Luku 10 - FỊAFỊA BAỊBỤLỤ

Jizọsị Kịnị Tesi Oyi Finji Na Maa apụ Na Fịrịma Pakamam

¹ Anịtẹso Jizọsị nwẹnị jen kịnị atesi oyi finji na maa apụ na sẹlẹ-ọkị, tẹ maa apụ, maa apụ kẹ tọrọkọ tarị ò mu ḅẹ ama, ama na, ọ̀ la ḅẹ anga, anga na fịrịma.

² Ọ̀ nwẹnị ịn ḅẹẹ, “Ḍiḅi aị ma kpọọ sara tẹ, kụma arị kobiri warị suu ḅẹ apụ boowa. Ọkọẹrẹsị ọ́ ḍụọ mẹ nyanaḅọ tẹkẹ tẹ ọ̀ kọrịnama kọrị apụ kẹ fịrịma tẹ ịn fịaị ma kobiri warị suu.

³ Ó muu! Àrị ọ́ fịrịma pakamarị, gbala anana awọmẹ kẹ anana kun pẹị, pẹị anama ogboku fịrịmarị ye ọkụ.

⁴ Igbigi sụa akpa-o, ye ḅii apụ akpa-o, okuro-o, ọmịnị ọkị ma; ọ́ pịkị etela daasịẹ tẹ sịn-ḅịḅị kẹ gbọrụḅọ-sọ pịrị ma.

⁵ Ó mu warị sọ sakị, sọ sakị ọ́ tarị ḅẹẹ, ‘Dein sime mị warị pịrịị.’

⁶ Warị mẹ ḅio dein ḅẹlẹmaḅọ emi ḅẹḅẹ, yee ọ́ karị ọ̀ pịrị dein mẹ ori na sime; ọkọ-a ḅẹḅẹ, ọmịnị ọmịna dein na soo.

⁷ Ọ́ bịan gbọrụ warị mẹ ḅio ó simee, tẹ ịn kẹ ọ́ pịrị ye, pịrị ye fị, pịkị ḅuu ḅẹ ye ḅuu. Kọrịnama-kọrịḅọ ḅe amịna gbẹẹ-ye nyana na-iḅim. Ọ́ mị warị sọ paka, mị warị sọ paka ma-ḅọrọ ma.

⁸ Ó mu ama la sakị, la sakị tomi ma iḅi ḅioḅẹngbọ kẹ ọ́ daa-ọkị ḅẹḅẹ, ịn kẹ ọ́ pịrị ye, pịrị ye ọ́ fịị,

⁹ tẹ ama mẹ ḅio sime obiapụ gwọ, tẹ ḍuko tomi ma pịrịị, ‘Tamụnọ Ama-da mẹ ḅo ó kpeki tẹẹ!’

¹⁰ Kụma ó mu gbọrụ ama la tẹ ini ọ́ daa-ọkịa ḅẹḅẹ, ó mu etela-ogbo sime tẹ ịn ḅẹẹ,

¹¹ ‘Ọmịna ama mẹ ḅẹ onwin tẹ wamịna aḅụọ oḅolo ye sọ wa gugu sara ọ́ pịrị tẹẹ! Kụma ọ́ kẹ ḅiokoromaa mịnẹ Tamụnọ Ama-da mẹ ḅo ó kpeki tẹẹ!’

¹² Karakara-ḅara-ḅụ à ḍuko ọ́ pịrịarị mịnẹ Ḅẹrẹkọn Ene ḅụ Tamụnọ ọkụrụkụrụ nyana Sọdọmụ pịrị anị ama mẹ nẹngị ḅa!

Jizọsị Minini Ḍụkụ-a Ama Ma

¹³ “Korazịnị, ị́ tẹkẹlẹ ḅa! Bẹtịsayịda, ị́yẹrị sọ ị́ tẹkẹlẹ ḅa! Ọmịna aḅio mịẹ ḅụụ-buama-aị ma Taya na Sayịdọnị na ḅụ mịẹm namịna mimgbe iḅere-iḅerea kụra-ḅio ịn lẹgị-sime tẹ akpa ịnwaịn tẹ fọọn kẹ ịna sịḅị sara tẹ kẹ ḍie tẹ mịnẹ ini ịna asi ḅụ pịkị tẹẹ.

¹⁴ Ḅẹrẹkọn Ene ḅụ Tamụnọ Taya na Sayịdọnị na kẹ iḅi kiri sịẹma ọ́ nẹngị ḅa.

¹⁵ Kepanọmụ, ị́yẹrị kịngẹ kụma, í ḅiotọn-arị í gele mu so la ḅẹ? Ini ị́ kẹ gbin iderima-ḅo ḍuḅu ḅio suu ḅa!”

