Luku 20 - FỊAFỊA BAỊBỤLỤ

In Jizọsị Gbelam Tụḅọ Kụrọ Kẹ Ọ̀ Pịrị

¹ Gbọrụ ene ḅụ, Jizọsị Tamụnọ-warị mẹ ḅio ye kẹ tomi ma toluma tẹ pịkị Iḅi Oku mẹ ḍukoarị ogbo Sịḅịda-Agbamịẹapụ ma na, Oloko Tolumapụ ma na, ama ḅẹ omongiapụ ma na ḅo

² tẹ ọ̀ gbelam, “Ị́ nyana tẹ kẹ ma aị ma mịẹarị kụrọ ḍuko wa pịrị, tụḅọ mị kụrọ mẹ kẹ ị́ pịrị?”

³ Jizọsị nwẹnị ịn pakịrị, “Mịọkụ yee yẹrị sọ gberie kẹ ó ḅii, ó ḍuko ị̀ pịrịị,

⁴ Jọnị kẹ minji sara kụrọ mẹ Tamụnọ ḅara ḅo mụnọọ, tomina aḅara ḅo?”

⁵ Ini-ini-ini nwẹnị saakị nụnụa, “Wa ḅọrọ tiye kẹ ọ̀ pakịrị ḅẹ? Wa nimiatẹ ḅẹẹm, ‘Tamụnọ ḅara ḅom’ ḅẹ kụma ọ̀ wa ḅii ḅa, ‘Anị sakị ó tiegotẹ Jọnị minini-a?’

⁶ Kụma wa pịkị ḅẹẹm, ‘Tomina aḅara ḅom’ ḅẹ kụma, mị bebe tomina-ogbo mẹ Jọnị ịkịankoroḅọ mẹ minini la ḅara ḅụ, ịn ḍụḅarị kẹ wa gbin ḅa.”

⁷ Mie ḅụ ịn nwẹnị pakịrị, “Anị ḅo anga wa nimi-a.”

⁸ Tẹ Jizọsị nwẹnị ịn ḅẹẹ, “Ọkọ ḅẹḅẹ yẹrị sọ à kẹ mịna aị ma kọrịarị kụrọ mẹ ḅo anga, à ḍuko ọ́ pịrị ḅịa.”

Jizọsị Kụrọ-Ḍụọ Ọkọ-apụ Egberi Gbaam

⁹ Anịtẹso Jizọsị mị egberi mẹ gbaa tomi ma pịrịm, “Gbọrụ sakị gbọrụḅọ girepu-ḍụọ ḍiḅim. Ọ̀ nwẹnị anị kẹ ọkọ-apụ pịrị, tẹ ama koroma so alama.

¹⁰ Mgbọlụ ma kaịn, kaịn sakị la tẹso, ori ọ̀ fịrịmẹnjịḅọ kẹ ḍụọ mẹ ọkọ-apụ ma fịrịmam, mịnẹ ini ọ̀ la kiri kẹ ọ̀ pịrịị, ini mgbọlụ ma kaịn tẹ ḅẹḅẹ. Kụma ḍụọ ọkọ-apụ ma nwẹnị fịrịmẹnjịḅọ ḅe fomu, tẹ papaa ḅara kẹ ọ̀ kẹ ọ̀ nyanaḅọ fịrịma.

¹¹ Mie ḅụ ọ̀ pịkị jen fịrịmẹnjịḅọ kẹ fịrịmam; kụma ḍụọ mẹ ọkọ-apụ ma nwẹnị anị ḅọ sọ kun fomu, ḅụụ-jịrịma ḅara kẹ ọ̀ mịẹ, tẹ papaa ḅara kẹ ọ̀ kẹ ọ̀ nyanaḅọ fịrịma.

¹² Anịtẹso ọ̀ nwẹnị tẹrẹị karama fịrịmẹnjịḅọ kẹ fịrịma. Ḍụọ mẹ ọkọ-apụ ma nwẹnị ye kẹ ori sọ lama, tẹ ḍụọ mẹ ḅio ò sukuruma pakama.

¹³ Anịtẹso girepu-ḍụọ mẹ nyanaḅọ ḅe nwẹnị kuroma, ‘À tiye mịẹ ḅẹ? Àrị ị̀ ḅụụ yela lama wararị tụḅọ ḅe kẹ fịrịma ḅa; piki-pikiye-ofori ḅara ḅụ ini ọ̀ kẹ ye-sịn ḅa!’

¹⁴ Kụma tụḅọ ḅe sịẹ paka tẹ ọkọ-apụ ma ori ẹrị gbọrụ sakị ịn nwẹnị ọ̀ kẹ ḅẹrẹ-ḅiya, ‘Ḅieḅe anie ḍụọ mẹ nyana ḅarị ḅọ ḅee, ó yee wa ọ̀ ḅaa tẹ ḍụọ mẹ wamịna nye sọ!’

