori anie Izirẹlị ḅọrọma ḅẹ ḅọ! Anịngẹ-kụraḅio mie tẹra aḍin tẹ miemẹ mịẹ tẹ.

²² Wamịnị na gbọrụ ḅụụ mẹnjịarị ereme ma ḅụ ḅẹ ja apụ pịkị ḅo wamịna ḅụụ-gbiripuma tẹ, mịnẹ in dede-funfun kẹ mu ḍuḅu mẹ lam,

²³ kụma ini inetẹ ori oju mẹ ẹrị-a. Ịn pịkịma ḅo ḍuko wa pịrịm mịnẹ ini enjẹlị apụ ẹrịm, tẹ ini ịn ḅẹẹm ò ḍumo wararị.

²⁴ Wamịna ḅụụ ḅẹ ja apụ mu ḍuḅu mẹ la tẹ ereme ma ḍuko ḅara kẹ ye ẹrịm, kụma ini ori ẹrị-a.”

²⁵ Anịtẹso Jizọsị nwẹnị ịn ḅẹẹ, “Ọmịnị kụma ọ́ kpọma oḅori-sọ ḍinm! Ịkịankoroapụ ma ḍuko aị ma ḅẹ gberie sọ ọmịnị inetẹ sarasarama minini-a.

²⁶ Anị mịẹ na-iḅi ye-a, mịnẹ Mẹsaya ḅe mịna ḅụụ-fụka ma da-tolu-ḅọrọ ḅo ori ebube ḅio sọ?”

²⁷ Tẹ Jizọsị nwẹnị saakị Mozizi ḅụ ọkị mu ịkịankoroapụ mamgba la ḅụ, Fịafịa Ḍiri mẹ ḅio ọ̀ ḅụụ kẹẹ wararị aị ma ḍuko finji ịn pịrị.

²⁸ In ḅo in muarị kala-ama mẹ kpeki sakị Jizọsị mịẹ ḅara gbala ọ̀ ḅọrọ so ala anga mu ḅẹm;

²⁹ kụma ini ọ̀ dasịẹmam; ini mẹẹ, “Wamịnị na sime; ene gbaịn ḅẹ tẹ, ala-a anị furu ḅa.” Mie ḅụ ọ̀ nwẹnị ini na sime ḅẹ mu.

³⁰ Ọ̀ lẹgị sime tẹ ini na ye fị ḅẹ tẹso, ori nwẹnị fịturu mẹ ọkị, tẹ anị boma tẹ paịn tẹ kẹ ịn pịrị.

³¹ Anịtẹso ịna atọrụngbọ finji tẹ ini ò lekirim, kụma ọ̀ nwẹnị ịna tọrọkọ ịmaịn-faa so.

³² Tẹ ịn nwẹnị jụmọ-jụmọ ḅẹẹ, “Etela wa nwẹn mẹnjịma ḅoarị tẹ ọ̀ Fịafịa Ḍiri mẹ puu-finji wa pịrịarị sakị wamịna ḅioḅẹngbọ koko ḅẹlẹ ḅụra?”

³³ Anị gbọrụ sakị ḅụ ịn saakị tẹ pịkịma Jeruselemu mum. In mu la sakị oyi gbọrụḅọ finji ma na osi apụ ma na kobiri wararị,

³⁴ tẹ in ḍukoarị, “Karakara ye KỊNỊNYANAḄỌ ḅe ọ̀ saakị tẹẹ! Ọ̀ pịkị ḅụụ kẹ Sayịmọnị ḍie tẹẹ!”

³⁵ Arị maa apụ ma nwẹnị saakị etela ye paka ḅara, paka ḅara ḍuko, mu ọ̀ fịturu paịn tẹ ini anị kẹ KỊNỊNYANAḄỌ ḅe lekiri anga la.

Jizọsị Ḅụụ Pakama Ò Ḍukamẹnjịapụ Ma Ḍiem

³⁶ Maa apụ ma paa miemẹ ḍuko ịn pịrịarị ogbo, ḅụụ-nimia ḅara ḅụ KỊNỊNYANAḄỌ ḅe ḅioju nwẹnị ḅo ịna ogboku sịẹ tẹ ịn ḅẹẹ, “Dein ọmịnị na simee.”

