Lẹvitikọsị 18 - FỊAFỊA BAỊBỤLỤ

Owiḅọ Na Ẹrẹḅọ Na Gboloma Mẹ Ḅẹ Tọn-tọn-aị

¹ KỊNỊNYANAḄỌ ḅe nwẹnị Mozizi ḅẹẹ:

² Izirẹlịapụ ma ḅẹẹ, “Yẹrị anie KỊNỊNYANAḄỌ ọmịna Tamụnọ ḅee.

³ Ọmịnị Ijiputi ama ḅụ ịn mịẹ ḅara mịẹ ma, ọmịnị anga sime anga mẹ, anịsakị ọ́ pịkị Kenanị ama mẹ tẹ arị ọmịnị ọkị-ḅo koromarị ama mẹ ḅụ ịn mịẹarị ḅara mịẹ ma. Ọmịnị ịna kẹẹtẹ oloko ma ḍiki mẹnjị ma.

⁴ Kụrọ ḅara ḅụ emi ḅọ ḅara ḅụ ọmịnị à tọn aị mịẹ ḅa, tẹ ì oloko kẹẹ-koro wararị aị ma koko tẹ arị ḍiki mẹnjị ḅa. Yẹrị anie KỊNỊNYANAḄỌ ọmịna Tamụnọ ḅee.

⁵ Ọmịnị anịẹrẹsị ì oloko kẹẹ-koro wararị aị ma na, kụrọ ḅara ḅụ emi ḅọ ḅara kẹ à tọn aị ma na koko ḅa, arị aị ma tẹ tomḅọ arị mịẹ ḅụ ḅọrọ tẹ ḍumo ḅarị aị ma. Yẹrị anie KỊNỊNYANAḄỌ ḅee.”

⁶ “Ọmịna aḅụụ gbọrụḅọ-sọ mḅọ na kpeki wararị mịnaḅọ paụma tẹ mḅọ na gboloma ma. Yẹrị anie KỊNỊNYANAḄỌ ḅee.”

⁷ “Ị́ ḍa paụma ma, anie í iyingi paụma tẹ árị na gboloma ḅụ. Árị anie í iyingi; á paụma tẹ arị na gboloma ma.”

⁸ “Ị́ ḍa ta paụma tẹ árị na gboloma ma. Anie mẹ anie ị́ ḍa ḅe paụ mẹ.”

⁹ “Ị́ ịyịmbara, anịanịa ị́ na gbọrụ ḍaḅọ iyi ẹrẹḅọtụḅọ, anịanịa gbọrụ iyingiḅọ iyi ẹrẹḅọtụḅọ paụma tẹ mḅọ na gboloma ma — ama ọgọnọ iyi ḅọ-o, jen sịẹ ḅụ iyi ḅọ sọ.”

¹⁰ “Í taa-ẹrẹḅọtụḅọ paụma tẹ árị na gboloma ma; kẹ gotẹ ọkọ ḅẹẹarị, anị ḅụụ-jịrị dogi-ḅo ị́ warị pịrị ḅa.”

¹¹ “Ị́ ḍa ta iyi ẹrẹḅọtụḅọ paụma tẹ arị na gboloma ma; ị́ ḍa árị iyim, árị ị́ ịyịmbara ḅẹ sakị.”

¹² “Ị́ ḍa ịyịmbara paụma tẹ árị na gboloma ma; árị ma anie ị́ ḍa na kpeki mịnaḅọ.”

¹³ “Í iyingi ịyịmbara paụma tẹ arị na gboloma ma; árị ma anie í iyingi na kpeki mịnaḅọ.”

¹⁴ “Ị́ ḍa iyimbere paụma ma. Anie mẹ fiearị ye, ọ̀ ta na gboloma ma; árị anie ị́ ḍa ḅe ịyịmbara.”

¹⁵ “Í owiḅọtụḅọ ta, anie ị́ fụanḅọ ma, paụma tẹ árị na gboloma ma; árị anie í owiḅọtụḅọ ta. Á paụma ma.”

¹⁶ “Í iyimbere ta paụma tẹ arị na gboloma ma; árị ma anie í iyimbere ḅe paụ.”

