Luku 21 - FỊAFỊA BAỊBỤLỤ

Diḅọ-fịtẹ-ẹrẹḅọ Agba Igbigi Kẹ Ḅo Tamụnọ Pịrịm

¹ Jizọsị ḍiki ikelema tẹ ẹrịm, igbigi nyana apụ igbigi kẹ Tamụnọ-warị mẹ ḅio ịn kẹ Tamụnọ pịrịarị igbigi kẹ sụa-sụa igbe ḅio sụarị,

² tẹ ọ̀ pịkị gbọrụ igoin lamatẹ diḅọ-fịtẹ-ẹrẹḅọ ẹrịm, árị ịrụ lamatẹ maa igbigi kẹ sụarị.

³ Ọ̀ nwẹnị ḅẹẹ, “À ḍuko ọ́ pịrịarị, ma igoin diḅọ-fịtẹ-ẹrẹḅọ ma kẹ sụa ye osi apụ mamgba sụa ye nẹngịm.

⁴ Osi apụ ma ịn kọn ngọ la ḅara ḅụ inetẹ pakama ḅarịye mie ịn pịrị ye; kụma árị igoinḅọ ma nyana tẹ kẹ anga ḅẹ ye mẹmgba mie á kẹ sụa ye.”

Jizọsị Ịn Tamụnọ-warị Mẹ Kaan-sara Ḅẹ Ye Ḍukom

⁵ Jizọsị ḍukamẹnjịapụ ma ḅẹ ja apụ Tamụnọ-warị mẹ iḅi na, ịn kẹ anị nama aḍụḅarị ma iḅi ḅara na, ịn kẹ ḍie Tamụnọ pịrịarị aị ma na, bomarị ogbo ọ̀ nwẹnị ḅẹẹ,

⁶ “Ọ́ nwẹn ẹrịarị aị mamgba, sakị ḅo ḅa, gbọrụ ḍụḅarị sọ ḅarị amịna kiri ḅụ sime ḅịa. Arịmgba in sukuruma-gbin fama ḅa.”

Ḅụụ-fụka Na Ḅaa-aḅọkọ Kẹ Minini apụ Ḍọkị Ḅo Ḅa

⁷ Ịn nwẹnị gbela, “Ye-tolumaḅọ, tọ sakị í ḍukoarị ye mẹ ḅọrọ paka ḅẹ? Anịsakị wa tọ elekima kẹ anị lekiri ḅa mịnẹ anị paka ḅẹ sakị mẹ ḅo la tẹ?”

⁸ Jizọsị mẹẹ, “Ọmịnị ẹbịị, ó mininitẹ kịnị oḅori kẹ ọ́ sịn ma. Tọnwa apụ ị̀ ẹrẹ kẹ ḅo tẹ ḅẹẹ ḅa, ‘Yẹrị anie Kịrayịsị ḅee!’ Ịn pịkị ḅẹẹ ḅa, ‘Sakị mẹ laa tẹ!’ Kụma ọmịnị ịn ḍuka-mu ma.

⁹ Ọmụ ịba na tomikiri gbolokiarị ye na ọ́ nwẹn naa sọ, anị ọmịna ḅalafa ma ma; ma ma anie tarị mịẹ ḅọrọ ḅarị aị, kụma arị fie-a mịnẹ kunoma mẹ ḅo kpeki tẹ.”

¹⁰ Ọ̀ pịkị ḅẹẹm, “Ja asịẹ na ja asịẹ na owu-sọ ḅa. Amadapụ owu kẹ ja apụ, ja apụ paka ḅa.

¹¹ Kiri ḅalafama ḅara kẹ jike ḅa; ḅuru tomi ḅaa ḅa, ama-fama obi anga, anga la ḅa; jen ene kịnị amụ ẹrị-a ḅalafama aị So-tọrụ paka ḅa.

¹² Kụma ma mamgba mịẹ-a ogbo ini ó kun tẹ ọ́ kẹ tọrụsiẹrịma ḅa; ini ọ́ kẹ ḅẹrẹkọn mu ḅa ama-awarị ḅio, tẹ ọ́ kẹ ikoli suu ḅa. Tomi ì gotẹ ọ́ kẹ amadapụ na ḅẹrẹtọn-apụ na tọrọkọ ḅẹrẹkọn mu ḅa.

¹³ Miemẹ ọ́ kẹ Iḅi Oku mẹ ḍuko ḅẹ sakị sọ ḅa.

¹⁴ Ó nimi wẹrịị mịnẹ anị sakị ḅụ ọmịnị ọ́ kẹ ḅụụ ḍụa ḅẹ ye go ḅalaḅala ḅịa

¹⁵ gbala ẹkwẹn-aḅịḅị na nimi na tẹ yẹrị kẹ ọ́ pịrị ḅarịye mẹ ḅụ si kẹ ọ́ tọn apụ ma inetẹ ọmịna kuḅu sịẹ ḅịa.

¹⁶ Ọmịna ḍapụ-na-iyingiapụ-na, owiapụ-amịnapụ na, furo-ḅẹ-apụ na, ikiapụ na ọ́ kẹ tomina ḅara-ḅio suu ḅa tẹ ini ọmịna ḅụ ḅẹ ja apụ ḅaa ḅa.

¹⁷ Ì gotẹ ḅẹḅọ-ḅẹḅọ ó ḍiki ḅioḅu ḅa.

¹⁸ Kụma ọmịna sịḅị-ḅẹ-inume ḅẹ gbọrụmgbọ sọ faa ḅịa.

