Luku 23 - FỊAFỊA BAỊBỤLỤ

In Jizọsị Kẹ Payịleti Tọrọkọ Ḅom

¹ Bebe kobiri-ogbo mẹ nwẹnị saakị tẹ Jizọsị kẹ Payịleti tọrọkọ mu,

² tẹ saakị ḅẹrẹ ḍuko, ḍuko ọ̀ sịḅị gbana anịanga ḅụ; ini mẹẹ, “Wa ḅị tomḅọ ḅe kunm ori ẹkwẹn tẹ kẹ wamịna atomi sịḅị ḅio pikirimarị ogbo, mịnẹ ịn ḅarị ama igbigi oso Romu tomikiri mẹ daarị ḅọ ḅe pịrị ma, tẹ pịkị ḅẹẹarị mịnẹ ori anie Mẹsaya ḅe ḅioju, anie fiearị ye, amadaḅọ.”

³ Payịleti nwẹnị ò gbela, “Ị́yẹrị anie Juu-ḅẹ-apụ ma amadaḅọ ḅe?” Jizọsị nwẹnị pakịrị, “Ị́yẹrị ọkọ ḅẹẹarị!”

⁴ Anịtẹso Payịleti nwẹnị agbamịẹapụ ma na tomina-ogbo mẹ na ḅẹẹ, “À gotẹ ḅẹrẹ-pẹlẹ ḅị tomḅọ ḅe ḅara sima ḅẹ ye àrị ẹrị-a.”

⁵ Kụma ini nwẹnị paa ịgbanị kụrọma tọrọkọ-tọrọkọ muarị, “Ḅị tomḅọ ḅe tolumaye mẹ bebe Judiya mẹmgba ḅụ ama-fiema saakị tẹ tomi ma ogboku. Galili ḅụ mie ọ̀ saakị ye, mịọkụ ò ḅo mịanga la tẹ.”

Payịleti Jizọsị Kẹ Ẹrọdị Fịrịmam

⁶ Payịleti miemẹ naa sakị ò gbelam, “Ḅị tomḅọ ḅe Galili ḅẹ ḅọ, aro?”

⁷ Ò ḅo nimi tẹ mịnẹ Ẹrọdị suku-ḅio sime ama ḅụ ò ḅom ḅẹ sakị ò Jizọsị kẹ Ẹrọdị fịrịmam. Anị sakị mẹ ḅụ Ẹrọdị ḅe sọ Jeruselemu ḅụ simem.

⁸ Ẹrọdị ḅe Jizọsị gbolomaye naa tẹ ori ẹrị ḅẹ ḍọkịarị kụra-ḅio iḅerea ẹrẹsị ò Jizọsị ẹrị ye mẹ kpọma ò ḅioḅẹlẹmam. Ò ḅiotọnm Jizọsị ḅụụ-buamaye mịẹ tẹ ori ẹrị ḅa.

⁹ Mie ḅụ Ẹrọdị tọnwa aị kẹ Jizọsị gbelam, kụma gberie-sọ ọ̀ pakịrị-a.

¹⁰ Agbamịẹapụ ma na, Oloko toluma apụ ma na nwẹnị paka-ḅo tẹ kụrọ kụrọtẹ aḅẹrẹ kẹ Jizọsị sịḅị sẹịn.

¹¹ Ẹrọdị na ori ọmụapụ na nwẹnị Jizọsị ḍiki iderima tẹ ọ̀ kẹ kpọọtii. Anịtẹso ịn nwẹnị iḅi kapa kẹ ọ̀ sụa tẹ ọ̀ kẹ pịkị Payịleti fịrịma.

¹² Anị gbọrụ ene mẹ ḅụ mie Ẹrọdị na Payịleti na ḅo ikia sọ ye; tẹrẹmẹ ḅo anị sakị la ịn fịya-a.

