Lẹvitikọsị 9 - FỊAFỊA BAỊBỤLỤ

Erọnị Na Ori Owiapụ-awọmẹ Ma Na Ịna Agbamịẹ Kọrịnama Saakịm

¹ Nine aḍin karama ene mẹ ḅụ Mozizi Erọnị na, ori owiapụ-awọmẹ na, Izirẹlị ḅẹ omongiapụ mamgba na sịnm;

² tẹ ọ̀ nwẹnị Erọnị ḅẹẹ, “Asambịrịma gbọrụ owi-nambulo ọkịị si sin agba mịẹ ye, pịkị gbọrụ ejimina ọkịị, dọkịma-agba mịẹ ye, maaịn mamgba ḅẹkụ arị ḅụụ ofori, tẹ KỊNỊNYANAḄỌ ḅe tọrọkọ ḅụ arị kẹ agba mịẹ.

³ Anịsakị Izirẹlịapụ ma ḅẹẹ, ‘Ịn gbọrụ ekpe-oḅori ọkịị, si sin agba mịẹ gotẹ, pịkị asambịrịma gbọrụ nambulo na, gbọrụ anana tụḅọ na, maaịn mamgba gbọrụ kụra sịḅị ḅụ ḅọrọtẹ ḅẹkụ ḅụụ ḅụ ofori aị, dọkịma-agba mịẹ gotẹ;

⁴ pịkị kẹ KỊNỊNYANAḄỌ ḅe tọrọkọ ḅụ dein-pịrị-agba mịẹ gotẹ gbọrụ pootẹ-nambulo na, gbọrụ ejimina na ọkịị, na pulo kẹ pikiritẹ mgbọlụ agbamịẹye na; kẹ gotẹ ọkọ ḅẹẹarị, mịmgba KỊNỊNYANAḄỌ ḅe ḅụụ kẹ í ḍie ḅa.’ ”

⁵ Ịn nwẹnị Mozizi tọnm ọkị-ḅo nwẹn ḅẹẹ aị ma kẹ Kobiri Akpụrụ-warị mẹ tọrọkọ ḅom; tẹ tomina-ogbo mẹmgba kpeki ḅo tẹ KỊNỊNYANAḄỌ ḅe tọrọkọ sịẹsimem.

⁶ Mozizi nwẹnị ḅẹẹ, “Miemẹ anie mịẹye mẹ tẹ KỊNỊNYANAḄỌ ḅe tọnm mịẹ nwẹn ḅẹẹ ye mẹ, anịsakị KỊNỊNYANAḄỌ ḅe ebube mẹ paka ị́ pịrị ḅa.”

⁷ Anịtẹso Mozizi nwẹnị Erọnị ḅẹẹ, “Sọma-ḅo agbamịẹ-anga mẹ kpeki tẹ ị́ mịẹ ị́ ḅụụ na, tomi ma na pịrị ḅarị í si sin agba mẹ na, ị́ dọkịma-agba mẹ na mịẹ tẹ si-wẹrịso ḅẹrẹ fama ị́ ḅụụ na tomi ma na pịrịị; tẹ tomi ma agbamịẹye mẹ ọkị-ḅo, tẹ si wẹrịso ḅẹrẹ fama ịn pịrịị KỊNỊNYANAḄỌ ḅe wẹrịtẹ tọn tẹ ḅara.”

⁸ Mie ḅụ Erọnị sọma ḅo agbamịẹ-anga mẹ kpekim, tẹ si sin agbamịẹ asambịrịma nambulo ḅe tẹ sime ọ̀ ḅụụ pịrị ye ḅe ḅaam.

⁹ Tẹ Erọnị owiapụ-awọmẹ ma ọmbie mẹ ọkị-ḅo ọ̀ pịrịm, tẹ ọ̀ nwẹnị ọ̀ ḅara-tụngbalị kẹ ọmbie mẹ gbọn-gbọn tẹ kẹ agbamịẹ-anga mẹ ḅẹ ịfalị ma tan, tẹ kirikọn ọmbie mẹ kẹ agbamịẹ-anga mẹ suku ḅụ sara.

¹⁰ Kụma si sin agbamịẹye mẹ ḅẹ ḅẹlẹkị mẹ na, san-akpa ma na, pụmbụra mẹ ḅụ sụa-paka wararị, ye mẹ ori agbamịẹ-anga mẹ ọgọnọ arị dọkịmam, KỊNỊNYANAḄỌ ḅe wẹrịtẹ tọn Mozizi pịrị ḅara.

¹¹ Nama ḅe meni mẹ na, ori oju apara mẹ na, kobiri-ogbo mẹ ḅụ ò sikima pakama mu fịnị kẹ arị dọkịmam.