¹⁹ Ọ́ sịẹ-kụrọọ, anị ḅụ mie ọmịna ḍumo ḅọrọtẹ ḅọrọma ḅarịye.

Jizọsị Jeruselemu Kaan-sara Ḅẹ Ye Mẹ Ḍukom

²⁰ “Ọmịnị ẹrịm ọmụ-ogbo-ogbo Jeruselemu ikelema-koro tẹ ḅẹḅẹ, ó nimi mịnẹ ala-a ini anị kaan-sara ḅa.

²¹ Anị sakị ḅụ Judiya ḅụ sime apụ mangị mu tụndụ ma kpọlị nyanam; opu ama mẹ ḅio sime apụ anị koroma mangị; tẹ piri ọgọnọ ḅụ sime apụ pịkịma opu ama mẹ mu ḅịa.

²² Arị ene ma anie ‘Fomu-ḅara ḅo tomi la ḅẹ ene ma,’ tẹ Fịafịa Ḍiri mẹ ḍuko aị mamgba mịẹ fama ḅa.

²³ Arị ene ma ḅụ furatẹ-ereme na, awọ ọlọ wararị iyingiapụ na ịn tẹkẹlẹ tẹ! Ḅalafama opu ḅụụ-fụka ḅo Judiya mẹ la ḅa, tẹ Tamụnọ fomu-ḅara ḅo mịna atomi ma ọgọnọ gbana ḅa.

²⁴ Ini okologie kẹ ja apụ ḅaa ḅa; ini ikoliapụ ḅara kẹ osi apụ kun so ja asịẹ mu ḅa; tẹ oru nimi apụ Jeruselemu mẹ ḅio anga tẹ mẹnjịma, mẹnjịma nwenii ịna sakị kara ḅa.

Tomḅọ Tụḅọ Ḅe Ḅoo Mẹ

²⁵ “Kịrị aị paka ḅa ịrụa mẹ na, akalụ mẹ na lolia ma na ḅụ. Tomikiri ḅẹ asịẹ ma tẹmẹ nyana-a ḅara kẹ ḅalafa ḅa, tọrụ mẹ ḍarịarị ye mẹ na ọnụngọ mẹ ḅakụ-ḅakụ seri sọarị ye mẹ na gotẹ.

²⁶ Ḅo tomikiri mẹ la ḅẹ ḅoarị ye mẹ tomina ḅalafama nwenii ịn naịn-ḅọrọ so ḅa. So ḅio ḅẹ opu akụrọ mamgba gboloki ḅa.

²⁷ Anịtẹso Tomḅọ Tụḅọ ḅe ḅụụ pakama tẹ kụrọ na ebube na kẹ So-tọrụ mẹ ḅụ ideri-ḅo ḅa.

²⁸ Ye ḅo saakị ọkọ pakarị ḅẹḅẹ, ọ́ saakị sịẹ tẹ sịḅị saakị sịẹmaa, gbala ọmịna ḅọrọma mẹ ḅo kpeki tẹ.”

Ịla Sịn Mẹ Ḅẹ Ḍawọye Mẹ

²⁹ Anịtẹso Jizọsị nwẹnị mị egberi mẹ gbaa ịn pịrị, “Ọmịnị ịla sịn mẹ na ja asịn mamgba na kẹ ḅiokoromaa.

³⁰ Arị saakị ịwọ ịnyịnya sụarị ḅẹḅẹ ó nimi tẹ mịnẹ ịrụa-kụra kpeki tẹ.

³¹ Anị gbọrụ ḅara ḅụ ọ́ mịna aị ma saakị pakarị mẹ ẹrị ḅẹḅẹ, ó nimi ḅa mịnẹ Tamụnọ Ama-da mẹ ḅo kpeki tẹ.

³² “Ọ́ kẹ ḅiokoromaa mịnẹ nwẹn ḍumo sime wararị apụ ma amụ fịị fama-a ogbo ma mamgba mịẹ fama ḅa.

³³ So na Kiri na ḅọrọ-so ḅa, kụma ị̀ ẹkwẹn ma ḅọrọ so ḅịa gbamasom.

Tomi Ẹbị Nyana Na-iḅim

³⁴ “Ọmịnị ẹbị nyana-a! Anie ofori tẹ ọ́ fị-na-ḅuu-na ngẹrị kẹ mịẹ-mịẹye sọma tẹ, pịkị mị tomikiri ḅẹ ḅalaḅala kọn-arị ogbo, ḅiotọn-a ḅara ḅụ anị Ene mẹ ḅofa ḅo ó kun sịẹma,

³⁵ ḍiein nama kun-ḅara. Anị ọkọ kẹ ḅo tomikiri sime apụ mamgba kun ḅa.

³⁶ Sakị mamgba ọmịnị ẹbị tẹ tẹkẹẹ, ọmịnị ịnyọ nyana tẹ paka ḅe aị mamgba da-tolu tẹ ḅo Tomḅọ Tụḅọ ḅe tọrọkọ sịẹ ḅarị ḅara.”

³⁷ Jizọsị arị ene ma kẹ Tamụnọ-warị mẹ ḅio ye tolumam, tẹ ḅoḅiri goyegoye ọ̀ paka-so Olivu Tụndụ mẹ ọgọnọ mu tẹ ḍin mẹ kẹ simem.

³⁸ Dede-funfun goyegoye tomi mamgba Tamụnọ-warị mẹ mu, mu tẹ ò pokim.