¹⁶ Jizọsị nwẹnị ò ḍukamẹnjịapụ ma ḅẹẹ, “Ó ḍuko ye naa ḅọ, naa ḅọ à ḍuko ye naa tẹ; ọ́ sịkị ḅọ, sịkị ḅọ ị̀ sịkị tẹ; ị̀ sịkị ḅọ, sịkị ḅọ pịkị ị̀ kẹ fịrịma ḅọ ḅe sịkị tẹ.”

Kịnị Tesi Oyi Finji Na Maa apụ Na Ma Pịkịma Ḅom

¹⁷ Ọ̀ fịrịma pakama kịnị atesi oyi finji na maa apụ ma na nwẹnị opu ḅioḅẹlẹ kẹ pịkịma ḅo tẹ ọ̀ ḅẹẹ, “KỊNỊNYANAḄỌ, oru ma sọ ị́ ẹrẹ ḅụ wa tọn ịn pịrị ye mịẹm!”

¹⁸ Jizọsị nwẹnị ịn pakịrị, “Àrị Ekwesu ẹrịm ọ̀ ḅalapụ so kọrị ḅọrọ ḅara kẹ kọrịma ideri-ḅo ḅịkị korom.

¹⁹ Ó pokii! À kụrọ kẹ ọ́ pịrị tẹ ọ́ kẹ ododo na akpị na ọgọnọ sịẹ mẹnjịị, tẹ pịkị kẹ Ekwesu kụrọ mẹ nẹngịmaa, tẹ gberie-sọ ye kẹ ọ́ lama ḅịa.

²⁰ Kụma ó si-atẹmẹ ọ́ tọn ye mịẹ ye gotẹ ḅioḅẹlẹ ma, anie nakara ọmịna ẹrẹ So-ḅio kẹẹ tẹ ye mẹ anie ọmịna ḅioḅẹlẹma ḅarịye.”

Jizọsị Ḅioḅẹlẹm

²¹ Anị sakị ḅụ Fịafịa Tẹmẹ ḅe ḅioḅẹlẹ kẹ Jizọsị ḅụụ ḅio suu ḅinma tẹ ọ̀ ḅẹẹm, “Ḍa, So na Kiri na Nyanaḅọ, àrị ịmịẹtẹ kẹ ị́ ḅẹẹm, ị́ kẹ opu nimi kọn apụ na opu aị ḍawọ apụ na ḍie-a tẹ kẹ ye ḍawọ-a apụ ḍie aị ma gotẹ. Inn, Ḍa, mie í ḅiim, anị mịẹ nwẹn ḅẹẹ ḅara.

²² “Ị̀ Ḍa ye mamgba kẹ ị̀ pịrị tẹ. Ḍaḅọ ḅe sikima tẹ Tụḅọ ḅe nimi ḅọ ofori, tẹ Tụḅọ ḅe sikima tẹ pịkị Ḍaḅọ ḅe nimi ḅọ ofori, anie Tụḅọ ḅe ọ̀ kẹ ḍie ḅii apụ ḅoto.”

²³ Anịtẹso Jizọsị nwẹnị pịkị ò ḍukamẹnjịapụ ma da, tẹ ori na ini na ngẹrị sime anga ịn ḅẹẹ, “Ó boma tẹẹ, ọmịnị ọ́ nwẹn ẹrịarị aị ma ẹrị ye mẹ!

²⁴ À ḍuko ọ́ pịrịarị tọnwa ịkịankoroapụ na amadapụ na ọ́ nwẹn ẹrịarị aị ma ẹrị ḅiim, kụma ini ẹrị-a; ịn pịkị ọ́ naarị aị ma naa ḅiim kụma ịn naa-a.”

Jizọsị Sameriya Iḅi Ḅọ Ḅe Egberi Gbaam

²⁵ Gbọrụ Oloko tolumaḅọ ḅo Jizọsị ḅịḅị paka ḅẹ ye ḍọkị ḅẹ tẹ ò gbelam, “Ye-tolumaḅọ, à ḅọrọ tiye mịẹ kụma à sime gbamaso ḍumo nyana ḅẹ?”

²⁶ Jizọsị nwẹnị ọ̀ pakịrị, “Fịafịa Ḍiri mẹ tiye ḍuko, ndẹẹ ị́ kẹ anị naa ḅara?”

²⁷ Tomḅọ ḅe nwẹnị pakịrị, “Í ḅioḅẹngbọ mẹmgba na, ị́ tẹmẹ mẹmgba na, ị́ ịnyọ mẹmgba na, í kuroma mẹmgba na kẹ ị́ Nyana Tamụnọ ḅe ḅẹlẹmaa, tẹ pịkị ị́ ị́ ḅụụ ḅẹlẹma ḅara kẹ ị́ na kpeki tẹ anga ḅọ ḅẹlẹmaa.”

²⁸ Jizọsị nwẹnị pakịrị, “Ị́ karakaram; mu ọkọ mịẹ, í ḍumo ḅa.”

