Lẹvitikọsị 4 - FỊAFỊA BAỊBỤLỤ

Tọrụ-gelegele Mịẹ-a Asi Sịkịrị Siin Agba Mịẹ Ḅara

¹ KỊNỊNYANAḄỌ ḅe nwẹnị Mozizi ḅẹẹ,

² “Izirẹlịapụ ma ḅẹẹ, ‘Ḅẹḅọ-ḅẹḅọ nwẹnị tọrụ-gelegele mịẹ-a ḅara kẹ ḅẹẹye-ḅẹẹye tẹ KỊNỊNYANAḄỌ ḅe tọnm mịẹ ma nwẹn ḅẹẹ aị ma ḅụ si mịẹ-mịẹ, mịna oloko ma mḅọ nwẹn koko.’ ”

Sịḅịda-Agbamịẹḅọ Mịẹ Si

³ “Sịḅịda-Agbamịẹḅọ ḅe anie si mẹ mịẹ tẹ mị-ḅara ḅụ ḅẹrẹ-ḅarasii ọkị-ḅo tomi ma ọgọnọ gbanam ḅẹḅẹ, yee si mẹ tẹ ọ̀ mịẹ ye mẹ gotẹ ọ̀ ḅẹkụ nyana-a asambịrịma owi-nambulo kẹ si siin agba mịẹ KỊNỊNYANAḄỌ ḅe pịrị.

⁴ Ori owi-nambulo ḅe kẹ Kobiri Akpụrụ-warị mẹ ḅẹ ḅọkọ ḅụ KỊNỊNYANAḄỌ ḅe tọrọkọ ḅo ḅa, tẹ ọ̀ ḅara kẹ owi-nambulo ḅe sịḅị ọgọnọ gbana, tẹ KỊNỊNYANAḄỌ ḅe tọrọkọ owi-nambulo ḅe ḅaa ḅa.

⁵ Sịḅịda-Agbamịẹḅọ ḅe owi-nambulo ḅe ọmbie mẹ ḅụ ye ọkị tẹ anị kẹ Kobiri Akpụrụ-warị mẹ ḅo ḅa,

⁶ tẹ ọ̀ ḅara-tụngbalị kẹ ọmbie mẹ gbọn-gbọn tẹ sọnọma asakị kẹ ọmbie mẹ ḅụ ye kẹ KỊNỊNYANAḄỌ ḅe tọrọkọ ḅụ Fịafịa Yọ mẹ ḅẹ kiki-pẹlẹ-ḅịtẹ mẹ tọrọkọ asana ḅa.

⁷ Ọ̀ pịkị ọmbie mẹ ḅụ ye kẹ KỊNỊNYANAḄỌ ḅe tọrọkọ ḅẹ kụnụaị agbamịẹ-anga mẹ tẹ Kobiri Akpụrụ-warị mẹ ḅio simearị ye mẹ ḅẹ sụa-paka wararị ịfalị ma tan ḅa, anịsakị owi-nambulo ḅe ọmbie mẹ ḅẹ kirikọn-ye mẹ ọ̀ nwẹn kẹ dọkịma agbamịẹ-anga mẹ tẹ Kobiri Akpụrụ-warị mẹ ḅọkọ ḅụ simearị ye mẹ suku ḅụ sara ḅa.

⁸ Kẹ si sin agba mẹ mịẹ wararị owi-nambulo ḅe ḅẹ ḅẹlẹkị mẹmgba ori ọ̀ ḅụụ anị ọkị ḅa, ḅẹlẹkị ma tẹ ịla ma gbaịn aị ma na, ḅẹlẹkị ma tẹ ịla ma ọgọnọ simearị aị ma na,

⁹ maa san-akpa ma na ḅẹlẹkị ma tẹ arị ọgọnọ simearị aị ma na ḅiri mẹ ḅụ na, pụmbụra mẹ ḅụ sụa-paka tẹ ọ̀ san-akpa ma na kẹ sụa keni sin ḅarịye mẹ na,

¹⁰ (dein agba mịẹ pootẹ-nambulo ḅe ḅụ mịna aị ma keni ḅara mie arị paa keni ḅarị ḅara), anịsakị agbamịẹḅọ ḅe nwẹnị dọkịma-agba mịẹ edeni mẹ ọgọnọ arị dọkịma ḅa.

¹¹ Kụma owi-nambulo ḅe oju apara-o, ori oju meni mẹmgba-o, ọ̀ sịḅị sọ kẹ sụa, ori aḅụọ-o, ori ịla-o, ọ̀ pọkụ-muaị sọ kẹ sụa;

¹² bebe owi-nambulo ḅe ori ò dogi tomina-ogbo mẹ kobiri tẹ simearị anga mẹ ḅụ pakama fọọn nguma anga mẹ ḅụ fịafịatẹ gbọrụ anga ḅụ koroma tẹ fịnị tọnọ tẹ kẹ ò dọkịma ḅa; ịn fọọn ma kẹ ngumarị anga mẹ ḅụ mie ori ọ̀ dọkịma ḅarịye.”

