Luku 2 - FỊAFỊA BAỊBỤLỤ

Meri Jizọsị Kịrayịsị Iyim

¹ Anị sakị ḅụ Romu tomikiri mẹ daarị ḅọ ḅe, Ọgọsịtọsị, oloko sụam mịnẹ ini ò suku-ḅio sime atomi mamgba kịẹn-ḅịḅị ọkịị.

² Mị kịnị kịẹn mẹ Kirinịyọsị Siriya ḅụ ḅẹrẹtọn-arị sakị anie anị tarị mịẹ ye.

³ Ọrụḅọ-ọrụḅọ nwẹnị miemẹ gotẹ mu mḅọ paka ama ḅụ ẹrẹ kẹ ḍiri ḅio sụa.

⁴ Josẹfụ nwẹnị Galili ḅẹ Nazarẹtị ḅụ saakị Judiya ḅẹ ama Bẹtịlịhẹmụ mu. Anị ama anie Ama-da Devidi iyi ye. Josẹfụ gotẹ anịanga mu ye ori Devidi furo-ḅẹ-ḅọ ẹrẹsị.

⁵ Meri, ò sime ḅẹ tẹ ọlọ ẹrẹḅọ ma sọ ori na sọ tẹ ẹrẹ mẹ sụa ḅẹ mum. Anị sakị á fura wararị,

⁶ tẹ ịn Bẹtịlịhẹmụ ḅụ emi ogbo árị iyi ḅẹ sakị lam,

⁷ tẹ á nwẹnị á tarị owiḅọtụḅọ iyi, tẹ ḅịtẹ kẹ ọ̀ sụa tẹ kẹ ịn kẹ nama fịye sụa-sụa igbe ḅio koroma. Anị gotẹ ọkọ mịẹ ye igoni apụ sime, sime warị mẹ ḅụ kịnị amụ sọ-a gbọrụ ḅio sọ ofori.

Enjẹlịapụ Jizọsị Iyi Mẹ Ḍuko Anana-Ḍikiḍikiapụ Pịrịm

⁸ Anị opu sịẹ mẹ pakịrị ḅụ anana-ḍikiḍikiapụ ḍin kẹ anana osuka fị-fị kiri mẹ ḅụ sime tẹ ịna anana koru simem.

⁹ Tẹ KỊNỊNYANAḄỌ ḅe enjẹlị nwẹnị ḅụụ pakama in ḍie tẹ KỊNỊNYANAḄỌ ḅe ebube nwẹnị ḅịya ịn gbaịn. Ịn nwẹnị kpọma ḅalafa.

¹⁰ Kụma enjẹlị ḅe ịn ḅẹẹm, “Ọ́ ḅalafa ma! Àrị iḅi-oku kẹ ḅo ọ́ pịrị wararị, opu ḍereku kẹ tomi mamgba pịrị ḅẹ ye.

¹¹ Mị gbọrụ ene mẹ ḅụ, Devidi ama ḅụ, ọ́ mịna Ḅọrọmaḅọ iyi tẹ — Kịrayịsị KỊNỊNYANAḄỌ ḅe!

¹² Tẹ miemẹ anie anị kẹ ó ḍie ḅarịye; ọmịnị ịwọma iyi tụḅọ ẹrị ḅa, ịn ḅịtẹ kẹ ọ̀ sụa tẹ kẹ ịn kẹ fịye sụa nama pịrị-pịrị igbe ḅio koroma wararị.”

¹³ Anị gbọrụ sakị ḅiotọn-a ḅara ḅụ So-tọrụ ḅụ enjẹlị ogbo ḅụụ-pakama tẹ, tarị ḅo enjẹlị ḅe na sọ tẹ sunsin Tamụnọ tokini tẹ ḅẹẹarị:

¹⁴ “Ebube sime Tamụnọ pịrị geletẹịn so mẹ ḅio, tẹ dein tomikiri sime ịna mịẹye ọ̀ ḅụụ-ḅẹlẹarị apụ ma pịrịị!”

