Lẹvitikọsị 25 - FỊAFỊA BAỊBỤLỤ

Sọnọma Karama Kụra Mẹ

¹ KỊNỊNYANAḄỌ ḅe nwẹnị Sayịnayị Tụndụ ọgọnọ ḅụ Mozizi ḅẹẹ,

² “Izirẹlịapụ ma ḅẹẹ: ọmịnị ama mẹ tẹ à kẹ ọ́ pịrị ama mẹ ḅio sọ ḅo sakị, ó fịye ḍiḅi na fịye soku na wẹrịsoo, sọnọma karama kụra goyegoye ḅụ, kẹ kụn kẹ KỊNỊNYANAḄỌ ḅe pịrị ḅara ḅụ.

³ Sonio akụra anie ọ́ kẹ ọmịna aḍụọ ḍiḅi tẹ pịkị ọmịna kụrọ-aḍụọ ma tẹlẹma tẹ arịḅẹ asịnmgbọlụ kobiri ḅarị ye.

⁴ Kụma sọnọma karama kụra mẹ, anị sime kẹ ḍụọ ḅio fịye ḍiḅi tẹ soku-a kụra pịrị ḅa, sime KỊNỊNYANAḄỌ ḅe pịrị Ịnyọsara ḅara ḅụ. Ọmịna aḍụọ ḅio ó fịye ḍiḅi ma, ọ́ pịkị ọmịna kụrọ-aḍụọ sọ tẹlẹma ma.

⁵ Ọmịna fịye soku sakị ḅụ, ḅarana ngẹrị so-paka aị ma ọ́ soku ma, anịsakị ó mu tẹlẹma-a girepu ḍụọ ma ḅụ paka-ḅo asịnmgbọlụ ma sọ ọ́ kaịn ma; anị karakara ḅara kẹ gbene-sime tẹ ịnyọsara-kụra sọ kẹ kiri mẹ pịrị ḅa.

⁶ Kiri mẹ ḅẹ ịnyọsara mẹ fịye pakama-ḅo ọ́ pịrị ḅa, ọmịnị ḅioju na, ọmịna omoniapụ na, ọmịna ọkọ afịrịmẹnjịapụ na, igoniapụ tẹ ọmịnị na angarị apụ na;

⁷ anị pịkị sime ọmịna opu anama na, nama tẹ ọmịna ama ḅio simearị aị na sọ pịrịm. Anị pakama-ḅo aị mamgba sime fị-fịaị pịrịm.”

Siin Ọkị-ḅo Wẹrị Kụra Mẹ

⁸ “Ọ́ sọnọma sakị kẹ sọnọma akụra kịẹn gbolomaa, anie gbọrụ kụra fa kụra amesi oyi finji.

⁹ Anịtẹso sọnọma karama akalụ mẹ ḅẹ oyia aḍin eneḅaka, anie Ḅẹrẹ-fama Si Pịrị Ene mẹ ḅụ, ọmịnị fie paka lamarị ọdụ ofuro pakama ọmịna ama mamgba, anga anga ikelema-koro ḅa.

¹⁰ Anịsakị ọ́ kụra amesi oyi finji karama kụra mẹ wẹrị fịafịama ḅa, tẹ ama mẹ nyana tẹ anị ḅio angarị apụ mamgba amịna sịḅị ḅẹ atomi sọ tẹẹ mẹ kẹ kpo-kpo gbolo bebe ama mẹ ikelema-koro ḅa. Anị ‘Ye Pịkịma-mu Nyanaḅọ Pịrị’ kụra sọ ọ́ pịrị ḅa. Mị kụra mẹ ḅụ, ọmịna aḅụụ ọrụḅọ-ọrụḅọ mḅọ fẹẹ wararị kiri anịanịa warị pịkịma-mu tarị tarị anị nyanaḅọ anịanịa mḅọ furo ḅẹ pịrị ḅa, tẹ ọrụḅọ-ọrụḅọ pịkị mḅọ igbigi kẹ nyana omoniḅọ pịkịma-mu mḅọ paka-furo pịrị ḅa.

¹¹ Kụra amesi oyi finji karama kụra mẹ ‘Ye Pịkịma-mu Nyanaḅọ Pịrị’ kụra sọ ọ́ pịrị ḅa. Anị ḅụ ó fịye ḍiḅi ma, ọ́ pịkị ḅarana ngẹrị so-pakarị aị ma soku ma, anịanịa ọ́ tẹlẹma-a ḅara kẹ ngẹrị sụa girepu asịnmgbọlụ ma kobiri ma.