¹⁵ Mie ḅụ ịn nwẹnị girepu-ḍụọ mẹ ḅio ò sukuruma pakama tẹ ọ̀ ḅaa.” Jizọsị nwẹnị gbela, “Ọ́ sịn-arị ḍụọ nyanaḅọ ḅe ò tiye kẹ arị ọkọ-apụ ma mịẹ ḅẹ?

¹⁶ Ò ḅo arị atomi ma ḅaa ḅa, tẹ ḍụọ mẹ saḅama ja apụ pịrị ọkọ sime ḅa.” Tomi ma miemẹ naa sakị ini mẹẹ, “Gbala-gbala, ọkọ-a.”

¹⁷ Jizọsị nwẹnị in ḍiki tẹ ḅẹẹ, “Fịafịa Ḍiri mẹ ḅẹ ẹkwẹn mẹ ḅọrọ tiye fiearị?” Warị nama apụ ma kẹ iḅi-a ḅẹẹ tẹ saakị anga pịrị ḍụḅarị mẹ, ḅo pịkị iḅitẹịn ye sọ tẹ.

¹⁸ “Ḅịkị anị ḍụḅarị mẹ ọgọnọ koro ḅọ, koro ḅọ anị mḅọ oju pẹlẹ kọsịma ḅa, kụma anị ḅịkị ponoma ḅọ, ponoma ḅọ anị mḅọ gbẹẹ kọsịma ḅa.”

In Ama-Igbigi Oso Gbolomaye Kẹ Jizọsị Ḅiim

¹⁹ Oloko toluma apụ ma na, agbamịẹapụ ma na, nwẹnị ḅọkọ ḍọkị tẹ anịanga mẹ ḅụ Jizọsị kun ḅẹ tọn, gbala in nimi tẹ mịnẹ ini mie ori egberi mẹ gbaa fịnama ye ẹrẹsị. Kụma in tomi ma ḍiki-ḅalafaam ẹrẹsị ịn ḅarị ọkọ mịẹ-a.

²⁰ Miemẹ ḅụ ịn nwẹnị ini na-iḅi ḅẹ sakị ḍọkị. Ini ọḅụ kẹ ja atomi pịrị fịm mịnẹ ini ịna ḅụụ kẹ ó ḍukamẹnjịarị karakara atomi elekima, tẹ ini ịn kẹ fịrịma tẹ in mu ọ̀ ḅịḅị ḅụ ye naa ḅo, tẹ ịn kẹ ọ̀ kẹ Romu ḅẹ Ḅẹrẹtọnḅọ ḅe opu kụrọ ḅara-ḅio suu ḅẹ ḅara, kịrị-kịrị aị kẹ Jizọsị gbela ḅụ.

²¹ Mịna epele atomi ma nwẹnị Jizọsị ḅẹẹ, “Ye-tolumaḅọ, wa nimim mịnẹ ị́ ẹkwẹn na í tolumaye na karakaram. Wa nimim í tomḅọ la opu kiri bala-a, kụma Tamụnọ tọn tomḅọ pịrị karakara mẹ kịngẹ mie í tolumarị ye.

²² Ḍuko wa pịrị, ama oso Romu tomikiri mẹ daarị ḅọ ḅe pịrị mẹ wamịna Oloko na kura mụnọọ kura-a?”

²³ Kụma Jizọsị nwẹnị in tii-arị epele mẹ lekiri tẹ ịn ḅẹẹ,

²⁴ “Ó mu seleḅa igbigi mẹ kẹ ḅo à ḍiki. Anị ḅụ tụḅọ tọrụ na ẹrẹ na emi?” Ịn nwẹnị pakịrị, “Romu tomikiri mẹ daarị ḅọ ḅe nye.”

²⁵ Mie ḅụ Jizọsị nwẹnị ḅẹẹ, “Ọkọ ḅẹḅẹ ó Romu tomikiri mẹ daarị ḅọ ḅe nye kẹ ọ̀ pịrịị, tẹ sime Tamụnọ pịrị ye kẹ Tamụnọ pịrịị.”

²⁶ Anịanga tomi ma tọrọkọ ọ̀ kẹ ịn pakịrị ye ḅụ kẹ ori ọlọ, ọlọ ye ofori, tẹ ịn nwẹnị gbọsime, ọ̀ pakịrị ḅara ịna ḅụụ-buamaye ḅụ.

In Fị-ḅụ-saakị Gbolomaye Kẹ Jizọsị Ḅiim

²⁷ Anịtẹso Sadusii ḅẹ ja apụ, anie fị-ḅụ-saakị minini-a apụ ma, nwẹnị ḅo Jizọsị la tẹ ḅẹẹ,

²⁸ “Ye-tolumaḅọ, Mozizi mị oloko mẹ kẹẹ koroma wa pịrịm: ‘Tomḅọ ẹrẹḅọ sime tẹ árị na iyi-a tẹ fịịm ḅẹḅẹ, mḅọ mịnaḅọ árị ọkị sime tẹ awọ iyi mḅọ ẹrẹ goo.’