²⁹ Kụma Oloko tolumaḅọ ḅe paa amịna ḅụụ kẹ iḅi kiri sịẹma ḍọkị ḅụ nwẹnị Jizọsị ḅii, “Ị̀ na kpeki tẹ anga ḅọ ḅọrọ tụḅọ?”

³⁰ Jizọsị nwẹnị pakịrị, “Gbọrụ sakị, gbọrụ owiḅọ Jeruselemu ḅụ sime tẹ Jeriko muarị ogbo, opu furuapụ nwẹnị ọ̀ gbaịn-koro; ini ọ̀ paụma fama tẹ ò fomu ḅaa ḅara wẹrị tẹ nwẹnị ọ̀ kẹ koroma tẹ so.

³¹ Ḍiki ḅarị sakị gbọrụ agbamịẹḅọ ḅo anịanga ḅọrọarị tẹ ori ẹrị tẹ. Kụma ọ̀ nwẹnị etela mẹ ḅẹ saḅa-anga ḅụ mẹnjị ḅọrọ so.

³² Anị gbọrụ ḅara ḅụ Livayị furo ḅẹ gbọrụḅọ-sọ nwẹnị ḅo ori ẹrị, tẹ saḅa mu tomḅọ ḅe ḍiki tẹ nwẹnị etela mẹ ḅẹ saḅa-anga ḅụ ḅọrọ so.

³³ Kụma Sameriya ḅẹ gbọrụḅọ anị etela mẹ ḅụ ḅọrọ ye muarị ogbo nwẹnị ḅọ tomḅọ ḅe na kura. Ò tomḅọ ḅe ẹrị sakị, ọ̀ kpọma ọkụrụkụrụ nyana ọ̀ pịrịm.

³⁴ Ọ̀ nwẹnị saḅa tomḅọ ḅe sime pakịrị anga mu, tẹ olo na iru na kẹ ọ̀ la aị ma ḅaa tẹ fịna; anịtẹso ọ̀ nwẹnị tomḅọ ḅe kẹ ò dogi mẹnjịarị opu nama ḅẹ ọgọnọ gbana tẹ ọ̀ kẹ mu igoni-bịan-warị ḅio suu, tẹ iḅiọkụ ò ḍikiḍiki.

³⁵ Ene ḅaa tẹso, ọ̀ nwẹnị maa seleḅa igbigi kẹ igoni-bịan-warị mẹ nyanaḅọ ḅe pịrị tẹ ọ̀ ḅẹẹ, ‘Sisi mie ọkị tẹ kẹ ḅị tomḅọ ḅe ḍikiḍikii ị̀ pịrịị, à pịkịma ḅo sakị ị́ ọ̀ ḅụụ fama ye fama ye, à kẹ ị́ gbẹẹ ḅa.’ ”

³⁶ Kunoma Jizọsị nwẹnị Oloko tolumaḅọ ḅe ḅii, “Ị́ sịn-arị mịna tẹra apụ ma ḅụ tụḅọ opu furuapụ ma fomu ḅọ ḅe na kpeki tẹ anga ḅọ ḅara mịẹ?”

³⁷ Oloko tolumaḅọ ḅe nwẹnị pakịrị, “Iḅi kẹ ọ̀ mịẹ ḅọ ḅee.” Jizọsị nwẹnị pakịrị, “Ị́yẹrị sọ mu tẹ ọkọ mịẹ.”

Jizọsị Mata Na Meri Na Ẹrị Ḅẹ Mum

³⁸ Jizọsị na ò ḍukamẹnjịapụ ma na in muarị anga muarị ogbo ò ḅo gbọrụ ama lam, tẹ Mata nwẹn-sịn gbọrụ ẹrẹḅọ nwẹnị ọ̀ da á warị suu.

³⁹ Á mịnaḅọ ẹrẹḅọ nyanam, árị ẹrẹ Meri. Árị nwẹnị KỊNỊNYANAḄỌ ḅe aḅụọ-suku lẹgị tẹ ò tolumaye mẹ poki.

⁴⁰ Mata ngẹrị fịrịmẹnjịarị ye mẹ ḅarị á ḅụụ-ḅẹlẹ-a ẹrẹsị á ḅo tẹ ḅẹẹm, “KỊNỊNYANAḄỌ, ḍiki ya, ị̀ ịyịmbara ma ị̀ wẹrịso tẹ yẹrị ngẹrị kọrịnama mamgba kọrịarị. Á ḅẹẹ tẹ á ḅo ḅarasụa ị̀ pịrị!”

⁴¹ KỊNỊNYANAḄỌ ḅe nwẹnị á pakịrị, “Mata, Mata! Ị́ kpọma tọnwa aị gotẹ ḅalaḅala tẹ,

⁴² kụma ye ḅụ ḅẹ gberie kịngẹ mie tomḅọ gotẹ ḅụụ-ḅaa na-iḅi ye. Meri anị iḅiye mẹ sẹlẹ-ọkị tẹ, gbọrụḅọ sọ pịkị á ḅara anị ọkị ḅịa.”