¹² Kẹ gotẹ ọkọ ḅẹẹarị, anị kụra mẹ anie ‘Ye Pịkịma-mu Nyanaḅọ Pịrị’ kụra; anị fịafịa sakị sọ ọ́ pịrị ḅa; ḍụọ mẹ anị ḅio pakama-ḅo aị kịngẹ mie ọ́ fị ḅarịye.”

¹³ “Mie ‘Ye Pịkịma-mu Nyanaḅọ Pịrị’ kụra mẹ ḅụ, ọrụḅọ-ọrụḅọ mḅọ fẹẹ wararị kiri anịanịa warị pịkịma-mu tarị tarị anị nyanaḅọ anịanịa mḅọ furo ḅẹ pịrị ḅa.

¹⁴ Ị́ nwẹnị ye kẹ ị́ na kpeki tẹ angarị ḅọ dẹrị, anịanịa mḅọ ḅara ye fẹẹ ḅẹḅẹ, ó si ḅara kẹ jụmọ-jụmọ na mịẹ ma.

¹⁵ Opu ‘Ye Pịkịma-mu Nyanaḅọ Pịrị’ kụra mẹ ḅo ḅọrọtẹ akụra ma ḅẹ kịẹn-ḅịḅị la ḅara mie í ḍiki tẹ ị́ na kpeki tẹ angarị ḅọ ḅara ye fẹẹ ḅarị ḅara, anịsakị kụra ma ḅẹ kịẹn-ḅịḅị ḍiḅi ḅẹ asịnmgbọlị ma na sime-ḅara mie ò ḍiki tẹ kẹ ị́ dẹrị ḅarịye.

¹⁶ Tọnwa akụra ḅọrọ tẹ ḅẹḅẹ, tuḅo-ḅịḅị mẹ ḅụ í ye sụa ḅa, kụra ma boowa ḅẹḅẹ, tuḅo-ḅịḅị mẹ ḅụ ye so ḅa, gbala ḍiḅi ḅẹ asịnmgbọlị ma kịẹn-ḅịḅị mie ọ̀ kẹ ị́ dẹrịarị ye ẹrẹsị.

¹⁷ Ó si kẹ jụmọ-jụmọ mịẹ ma, kụma ọmịnị ọmịna Tamụnọ mangịma ḅa; kẹ gotẹ ọkọ ḅẹẹarị, yẹrị anie KỊNỊNYANAḄỌ ọmịna Tamụnọ ḅee.”

Sọnọma Akụra Karama Kụra Mẹ Ḅẹ Ḅụụ-fụka

¹⁸ “Anịẹrẹsị ọmịnị ì oloko kẹẹ-koro wararị aị ma ḅẹẹ ḅara mịẹ ḅa, tẹ kụrọ ḅara ḅụ emi ḅọ ḅara kẹ à tọn aị ma koko tẹ arị mịẹ ḅa, mie ḅụ ọ́ gberie-sọ ḅụụ la-a ḅara kẹ ama mẹ ḅio anga ḅa.

¹⁹ Kiri mẹ amịna sịnmgbọlụ pakama-ḅo ḅa, tẹ ọ́ fị furo ḅinma, tẹ gberie-sọ ḅụụ la-a ḅara kẹ anị ḅio anga ḅa.

²⁰ Tẹ ọ́ nwẹnị ‘Wa fịye ḍiḅi, anịanịa kobiri ma nwẹn ḅẹẹ sakị, sọnọma akụra karama kụra mẹ ḅụ wa tiye fị ḅẹ?’ gbela ḅarị ḅẹḅẹ,

²¹ À tọn tẹ sonio akụra karama kụra mẹ ḅụ ì boma ọmịna ọgọnọ sara ḅa, tẹ mịẹtẹ anị tẹra akụra ḅẹ fịye ọkị-ḅo ḅa.

²² Ninea akụra karama kụra mẹ ḅụ ó fịye ḍiḅi ḅarị sakị ọmịnị elemu fịye fị-fị ḍiḅi ḅa, nwenii esenia akụra karama kụra la ḅa; anị ḅẹ fịye paka-ḅo ḅarị sakị, ọ́ paa elemu fịye fị ḅa.”

Tomḅọ Mḅọ Nyana Ye Pakịrị Ọkị

²³ Kiri mẹ gbọrsịḅị dẹrị fa gbamaso ma, kẹ gotẹ ọkọ ḅẹẹarị, kiri mẹ ì nye; gbala ọmịnị anie igoniapụ tẹ ị̀ na simearị bịan apụ.

