Lẹvitikọsị 20 - FỊAFỊA BAỊBỤLỤ

Sime Ḅịḅịpoki-a Pịrị Afomu-ḅara

¹ KỊNỊNYANAḄỌ ḅe nwẹnị Mozizi ḅẹẹ,

² “Izirẹlịapụ ma ḅẹẹ, Izirẹlị ḅẹ apụ ma ḅụ, anịanịa igoniapụ tẹ Izirẹlị ḅụ angarị apụ ma ḅụ, ḅẹḅọ-ḅẹḅọ tẹ amịna awọmẹ ḅụ ḅẹḅọ-ḅẹḅọ kẹ Molẹkị nwẹn-sịn oru-tamụnọ ḅe pịrị ḅọ pịrị ḅọ, ini mḅọ ḅaa ḅa; ama mẹ ḅẹ apụ ḍụḅarị kẹ mḅọ gbin ḅaa ḅa.

³ Yẹrị ḅe sọ anị tomḅọ mẹ na tụḅụrụ ḅara kẹ tọrụ kẹ mḅọ ọgọnọ gbana ḅa, tẹ mḅọ atomi ogbo-ḅio ḅụ mḅọ pẹlẹ-siin ḅa, gbala mḅọ amịna awọmẹ ma ḅẹ gbọrụḅọ kẹ Molẹkị nwẹn sịn oru-tamụnọ ḅe pịrị tẹ, tẹ ị̀ Fịafịa Yọ mẹ pilema, tẹ ị̀ Fịafịa Ẹrẹ mẹ mịẹ-sima tẹ ẹrẹsị.

⁴ Anịsakị ama mẹ ḅẹ apụ ma mḅọ amịna awọmẹ ḅẹ gbọrụḅọ kẹ Molẹkị nwẹn-sịn oru-tamụnọ ḅe pịrị sakị mẹ ḅụ ịna atọrụ ḅọị tẹ gbala-gbala mḅọ ḅaa-a ḅẹḅẹ,

⁵ anịrẹ arị ị̀ tọrụ kẹ anị tomḅọ mẹ na, mḅọ furo na ḅụ tụḅụrụ ḅara wẹrị tẹ ịna atomi ogbo-ḅio ḅụ ịn pẹlẹ-siin ḅa; mḅọ tẹ sẹfị tẹ Molẹkị nwẹn-sịn oru-tamụnọ ḅẹ ḍukamẹnjị ḅọ mẹ na, mḅọ ḍuka-mu atomi mamgba na.”

⁶ Gbọrụ tomḅọ nwẹnị vuunma pịkị tẹ fụḅara-ḍiki-ḅịrịapụ na majịkị-mịẹapụ na ḍukamẹnji-mẹnjitẹ inina sẹfị ḅẹḅẹ, arị ị̀ tọrụ kẹ anị tomḅọ mẹ si anga ḅụ wẹrị tẹ mḅọ atomi ogbo-ḅio ḅụ mḅọ pẹlẹ-siin ḅa.

⁷ Anịẹrẹsị ọmịnị ọmịna aḅụụ mịẹ fịafịama tẹ fịafịa ḅara simee; kẹ gotẹ ọkọ ḅẹẹarị, Yẹrị anie KỊNỊNYANAḄỌ ọmịna Tamụnọ ḅee.

⁸ Ọmịnị ì oloko kẹẹ-koro wararị aị ma koko tẹ arị mịẹ. Yẹrị anie KỊNỊNYANAḄỌ ḅe tẹ ọ́ mịẹ fịafịama ḅọ ḅee.

⁹ Ḅẹḅọ-ḅẹḅọ tẹ amịna ḍaḅọ, anịanịa, amịna iyingiḅọ woriḅọ-woriḅọ, ini mḅọ ḅaa ḅa mḅọ amịna ḍaḅọ, anịanịa amịna iyingiḅọ wori tẹ, mḅọ ọmbie mḅọ ọgọnọ simee.

¹⁰ Gbọrụ owiḅọ nwẹnị mḅọ na kpeki tẹ angarị ḅọ ta na sẹfị mẹnjị kọn, kọn, ini maa apụ ma, owiḅọ ḅe na, ẹrẹḅọ ma na ini ịn ḅaa ḅa.

¹¹ Owiḅọ ḅe tẹ amịna ḍaḅọ ta na gboloma ḅọ, gboloma ḅọ, amịna ḍaḅọ paụma tẹ; ini maa apụ mamgba ini ịn ḅaa ḅa; ịna ọmbie ịna ọgọnọ emi.

¹² Gbọrụ owiḅọ nwẹnị amịna owiḅọtụḅọ ta na gboloma, gboloma; ini maa apụ mamgba ini ịn ḅaa ḅa ịn kpekitẹ amịnapụ sẹfị mẹnjị kọn tẹ ịna ọmbie ini ọgọnọ emi.

¹³ Gbọrụ owiḅọ nwẹnị ẹrẹḅọ na gboloma ḅara kẹ ò pembe owiḅọ na gboloma, gboloma; ini maa apụ mamgba tọn-tọnye mịẹ tẹ, ini ịn ḅaa ḅa; ịna ọmbie ini ọgọnọ simee.

¹⁴ Gbọrụ owiḅọ nwẹnị gbọrụ ẹrẹḅọ sime, pịkị á iyingi sọ ọkị sime, sime, aniemẹ anie si sịḅịḅio; ịn fịnị kẹ ori na, ini maa ereme mamgba na dọkịma ḅa, mịẹtẹ ọmịna ogbo-ḅio si sịḅịḅio paka ḅịa ḅara.