¹⁵ Enjẹlị ma ịn koroma pịkịma iwo so mu tẹso, anana-ḍikiḍikiapụ ma nwẹnị jụmọ-jụmọ ḅẹẹ, “Ó yee wa Bẹtịlịhẹmụ mu tẹ pakaye mẹ ẹrị, anie KỊNỊNYANAḄỌ ḅe ḍuko wa pịrị tẹ ye mẹ.”

¹⁶ Mie ḅụ ịn nwẹnị fọnya mu tẹ Meri na Josẹfụ na ẹrị, anị sakị tụḅọ ḅe ini ọ̀ kẹ fịye sụa nama pịrị igbe mẹ ḅio ḅọlọlọma wararị.

¹⁷ Anana ḍikiḍikiapụ ma ori ẹrị tẹso, ịn nwẹnị enjẹlị ḅe ọ̀ ḅụ kọn ẹkwẹn mẹ ḍuko anịjụ sime apụ pịrị.

¹⁸ Tẹ anana-ḍikiḍikiapụ ma ḍuko ye mẹ naa apụ mamgba ḅụụ-buam.

¹⁹ Mịna aị mamgba ḅụ gberie-sọ Meri ḅioḅọrọ-a, á pịkị kpọma arị kẹ kuroma ḅụ suum.

²⁰ Anana ḍikiḍikiapụ ma nwẹnị ịn naa tẹ pịkị ẹrị tẹ aị ma gotẹ nume su-su Tamụnọ tokini ma so. Enjẹlị ḅe ḍuko ịn pịrị ḅara anie ye pịkị paka ḅara.

Ini Ẹrẹ Kẹ Jizọsị Sịnm

²¹ Nine aḍin ḅọrọ tẹ ịn tụḅọ ḅe tarị-ḅụụ sin ḅẹ tẹso, ịn nwẹnị ọ̀ sịn Jizọsị, anie ò iyingi amụ ò fura kọn-a ogbo enjẹlị ḅe go ẹrẹ mẹ.

In Jizọsị Saakị Tamụnọ Pịrịm Tamụnọ-warị Ḅio

²² Mozizi Oloko mẹ tọn kuroma ḅara ḅụ, Josẹfụ na Meri na ịna aḅụụ fịafịama mịẹye mịẹ ḅẹ sakị ḅo la tẹso, ịn nwẹnị tụḅọ ḅe kẹ sụa Jeruselemu mu, gbọrsịḅị ọ̀ saakị KỊNỊNYANAḄỌ ḅe pịrị ḅẹ ḅara.

²³ Anie KỊNỊNYANAḄỌ ḅe oloko ḍiri mẹ ḅio anị kẹẹ koro ḅara, mịnẹ tarị iyi owiḅọ goḅọ-goḅọ ịn saakị sikima KỊNỊNYANAḄỌ ḅe pịrị ḅa.

²⁴ Ịn mịẹ ḅẹ tẹ mu jen ye anie nwẹẹrẹsị amẹngbọ, ọkọ-a ḅẹḅẹ olosịkịya amẹngbọ, kẹ mịẹ-mịẹ agba mẹ mịẹ, KỊNỊNYANAḄỌ ḅe oloko mẹ ḅii ḅara ḅụ.

²⁵ Anị sakị ḅụ Jeruselemu ḅụ ịn kẹ Simiyọnị sịn gbọrụ owiḅọ simem. Ḅị ḅọ ḅe karakara iḅi tomḅọ, tẹ Tamụnọ ḍiki-ḅalafarị ḅọ, ọ̀ pịkị Izirẹlị ḅọrọma ḅẹ sakị mẹ koruarị. Fịafịa Tẹmẹ ḅe ọ̀ ḅụụ sime

²⁶ tẹ mịẹtẹ ò nimi tẹ mịnẹ ọ̀ fịị ḅịa nwenii ọ̀ KỊNỊNYANAḄỌ ḅe mininim ḅo ḅa nwẹn ḅẹẹ Mẹsaya ḅe ẹrị sakị la ḅa.

