Lẹvitikọsị 7 - FỊAFỊA BAỊBỤLỤ

Ye-pịkịmaḅo Agbamịẹ-aị

¹ Miemẹ anie ḅẹrẹ-ḅarasii agba mịẹ mẹ ḅẹ oloko. Miemẹ anie fịafịa-tẹịn ye.

² Ịn dọkịma-agba mịẹ nama ḅe ḅaarị anga mẹ ḅụ mie ịn pịkị ḅẹrẹ-ḅarasii agba mịẹ nama ḅe ḅaa ḅarị anga, anịsakị ịn nama ḅe ọmbie mẹ kẹ agbamịẹ-anga mẹ oju sara ikelema-koro ḅa.

³ Ori ḅẹ ḅẹlẹkị mẹmgba agbamịẹ mẹ ḅụ sọ ḅa ḅẹlẹkị etemi mẹ-o, ḅẹlẹkị mẹ tẹ ịla ma gbaịn ye mẹ-o,

⁴ maa san-akpa ma na ḅiri mẹ ḅụ arị ọgọnọ simearị ḅẹlẹkị ma-o, pụmbụra mẹ ḅụ sụa-paka tẹ ọ̀ kẹ san-akpo ma ḅụ sụa keni sin ḅarịye mẹ sọ.

⁵ Agbamịẹḅọ ḅe agbamịẹ-anga mẹ ọgọnọ fịnị ḅụ mịẹ KỊNỊNYANAḄỌ ḅe pịrịarị agba ḅara kẹ arị dọkịma ḅa. Miemẹ anie ḅẹrẹ-ḅarasii agba.

⁶ Agbamịẹapụ ma ogbo-ḅio ḅụ owiḅọ goḅọ-goḅọ inetẹ anị ḅẹ nama pẹị ḅa; fịafịa yọ mẹ ḅẹ gbọrụ anga ḅụ ịn sime tẹ anị pẹị ḅa. Miemẹ anie fịafịa-tẹịn ye.

⁷ Ḅẹrẹ-ḅarasii agba mẹ anị si sin agba mẹ na kịkam, gbọrụ oloko mie arị nyana ye; agbamịẹḅọ ḅe tẹ anị kẹ ḅẹrẹ mẹ fama ḅọ ḅe mie anị nyana ḅarị ḅọ.

⁸ Anịsakị agbamịẹḅọ tẹ ḅẹḅọ-ḅẹḅọ ḅara dọkịma agbamịẹye da tẹ mịẹ ḅọ ḅe dọkịma-agba tẹ ọ̀ mịẹ ye mẹ ḅẹ nama ḅe oju apara mẹ nyana amịna ḅụụ pịrị ḅa.

⁹ Anịsakị ọpọ ḅio fọị sịnmgbọlụ agba mịẹye goyegoye na, panị ḅẹlẹ ḅio anịanịa ye fọị pẹmpẹmtẹ ikulele ọgọnọ ịn sọ aị mamgba sime agbamịẹḅọ ḅe tẹ agba mẹ mịẹ ḅọ ḅe pịrịm.

¹⁰ Anịsakị pulo kẹ pikiri mgbọlụ agbamịẹye goyegoye, anịanịa samụnọtẹ mgbọlụ agbamịẹye goyegoye sime Erọnị owiapụ-awọmẹ mamgba pịrịm; anị sime gbọrụḅọ pịrị ḅara mie anị pịkị sime osi-ḅọ pịrị ḅara.

Dein Agbamịẹ-aị

¹¹ Miemẹ anie dein agbamịẹ-aị ma ḅẹ oloko mẹ tẹ kịnị mịẹ KỊNỊNYANAḄỌ ḅe pịrị ḅarịye.

¹² Mḅọ nwẹnị anị kẹ ịmịẹtẹ ḅẹẹ gotẹ pịrịarị agbamịẹye ḅẹḅẹ, anịrẹ mḅọ ịmịẹtẹ ḅẹ sunmaye sọ-a kịkị pulo kẹ pikiri ye na, sunmaye so-a pulo tan tẹ ḍọkọḍọkọ ịkịka na, pịkị iḅiọkụ gbẹẹtẹ iḅi fịlawa, tẹ pulo kẹ iḅiọkụ pikiri tẹ mịẹ akịkị na ọkị-ḅo ḅa.

¹³ Mḅọ pịkị ịmịẹtẹ ḅẹẹ agba mẹ gotẹ sunmaye sọọtẹ fịturu kẹ sụa ḅo amịna dein agba mịẹ ḅa.

¹⁴ Ọkọsime ye ḅụ ori agbamịẹ-aị ma ḅụ gbọrụ ye, gbọrụ ye ḅụ kịkị gbọrụ pakịrị, gbọrụ pakịrị ọkị ḅa kẹ agba mịẹ KỊNỊNYANAḄỌ ḅe pịrị ḅara ḅụ; anị sime agbamịẹḅọ ḅe tẹ dein agba mịẹ nama ḅe ọmbie mẹ kẹ agbamịẹ-anga mẹ oju sara ḅọ ḅe pịrịm.

