Lẹvitikọsị 19 - FỊAFỊA BAỊBỤLỤ

Fịafịa Na Karakara Mịẹ Na Gboloma Oloko Ma

¹ KỊNỊNYANAḄỌ ḅe nwẹnị pịkị Mozizi ḅẹẹ,

² “Izirẹlịapụ ma tomina-ogbo mẹmgba ḅẹẹ, ó fịafịa ḅara simee, gbala Yẹrị KỊNỊNYANAḄỌ ọmịna Tamụnọ ḅe à fịafịa wararị ẹrẹsị.

³ Ọmịna aḅụụ tomḅọ nwẹn-sịn tomḅọ amịna iyingiḅọ na, amịna ḍaḅọ na mangịma ḅa, tẹ ị̀ Ịnyọsara-Ene ma koko ḅa. Yẹrị anie KỊNỊNYANAḄỌ ọmịna Tamụnọ ḅee.”

⁴ “Ó sunsin oru-atamụnọ pịrị ma, pịkị ḅara kẹ tẹmẹ oru-atamụnọ tẹmẹ ọmịna aḅụụ pịrị ma. Yẹrị anie KỊNỊNYANAḄỌ ọmịna Tamụnọ ḅee.”

⁵ “Ó dein-pịrị-agba mịẹ KỊNỊNYANAḄỌ ḅe pịrịarị sakị, ọmịnị anị mịẹ ḅa, mịẹtẹ KỊNỊNYANAḄỌ ḅe ọ́ mịẹ agba mẹ ọkị ḅarị ḅara.

⁶ Anị gbọrụ ene mẹ ḅụ ini anị fị ḅa, anịanịa, anị ḅẹ ene-ḅaa anịsakị anị ḅụ kirikọntẹ sime nwenii tẹrẹị karama ene la ye mẹ ọ́ fịnị kẹ anị dọkịma ḅa.

⁷ Gbala-gbala tẹ tẹrẹị karama ene mẹ ḅụ ini anị fị-fị, agba mẹ ḅarị ọkị ḅịa.

⁸ Anịsakị anị fịm nwẹn ḅẹẹ ḅọ ḅẹẹ ḅọ, amịna mịẹ-irima mẹ dogi ḅa, gbala mḅọ KỊNỊNYANAḄỌ ḅe fịafịa ye mịẹ sima papaaye mịẹ tẹ ẹrẹsị anịsakị anị tomḅọ mẹ ini mḅọ pẹlẹ-siin ḅa mḅọ atomi ogbo-ḅio ḅụ.”

⁹ “Ọmịnị ọmịna kiri mẹ ḅẹ fịye soku-ḅẹ sakị, ó soku mu gbọrsịḅị ọmịna ḍụọ agara ma la, anịanịa pịkị mu ḅara kọnma aị kolokolo ma, ó fịye mẹ soku ḅọrọma tẹso.

¹⁰ Ọmịnị ọmịna girepu nwẹn-sịn sịnmgbọlụ ḅẹ ḍụọ soku sakị, ọmịnị arịmgba kaịn fama ma. Siin-koro asịnmgbọlụ ma sọ ó kolokolo ọkị ma ọmịna ḍụọ ḅio. Ọmịnị arị wẹrịso igoin-apụ ma na, igoniapụ ma na pịrịị. Yẹrị anie KỊNỊNYANAḄỌ ọmịna Tamụnọ ḅee.”

¹¹ “Ó furu ma, anịanịa kịnị inoma, anịanịa iruo kọn.

¹² Ị̀ ẹrẹ ḅụ iruo ḅara kẹ ye minini tẹ mị ḅara ḅụ ị́ Tamụnọ ḅe ẹrẹ mẹ sima ma. Yẹrị anie KỊNỊNYANAḄỌ ḅee.”

¹³ “Ị́ ị́ na kpeki tẹ angarị ḅọ ponoma, anịanịa, kụrọ ḅara kẹ mḅọ nye ọkị ma. Ọkọ fịrịmẹnjịḅọ gbẹẹ-ye bebe ene kẹ ị́ ḅara ḅụ sime nwenii mu ene-ḅaa dede-ḅio lama.