²⁴ Ọ́ nyana opu ama mamgba ḅụ, ó minini kiri pakịrị ọkị pịrị.

²⁵ “Í iyimbere pịkị-ḅo igoinm, tẹ ọ̀ nyana ye ḅụ ye dẹrị-dẹrị, ori na kpekitẹịn-mịnaḅọ ḅo ori iyimbere dẹrị tẹ ye mẹ pakịrị ḅo ḅa.

²⁶ Gbọrụ tomḅọ nwẹnị anị pakịrị ḅo ḅẹ gbọrụḅọ-sọ nyana-a, tẹ anị sakị ḅọrọ tẹso ò ḅioju ḅo lọkọlọkọ, tẹ nyana karama tẹ kẹ anị pakịrị ọkị ḅẹ ḅara ḍọkị-ẹrị-ẹrị,

²⁷ yee mḅọ anị dẹrị kụra-ḅio ḅọrọ tẹ akụra ma kịẹn, tẹ gbana igbigi mẹ kẹ oriḅe tẹ mḅọ ye mẹ kẹ dẹrị ḅọ mẹ pịrị, anịsakị mḅọ pịkịma-ḅo mḅọ nyana ye mẹ nyana ḅa.

²⁸ Kụma mḅọ ḅarana nyana karama tẹ kẹ anị pịkịma ọkị ḅẹ ḅara sime-a ḅẹḅẹ, anịrẹ mḅọ dẹrị ye mẹ, anị ḅọ mẹ tẹ mḅọ ḅara ye mẹ fẹẹ ḅọ mẹ ḅara sime nwenii ‘Ye Pịkịma-mu Nyanaḅọ Pịrị’ kụra mẹ la ḅarịye. Anị kụra mẹ ḅụ, fẹẹ tẹ anị nyana sime ḅọ mẹ anị ḅụ ḅara-siin ḅa, tẹ anị pịkịma-ḅo nyanaḅọ mẹ pịrị ḅa.”

²⁹ “Onu gbori wararị opu ama ḅio gbọrụ tomḅọ anga warị dẹrị tẹ anị ḅẹ dẹrị ḅụ bebe gbọrụ kụra ḅọrọ tẹ ḅẹḅẹ, mḅọ inetẹ anị pakịrị ọkị ḅa; kẹ gotẹ ọkọ ḅẹẹarị, ḅintẹ gbọrụ kụra ḅụ mḅọ anị pakịrị ọkị kụrọ nyana ḅa.

³⁰ Ḅintẹ gbọrụ kụra ḅụ anị pakịrị-a ḅẹḅẹ, anịrẹ warị mẹ tẹ onu gbori wararị opu ama mẹ ḅio simearị ye mẹ tụkụma ḅara ḅụ sime kẹ anị ḅọ mẹ tẹ anị fẹẹ ḅọ mẹ na, mḅọ ḅụ paka-ḅo ḅarị aḅụọ ikelema-koro na pịrị gbamaso ḅa; ‘Ye Pịkịma-mu Nyanaḅọ Pịrị’ kụra mẹ ḅụ sọ ini anị ḅụ ḅara-siin ma.

³¹ Kụma kala-ama ma tẹ onu arị gbori-ikelema-a ama ma ḅẹ awarị ma, opu sịẹ mẹ ḅẹ apiri na arị na ịn kẹ gbọrụ ḅara kịẹn ḅa; ini inetẹ arị pakịrị ọkị ḅa, anịsakị ‘Ye Pịkịma-mu Nyanaḅọ Pịrị’ kụra mẹ ḅụ ịn pịkị arị ḅụ ḅara-siin ḅa.

³² Anị sime-ḅara, sime-ḅara sọ, sime Livayị furo-ḅẹ-apụ ma pịrị opu ama ma ḅụ, ịn nyana opu ama ma ḅio ịna awarị ma, Livayị furo-ḅẹ-apụ ma, ḅẹ sakị, ḅẹ sakị ḅụ inetẹ arị pakịrị ọkị ḅa.