¹⁵ Anịsakị mḅọ kẹ ịmịẹtẹ ḅẹẹ gotẹ dein agba mịẹ nama ḅe meni mẹ, mḅọ agba mẹ mịẹ wararị ene mẹ ḅụ mie anị pẹị fama ḅarị ene; ori anị ḅẹ nama pẹị kọnma wẹrị nwenii mu jen dede-ḅio lama ma.

¹⁶ Kụma mḅọ agbamịẹye mẹ nwẹnị ịlọ suma agbamịẹye, anịanịa ḅarana tọn ḅụụ pịrị agba mịẹye ḅẹḅẹ anị ḅẹ nama mẹ ene mẹ tẹ mḅọ amịna agba mẹ mịẹ ene mẹ ḅụ pẹị ḅa, anị ḅụ kirikọn-ye pịkị sime ene-ḅaama tẹ ene-ḅaa ḅụ pẹị ḅa.

¹⁷ Kụma anị ḅẹ nama mẹ ḅụ kirikọntẹ sime mu tẹrẹị karama ene la ye, la ye fịnị kẹ dọkịma ye sọ ḅa.

¹⁸ Tẹrẹị karama ene mẹ ḅụ kịnị mḅọ mịẹ dein agba mẹ ḅẹ nama ḅụ nama pẹị-pẹị, ori ḅe tẹ agba mẹ mịẹ ḅọ ḅe mịẹ agba mẹ, ḅarị ọkị ye sọ ma, pịkị kịẹn ḅụ sọ mḅọ pịrị ma; anị tọn-tọnye sọ ḅa, anịsakị anị ḅọ mẹ tẹ anị pẹị ḅọ mẹ, mḅọ mịẹ-irima mẹ dogi ḅa.

¹⁹ Pẹị nama tẹ fịafịa-a ye nwẹn-sịn ye na kpakụmam ḅẹḅẹ, kịnị ḅarị anị pẹị ma, dọkịma mie ini anị dọkịma ḅarịye. Inimgba tẹ fịafịa wararị apụ mamgba inetẹ nama pẹị ḅa,

²⁰ kụma anị ḅọ mẹ tẹ fịafịa-a ye mḅọ ọgọnọ emi tẹ kẹ KỊNỊNYANAḄỌ ḅe dein-pịrị-agba mịẹ agbamịẹ nama pẹị ḅọ, pẹị ḅọ mḅọ atomi ḅụ ini mḅọ pẹlẹ-siin ḅa.

²¹ Anịsakị ḅẹḅọ-ḅẹḅọ tẹ tomina oju ḅẹ fịafịa-a ye-o, piri-ḅio-ḅẹ fịafịa-a anama-o, anịanịa fịafịa-a tọn-tọnye nwẹn-sịn ye, sịn ye na kpakụma ḅọ, kpakụma ḅọ, tẹ anị sakị rẹ mu KỊNỊNYANAḄỌ ḅe dein agbamịẹ-aị ma ḅẹ agbamịẹ nama mẹ pẹị, pẹị, anị tomḅọ mẹ ini mḅọ pẹlẹ-siin ḅa mḅọ atomi ḅụ.

²² KỊNỊNYANAḄỌ ḅe nwẹnị Mozizi ḅẹẹ,

²³ “Izirẹlịapụ ma ḅẹẹ, ọ́ gbọrụ ḅẹlẹkị sọ taḅa ma anị nambulo ḅụ paka-ḅo ye, anịanịa, anana ḅẹlẹkị, anịanịa oḅori ḅẹlẹkị sọ.

²⁴ Nama ḅe tẹ so-fị la tẹ ḅarana fị nama ḅẹlẹkị na, piri-ḅio-ḅẹ kụrọ nama ḅaa nama ḅẹlẹkị na, ọmịnị inetẹ arị ọkị tẹ kẹ ḅẹ ja akọrịnama kọrị ḅa, kụma ó gotẹ arị taḅa-taḅa gbọrụ kiri sọ ofori.

²⁵ Tomḅọ nwẹn-sịn tomḅọ tẹ nama tẹ ịn fịnị ḅụ mịẹ KỊNỊNYANAḄỌ ḅe pịrị agbamịẹ nama ḅụ paka-ḅo ḅẹlẹkị taḅa ḅọ taḅa ḅọ, ini mḅọ atomi ḅụ mḅọ pẹlẹ-siin ḅa.

²⁶ Anie sikima, ọmbie nwẹn-sịn ye ọ́ pẹị ma pịkị ḅuu ma ọmịna anga yọ ma ḅụ; anị feni ọmbie-o, nama ọmbie-o.

²⁷ Ḅẹḅọ-ḅẹḅọ tẹ ọmbie ḅuum, anịanịa pẹị ḅọ, pẹị ḅọ ini mḅọ pẹlẹ-siin ḅa mḅọ atomi ḅụ.”