Payịleti Ḅaa-Ḅẹrẹ Pẹlẹ Jizọsị Pịrịm

¹³ Payịleti nwẹnị agbamịẹapụ ma na, sịḅịdapụ ma na tomi ma na sịn kobiri,

¹⁴ tẹ ịn ḅẹẹ, “Ọ́ ḅị tomḅọ ḅe kẹ ḅo sakị ọmịnị mẹẹ ò tomi ma toluma irimarị. Ọmịna tọrọkọ àrị ò pekele-ḍiki la ḅara ḅụ, àrị ọ̀ ḅụụ ọ́ kẹ ọ̀ sịḅị sẹịn aị ma ḅe gberie-sọ ẹrị-a.

¹⁵ Ẹrọdị sọ ọ̀ ḅụụ si ẹrị-a ẹrẹsị ori ọ̀ kẹ pịkị wa fịrịmam. Ḅị tomḅọ ḅe mịẹ si tẹ fịị gbẹẹ gberie-sọ ofori.

¹⁶ Ọkọẹrẹsị àrị ò fomu tẹ ọ̀ ḅụụ ḅara-siin ḅa.”

¹⁷ Saḅaḅọrọ-Alalị goyegoye ḅụ Payịleti gbọrụ ikoliḅọ ḅụụ ḅara-siin ịn pịrị pịrịm.

¹⁸ Bebe tomina-ogbo mẹ nwẹnị oloku pakama, “Ọ̀ ḅaa! Barabasị ḅụụ ḅara-siin wa pịrịị!”

¹⁹ (Barabasị ḅe ama-fiema na kịnị ḅaa na tẹ opu ama mẹ ḅio paka aị mie in gotẹ ọ̀ kẹ ikoli suu ye.)

²⁰ Ò Jizọsị ḅụụ ḅara-siin ḍọkịm ẹrẹsị Payịleti sin ẹkwẹn tomi ma pịrịm.

²¹ Kụma ini oloku ọ̀ ḅịḅị gbaịnm, “Ọ̀ kẹ ẹngbẹsẹ-sịn ḅụ ḅakụụ, ọ̀ kẹ ẹngbẹsẹ-sịn ḅụ ḅakụụ!”

²² Payịleti nwẹnị tẹrẹị karama sakị kẹ ịn ḅẹẹ, “Ọ̀ ḅọrọ tọ si mịẹ? Yẹrị kụma àrị inetẹ ọ̀ mịẹ tẹ fịị gbẹẹ si ḍọkị ḅo ḅịa. Yee àrị ò fomu tẹ ọ̀ wẹrịso.”

²³ Kụma tomi ma paa oloku-oloku kụrọmarị mịnẹ mịẹ ḅara, mịẹ ḅara in Jizọsị ḅe kẹ ẹngbẹsẹ-sịn ḅụ ḅakụụ, nwenii kunoma ḅụ ini oloku-oloku tẹ ḅii ḅara anị nwẹnị ọkọ ḅọrọ.

²⁴ Mie ḅụ Payịleti nwẹnị in ḅii ḅẹrẹ ḅịḅị mẹ pẹlẹ Jizọsị ọgọnọ gbana.

²⁵ Ọ̀ nwẹnị anị ama-fiema na kịnị ḅaa na gotẹ ịn kẹ ikoli suu ḅọ ḅe pakama ịn pịrị, in ḅii ḅara ḅụ, tẹ Jizọsị saḅama ịn pịrị mịnẹ in mu ịna ḅiotọn ḅara kẹ ọ̀ mịẹ.

In Jizọsị Kẹ Ẹngbẹsẹ-sịn Ḅụ Ḅakụ Ḅaam

²⁶ Ọmụapụ ma nwẹnị Jizọsị ọkị so, tẹ in muarị ogbo ịn nwẹnị ḅo Sayịmọnị nwẹn-sịn Sayịrini ḅẹ ḅọ na bịama, ó piri ọgọnọ-jụ sime tẹ pịkịma opu ama mẹ ḅio sọ-muarị. Ịn nwẹnị ò kun tẹ ẹngbẹsẹ-sịn mẹ kẹ ori apana gbana tẹ ori anị dogi tẹ Jizọsị ọḅụjụ mẹnjị.