³³ Anịsakị Livayị furo-ḅẹ-apụ ma ḅẹ gbọrụḅọ nwẹnị inetẹ mḅọ pakịrị ọkị kụrọ mẹ kọn-a ḅẹḅẹ, anịrẹ warị mẹ tẹ ịn nyana opu ama mẹ ḅio dẹrị wararị warị mẹ ḅụ ịn ḅara-siin ḅarịye ‘Ye Pịkịma-mu Nyanaḅọ Pịrị’ kụra mẹ ḅụ; kẹ gotẹ ọkọ ḅẹẹarị, Livayị furo-ḅẹ-apụ ma opu ama ma ḅio simearị awarị ma anie Izirẹlịapụ ma ogbo-ḅio ḅụ ịn nyana ye.

³⁴ Kụma sime ịna opu ama ma ḅụ inweni-mgba pịrị apiri ma ḅẹ kiri inetẹ dẹrị ye sọ ḅịa; gbala aniemẹ anie sime ịn pịrị gbamaso ye ẹrẹsị.”

Kẹ Ḅọlọ Ḅụ Igoin-apụ Pịrị Igbigi

³⁵ “Ọmịna iyimbere ḅo igoin, tẹ ọmịnị na sime tẹ inetẹ amịna ḅụụ ḍikiḍiki-a ḅẹḅẹ, ọmịnị mḅọ ḍikiḍiki ḅa, igoniḅọ na, bịanḅọ na ḍikiḍiki ḅara ọ́ nwẹn kẹ mḅọ na anga ḅa.

³⁶ Mḅọ ḅara ḅụ gbana igbigi kịẹn, anịanịa ye kẹ sụa ọkị ma, kụma ọ́ Tamụnọ ḍiki-ḅalafaa mịẹtẹ ọmịna iyimbere ọmịna akaka ḅụ ọmịnị na anga ḅarị ḅara.

³⁷ Ọ́ gbana igbigi kịẹn ọkị ḅara kẹ ọmịna igbigi kẹ mḅọ ḅọlọ, anịanịa sọye fị ḅara kẹ ọmịna fịye kẹ mḅọ pịrị fị ma.

³⁸ Yẹrị anie KỊNỊNYANAḄỌ ọmịna Tamụnọ ḅe tẹ Kenanị ama mẹ kẹ ọ́ pịrị, tẹ ọmịna Tamụnọ sọ ḅẹ ẹrẹsị Ijiputi ama mẹ ḅio ọ́ pakama-ḅo ḅọ ḅee.”

Omoniapụ Ḅụ Ḅara-siin

³⁹ “Ọmịna iyimbere ọmịna akaka ḅụ sime tẹ ḅo igoin, tẹ amịna ḅụụ kẹ ọ́ dẹrị-dẹrị, ọmịnị mḅọ mịẹtẹ mḅọ omoniḅọ ḅara kẹ fịrịmẹnjị ma

⁴⁰ Mḅọ ọkọ fịrịmẹnjịḅọ ḅara, na, bịanḅọ ḅara kẹ ọmịnị na sime ḅa. Mḅọ ọmịnị na sime tẹ fịrịmẹnjị nwenii ‘Ye Pịkịma-mu Nyanaḅọ Pịrị’ kụra mẹ la ḅa.

⁴¹ Anị sakị ḅụ mie mḅọ, mḅọ awọmẹ kẹ amịna ḅụụ sụa tẹ ọmịna aḅụụ paka-so mḅọ ere-furo mu, tẹ pịkịma-so mḅọ aḍapụ nyana ye ḍọkụma-mu ḅarịye.

⁴² Kẹ gotẹ ọkọ ḅẹẹarị, ini anie ị̀ afịrịmẹnjịapụ, inima tẹ Ijiputi ama mẹ ḅụ à pakama-ḅo apụ ma; ini omoniapụ dẹrị ḅara kẹ ịn dẹrị ma.

⁴³ Ọ́ kụrọ ḅara kẹ ḅẹrẹtọn mḅọ pịrị ma, kụma ọmịnị ọmịna Tamụnọ mangịma ḅa.

⁴⁴ Ọmịna owiapụ omoniapụ na eremịna omoniapụ na, inima tẹ ọ́ nyana ḅarị apụ ma kụma, ọmịnị inetẹ opu asịẹ ma tẹ ọmịnị ikelema-koro wararị asịẹ ma ogbo-ḅio ḅụ owiapụ omoniapụ na, eremịna omoniapụ na fẹẹ ḅa.

⁴⁵ Ọ́ pịkị inetẹ igoniapụ ma tẹ ịna afuro na bịan apụ sọ tẹ ọmịnị na anga, tẹ ọmịna ama ḅio iyi tẹ awọmẹ ma ogbo-ḅio ḅụ sọ omoniapụ fẹẹ ḅa, tẹ ini ọmịna atomi sọ ḅa.