¹⁴ Ye karị ḅeri-iningiḅọ pịrị ma, pịkị kịnị-ḅịkịmaye kẹ tọrụngbọ-pụụntẹḅọ tọrọkọ koroma ma. Ọmịnị ị̀ mangịmaa; yẹrị anie KỊNỊNYANAḄỌ ḅee.”

¹⁵ “Ḅẹrẹkọn kiri ḅụ ị́ karakara ḅẹrẹ kọn ḅa, ị́ aḍụa kọn igoinḅọ ḅe pịrị, anịanịa ị́yẹrị ẹrẹsị kẹ opu tomḅọ ḅe ḅẹẹ ma, kụma karakara ḅụ mie ị́ ḅẹrẹ kọn ị́ na kpeki tẹ angarị ḅọ pịrị ḅarịye.

¹⁶ Ị́ atomi ogbo-ḅio ḅụ mẹnjị-mẹnjị iwo na, ideri na tẹ iruo aị kẹ kịnị ḍuko-sima ma ḅọrọma ị́ na kpeki tẹ angarị ḅọ ḍumo gbolomaye ḅụ siye anga sịẹma. Yẹrị anie KỊNỊNYANAḄỌ ḅee.”

¹⁷ “Ó ḅioḅẹngbọ, ḅioḅẹngbọ kẹ ọmịna mịnaḅọ ḍiki-ḅioḅu ma, kụma ọmịnị, ọmịnị na kpeki tẹ angarị ḅọ na ḅịḅị-ọkịyaa, anieofori ó ḅofa mḅọ gotẹ si mịẹ.

¹⁸ Ọ́ gbẹẹfị ḅii ma, ọ́ pịkị si ḅioḅẹngbọ sụa ọmịna atomi pịrị ma; kụma ọmịnị ọmịna aḅụụ ḅẹlẹma ḅara kẹ ọmịnị na kpeki tẹ angarị ḅọ ḅẹlẹmaa. Yẹrị anie KỊNỊNYANAḄỌ ḅee.”

¹⁹ “Ọmịnị ị̀ oloko kẹẹ-koro wararị aị ma koko ḅa. Ọ́ ḍụkụ tẹ ọmịna opu anama ma gbọrụ ḅara sime nama mu jen kiri nama kpọlị ma (Kẹ tọnma — ejimina mu oḅori kpọlị). Ọmịna ḍụọ ḅio ọ́ kịrị-kịrị maa asịnmgbọlị kẹ gbọrụ ḍụọ ḅio ḍiḅi ma, ọ́ pịkị kịrị-kịrị aḅịtẹ maa atọrụ kẹ gbọrụ kapa gbin ma.”

²⁰ “Gbọrụ owiḅọ nwẹnị omoni-ẹrẹḅọ tẹ ini ọlọ jen owiḅọ pịrị wararị tẹ amụ ịn pịrị pakama tẹ amịna sịḅị nyana-a omoni-ẹrẹḅọ na gboloma gboloma, ịn kịnị fịrịma tẹ anị sọkịrị tẹ gbela nimi ḅa. Ini ịn ḅaa ma, gbala arị á sịḅị nyana-a ẹrẹsị.

²¹ Kụma ori amịna ḅụụ gotẹ ḅẹrẹ-ḅarasii agbamịẹ gbọrụ ejimina ọkị-ḅo KỊNỊNYANAḄỌ ḅe pịrị ḅa Kobiri Akpụrụ-warị mẹ ḅẹ ḅọkọ mẹ ḅụ.

²² Agbamịẹḅọ ḅe nwẹnị ḅẹrẹ-ḅarasii agbamịẹ ejimina ḅe kẹ KỊNỊNYANAḄỌ ḅe tọrọkọ ḅụ ò si mẹ tẹ ọ̀ mịẹ tẹ ye mẹ gotẹ si-wẹrịso pịrị ḅẹrẹ fama ọ̀ pịrị ḅa, anịsakị ọ̀ nwẹnị si mẹ tẹ ọ̀ mịẹ tẹ ye mẹ ḅụ si-wẹrịso pịrị nyana ḅa.”

²³ “Ó ḅo Kenanị ama mẹ la tẹ ọ́ fị ḅẹ mgbọlụ sụa fị asịn ḅara, ḅara mamgba ḍiḅi fama tẹso, ọmịna aḅụụ arịḅẹ asịnmgbọlụ ma tọn-tọn-aị sọ ḅa, tẹra kụra ḅụ ọmịnị arị fị nyana-a.