²⁷ Tọnwa apụ ò ḍuka-mum, ịna ḅụ ja ereme sọ sime tẹ ò gotẹ pee-peema owum.

²⁸ Jizọsị nwẹnị pịkị ịn da tẹ ịn ḅẹẹ, “Jeruselemu ḅẹ ereme! Ọmịnị ì gotẹ owu ma, ọmịnị ọmịna aḅụụ na, ọmịna awọmẹ na gotẹ owuu.

²⁹ Gbala sakị ḅoarị, tẹ tomi ḅẹẹ ḅa, ‘Awọ iyi-a, fura-a, pịkị awọ ḍikiḍiki-a ereme ma kụma in boma tẹ!’

³⁰ Ḅo ọkọ la sakị tomi tụndụ ma sịn ḅa, ‘Ọ́ paịn wa ponomaa!’ ịn pịkị tụndụ ma ḅẹẹ ḅa ‘Ọ́ wa ḅọị!’

³¹ Sịn mẹ ịwọ wararị ogbo nwẹn pembema aị mịẹarị kụma, anị tọ-ḅara sime ḅa anị samụnọ sakị?”

³² Ja maa owiapụ, ini maa apụ ma si-mịẹapụ, ịn nwẹn kẹ Jizọsị na sụa ḅaa ḅẹ mum,

³³ tẹ in ḅo ịn kẹ Arịapụ sịḅịkọ nwẹn-sịn anga la tẹso, ịn nwẹnị Jizọsị na maa si-mịẹapụ ma na kẹ ẹngbẹsẹ-asịn ḅụ ḅakụ, gbọrụḅọ ori ama-ḅara anga, osi-ḅọ ori ere-ḅara anga.

³⁴ Jizọsị nwẹnị ḅẹẹ, “Ḍa, ịna si-wẹrịso ịn pịrị! Ịn mịẹarị ye in nimi-a.” Ịn nwẹnị okoḅa sara tẹ ori akapa ḍiya ọkị.

³⁵ Tomi ma sịẹ tẹ ḍikiarị sakị Juu-ḅẹ-apụ ma ḅẹ sịḅịdapụ ma ḅịḅị kpọọ, kpọọ Jizọsị pịrịarị, “Ọ̀ ja apụ ḅọrọma ḅọrọmam nwẹn ḅẹẹ-a; ori Mẹsaya ḅe tẹ Tamụnọ sẹlẹ-ọkị tẹ ḅọ ḅe ḅẹḅẹ, yee ori amịna ḅụụ ḅọrọma!”

³⁶ Ọmụapụ ma sọ ọ̀ kẹ kpọọtiim. Ịn kpọọtẹ iru kẹ ọ̀ dam ò ḅuu,

³⁷ tẹ ḅẹẹm, “Ị́yẹrị Juu-ḅẹ-apụ ma amadaḅọ ḅe ḅẹḅẹ, ị́ ḅụụ ḅọrọmaa!”

³⁸ Ọ̀ sịḅị ọgọnọ-jụ ịn ma ẹkwẹn ma kẹẹm: “Ḅie Juu-ḅẹ-apụ ma Amadaḅọ ḅee.”

³⁹ Anịanga sololo wararị si-mịẹapụ ma ḅẹ gbọrụḅọ ọ̀ mịẹ-sima simatẹ ḅẹẹm, “Ị́yẹrị kọkọ Mẹsaya ḅe? Ị́ ḅụụ ḅọrọma tẹ wa kẹ sụa ḅọrọma!”

⁴⁰ Anịtẹso osi-ḅọ ḅe nwẹnị ò ḍiki ịganị, “Ị́ Tamụnọ ḍiki ḅalafa-a aro? Í kọkọ ori na gbọrụ fomu-ḅara daarị.

⁴¹ Wamịna nye kuram, wa mịẹ ḅo ye ḅẹ fomu-ḅara mie wa daarị ye, kụma ori ọ̀ gbọrụ siye sọ mịẹ-a.”

