Kọlọsị 3 - FỊAFỊA BAỊBỤLỤ

¹ Tamụnọ ọ́ kẹ Kịrayịsị na sụa saakịma ḍumo ḅụ suu tẹ, mie ḅụ, ọmịnị ọmịna aḅioḅẹngbọ kẹ So-ḅio simearị aị ḅụ gbanaa, anie Kịrayịsị amịna emine kẹ Tamụnọ ama-ḅara anga lẹgị wararị anga mẹ.

² Ọmịnị ọmịna akuroma kẹ So-ḅio ḅẹ aị ḅụ gbana wẹrịị, tomikiri ḅẹ aị ḅụ-a.

³ Kẹ gotẹ ọkọ ḍukoarị, ọ́ fịị tẹ, anịsakị ọmịna ḍumo mẹ Kịrayịsị na Tamụnọ ḅụ ḅọị wararị.

⁴ Ọmịna karakara ḍumo anie Kịrayịsị, ọkọẹrẹsị, ọ̀ paka-ḅo ḅarị sakị, ọmịnị sọ ori na paka-ḅo tẹ ori na sọ tẹ ebube nyana ḅa.

Elemu Ḍumo Mẹ Na Ịwọ Ḍumo Mẹ Na

⁵ Ọkọẹrẹsị, ó tomikiri ḅẹ aị tẹ oju ḅio ọmịnị ịgbanịarị aị ma ḅaa siin, anie mịna aị ma kịka aị: kura-a ḅara ḅụ owiḅọ na ẹrẹḅọ na gboloma na, ḅụụ gbẹẹ-a ye-mịẹ-ḅara na, lẹlẹ ye pịrị na, si ḅara kẹ tẹmẹ-lokoloko ye pịrị na, opu pọkọ-ḅẹngbọ na (miemẹ oru tẹkẹ na anị na gbọrụ ḅara).

⁶ Nwẹn sime-ḅara sime aị ma gotẹ Tamụnọ ịganị ḅo ọ̀ ḅịḅị poki-a apụ ma ọgọnọ gbana ḅa.

⁷ Sakị ḅẹ gbọrụ sakị ḅụ ọmịnị sọ nwẹn sime aị ḅii ḍumo kọnm, arị gbọrsịḅị ḅẹrẹtọn ọmịna ḍumo pịrị sime sakị mẹ.

⁸ Kụma mịọkụ ma mamgba ọ́ pẹlẹ siin ọmịna ḍumo ḅụ: ịganị na, si ḅara kẹ tẹmẹ-lokoloko ye pịrị na, kịnị ḍiki-ḅioḅu akuroma na. Kịnị-mịẹsima na, kọn na-iḅi-a ẹkwẹn kọn na, nwẹn go ye ọmịna aḅịḅị ḅio paka-ḅo ma.

⁹ Ọmịnị iruo jụmọ-jụmọ pịrị ma, kẹ gotẹ ọkọ ḍukoarị, ọmịnị elemu ḅụụ mẹ na anị ḅẹ mịẹ-mịẹ aḅara na saakị sin tẹ,

¹⁰ ịwọ ḅụụ mẹ kẹ kapa sọma tẹ sụa tẹ. Ḅị ịwọ tomḅọ ḅe tẹ Tamụnọ, Tẹmẹḅọ ḅe, sakị mamgba mịẹ-mịẹ ịwọma tẹ anị ò sime-ḅara mẹ kịkarị ḅọ ḅe, mịẹtẹ ori ọ́ kẹ ḅo ó ḅintẹ ḅara kẹ ò nimi ḅara wẹrị ḅarị ḅara.

¹¹ Anie mịẹtẹ kịrị ḅarị ofori, Ja asịẹ ḅẹ apụ na, Juu-ḅẹ-apụ na, tarị-ḅụụ sin tẹ apụ na sin-a apụ na, karakara ḍumo kọn-a apụ na, tọrụ-finji-a apụ na, omoniapụ na, amịna sịḅị atomi na ogboku, kụma Kịrayịsị anie ye mẹmgba, Kịrayịsị inweni-mgba ḅụụ ḅio emi.

¹² Ọmịnị Tamụnọ atomi; ori ọ́ ḅẹlẹma tẹ ọ́ sẹlẹ-ọkị tẹ kẹ ori atomi sọmam. Ọkọẹrẹsị, ọmịnị ọkụrụkụrụ na, iḅi-yemịẹ-ḅara na, ḅụụ-iderima na, gbene na, ye-inema na kẹ kapa sọma tẹ sụa.

¹³ Ọmịnị inoma fị jụmọ-jụmọ pịrị, tẹ si-wẹrịso jụmọ-jụmọ pịrịị, gbọrụḅọ osi ḅọ ḅụ ḍuko-sụa ḅẹ ye nyana, nyana. Ó si-wẹrịso jụmọ-jụmọ pịrịị, KỊNỊNYANAḄỌ ḅe kẹ si-wẹrịso ọ́ pịrị ḅara mẹ.