¹² Ọ̀ nwẹnị dọkịma agbamịẹ nama ḅe ḅaa; tẹ Erọnị owiapụ-awọmẹ ma ọmbie mẹ ọkị-ḅo ọ̀ pịrịm, tẹ ọ̀ nwẹnị anị kẹ agbamịẹ-anga mẹ oju ḅụ sara ikelema-koro.

¹³ Ịn nwẹnị dọkịma agbamịẹye mẹ ḅẹ eleke-eleke ma na sịḅị mẹ na, saakị saakị ọ̀ pịrị, tẹ agbamịẹ-anga mẹ ọgọnọ ori arị dọkịmam.

¹⁴ Ọ̀ nwẹnị ịla ma na, ḅụọ ma na sịkịrị, tẹ arị kẹ agbamịẹ-anga mẹ ọgọnọ ḅụ dọkịma agbamịẹye mẹ na sụa dọkịma.

¹⁵ Anịtẹrẹmẹ ò tomi ma agba mẹ mịẹm Ọ̀ nwẹnị si sin agbamịẹ oḅori ḅe tẹ sime tomi ma pịrị ye ọkị tẹ ọ̀ ḅaa, tẹ ọ̀ tarị ye mẹ mịẹ ḅara mẹ kẹ ọ̀ kẹ si sin agba mịẹ tomi ma pịrịm.

¹⁶ Tẹ ọ̀ dọkịma-agba mẹ mịẹm. Kụrọ ḅara ḅio sime ḅọ sụa oloko mẹ wẹrịtẹ ḅẹẹ ḅara ọ̀ nwẹn kẹ agba mẹ mịẹm.

¹⁷ Ọ̀ pịkị mgbọlụ agba mẹ mịẹm, tẹ anị ḅụ ye ọkị ọ̀ ḅara-kuḅu ḅinma tẹ dede dọkịma agbamịẹye mẹ sikima, ọ̀ pịkị anị dọkịmam agbamịẹ-anga mẹ ọgọnọ ḅụ.

¹⁸ Ọ̀ nwẹnị pịkị tomi ma dein agbamịẹ pootẹ-nambulo ḅe na, ejimina ḅe na ḅaa; tẹ Erọnị owiapụ-awọmẹ ma ọmbie mẹ ọkị-ḅo ọ̀ pịrịm aniemẹ tẹ ọ̀ kẹ agbamịẹ-anga mẹ oju sara ikelema-koro ye mẹ.

¹⁹ Pootẹ-nambulo ḅẹ ḅẹlẹkị mẹ na, ejimina ḅe ḅẹ ḅẹlẹkị mẹ na, ḅẹlẹkị etemi mẹ na, ḅẹlẹkị mẹ tẹ ịla ma gbaịn aị ma, san-akpa ma na, pụmbụra mẹ ḅụ sụa-paka wararị ye mẹ na ọkị;

²⁰ tẹ ịn nwẹnị ḅẹlẹkị mẹ kẹ ndo ma ọgọnọ gbana, tẹ agbamịẹ-anga mẹ ọgọnọ ḅụ ọ̀ ḅẹlẹkị mẹ dọkịmam.

²¹ Kụma ndo mẹ na, ama-ḅara anga ḅẹ ḅụọ-ẹtẹnẹ mẹ na ò sikima KỊNỊNYANAḄỌ ḅe tọrọkọ karakara ịmịẹtẹ ḅẹẹ agba mịẹ pịrịm; Mozizi tọn ḅara ḅụ.

²² Anịtẹso Erọnị ori aḅara saakị-gelema tomi ma dam, tẹ ịn bomam; tẹ ọ̀ nwẹnị si sin agba mẹ na, dọkịma-agba mẹ na, dein-pịrị-agba mẹ na mịẹ anga mẹ ḅụ ideri-ḅo.

²³ Tẹ Mozizi na, Erọnị na mẹnjị Kobiri Akpụrụ-warị mẹ ḅio sọ-mum; tẹ ịn mẹnjị paka-ḅo tẹso ịn tomi ma bomam, tẹ KỊNỊNYANAḄỌ ḅe ebube mẹ nwẹnị paka-ḅo ḅịya tomi mamgba sarama.

²⁴ Tẹ fịnị KỊNỊNYANAḄỌ ḅe tọrọkọ ḅụ kọrị paka-ḅo tẹ agbamịẹ-anga mẹ ọgọnọ ḅụ mie dọkịma agba mẹ na, ḅẹlẹkị mẹ na dọkịma siinm. Tomi mamgba pakaye mẹ ẹrị tẹso, ịn nwẹnị oloku, tẹ ịna atọrụ-kuḅu kẹ ḅịkị kiri-ḅio koro.