²⁷ Tẹmẹ ḅe kẹ ò jike ḅara ḅụ, Simiyọnị nwẹnị Tamụnọ-warị mẹ ḅio sọ-mu. Ọ̀ ḍa-na-iyingi-na ọ̀ kẹ Tamụnọ-warị mẹ ḅio sọ-mu tẹ Oloko mẹ ḅii ḅara mịẹ ọ̀ pịrị ḅẹ sakị,

²⁸ Simiyọnị nwẹnị tụḅọ ḅe saakị dogi tẹ Tamụnọ boma tẹ ḅẹẹ:

²⁹ “KỊNỊNYANAḄỌ, Í minini ye Ị́ mịẹtẹ, mịọkụ Ị́ pịkị mịẹtẹ Ị́ fịrịmẹnjịḅọ Dein na so ḅa.

³⁰ À ḅarana ị̀ atọrụngbọ kẹ ị́ ḅọrọma mẹ ẹrị tẹ,

³¹ tomi mamgba tọrọkọ ḅụ, Ị́ tẹlẹma tẹ ye mẹ:

³² Bele tẹ Í ḅiiarị ye mịẹ finji Ja asịẹ ḅẹ apụ ma pịrị, pịkị ebube sọ Ị́ atomi Izirẹlị pịrị.”

³³ Simiyọnị tụḅọ ḅe ḅụ ḍuko aị ma ọ̀ ḍa na ò iyingi na ḅụụ-buamam.

³⁴ Simiyọnị nwẹnị ịn boma tẹ Meri ò iyingi ma ḅẹẹ: “Ḅị tụḅọ ḅe Tamụnọ ọ̀ sẹlẹ-ọkị tẹ ò fa na ḅọrọma na sọ Izirẹlị ḅụ tọnwa-apụ pịrị ḅẹm. Ọ̀ Tamụnọ ḅara ḅụ ḅo elekima sọ ḅa, tẹ tọnwa atomi anị na tụḅụrụ ḅa Izirẹlị ḅụ,

³⁵ tẹ anie ḅụ ịna ḅọịtẹ akuroma ma mịẹ ḅelema ḅẹm. Tẹ kururu oḅuarị okologie sọ tẹ í ḅioḅẹngbọ temi kan kọsịma ḅa.”

³⁶ Anị sakị mẹ ḅụ gbọrụ omongi lamatẹ ịkịankoro ẹrẹḅọ sọ simem. Á di fịị tẹ. Árị ẹrẹ Ana, tẹ Asa furo ḅẹ Fanụwẹlị nwẹn-sịn ḅọ anie á da. Sọnọma kụra kịngẹ anie á kẹ á di ḅe na sime tẹ ọ̀ fịị ye.

³⁷ Tẹ mịọkụ kụra inia si ini akụra finji á sịḅị ḅọrọ tẹ diḅọ-fịtẹ-ẹrẹḅọ ḅara ḅụ. Tamụnọ-warị ḅụ á so so-a, ḍin-o, eneḅaka-o, tẹ ḅuru-ịmọ-ịmọ tẹ tẹkẹm.

³⁸ Anị gbọrụ sakị mẹ ḅụ árị sọ nwẹnị ḅo la, tẹ ịmịẹtẹ kẹ Tamụnọ ḅẹẹ, pịkị tụḅọ ḅe gboloma ye ḍuko Tamụnọ Jeruselemu ḅọrọma ḅarị mẹ koruarị apụ mamgba pịrị.