²⁴ Ini akụra karama kụra mẹ ḅụ arịḅẹ asịnmgbọlụ mamgba fịafịa aị sọ, tẹ tokini agbamịẹye sọ KỊNỊNYANAḄỌ ḅe pịrị ḅa.

²⁵ Kụma sọnọ akụra karama kụra ḅụ ọmịnị inetẹ arịḅẹ asịnmgbọlụ fị ḅa, mịẹtẹ arị iḅiọkụ tọnwa ḅara kẹ sịnmgbọlụ sụa ọ́ pịrị ḅarị ḅara Yẹrị anie KỊNỊNYANAḄỌ ọmịna Tamụnọ ḅee.”

²⁶ “Ọmịnị ọmbie kẹ gbọrụ meni sọ na sụa pẹị ma. Ó ḍiri kọrị, anịanịa majịkị amịẹaị mịẹ ma.

²⁷ Ọmịnị ọmịna fụḅara kẹngẹ anịanịa, ọmịna mpọrị agara ma sẹịn ma.

²⁸ Ọ́ ḍụẹịn ḍuu gotẹ ọmịna oju-kiri puu, anịanịa akaka-anda kẹ ọmịna oju ḅụ sụa ma, yẹrị anie KỊNỊNYANAḄỌ ḅee.”

²⁹ “Ọmịnị ọmịna eremịna-awọmẹ mịẹ iderima tẹ ịn sẹfị-apụ sọ ma, anieofori ama mẹ ḅofa sẹfị ama sọ, tẹ si-sịḅịḅio ḅo anị ḅio ḅin.

³⁰ Ọmịnị ị̀ Ịnyọsara-Ene ma koko tẹ ị̀ Fịafịa Yọ mẹ mangịma ḅa. Yẹrị anie KỊNỊNYANAḄỌ ḅee.”

³¹ “Ó vuunma pịkị fụḅara-ḍiki-ḅịrịapụ, anịanịa majịkị-mịẹapụ ḍọkị pakama-ḅo, tẹ ịna aḅụụ ọmịna aḅụụ pilema ma. Yẹrị anie KỊNỊNYANAḄỌ ọmịna Tamụnọ ḅee.”

³² “Sịḅị iḅulu ḅịyatẹ apụ ma tọrọkọ ọ́ saakị sịẹsimee, tẹ omongiḅọ tọrụ kụn, anịsakị ọmịnị ọmịna Tamụnọ ḅe mangịma ḅa. Yẹrị anie KỊNỊNYANAḄỌ ḅee.”

³³ “Igoniḅọ ḅo ọmịna ama ḅio anga sakị, ó siye kẹ mḅọ mịẹ ma.

³⁴ Igoniḅọ ḅe tẹ ọmịnị na angarị ḅọ ḅẹ ọmịna ogbo-ḅio ḅụ ama-kuḅu ḅẹ ḅọ sime-ḅara sime ḅa, anịsakị ọmịnị ọmịna aḅụụ ḅẹlẹma ḅara kẹ mḅọ ḅẹlẹma ḅa kẹ gotẹ ọkọ ḅẹẹarị, ọmịnị sọ igoniapụ sọ simem Ijiputi ama mẹ ḅio. Yẹrị anie KỊNỊNYANAḄỌ ọmịna Tamụnọ ḅee.”

³⁵ “Ọ́ gbọrụ siye sọ mịẹ ma ye nangwọ-laa-ḅara na iku-laa-ḅara na anịanịa ḅaka-laa-ḅara na tọn kiri ḅụ.

³⁶ Ọ́ karakara ye-tọn ḍigi na, karakara iku-laa-ḅara tọn ye na, karakara ḅaka-laa-ḅara tọn ye na nyanaa. Yẹrị anie KỊNỊNYANAḄỌ ọmịna Tamụnọ ḅe tẹ Ijiputi ama mẹ ḅio ó pakama-ḅo ḅọ ḅee.

³⁷ Anịsakị ọmịnị ì oloko kẹẹ-koro wararị aị mamgba na, kụrọ ḅara-ḅio emi ḅọ ḅara kẹ à tọn aị mamgba na kẹ elekima sụa tẹ arị mịẹ ḅa. Yẹrị anie KỊNỊNYANAḄỌ ḅee.”