²⁹ Sọnọma mịna apụ simem gbọrụ sakị; ini ḅẹ omongiḅọ ḅe nwẹnị ẹrẹḅọ sime, kụma ori árị na iyi-a ogbo ọ̀ fịịm.

³⁰ Anịtẹso maaịn karama ḅọ ḅe nwẹnị ẹrẹḅọ ma ọkị sime,

³¹ anịtẹso tẹrẹị karamaḅọ ḅe sọ á simem. Mị gbọrụ ḅara mẹ nwenii ini sọnọma apụ mamgba á sime famam, kụma inimgba gbọrụḅọ-sọ pịkị árị na iyi-a.

³² Kunoma ḅụ ẹrẹḅọ ma nwẹnị fịị.

³³ Fịị apụ saakị ḅarị ene mẹ ḅụ ini sọnọma apụ mamgba á simem ḅẹ sakị, ịna ḅụ á tụḅọ taḅọ sọ ḅẹ?”

³⁴ Jizọsị nwẹnị ịn pakịrị, “Mị tomikiri mie owiapụ na ereme na sime, simearị ye.

³⁵ Kụma fị-ḅụ-saakị gbẹẹ owiapụ na ereme na, anị ḅo ọkọ la tẹ ịn fị-ḅụ-saakị tẹ ḅẹḅẹ ịn ḅarị owiapụ na ereme na sime ḅẹrẹ nimi-a.

³⁶ Ini enjẹlị apụ kịka ḅa, tẹ ḅarị inetẹ fịị ḅịa. Ịn fị-ḅụ-saakị ye mẹ gotẹ ịn Tamụnọ awọmẹ sọ tẹ.

³⁷ Tẹ Mozizi fịtẹ-apụ saakị tẹ ḍumo ḅa ḅẹẹ ye mẹ mịẹ banabanama wararị. Fịafịa Ḍiri mẹ ḅio kọrịarị piri mẹ gboloma pakịrị mẹ ḅụ ọ̀ KỊNỊNYANAḄỌ ḅe gotẹ ẹkwẹn-arị tẹ ḅẹẹm, ‘Ebira-amụ na Ayịzịkị na pịkị Jekọbụ na sịḅị-tuu pịrị Tamụnọ ḅee.’

³⁸ Ori anie ḍumo wararị apụ Tamụnọ, fịtẹ-apụ Tamụnọ-a; gbala kịnị mamgba ḍumo wararị ọ̀ ḅụụ ḅụ.”

³⁹ Oloko toluma apụ ma ḅẹ ja apụ nwẹnị ẹkwẹn pakama, “Ye-tolumaḅọ, ị́ pakịrị lamam!”

⁴⁰ Mie ḅụ ịn ḅarị ọ̀ tọrụ inetẹ jaị kẹ ò gbela-a.

In Mẹsaya Gbolomaye Kẹ Jizọsị Ḅiim

⁴¹ Jizọsị nwẹnị in gbela, “In tiegotẹ ḅẹẹarị Devidi furo ḅụ mie Mẹsaya ḅe paka-ḅo ḅarịye?”

⁴² Devidi ḅioju sọ kọkọ nume ḍiri ḅio ḅẹẹ, “KỊNỊNYANAḄỌ ḅe ị̀ Nyanaḅọ ḅe ḅẹẹm: Ị̀ ama-ḅara anga lẹgịị mịanga,

⁴³ nwenii à si kẹ ị́ tọn apụ mamgba kẹ ị́ suku-ḅio suu.”

⁴⁴ “Devidi ị̀ Nyanaḅọ kẹ ọ̀ sịnm; ndẹẹ Mẹsaya ḅe pịkị Devidi furo paka-ḅo ḅọ sọ ḅẹ ḅara?”

Jizọsị Oloko Tolumapụ Ma Gotẹ Ḅeri Nụnụm

⁴⁵ Tomi mamgba aḅeri paa ọ̀ ḅụ emi ogbo mie Jizọsị ò ḍukamẹnjịapụ ma ḅẹẹ ye,

⁴⁶ “Ọmịnị Oloko toluma apụ ma ḍiki ḅụụ kịẹn. Ịn ḍọkịarị ye jen-a, nangwọtẹ opu akapa sụa tẹ mẹnjịma ḅọrọ na, ogumaḅiri ḅụ tomi kụn ḅara kẹ sịn-ḅịḅị kẹ ịn pịrị na, ama-awarị ḅio lẹgị anga sikima ịn pịrị na, fịye kiri iḅitẹịn anga ḍọkị na sikima.

⁴⁷ Ini ma anie diapụ-fịtẹ-ereme ma sime-ḅara ḍiki tẹ ịn nyana aị fọịn ọkị tẹ nwẹnị nangwọ atẹkẹ kọn-kọn ịn pịrịarị apụ. Ḅo ịn la ḅarị fomu-ḅara sii ḅaka lama ḅa!”