⁴⁶ Ọmịnị inetẹ ịn ḍiema tẹ kẹ ọmịna owiapụ-awọmẹ pịrị ḅa ọmịnị ḅọrọ sakị ịn nyana gbamaso ḅẹ ḍuu fị ḅara ḅụ; ọmịnị inetẹ omoniapụ mịẹ ḅara kẹ ini na mịẹ ḅa, kụma ọmịna amịnapụ Izirẹlịapụ ma, gbọrụḅọ-sọ kụrọ ḅara kẹ ḅẹrẹtọn jụmọ pịrị ma.”

⁴⁷ “Ọmịnị na simearị igoniḅọ, anịanịa, bịanḅọ ḅo ngọ kọn, tẹ ọmịna iyimbere mḅọ akaka simearị ḅọ ḅo igoin tẹ amịna ḅụụ kẹ ọmịnị na simearị anịanịa bịanḅọ mẹ anịanịa igoniḅọ mẹ furo-ḅẹ-ḅọ dẹrị-dẹrị;

⁴⁸ mḅọ dẹrị sakị mẹ ḅọrọ sakị, mḅọ iyimbere amịnapụ ma ḅẹ gbọrụḅọ inetẹ mḅọ pakịrị ḅa.

⁴⁹ Mḅọ iyiḅọ iyimbere, anịanịa mḅọ iyiḅọ iyimbere tụḅọ anịanịa mḅọ iyiḅọ ịyịmbara tụḅọ, anịanịa mḅọ paka-furo ḅụ mḅọ na kpekitẹịn-mịnaḅọ inetẹ mḅọ pakịrị ḅa. Mḅọ pịkị-ḅo ngọ kọn ḅẹḅẹ, mḅọ inetẹ amịna ḅụụ pakịrị ḅa.

⁵⁰ Mḅọ anị ḅọ mẹ tẹ mḅọ fẹẹ ḅọ mẹ na kụra mẹ tẹ mḅọ ḅarana amịna ḅụụ dẹrị sakị mẹ ḅụ saakị kịẹn nwenii ḅo ‘Ye Pịkịma-mu Nyanaḅọ Pịrị’ kụra mẹ la ḅa; anịsakị mḅọ ḅụ ḅara-siin igbigi ḅịḅị mẹ pịkị kụra ma kịẹn-ḅịḅị mẹ la ḅara la ḅa; mḅọ nyana ḅọ mẹ na sime sakị mẹ, ọkọ-fịrịmẹnjịḅọ fị-fị igbigi ḅịḅị mie ịn kẹ kịẹn ḅarịye.

⁵¹ Ịn wẹrịtẹ ḍuko ḅara ḅụ tọnwa akụra paa emi ḅẹḅẹ, mḅọ fẹẹ igbigi mẹ ḅụ igbigi sin-sin mḅọ ḅụụ pakịrị igbigi mẹ gbẹẹ ḅa.

⁵² Ọkị mu ‘Ye Pịkịma-mu Nyanaḅọ Pịrị’ kụra mẹ la mẹ boowa akụra mie kọn ye ḅẹḅẹ, mḅọ mḅọ na fịrịmẹnjị akụra ma kịẹn tẹ igbigi sin mḅọ ḅụụ pakịrị igbigi mẹ gbẹẹ ḅa.

⁵³ Kụra finji sakị, finji sakị ọkọarị fịrịmẹnjịḅọ sime-ḅara mie mḅọ, mḅọ na sime ḅarị ḅara; mḅọ ọmịna tọrụ-ogbo ḅụ kụrọ ḅara kẹ ḅẹrẹtọn mḅọ pịrị ma.

⁵⁴ Mịna aḅọkọ ma ḅụ mḅọ pakịrị-a ḅẹḅẹ, anịrẹ mḅọ na, mḅọ awọmẹ na kẹ sụa pakịrị ḅa ‘Ye Pịkịma-mu Nyanaḅọ Pịrị’ kụra mẹ ḅụ.

⁵⁵ Kẹ gotẹ ọkọ ḅẹẹarị, Izirẹlịapụ ma anie ị̀ afịrịmẹnjịapụ, ini anie ị̀ afịrịmẹnjịapụ, inima tẹ arị Ijiputi ama mẹ ḅio pakama-ḅo apụ ma. Yẹrị anie KỊNỊNYANAḄỌ ọmịna Tamụnọ ḅee.”