Lẹvitikọsị 17 - FỊAFỊA BAỊBỤLỤ

Ọmbie Kpọma Yela Ḅara

¹ KỊNỊNYANAḄỌ ḅe nwẹnị Mozizi ḅẹẹ,

² “Erọnị na, ori owiapụ-awọmẹ na, Izirẹlị ḅẹ apụ mamgba na ḅẹẹ, miemẹ anie ye tẹ KỊNỊNYANAḄỌ ḅe tọn tẹ ye.

³ Izirẹlị warị mẹ ḅio ḅẹ ḅọ, ḅẹ ḅọ nwẹnị kobiri-ogbo mẹ ḅio sime, anịanịa kobiri-ogbo mẹ ḅio paka tẹ pootẹ-nambulo, anịanịa anana, anịanịa, oḅori ḅaa,

⁴ tẹ anị ọkị-ḅo tẹ kẹ ḍiepịrịye ḅara ḅụ Kobiri Akpụrụ-warị mẹ ḅọkọ ḅụ, Ọḅọkụ-Igbe koko Akpụrụ-warị mẹ tọrọkọ anị kẹ KỊNỊNYANAḄỌ ḅe pịrị-a ḅẹḅẹ ọmbie ọsụma ḅẹrẹ-ḅarasii anị tomḅọ ḅe ọgọnọ gbana ḅa, mḅọ ọmbie ọsụma tẹ, anịsakị anị tomḅọ ḅe ini mḅọ pẹlẹ-siin ḅa mḅọ atomi ogbo-ḅio ḅụ.

⁵ Miemẹ mu kunoma ḅa, mịnẹ agba ma tẹ Izirẹlị ḅẹ apụ ma ama ḅio paka tẹ ḅaarị anama ma ọkị-ḅo kẹ KỊNỊNYANAḄỌ ḅe pịrị, tẹ kẹ Kobiri Akpụrụ-warị mẹ ḅọkọ ḅụ arị kẹ agbamịẹḅọ ḅe pịrị, tẹ ḅaa tẹ kẹ dein-pịrị-agba mịẹ KỊNỊNYANAḄỌ ḅe pịrị ḅarị ḅara.

⁶ Anịsakị agbamịẹḅọ ḅe nwẹnị ọmbie mẹ kẹ Kobiri Akpụrụ-warị mẹ ḅọkọ ḅụ KỊNỊNYANAḄỌ ḅe agbamịẹ-anga mẹ asana, tẹ ḅẹlẹkị mẹ dọkịma ḅa, KỊNỊNYANAḄỌ ḅe ḅụụ-ḅẹlẹarị kụnụ go.

⁷ Mie ḅụ ịn ḅarị jen-maaịn kẹ nama ḅaa tẹ kẹ agba mịẹ ịn sịn kẹ tomḅọ kịkama kara oru pịrị ḅịa, arị aị ma tẹ ịn ḍuka-mu sẹfịarị aị ma. Mie mẹ kẹẹ-koro wararị oloko sọ ịn pịrị gbamaso mu ḅụọ fa, ḅụọ paka la ḅa.”

⁸ “Anịsakị ị́ ịn ḅẹẹ ḅa, Izirẹlị warị mẹ ḅụ, ḅẹḅọ-ḅẹḅọ, anịanịa igoniḅọ tẹ ịna ogbo-ḅio angarị igoniapụ ma ḅẹ ḅọ tẹ dọkịma-agba, anịanịa, agba mịẹarị,

⁹ tẹ anị ọkị-ḅo Kobiri Akpụrụ-warị mẹ ḅọkọ ḅụ agba mẹ mịẹ KỊNỊNYANAḄỌ ḅe pịrị-a ḅọ, pịrị-a ḅọ anị tomḅọ mẹ ini mḅọ pẹlẹ-siin ḅa mḅọ atomi ogbo-ḅio ḅụ.

¹⁰ “Izirẹlị warị mẹ ḅụ ḅẹḅọ-ḅẹḅọ, anịanịa igoniḅọ tẹ ịna ogbo-ḅio angarị igoniapụ ma ḅẹ ḅọ, ọmbie ḅuu, anịanịa ọmbie pẹị, pẹị, àrị ị̀ tọrụ kẹ anị ḅọ tẹ ọmbie mẹ ḅuu anịanịa, pẹị ḅọ mẹ ọgọnọ gbana tụḅụrụma tẹ mḅọ atomi ogbo-ḅio ḅụ mḅọ pẹlẹ-siin ḅa.

¹¹ Kẹ gotẹ ọkọ ḅẹẹarị, oju meni mẹ ḅẹ ḍumo mẹ ọmbie mẹ ḅio emi; anịsakị arị anị kẹ ọ́ pịrị tẹ, kẹ agbamịẹ-anga mẹ ọgọnọ si-wẹrịso pịrị ḅẹrẹ fama ọmịna aḅụụ pịrịị; kẹ gotẹ ọkọ ḅẹẹarị, ọmbie anie si-wẹrịso pịrị ḅẹrẹ fama ye ḍumo gbolomaye ḅụ.

¹² Ọkọẹrẹsị arị Izirẹlịapụ ma ḅẹẹ tẹ ọmịna ogbo-ḅio ḅụ gbọrụḅọ-sọ ọmbie ḅuu, anịanịa pẹị ma, anịanịa ḅẹẹ-igoniḅọ-igoniḅọ tẹ ọmịna ogbo-ḅio angarị ḅọ sọ ḅuu anịanịa pẹị ma.”

¹³ “Izirẹlịapụ ma ḅụ, anịanịa, igoniapụ ma tẹ ịna ogbo-ḅio angarị apụ ma ḅụ, ḅẹ ḅọ, ḅẹ ḅọ tẹ piri-ḅio-ḅẹ nama, anịanịa feni, tẹ pẹị ḅẹ ye ḅaa ḅọ, ḅaa ḅọ sọ, mḅọ nama, anịanịa feni ḅe ọmbie kẹ kiri-ḅio sara tẹ lịka kẹ anị gbaịn ḅa.

¹⁴ Kẹ gotẹ ọkọ ḅẹẹarị, tẹmẹ ye goyegoye ḅẹ ḍumo mẹ anị ḅẹ ọmbie mẹ ḅio emi ọkọẹrẹsị arị Izirẹlịapụ ma ḅẹẹ tẹ, tẹmẹ ye goyegoye ọmbie ó ḅuu anịanịa pẹị ma, gbala tẹmẹ ye goyegoye ḍumo anie anị ḅẹ ọmbie mẹ ẹrẹsị anị ḅuu, anịanịa pẹị ḅọ goḅọ-goḅọ ini mḅọ pẹlẹ-siin ḅa.”

¹⁵ “Tomḅọ goḅọ-goḅọ tẹ ngẹrị fịị nama anịanịa, kụrọ nama ḅaa nama pẹị ḅọ, pẹị ḅọ ḅọrọ ama ḅẹ ḅọ-o, igoniḅọ sọ, mḅọ amịna akapa sịkịrị ḅa, tẹ minji ḅiri tẹ amịna oju sịkịrị tẹ fịafịa-a ḅara sime nwenii ḅoḅiri-so la ḅa, anịtẹrẹmẹ mḅọ fịafịa ḅa.

¹⁶ Kụma mḅọ amịna akapa ma sịkịrị-a, anịanịa, minji ḅiri tẹ mḅọ oju-kiri sịkịrị-a ḅẹḅẹ, mḅọ amịna mịẹ-irima mẹ dogi ḅa.”