¹⁷ “Gbọrụ ẹrẹḅọ paụma tẹ árị na gboloma tẹ pịkị árị ẹrẹḅọtụḅọ anịanịa á taa-ẹrẹḅọtụḅọ na gboloma ma; ini anie ị́ na kpeki eremịna-amịnapụ. Anie mẹ anie si-sịḅịḅio.”

¹⁸ “Ị́ ta ịyịmbara ọkị tẹ á kẹ ịyịmbara afanaḅọ mịẹ tẹ árị na gboloma ma, ị́ ta ma paa ḍumo wararị ogbo.”

¹⁹ “Ẹrẹḅọ pile wararị tẹ amụ fịafịa-a ogbo á ḍọkụma-mu tẹ árị na gboloma ma.”

²⁰ “Ị́ na kpeki tẹ angarị ḅo ta na gboloma tẹ árị na ị́ ḅụụ pilema ma.

²¹ Ị́ awọmẹ ḅụ, gbọrụḅọ-sọ pịrị pakama tẹ ịn kẹ agba mịẹ Molẹkị nwẹn-sịn oru ḅe pịrị tẹ mị-ḅara ḅụ ị́ Tamụnọ ḅe ẹrẹ mịẹ-sima ma.”

²² “Ẹrẹḅọ na gboloma ḅara kẹ í pembe owiḅọ na mịẹ ma; aniemẹ anie tọn-tọnye.”

²³ “Piri-ḅio-ḅẹ gbọrụ nama sọ na gboloma tẹ anị na ị́ ḅụụ pilema ma; anịanịa ẹrẹḅọ amịna ḅụụ kẹ piri-ḅio-ḅẹ nama pịrị tẹ anị na gboloma; aniemẹ mịẹ-mịẹ-a kịrị ye.”

²⁴ “Ọ́ mịna aị ma ḅụ ḅẹẹye-ḅẹẹye sọ kẹ ọmịna aḅụụ pilema ma, kẹ gotẹ ọkọ ḅẹẹarị, mịna aị mamgba ḅụ mie ọmịna tọrọkọ à kẹ wakị ngumarị opu asịẹ ma kẹ ịna ḅụụ pilema aị.

²⁵ Tẹ ama mẹ nwẹnị ḅo pilema, anie mịẹtẹ àrị anị ḅẹ iri-mịẹye mẹ fomum, tẹ ama mẹ anị ḅio anga apụ ma ọsụ pakamam.

²⁶ Kụma ọmịnị ì oloko ma na à tọn aị ma na kokoo tẹ mịna tọn-tọn-aị ma ḅẹ gberie-sọ mịẹ ma, ị́yẹrị ama ḅẹ ḅọ-o, anịanịa igoniḅọ tẹ ọmịna ogbo-ḅio angarị ḅọ sọ.

²⁷ Kẹ gotẹ ọkọ ḅẹẹarị, ama mẹ ḅẹ atomi ma mịna tọn-tọn-aị mamgba mịẹm, inima tẹ ọmịna tọrọkọ tarị sime-sime apụ ma. Anie mịẹtẹ ama mẹ ḅo pilemam.

²⁸ Ọmịnị sọ ọkọ mịẹ ḅẹḅẹ, ama mẹ ḅofa ọmịnị ọsụ pakama, ọmịnị anị pilema sakị; anị wẹrịtẹ opu sịẹ mẹ tẹ ọmịna tọrọkọ tarị sime-sime ye mẹ ọsụ pakama ḅara.

²⁹ Kẹ gotẹ ọkọ ḅẹẹarị, ḅẹḅọ-ḅẹḅọ tẹ mịna tọn-tọn-aị ma ḅụ ḅẹẹye-ḅẹẹye mịẹ ḅarị ḅọ, mḅọ atomi ogbo-ḅio ḅụ ini mḅọ pẹlẹ-siin ḅa.”

³⁰ “Mie ḅụ ọmịnị à tọn ọ́ pịrị aị ma kokoo. Mịna tọn-tọn ama-anganga-aḅara ma, gbala-gbala ọmịnị anị ḅẹ gberie-sọ kẹ mịẹ-mịẹye sọma ma, arị aị ma tẹ ọmịna tọrọkọ ịn kẹ mịẹ-mịẹye sọma aị ma. Gbala-gbala arị ḅụ ọmịnị ọmịna aḅụụ pilema ma. Yẹrị anie KỊNỊNYANAḄỌ ọmịna Tamụnọ ḅee.”