³⁷ Ịn ḅalafa lamam, ịn sịnm ịn ḍụẹịn ẹrị tẹ.

³⁸ Ori nwẹnị in ḅii, “Tiye ọmịna ḅụụ-gbiripumarị? Ọmịna ḅio tiegotẹ maaịn-maaịn tọn-arị?

³⁹ Ọmịnị ị̀ aḅara ma na ị̀ aḅụọ ma na ḍiki tẹ nimii mịnẹ yẹrị ḅioju. Ọ́ ḅara kẹ ị̀ lama ḍiki kụma ó nimi ḅa, ḍụẹịn nwẹn meni-oju sụa ḅara kẹ meni na mgbe na nyana nyana-a, ọmịnị inetẹ ẹrịarị ḅara ḅụ.”

⁴⁰ Ò mie ḍuko tẹso, ọ̀ nwẹnị ori aḅara na ori aḅụọ na kẹ in ḍie.

⁴¹ Anịsọ ini inetẹ paa minini-a, ḅụụ-bua na ḅioḅẹlẹ na pịkị ịna ḅụ ḅinm; mie ḅụ ọ̀ nwẹnị in gbela, “Mịanga ọ́ fị-fị ye nyana?”

⁴² Ịn nwẹnị sọọtẹ inji kẹ ọ̀ pịrị,

⁴³ tẹ ọ̀ nwẹnị ọkị tẹ ịna tọrọkọ pẹị.

⁴⁴ Anịtẹso ọ̀ nwẹnị ịn ḅẹẹ, “Ma ma anie àrị ọmịnị na simearị sakị à ḍuko ọ́ pịrị-pịrị aị ma, mịnẹ Mozizi Oloko mẹ na, ịkịankoroapụ ma na, Nume Ḍiri mẹ na, ị̀ ḅụụ ḅụ kẹẹ ye goyegoye paka fama ḅa.”

⁴⁵ Anịtẹso ọ̀ nwẹnị ịna aḅioḅẹngbọ ma finji, ịn Fịafịa Ḍiri mẹ fiearị ye naa ḅẹ ḅara,

⁴⁶ tẹ ịn ḅẹẹ, “Mie anị kẹẹ ḅara: Mẹsaya ḅe tọrụsiẹrị ḅa, tẹ tẹra aḍin karama ene ḅụ ọ̀ fị-ḅụ-saakị ḅa,

⁴⁷ tẹ ori ẹrẹ ḅụ in si ḅụ pịkị na, si-wẹrịso na oku mẹ ḍuko sịẹ mamgba pịrị ḅa, Jeruselemu ḅụ saakị.

⁴⁸ Ọmịnị anie mịna aị ma ḅẹ ḅẹrẹ-kiri sime apụụ.

⁴⁹ Tẹ ị̀ Ḍa minini ọ́ pịrị ye mẹ yẹrị ḅarana anị kẹ ọ́ fịrịma ḅa. Kụma gbala-gbala opu ama mẹ ḅio ó so ma nwenii kụrọ So-ḅio koro ḅo ọmịna ọgọnọ gbana sakị la.”

Tamụnọ Jizọsị Ọkị Iwo So Mum

⁵⁰ Anịtẹso ọ̀ nwẹnị tọrọkọ tarị tẹ ini na opu ama mẹ ḅio paka mu Bẹtani la, tẹ anịanga ḅụ ḅara saakị tẹ in boma.

⁵¹ Ori in bomarị ogbo ori ịna ḅụ puu ḅele tẹ Tamụnọ ọ̀ kẹ iwo so mum.

⁵² In sunsin ọ̀ pịrị tẹ opu ḅioḅẹlẹ na so Jeruselemu mum,

⁵³ tẹ ịna sakị mamgba kẹ Tamụnọ-warị mẹ ḅio mu, mu tẹ ịmịẹtẹ kẹ Tamụnọ ḅẹẹm.