⁴² Tẹ ọ̀ nwẹnị Jizọsị ḅẹẹ, “Jizọsị, sisi í ḅo ị́ ama ọkị daa ḅẹ sakị, ị̀ kẹ ḅiokoromaa!”

⁴³ Jizọsị nwẹnị ọ̀ ḅẹẹ, “À minini ị́ pịrịm, mịmgba na ị̀ na Paradayịsị ḅio sọ ḅa.”

Jizọsị Kunoma Ọwụ Sara Tẹ Fịịm

⁴⁴ Ḅo ene-ogbo la sakị ịrụa ḅarị ḅịya-a, tẹ kanakana bebe Judiya mẹ gbaịn nwenii tẹra so lam,

⁴⁵ tẹ ịn kẹ Tamụnọ-warị mẹ ḅio kiki-pẹlẹ-ḅịtẹ mẹ nwẹnị maaịn puu.

⁴⁶ Tẹ Jizọsị nwẹnị oloku pakama gele pọkọ ḅụ, “Ḍa! Àrị ị̀ tẹmẹ kẹ ị́ ḅara sụam!” Ò mie ḍuko tẹso, ọ̀ nwẹnị fịị.

⁴⁷ Ọmụ-alaḅọ ḅe paka ye mẹ ẹrị tẹ Tamụnọ boma tẹ ḅẹẹm, “Karakara yee, ḅị tomḅọ ḅe iḅi tomḅọọ!”

⁴⁸ Anịanga dẹẹ tẹ ye mẹ ḍiki sime apụ ma paka ye ẹrị tẹso, inimgba nwẹnị ḅara kẹ ekpe fomu, fomu tẹ kururu na so warị mu.

⁴⁹ Anị ọkụma da-da Jizọsị ḅe nimi apụ mamgba, Galili ḅụ ọ̀ ḅụ sọ tẹ ḅo ereme ma kẹ sụa, ala anga mie in sime tẹ paka aị ma ḍiki ye.

Arịmatiya Ḅẹ Josẹfụ Ò Ḍuḅu Ḅio Jizọsị Ḍiḅim

⁵⁰ Anị sakị ḅụ Josẹfụ nwẹn-sịn gbọrụḅọ simem, tẹ Juu-ḅẹ-apụ ma Sịẹ-Kobiri mẹ ḅẹ ḅọ, pịkị karakara iḅi tomḅọ.

⁵¹ Ịn pẹlẹ Jizọsị pịrị si ḅẹrẹ mẹ na ịn kẹ ọ̀ mịẹ aị ma na ḅụ ọ̀ ḅịḅị sọ-a; tẹ Judiya sịẹ mẹ ḅụ ịn kẹ Arịmatiya sịn ama mẹ ḅụ ọ̀ pakam, tẹ ọ̀ pịkị Tamụnọ Ama-da mẹ koru simem.

⁵² Ori anie mu Payịleti ḅara Jizọsị oju mẹ ḅii ọkị ye.

⁵³ Anịtẹso ọ̀ nwẹnị anị sin koroma ḅo tẹ fereferetẹ pịna-fa ḅịtẹ kẹ oju mẹ tẹlẹma tẹ kẹ ḍụḅarị ḅụ in soku ḍuḅu, tẹ jene-jene ḍụẹịn amụ ḍiḅi-a anga, ḅụ koroma.

⁵⁴ Miemẹ mịẹ ene anie Tuḅo Sọnọa ḍin, tẹ kẹlẹ kọnm Ịnyọsara-Ene mẹ saakị ḅa.

⁵⁵ Galili ḅụ Jizọsị ḍuka ḅo ereme ma nwẹnị Josẹfụ na mu ḍuḅu mẹ na ini oju mẹ koroma ḅara na ḍiki.

⁵⁶ Anịtẹrẹmẹ ịn nwẹnị pịkịma warị mu, tẹ ịn kẹ oju mẹ tẹlẹma ḅẹ kụnụaị kobiri wẹrị. Oloko mẹ tọn ḅara ḅụ, ini Ịnyọsara-Ene mẹ kẹ ịnyọsaram.