²⁸ KỊNỊNYANAḄỌ ḅe nwẹnị Mozizi ḅẹẹ,

²⁹ “Izirẹlịapụ ma ḅẹẹ, ori ḅe tẹ amịna dein-pịrị-agba mịẹ-aị kẹ agba mịẹ KỊNỊNYANAḄỌ ḅe pịrịarị ḅọ goḅọ-goḅọ, mḅọ dein-pịrị-agba mịẹ-aị ma ḅụ kiri sikima ọkị-ḅo KỊNỊNYANAḄỌ ḅe pịrị.

³⁰ Mḅọ ḅarana amịna soku-ḅẹ aḅara kẹ fịnị ḅụ mịẹ KỊNỊNYANAḄỌ ḅe pịrị ḅẹ agbamịẹye mẹ ọkị-ḅo ḅa; mḅọ agbamịẹ nama ḅe ḅẹlẹkị na, ori ndo na ọkị-ḅo KỊNỊNYANAḄỌ ḅe pịrị tẹ ndo mẹ KỊNỊNYANAḄỌ tọrọkọ sikima mie karakara ḍiepịrịye agbamịẹye sime-ḅara sime ḅa.

³¹ Agbamịẹḅọ ḅe agbamịẹ-anga mẹ ọgọnọ ḅụ ḅẹlẹkị mẹ dọkịma ḅa, kụma ndo mẹ sime Erọnị na, ori owiapụ-awọmẹ na pịrị ḅa.

³² Anịsakị ọmịna dein agbamịẹ-aị ma ḅẹ ama-ḅara anga ḅẹ ḅụọ-ẹtẹnẹ mẹ ọ́ nwẹn kẹ mịẹ agba ḅara ḅụ agbamịẹḅọ ḅe pịrị ḅa.

³³ Erọnị owiapụ-awọmẹ ma ogbo-ḅio ḅụ ori ḅe tẹ dein agbamịẹ-aị ma ḅẹ ọmbie mẹ na, ḅẹlẹkị mẹ na kẹ agba mẹ mịẹ ḅọ ḅe gbọrụ kiri ḅara ḅụ ama-ḅara anga ḅẹ ḅụọ-ẹtẹnẹ mẹ nyana ḅa.

³⁴ Ndo mẹ tẹ ịn kẹ sikima karakara ḍiepịrịye agba mịẹ ye mẹ na, ḅụọ-ẹtẹnẹ mẹ tẹ kẹ agba mịẹ ye mẹ ḅụ arị Izirẹlịapụ ma ḅara ọkị ye mẹ na ịna dein agbamịẹ-aị ma ḅụ paka-ḅo aị ma, arị arị kẹ Erọnị, agbamịẹḅọ ḅe na, ori owiapụ-awọmẹ ma na pịrị tẹ Izirẹlịapụ ma ḅara ḅụ sime ịn pịrị gbamaso aị ḅara ḅụ.

³⁵ Miemẹ anie sime Erọnị na, ori owiapụ-awọmẹ na pịrị ḍiekiri fịnị ḅụ mịẹ KỊNỊNYANAḄỌ ḅe pịrịarị agbamịẹ-aị ma ḅụ, wẹrị sikima ịn pịrị ye anị eneḅaka mẹ tẹ KỊNỊNYANAḄỌ ḅe agbamịẹapụ ḅara ḅụ ịn fịrịmẹnjị ḅẹ tẹ ḅara kẹ ịna asịḅị gbana ene ḅụ ọkị tọrọkọ mu.

³⁶ KỊNỊNYANAḄỌ ḅe miemẹ tọnm, Izirẹlịapụ ma miemẹ kẹ ịn pịrị, anị ene mẹ tẹ pulo ịna asịḅị ọgọnọ sara ene mẹ ḅụ; miemẹ anie ḅẹ sakị, ḅẹ sakị ḅụ sime ịn pịrị kiri ịna ḅụọ ḅụ ọkị mu ḅụọ-fa-ḅụọ-paka la.”

³⁷ Mịna oloko ma anie dọkịma-agba mịẹ oloko mẹ na, mgbọlụ agba mịẹ oloko mẹ na, si sin agba mịẹ oloko mẹ na, ḅẹrẹ-ḅarasii agba mịẹ oloko mẹ na, mịẹ fịafịama wẹrị sikima oloko mẹ na, pịkị dein (anịanịa gbọrụ ḅụ sime) agba mịẹ oloko mẹ na,

³⁸ tẹ Sayịnayị Tụndụ ọgọnọ ḅụ KỊNỊNYANAḄỌ ḅe tọn Mozizi pịrị aị ma anị eneḅaka mẹ tẹ Sayịnayị ịkpa mẹ ḅio ọ̀ tọnm Izirẹlịapụ ma ịna agbamịẹ-aị ọkị-ḅo KỊNỊNYANAḄỌ ḅe pịrị nwẹn ḅẹẹ ene mẹ ḅụ.