Kọlọsị 4 - FỊAFỊA BAỊBỤLỤ

¹ Omoniapụ-nyanapụ, ọmịnị inoma ofori ḅara na karakara ḅara na kẹ ọmịna omoniapụ na mịẹ. Ọ́ kẹ ḅiokoroma mịnẹ ọmịnị sọ ọ́ Nyanaḅọ nyana wararị So-ḅio ḅụ.

Tọn Pịrị Tẹ Mịẹ Ḅẹ Aị

² Tẹkẹ ḅụ ọ́ ḅara-siin ma, tẹ ọ́ tẹkẹarị sakị ọ́ pịkị ẹbị nyana, tẹ ịmịẹtẹ kẹ Tamụnọ ḅẹẹ.

³ Ọ́ tẹkẹarị gbọrụ sakị mẹ ḅụ ọ́ pịkị wamịnị sọ kẹ sụa tẹkẹẹ, mịẹtẹ Tamụnọ ḅọkọ pakama wa pịrị tẹ wa kẹ Kịrayịsị gboloma oku mẹ tẹ kikima wararị ye mẹ ḍuko pakama ḅarị ḅara. Anie mẹ mie à gotẹ mịọkụ ikoli ḅio emi ye.

⁴ Ọkọẹrẹsị, ọ́ tẹkẹẹ mịnẹ à paa anị ḍuko na-iḅi ḅara kẹ anị ḍuko giregirema.

⁵ Amụ Kịrayịsị minini-a apụ ḅụ ó ye mịẹ ḅẹ sakị, ó nimi ḅara kẹ anị mịẹ, ḅo ọmịna ḅara sọ sakị, sọ sakị kẹ iḅiye mịẹ ḅụ suu.

⁶ Sakị mamgba tomina ḅeri ḅẹlẹ ḅarị iḅi ẹkwẹn mie ọ́ kọọn ḅarịye, tẹ ye kẹ ó gbela ḅọ gbela ḅọ, ọ́ kẹ mḅọ pakịrị ḅarị kura ḅara ọ́ nwẹn nimii.

Kunoma Ḅii-ḅịḅị

⁷ Wamịna iḅi mịnaḅọ Tịkịkọsị ḅe, ḅioḅẹngbọ-kẹ-sịrẹrẹ-niḅi iḅi kọrịnama-kọrịḅọ, pịkị wamịna pembema fịrịmẹnjịḅọ, KỊNỊNYANAḄỌ ḅe kọrịnama mẹ ḅụ, ì gboloma aị mamgba ḅẹ ḅẹrẹ ḅẹlẹma ọ́ pịrị ḅa.

⁸ Anie à gotẹ ọ̀ kẹ ọ́ fịrịmarị, mịẹtẹ ò ye kọnma-a ḅara kẹ ye wamịnị na sime-ḅara ḍuko ọmịna ḅiokpọma ḅarị ḅara.

⁹ Onisimọsị, anị kịnị ḅụụ yela, ḅioḅẹngbọ-kẹ-sịrẹrẹ-niḅi mịnaḅọ ḅe, ọmịna ogbo ḅẹ ḅọ ḅe, ori na muarị. Mịanga pakarị ye, pakarị ye, in ḍuko ọ́ pịrị ḅa.

¹⁰ Arisitakọsị, ị̀ na ikoli ḅio emi ḅọ ḅe na, Banabasị iyimbere Makị na, ḅii-ḅịḅị kẹ ọ́ fịrịmam. (Jen sakị ọmịnị ò gboloma oku daa-ọkị tẹ, mịnẹ Makị ḅo ọ́ la-la, ọmịnị ọ̀ daa-ọkị).

¹¹ Jọsụwa, tẹ ịn pịkị Josịtọsị kẹ sịn ḅọ ḅe, sọ ó ḅiim. Mịna tẹra apụ ma kịngẹ anie Juu-ḅẹ-apụ ḅụ pịkị tẹ apụ, tẹ ị̀nịna Tamụnọ Ama-da mẹ ḅẹ kọrịnama mẹ kọrịarị apụ, tẹ ịn pịkị kpọma ḅarasụa ị̀ pịrị tẹ.

¹² Ẹpafarasị sọ ó ḅiim; ori anie pịkị ọmịna ogbo mẹ ḅẹ jụmọ, tẹ fịrịmẹnjị Kịrayịsị Jizọsị pịrịarị ḅọ. Sakị mamgba ọ̀ tẹmẹ-la ḅara kẹ tẹkẹ ọ́ pịrịarị, Tamụnọ ḅara ḅiiarị mịnẹ ọ̀ mịẹtẹ ọ́ sịẹ-kụrọ, mịẹarị ye nimi tẹ ḅioḅẹngbọ mẹmgba kẹ minini tẹ Kịrayịsị ḍukamẹnjịapụ ḅara, tẹ busunu tẹ ḅara kẹ Tamụnọ ḅịḅị poki, tẹ ó ḅii ye mịẹ.

¹³ Arị inetẹ ḅarana ọ̀ kọrị ọ́ pịrị kụrọtẹ kọrịnama gboloma ye ḍuko ḅa, pịkị ọkọ kẹ kọrị Lahodisiya na Hirapolisi na ḅẹ apụ pịrịm.

¹⁴ Luku, wamịna ḅụụ yela iḅi ḅịrịḅọ ḅe, na Dẹmasị na ḅii-ḅịḅị kẹ ọ́ fịrịmam.

¹⁵ Ọ́ wamịna ḅụụ kụrọ nyana lama wararị ḅii-ḅịḅị kẹ Lahodisiya ḅẹ amịnapụ ma na, Nimifa na á warị kobiriarị sọsị mẹ na pịrịị.

¹⁶ Ọ́ mị ḍiri mẹ go fama tẹ ḅẹḅẹ, ọ́ gbarịma ma tẹ pịkị anị kẹ Lahodisiya ḅẹ sọsị mẹ fịrịma tẹ ini sọ anị go. Anị gbọrụ sakị mẹ ḅụ, ọmịnị sọ Lahodisiya ḅẹ amịnapụ ma kẹ ọ́ fịrịma ḅarị ḍiri mẹ goo.

¹⁷ Tẹ ó ḍuko Akịpọsi pịrịị, “Ẹrịị mịnẹ KỊNỊNYANAḄỌ ḅe fịrị mẹ ḅụ ịn kẹ ị́ pịrị kọrịnama mẹ ị́ kọrị famam.”

¹⁸ Yẹrị ị̀ ḅara kẹ miemẹ kẹẹarị: Pọlụ ḅara mị ḅii-ḅịḅị mẹ ḅom. Ọ́ kẹ ḅioḅọrọma ma mịnẹ arị ikoli ḅio emi! Yee Tamụnọ ḍiki-ḅụụjịrị ọmịnị na sime.