Luku 17 - FỊAFỊA BAỊBỤLỤ

Jizọsị Si Gbolomaye Tolumam

¹ Jizọsị nwẹnị ò ḍukamẹnjịapụ ma ḅẹẹ, “Mịẹtẹ tomi si mịẹ ḅẹ aị paka-a so ḅịa, kụma arị pakama ḅarị ḅọ mẹ mḅọ tẹkẹlẹtẹ!

² Ikuarị ye gbẹẹ ḍụḅarị kẹ mḅọ kọngọ kpọ tẹ mḅọ kẹ tọrụ-minji gbin fama iḅi kẹ mḅọ ḅụụ ḅo ye mịẹtẹ mịna kala awọmẹ ma ḅụ ḅẹ gbọrụḅọ si mịẹ nẹngịm.

³ Ọkọẹrẹsị ọmịnị ọ́ mịẹarị ye ḅụ ẹbị nyana-a. “Ị́ mịnaḅọ si mịẹ-mịẹ, ò ḍiki-ịganịị, ori anị ḅụ pịkịm ḅẹḅẹ wẹrịso ọ̀ pịrịị.

⁴ Gbọrụ ene ḅụ ọ̀ sọnọma sakị kẹ si kẹ ị́ mịẹ sọ ọ̀ pịkịma-ḅo tẹ ‘À ḅarị mịẹ ḅịa’ kẹ ị́ ḅẹẹ ḅẹẹ, wẹrịso ọ̀ pịrịị.”

Jizọsị Minini Gbolomaye Tolumam

⁵ Fịrịmẹnjịapụ ma nwẹnị KỊNỊNYANAḄỌ ḅe ḅẹẹ, “Wa nyana minini nẹngị ye kẹ wa pịrịị.”

⁶ KỊNỊNYANAḄỌ ḅe nwẹnị pakịrị, “Ọmịna minini ịrụ mọsịtadị mgbọlị na gbasị sọ, ọ́ sịẹ wararị sịn ḅẹẹ mịnẹ anị suku-na-suku-na saakị mu tọrụ koro, tẹ anịanga sịẹsime ḅẹẹ kụma, anị ọ́ ḅẹẹ ḅara mịẹ ḅa.

Sime Fịrịmẹnjịḅọ Pịrị Kọrịnama

⁷ “Ọkịị mịnẹ ọmịna ḅụ ḅẹ gbọrụḅọ fịrịmẹnjịḅọ ọkọ tẹ ọ̀ ḍụọ kọrịarị, anịanịa anana ḍikiḍikiarị. Tẹ ọ̀ kọrịnama kọrị fama tẹ ḅo warị la kụma ọ́ ḅọrọ ọ̀ ḅẹẹ ḅẹ mịnẹ ọ̀ fọnya ye tẹ ḅo ye fị?

⁸ Gbala-gbala, ọkọ-a! Anie nakara í ọ̀ ḅẹẹarị, ‘Fịye mịẹ ị̀ pịrị, tẹso, ị́ tọrọkọ gbaịn ḅịtẹ kpọọ tẹ ì koru à ye mẹ fị tẹ pịkị minji ḅuu, tẹrẹmẹ í í nye fị.’

⁹ Fịrịmẹnjịḅọ ḅe ịn tọn ọ̀ pịrị ye mịẹ kụma ị́ ịmịẹtẹ kẹ ọ̀ ḅẹẹ na-iḅi?

¹⁰ Anie anị pịkị sime ọ́ pịrị ḅara. In tọn ọ́ pịrị aị mamgba ọ́ nwẹn mịẹ fama tẹ ḅẹḅẹ, ọ́ ḅẹẹ, ‘Wamịnị fịrịmẹnjịapụ, sime wa pịrị kọrịnama mie wa kọrị ye.’ ”

Jizọsị Oyia Sofịnị-obi Kọn Apụ Gwọm

¹¹ Jizọsị so Jeruselemu muarị sakị Sameriya na Galili na ogboku ḅẹ agara ḅụ mie ọ̀ ḅọrọ ye.

¹² Ọ̀ mẹnjị gbọrụ kala-ama sọ ḅẹ-muarị ogbo ò ḅo oyia apụ na bịamam, in sofịnị-obi kọn-arị. Ịn nwẹnị ala-jụ sịẹ

¹³ tẹ oloku, “Jizọsị, Sịḅịdaḅọ! Wa ḍiki-sịḅị-kụrụkụrụụ!”

¹⁴ Jizọsị ḅo ịna ẹrị tẹso, ọ̀ nwẹnị ịn ḅẹẹ, “Ó mu ḅụụ kẹ agbamịẹapụ ma ḍie tẹ ini ó pekele-ḍiki.” Ini ọkọ kẹ muarị ogbo ịna oju nwẹnị fịafịa.

¹⁵ Ịna ḅụ ḅẹ gbọrụḅọ ḅo ẹrịm mịnẹ ọ̀ gwọ tẹ ḅẹ sakị, ọ̀ pịkịma ḅo tẹ gele pọkọ kẹ Tamụnọ bomam.

¹⁶ Ọ̀ nwẹnị Jizọsị ḅụọ-suku amịna ḅụụ sẹma-kiri-gbin, tẹ ịmịẹtẹ kẹ ọ̀ ḅẹẹ. Tomḅọ ḅe Sameriya ḅẹ ḅọ.