Bebe Izirẹlị Tomina-ogbo Mịẹ Si

¹³ “Bebe Izirẹlị tomina-ogbo mẹ tọrụ-gelegele nimi tẹ mịẹ-a si mịẹm, tẹ ye mẹ kobiri-ogbo mẹ tọrụ-ogbo ḅụ ḅọị wararị, tẹ KỊNỊNYANAḄỌ ḅe tọnm ịn mịẹ ma nwẹn ḅẹẹ aị ma ḅụ ịn mịẹ ye, mịẹ ye tẹ ḅẹrẹ-ḅarasii nyana ye ḅẹḅẹ;

¹⁴ kịnị ḅo si mẹ tẹ ịn mịẹ ye mẹ nimi sakị mẹ ḅụ kobiri-ogbo mẹ asambịrịma gbọrụ owi-nambulo kẹ si agba mịẹ tẹ anị kẹ Kobiri Akpụrụ-warị mẹ tọrọkọ ḅo ḅa;

¹⁵ tẹ tomina-ogbo mẹ ḅẹ omongiapụ ma ịna aḅara kẹ owi-nambulo ḅe sịḅị ọgọnọ gbana ḅa KỊNỊNYANAḄỌ ḅe tọrọkọ ḅụ, tẹ KỊNỊNYANAḄỌ ḅe tọrọkọ ḅụ owi-nambulo ḅe ḅaa ḅa.

¹⁶ Anịtẹso Sịḅịda-Agbamịẹḅọ ḅe owi-nambulo ḅe ọmbie mẹ ḅụ ye kẹ Kobiri Akpụrụ-warị mẹ ḅo ḅa,

¹⁷ tẹ nwẹnị amịna ḅara-tụngbalị kẹ ọmbie mẹ gbọn-gbọn tẹ sọnọma asakị kẹ anị kẹ KỊNỊNYANAḄỌ ḅe tọrọkọ ḅụ kiki-pẹlẹ-ḅịtẹ mẹ tọrọkọ asana ḅa.

¹⁸ Anịsakị ọ̀ pịkị ọmbie mẹ ḅụ ye kẹ agbamịẹ-anga mẹ tẹ Kobiri Akpụrụ-warị mẹ ḅio KỊNỊNYANAḄỌ ḅe tọrọkọ ḅụ simearị ye mẹ ḅẹ ịfalị ma ọgọnọ sara ḅa; tẹ ọmbie mẹ ḅụ kirikọn-ye mẹ ọ̀ kẹ dọkịma agbamịẹ-anga mẹ tẹ Kobiri Akpụrụ-warị mẹ ḅọkọ ḅụ simearị ye mẹ suku sara ḅa.

¹⁹ Ori ḅẹ ḅẹlẹkị mẹmgba ori ọ̀ ḅụụ anị ọkị tẹ agbamịẹ-anga mẹ ọgọnọ anị dọkịma ḅa.

²⁰ Mị-ḅara mie ọ̀ kẹ owi-nambulo ḅe na mịẹ ḅarị ḅara; ọ̀ wẹrịtẹ si sin agba mịẹ owi-nambulo ḅe na mịẹ ḅara, anị ḅara mie ọ̀ kẹ miemẹ na mịẹ ḅarị ḅara; tẹ agbamịẹḅọ ḅe ḅẹrẹ fama ịn pịrị ḅa, tẹ Tamụnọ nwẹnị si-wẹrịso ịn pịrị ḅa.

²¹ Ọ̀ nwẹnị kobiri-ogbo mẹ sime anga mẹ ḅụ owi-nambulo ḅe dogi pakama tẹ ọ̀ dọkịma ḅa; ọ̀ tarị owi-nambulo ḅe dọkịma ḅara. Miemẹ anie kobiri-ogbo mẹ si sin agba mẹ.”

Ḅẹrẹtọnḅọ Mịẹ Si

²² Ḅẹrẹtọnḅọ tọrụ-gelegele nimi tẹ mịẹ-a ḅara kẹ arị aị mamgba tẹ KỊNỊNYANAḄỌ ọ̀ Tamụnọ ḅe tọnm mịẹ ma nwẹn ḅẹẹ aị ma ḅụ mịẹ ye mịẹ ye, anie si, tẹ ḅẹrẹ-ḅarasii nyana tẹ.

²³ Si mẹ tẹ ọ̀ mịẹ ye mẹ ịn mịẹtẹ ò nimi tẹ ḅẹḅẹ, ori agbamịẹye ḅara ḅụ, ḅẹkụ ḅụụ ḅụ ofori gbọrụ ekpe-oḅori ọkị-ḅo ḅa;

²⁴ tẹ ọ̀ ḅara kẹ ekpe-oḅori ḅe sịḅị ọgọnọ gbana, tẹ KỊNỊNYANAḄỌ ḅe tọrọkọ ịn dọkịma-agba mịẹ nama ḅaa, ḅaa anga mẹ ḅụ ọ̀ ḅaa ḅa. Mie mẹ anie si sin agba.