¹⁵ Gbọrụ owiḅọ nwẹnị nama na gboloma, gboloma, ini mḅọ ḅaa ḅa, ọ́ pịkị nama ḅe ḅaa ḅa.

¹⁶ Gbọrụ ẹrẹḅọ nwẹnị sọma mu ḅe nama, nama na gboloma, gboloma, ọmịnị ẹrẹḅọ ma na, nama ḅe na ḅaa ḅa; ịn fịị ḅa; ịna ọmbie ini ọgọnọ emi.

¹⁷ Gbọrụ owiḅọ nwẹnị amịna ịyịmbara, mḅọ ḍaḅọ, anịanịa mḅọ iyingiḅọ iyi ẹrẹḅọtụḅọ ọkị paụma, tẹ á paụ ẹrị, arị pịkị ọ̀ paụ ẹrị-ẹrị, aniemẹ anie ḅụụ-jịrịma ye; ịna atomi ma awọmẹ ma ḍiki-tọrụ ḅụ ini ịn pẹlẹ-siin ḅa; ori amịna ịyịmbara paụma tẹ ẹrẹsị, ori ọ̀ mịẹ-irima mẹ dogi ḅa.

¹⁸ Ẹrẹḅọ so ẹrịarị, tẹ gbọrụ owiḅọ á paụma tẹ arị na tii, tii, ori arị ngụngụḅa paụma tẹ, arị arị ọmbie mẹ sara, sara paka-ḅo arị anga mẹ finji tẹ ini ini maa apụ mamgba pẹlẹ-siin ḅa ịna atomi ma ogbo-ḅio ḅụ.

¹⁹ Ọmịnị ọmịna iyingiḅọ ịyịmbara, anịanịa, ọmịna ḍaḅọ ịyịmbara paụma ma, aniemẹ anie gbala mḅọ mḅọ na kpeki lamatẹ mịnaḅọ paụma tẹ; ini ịna mịẹ-irima mẹ dogi ḅa.

²⁰ Gbọrụ owiḅọ nwẹnị mḅọ ḍaḅọ, anịanịa, mḅọ iyingiḅọ iyimbere ta na gboloma, gboloma, mḅọ amịna ḍaḅọ, anịanịa amịna iyingiḅọ iyimbere paụma tẹ; ini ịna si dogi ḅa. Ini awọ iyi-a ḅara kẹ fịị ḅa.

²¹ Gbọrụ owiḅọ nwẹnị amịna iyimbere ta ọkị-ọkịị, miemẹ anie pilematẹ mịẹye. Ori amịna iyimbere paụma tẹ; ini awọ iyi ḅịa.

²² Ọmịnị ọkọẹrẹsị ì oloko kẹẹ-koro wararị aị ma na, kụrọ ị̀ ḅara-ḅio emi ḅara kẹ à tọn aị ma na koko tẹ arị mịẹ; mịẹtẹ arị ọmịnị ọkị-ḅo tẹ ọ́ mu anga ḅẹ muarị anga mẹ, ama mẹ ọmịnị ọsụ pakama ḅịa ḅara.

²³ Anịsakị ọmịnị ọmịna tọrọkọ opu sịẹ mẹ tẹ à wakị ngumarị ye mẹ ḅẹ ama anga anga ḅara ma ḍiki mẹnjị ma; kẹ gotẹ ọkọ ḅẹẹarị, mịna aị mamgba ịn mịẹm, anịẹrẹsị arị ịn sịkịm.

²⁴ Kụma à ḍuko ọ́ pịrị tẹ, ọmịnị ịna ama mẹ ḅio anga ḅa, tẹ arị anị kẹ ọ́ pịrị tẹ ọmịnị anị nyana ḅa, anie ḅụụ-ḅẹlẹmatẹ iḅiọkụma fịye so-pakamarị amakiri mẹ. Yẹrị anie KỊNỊNYANAḄỌ ọmịna Tamụnọ ḅe tẹ tomi ma ḅụụ ó ḅelema ḅọ ḅee.

²⁵ Ọmịnị anịẹrẹsị fịafịatẹ anama na, fịafịa-a anama na ogboku kịrị pakama ḅa, pịkị fịafịatẹ afeni na, fịafịa-a afeni na sọ; nama ḅụụ, anịanịa feni ḅụụ, anịanịa ḅẹẹye-ḅẹẹye tẹ ogbo-ogbo ḅụụ kiri mẹ ọgọnọ ḅụ mẹnjịarị aị ma ḅụụ, arị aị ma tẹ à sikima ọ́ pịrịm, ọ́ kẹ fịafịa-a aị sọma nwẹn ḅẹẹ aị ma ḅụ, ọmịnị ọmịna aḅụụ pilema ma.

²⁶ Ọmịnị ọmịna aḅụụ mịẹ fịafịama ị̀ pịrịị, gbala yẹrị KỊNỊNYANAḄỌ ḅe à fịafịa wararị ẹrẹsị, tẹ osi atomi ma ḅụụ ó puu-ḅelema tẹẹ, mịnẹ ó sime ị̀ pịrịị.

²⁷ Owiḅọ, anịanịa ẹrẹḅọ tẹ fụḅara, anịanịa, ḅara-kuḅu ḍikiarị ḅọ, anịanịa majịkị mịẹarị ḅọ, ini mḅọ ḅaa ḅa. Ịn ḍụḅarị kẹ mḅọ gbin ḅaa ḅa. Mḅọ ọmbie amịna ọgọnọ gbana ḅa.