¹⁷ Jizọsị nwẹnị ḅẹẹ, “Oyi apụ mie gwọ ye, ndẹẹ kirikọn eseni apụ ma?

¹⁸ Ndẹẹ ḅị igoniḅọ ḅe ngẹrị pịkị-ḅo tẹ ịmịẹtẹ kẹ Tamụnọ ḅẹẹ ḅe ḅo ḅara?”

¹⁹ Tẹ Jizọsị nwẹnị ọ̀ ḅẹẹ, “Saakị tẹ soo, í minini mịẹtẹ í oju iḅi tẹ.”

Jizọsị Tamụnọ-Amada Gbolomaye Tolumam

²⁰ Farịsii ḅẹ ja apụ nwẹnị Tamụnọ Ama-da mẹ ḅo ḅẹ sakị kẹ Jizọsị gbela. Mie ọ̀ pakịrị ḅịḅị, “Tamụnọ Ama-da mẹ tomi ẹrị ḅẹ ḅara kẹ ḅo ḅịa.

²¹ Gbọrụḅọ sọ ḅẹẹ ḅịa, ‘Ḍiki mịanga!’ anịanịa, ‘Anịanga!’ kẹ gotẹ ọkọ ḅẹẹarị, ọmịna ḅụụ ḅio mie Tamụnọ Ama-da mẹ simearị ye.”

²² Anịtẹso ọ̀ nwẹnị ò ḍukamẹnjịapụ ma ḅẹẹ, “Sakị ḅo ḅa tẹ ó ḅii ḅa ọ́ paa Tomḅọ Tụḅọ ḅe sakị mẹ ḅẹ gbọrụ ene kịngẹ ẹrị, kụma ọmịnị ẹrị ḅịa.

²³ ‘Ọmịnị anịjụ ḍikii!’ anịanịa ‘Mịanga ḍikii!’ kẹ ọ́ ḅẹẹ ḅẹ apụ paka ḅa. Kụma ó minini tẹ paka anị ḍọkụma-mu ma.

²⁴ So ḅalapụ tẹ anị ḅẹ bele mẹ puu saḅa-ḅọrọ ḅara anie Tomḅọ Tụḅọ ḅe ḅo ḅẹ ene mẹ sọ sime ḅarị ḅara.

²⁵ Kụma ọ̀ tarị tọrụsiẹrị lama ḅa, tẹ mị sakị mẹ ḅẹ apụ ma ọ̀ sịkị ḅa.

²⁶ Noha sakị ḅụ ye sime-ḅara anie Tomḅọ Tụḅọ ḅe ene ma ḅụ sọ anị sime ḅarị ḅara.

²⁷ Ọrụḅọ-ọrụḅọ fị-na-ḅuu-nam, owiapụ na ereme na simem, nwenii tẹ Noha arụ mẹ ḅụkụlọ tẹ opu minji mẹ ḅo inimgba ḅaa famam.

²⁸ Lọtị sakị ḅụ anị sime-ḅara mie anị pịkị sime ḅarị ḅara. Ọrụḅọ-ọrụḅọ fị-na-ḅuu-naarị, dẹrị-na-fẹ-naarị, ye ḍiḅiarị, pịkị warị namarị.

²⁹ Lọtị ḅe Sọdọmụ koroma-so eneḅaka So-ḅio fịnị na ḍụḅarị na ene sara ḅara sara tẹ inimgba ḅaa famam.

³⁰ Anie Tomḅọ Tụḅọ ḅe ḅụụ pakama ḅarị ene mẹ sọ sime ḅarị ḅara.

³¹ “Anị ene mẹ ḅụ, warị isun ọgọnọ sime ḅọ koro warị ḅio mḅọ nyana aị ọkị ḅẹ ḍọkị ma; anị gbọrụ ḅara ḅụ piri-ḅio sime ḅọ pịkịma warị mu ma.

³² Ọ́ Lọtị ta kẹ ḅiokoromaa!

³³ Amịna ḍumo ḅọrọma ḍọkị ḅọ anị fama ḅa; amịna ḍumo fama ḅọ anị ḅọrọma ḅa.

³⁴ À ḍuko ọ́ pịrịarị mịnẹ anị ḍin, gbọrụ iḅila ọgọnọ monoarị maa apụ ḅụ ịn gbọrụḅọ ọkị tẹ osi-ḅọ wẹrịso ḅa.

³⁵ Maa ereme mbịaka gbẹẹ gbolomarị anga ḅụ ịn gbọrụḅọ ọkị tẹ osi-ḅọ wẹrịso ḅa.”

³⁶ Maa owiapụ piri-ḅio kọrịnama kọrịarị ogbo ịn gbọrụḅọ ọkị tẹ osi-ḅọ wẹrịso ḅa.

³⁷ Ò ḍukamẹnjịapụ ma nwẹnị ò ḅii, “KỊNỊNYANAḄỌ, miemẹ ḅọrọ tọ-anga mịẹ ḅẹ?” Jizọsị nwẹnị pakịrị, “Fịtẹ nama sime anga, anie ẹdẹlẹ gbori-gbori anga.”