²⁵ Anịtẹso agbamịẹḅọ ḅe si sin agbamịẹye mẹ ọmbie mẹ ḅụ ọ̀ ḅara-tụngbalị kẹ gbọn tẹ kẹ dọkịma agbamịẹ-anga mẹ ḅẹ ịfalị ma tan ḅa, tẹ anị ḅụ kirikọn ọmbie mẹ kẹ dọkịma agbamịẹ-anga mẹ suku ḅụ sara ḅa.

²⁶ Anịsakị ọ̀ ḅụụ ḅẹ ḅẹlẹkị mẹmgba agbamịẹ-anga mẹ ọgọnọ ori anị dọkịma ḅa, dein agba mịẹ aị ḅẹlẹkị dọkịma ḅara pembema ḅara; mị-ḅara mie agbamịẹḅọ ḅe kẹ ò si mẹ ḅụ ḅẹrẹ-fama ọ̀ pịrị tẹ Tamụnọ si-wẹrịso ò pịrị ḅarị ḅara.

Ḅẹḅọ-ḅẹḅọ Mịẹ Si

²⁷ “Tomi ma ḅụ ḅẹḅọ-ḅẹḅọ nwẹnị tọrụ-gelegele nimi tẹ mịẹ-a ḅara kẹ arị aị ma tẹ KỊNỊNYANAḄỌ ḅe tọnm mịẹ ma nwẹn ḅẹẹ aị ma ḅụ mịẹ ye, mịẹ ye, tẹ ḅẹrẹ-ḅarasii nyana tẹ ḅẹḅẹ,

²⁸ ịn mịẹtẹ si mẹ tẹ ọ̀ mịẹ ye mẹ ọ̀ nwẹn nimi sakị, ọ̀ mịẹ tẹ si mẹ gotẹ ọ̀ ḅẹkụ ḅụụ ḅụ ofori gbọrụ ịyọrọ oḅori ọkị-ḅo ori agba mịẹ ḅa.

²⁹ Ori ọ̀ ḅara kẹ si sin agbamịẹye ḅe sịḅị ọgọnọ gbana ḅa, tẹ dọkịma-agba mịẹ anga mẹ ḅụ si sin agbamịẹ oḅori ḅe ḅaa ḅa.

³⁰ Agbamịẹḅọ ḅe nwẹnị amịna ḅara-tụngbalị kẹ ọmbie mẹ ḅụ ye ọkị tẹ anị kẹ dọkịma agbamịẹ-anga mẹ ḅẹ ịfalị ma tan ḅa, ọmbie mẹ ḅẹ kirikọn-ye mẹ kẹ dọkịma agbamịẹ-anga mẹ suku sara ḅa.

³¹ Oḅori ḅe ḅẹlẹkị mẹmgba ò siin ḅa, ḅụụ-dein nyana agba mịẹ nama mẹ ḅụ ori arị sin ḅara, tẹ agbamịẹḅọ ḅe agbamịẹ-anga mẹ ọgọnọ ḅụ anị dọkịma KỊNỊNYANAḄỌ ḅe pịrị ḅa ḅụụ-ḅẹlẹarị kụnụ ḅara ḅụ; tẹ agbamịẹḅọ ḅe ḅẹrẹ fama ọ̀ pịrị ḅa, tẹ Tamụnọ si-wẹrịso ọ̀ pịrị ḅa.”

³² “Ò si sin agbamịẹye ḅara ḅụ ori anana ọkị-ḅo si sin agba mịẹ-mịẹ, ḅụụ ḅụ ḅẹkụ ofori anana mie ori ọkị-ḅo ḅarịye,

³³ tẹ ọ̀ ḅara kẹ si sin agbamịẹ nama ḅe sịḅị ọgọnọ gbana, tẹ si sin agba gotẹ in dọkịma agbamịẹ nama ḅaa, ḅaa anga ḅụ ọ̀ ḅaa ḅa.

³⁴ Anịtẹso agbamịẹḅọ ḅe amịna ḅara-tụngbalị kẹ si sin agbamịẹ nama ḅe ọmbie mẹ ḅụ ye ọkị tẹ kẹ dọkịma agbamịẹ-anga mẹ ḅẹ ịfalị ma tan ḅa, tẹ nama ḅe ọmbie mẹ ḅẹ kirikọn-ye mẹ kẹ dọkịma agbamịẹ-anga mẹ suku sara ḅa.

³⁵ Nama ḅe ḅẹlẹkị mẹmgba ò sin ḅa ịn dein agba mie anana ḅe ḅẹ ḅẹlẹkị mẹ sin ḅara; tẹ agbamịẹḅọ ḅe, fịnị kẹ agbamịẹye dọkịma KỊNỊNYANAḄỌ ḅe pịrịarị agbamịẹ-anga mẹ ọgọnọ anị dọkịma ḅa; tẹ agbamịẹḅọ ḅe nwẹnị si mẹ tẹ ọ̀ mịẹ tẹ ye mẹ ḅụ ḅẹrẹ fama ọ̀ pịrị ḅa, tẹ Tamụnọ si-wẹrịso ọ̀ pịrị ḅa.”