Josẹfụ Meri Na Jizọsị Na Kẹ Pịkịma-so Nazarẹtị Mum

³⁹ Josẹfụ na Meri na KỊNỊNYANAḄỌ oloko mẹ ḅiim ịn mịẹ nwẹn ḅẹẹ aị mamgba mịẹ fama tẹso, ịn nwẹnị pịkịma so Galili ḅụ ịna ama Nazarẹtị mu.

⁴⁰ Tụḅọ ḅe nwẹnị ḍụḅa paka-ḅo, tẹ pịkị ịnyọ nyana. Ò ye nimi lamam, tẹ Tamụnọ aboma ori ọgọnọ gbanam.

Owiḅọtụḅọ Jizọsị Tamụnọ-warị Ḅio Tamụnọ Ẹkwẹn Kọnm

⁴¹ Kụra-kụra ḅụ Jizọsị ḍa-na-iyingi-na Saḅa-ḅọrọ Alalị mẹ fị ḅẹ tẹ Jeruselemu mu-mum.

⁴² Oyi maa kụra finji Jizọsị sịḅị ḅọrọ tẹso, ịn nwẹnị in mu-mu ḅara kẹ alalị mẹ muarị tẹ ọ̀ kẹ sụa mu.

⁴³ Ini alalị mẹ fị ḍin karama tẹso, ịn nwẹnị saakị pịkịma so ama mu, kụma Jizọsị owiḅọtụḅọ ḅe nwẹnị Jeruselemu ḅụ sime. Ọ̀ ḍa-na-iyingi-na miemẹ nimi-a.

⁴⁴ Ini ọkịm ò tomina-ogbo mẹ ḅio emi, tẹ ịn nwẹnị bebe gbọrụ ene kẹ mẹnjị tẹrẹmẹ saakị ọ̀ ḍọkị ịna mịnapụ na ikiapụ na ogboku ḅụ,

⁴⁵ kụma ini ori ẹrị-a, ọkọẹrẹsị ịn nwẹnị ọ̀ ḍọkịma pịkịma Jeruselemu mu.

⁴⁶ Tẹra aḍin karama ene ḅụ ịn nwẹnị Tamụnọ-warị mẹ ḅio ori ẹrị, ò Juu-ḅẹ-apụ ma ye-tolumapụ na sime tẹ in tolumarị ye poki-poki tẹ pịkị ye kẹ in gbelarị.

⁴⁷ Ò ye-nimi ḅara kẹ ịn kẹ ò gbela ye, gbela ye pakịrịm, ọ̀ naa apụ, naa apụ ḅụụ-buamam.

⁴⁸ Ọ̀ ḍa-na-iyingi-na ḅo ori ẹrị sakị ịn ḅụụ-buam, tẹ ò iyingi nwẹnị ọ̀ ḅẹẹ, “Ị̀ tụḅọọ, í tiegotẹ miemẹ kẹ wa mịẹ? Ị́ ḍa na ị̀ na kpọma anị kụra-ḅio ḅalaḅalama ị́ ḍọkịarị.”

⁴⁹ Ori nwẹnị ịn pakịrị: “Ó tiegotẹ ị̀ ḍọkịma ḅọrọ ḅẹ? Ó nimi na-iḅi-a, ị̀ ḍa warị ḅio àrị emi ḅara?”

⁵⁰ Kụma ọ̀ kẹ ịn pakịrị ye mẹ fie ye in nimi-a.

⁵¹ Mie ḅụ Jizọsị ini na pịkịma so Nazarẹtị mu, tẹ ịna ḅịḅị poki ḅara kẹ ini na angam. Ò iyingi nwẹnị mịna aị mamgba kẹ á ḅioḅẹngbọ ḅụ suu wẹrị.

⁵² Jizọsị nwẹnị ḍụḅa paka-ḅo, oju na ye-nimi na ḅụ, Tamụnọ ḍiki-ḅụụjịrị ori na simem, tomi pịkị iḅi tọrụ kẹ ò ḍiki ḅioḅẹlẹm.