¹⁴ Mịna iḅi aị mamgba ḅụ ọ́ ḅẹlẹma kẹ sụa, anie mie arịmgba ọlọ kpesi ḅarịye, karakara gbọrụ ḅụ sime ḅụ.

¹⁵ Kịrayịsị kẹ ọ́ pịrịarị dein mẹ ọ́ datụkụma ḅa, ọ́ tọn-pẹlẹ ḅarị aị mamgba ḅụ, kẹ gotẹ ọkọ ḍukoarị, mị dein mẹ mie Tamụnọ gotẹ ọ́ sịn ḅo gboloma yee, gbọrụ oju ḅụ. Ọ́ pịkị ịmịẹtẹ ḅẹẹ.

¹⁶ Kịrayịsị oku mẹ na anị ḅẹ iḅi mẹmgba ọmịna aḅioḅẹngbọ ḅụ angaa. Nimi mẹmgba ḅụ ó ye kẹ jụmọ-jụmọ tolumaa. Ó Devidi nume mẹ ḅẹ aị na ja anume na fịafịa anume na suu; ó su Tamụnọ bomaa, ịmịẹtẹ-ḅẹẹ aḅioḅẹngbọ ḅụ.

¹⁷ Ọkọẹrẹsị, ọ́ mịẹarị, anịanịa ḍukoarị, ye goyegoye KỊNỊNYANAḄỌ Jizọsị ẹrẹ ḅụ anị mịẹ, anie ọmịnị ọ̀ ḅụ ḅọrọ tẹ ịmịẹtẹ kẹ Tamụnọ Ḍaḅọ ḅe ḅẹẹ ḅẹ ḅara.

Ịwọ Ḍumo Mẹ Ḅụ Kịnị Anga Gboloma Ḅẹ Ḅara

¹⁸ Tapụ, ọmịnị ọmịna diapụ suku-ḅio simee, kẹ gotẹ ọkọ ḍukoarị, miemẹ anie ọ́ mịẹ ḅẹ ye Kịrayịsị ḍukamẹnjịapụ ḅara ḅụ.

¹⁹ Diapụ, ọmịnị ọmịna tapụ ḅẹlẹmaa, tẹ kụrọ, kụrọ ḅara kẹ ini na mịẹ ma.

²⁰ Awọ, Kịrayịsị ḍukamẹnjịapụ ḅara ḅụ, ọmịnị ọmịna ḍapụ-na-iyingiapụ-na ḅịḅị poki mẹ anie sime ọ́ pịrị tẹ ọ́ mịẹ ḅẹ ye sakị mamgba, kẹ gotẹ ọkọ ḍukoarị, aniemẹ mie Tamụnọ ḅioḅẹlẹmarị ye.

²¹ Ḍapụ-na-iyingiapụ-na, ọmịnị ọmịna awọmẹ ḅụụ-sịnịsịnịma ma, ọkọ-a kụma ịna ḅioḅẹngbọ ḅofa lọkọ.

²² Omoniapụ, ye mamgba ḅụ ó tomikiri ḅụ ọ́ nyanapụ ma ḅịḅị pokii, ini ọmịnị ẹbịarị sakị ḅụ kịngẹ-a, mịẹ ịna tọrụ da tẹ ini ó tokini ḅẹ ẹrẹsị; kụma ọ́ karakara ḅioḅẹngbọ ḅụ anị mịẹ, ọ́ nyana KỊNỊNYANAḄỌ ḅe pịrị mangịma gotẹ.

²³ Ọ́ nyana tẹ mịẹarị ye goyegoye, ọmịnị ọmịna ḅioḅẹngbọ mẹmgba kẹ anị kọrịị, gbala ọ́ kọrị KỊNỊNYANAḄỌ ḅe pịrịarị ḅara, tomi-a.

²⁴ Ọ́ kẹ ḅiokoroma mịnẹ KỊNỊNYANAḄỌ ḅe, ọ̀ kẹ ori atomi wẹrịma wararị ye mẹ, kẹ gbẹẹ-ye ḅara kẹ ọ́ pịrị ḅa. Kẹ gotẹ ọkọ ḍukoarị, karakaramatẹ ọ́ fịrịmẹnjị pịrịarị ḅọ anie Kịrayịsị.

²⁵ Tẹ kura-aye mịẹarị ḅọ mịẹarị ḅọ, mḅọ mịẹarị kura-a aị ma ḅẹ gbẹẹ-ye nyana ḅa, kẹ gotẹ ọkọ ḍukoarị, gbọrụ ḅara mie Tamụnọ kẹ ḅẹḅọ-ḅẹḅọ kọn-arị ye.