Kọlọsị 2 - FỊAFỊA BAỊBỤLỤ

¹ Yee à ḍuko ọ́ pịrị, arị ọmịnị na, Lahodisiya ḅẹ apụ na, osi apụ mamgba na tẹ amụ ị̀ tọrụkuḅu ẹrị-a apụ ma, à kọrị ọ́ pịrị tẹ kọrịnama mẹ kụrọ la ḅara.

² À miemẹ mịẹ tẹ ḅiokpọ ịna ḅụụ ḅio ḅintẹ ḅẹlẹma ini ọkị-ḅo gboloma dogi-ḅo ḅarị ḅara, tẹ mịẹ tẹ ịn gbala-gbala ḅio maaịn maaịn tọn ḅịa ḅara, aniemẹ anie karakara ḅara kẹ ye fiearị ye naa dogi-ḅoarị ye. Mị ḅara ḅụ ịn ḅo nimi ḅa mịnẹ Tamụnọ kikima ye mẹ anie Kịrayịsị ḅe ḅioju.

³ Ori anie sambị mẹ tẹ ịn kẹ Tamụnọ kikima wẹrị wararị ngọ mamgba ḅẹ warị finjiarị ḅọ, anie nimi na, ye ḍawọ ḍin na, tẹ ọ̀ ḅụụ ngẹrị ḅụ simearị aị ma.

⁴ Ọkọẹrẹsị à ḍuko ọ́ pịrịarị ọ́ ḍụkụ tẹ tomi ye ḅụ ofori ẹkwẹn kẹ oḅori kẹ ọ́ sịn ma, ịna ḅịḅị ḅẹlẹ la ḅara, la ḅara sọ.

⁵ Oju akpakpa ḅụ arị ọmịnị na ofori sọ, tẹmẹ ḅụ arị ọmịnị na emi, tẹ ọ́ kẹ wẹrịtẹ tọn kụrọma tẹ gbọrụ ḅụ ḅụ Kịrayịsị mininiye mẹ ḅụ sịẹ-kụrọ ḅara mẹ à nwẹn ẹrị ye mẹ ì ḅioḅẹlẹmarị.

Kịrayịsị Ḅụ Mie Ḅintẹ Ḍumo Simearị

⁶ Ọ́ Kịrayịsị Jizọsị anie KỊNỊNYANAḄỌ ḅe nwẹn ḅẹẹ ye mẹ minini tẹ ḅẹ sakị, ọmịnị ori na gbọrụ ḅụ sime ḅụ angaa.

⁷ Ọmịnị ọ̀ ḅụ kuno sụa pokolomaa, tẹ ọmịna aḍumo ọ̀ ḅụụ sịrẹrẹ tẹ anị lolo paka-ḅo, tẹ ọmịna minini mẹ nwẹnị kụrọ tarị ḅara nẹngị, ịn wẹrịtẹ kẹ ó toluma ḅara ḅụ. Ịmịẹtẹ-ḅẹẹ pịkị ọmịna ḅụụ ḅio ḅiin.

⁸ Ọkọẹrẹsị, ọmịnị ẹrị mịnẹ, gbọrụḅọ-sọ tomina nimi, tẹ tomi na, So na Kiri na ḅụ sime tẹ ḅẹrẹtọn-arị si-atẹmẹ na, ḅara ḅo oḅori-kẹ-kịnịsịn toluma aị, tẹ Kịrayịsị ḅara ḅo-a aị, ḅụ ọ́ kẹ omoni sọma-a.

⁹ Kẹ gotẹ ọkọ ḍukoarị, bebe Tamụnọ sime-ḅara mẹmgba Kịrayịsị ḅụ angarị, ori tomḅọ ḅara ḅụ,

¹⁰ anịsakị ori na gbọrụ ḅụ sime ḅụ Tamụnọ ḅintẹ ḍumo kẹ ọ́ pịrị tẹẹ. Ori anie tẹmẹ ḅụ ḅẹrẹtọn-arị tẹ kụrọ ḅara ḅụ sime ḅọ, sime ḅọ nẹngị opu sịḅịdaḅọ.

¹¹ Kịrayịsị na gbọrụ ḅụ sime ḅụ ọ́ tarị-ḅụụ siinm, tomi sin-arị tarị-ḅụụ sin mẹ-a, kụma Kịrayịsị sin-arị tarị-ḅụụ sin mẹ ḅụ, anie ḅụ simearị ye anie, tomḅọ si sime-ḅara kụrọ mẹ kẹ mḅọ sọmarị ikoli mẹ ḅio paka-ḅo.

¹² Kẹ gotẹ ọkọ ḍukoarị, ó minji sara sakị, ọ́ Kịrayịsị na sọ tẹ ḍiḅim, tẹ pịkị mị gbọrụ minji-sara mẹ ḅụ, Tamụnọ kẹ kọrịnama kọrịarị kụrọ mẹ ḅụ ọ́ nyana minini ḅụ, ori ọ́ kẹ Kịrayịsị na sụa saakịmam, anie fịị ḅụ Kịrayịsị saakịma ḅọ ḅe.

¹³ Sakị ḅẹ gbọrụ sakị ḅụ, ọmịna asi gotẹ tẹmẹ ḅụ ọ̀ fịịm, anie ọmịnị Ja asịẹ ḅẹ apụ tẹ Oloko mẹ nyana-a ẹrẹsị. Kụma mịọkụ Tamụnọ ọ́ kẹ Kịrayịsị ḅụ sụa tẹ ḍumo ḅụ suu tẹ. Tamụnọ wamịna asi mamgba wẹrịso wa pịrịm;

¹⁴ ọ̀ wamịna asaa ma tẹ wamịna ẹrẹ sima ḅụ kẹẹ koro sime aị ma, kan siinm, pịkị wa fịnama sime oloko ma sọ ọ̀ kẹ sụa kan sin tẹ gbọrsịḅị arị mịẹ famam, arị kẹ ẹngbẹsẹ-sịn mẹ ḅụ ḅakụ ḅụ.

¹⁵ Anịsakị, anị ẹngbẹsẹ-sịn mẹ ọgọnọ mie Kịrayịsị tẹmẹ ḅụ ḅẹrẹtọn-arị apụ ma na, kụrọ-ḅara ḅụ simearị apụ ma na, kụrọ ḅụ ọ̀ ḅụụ pakama-ḅo ye; ọ̀ nwẹnị ama mamgba ini ẹrịarị ḅara kẹ ịn kẹ ọgbụrụ-sụn tẹ ini ọmụ ḅio kun-ḅo apụ ḅara kẹ ịna tọrọkọ-sụn tẹ ịn kẹ ama ḅọrọ, owu-ḅara-iḅi ḅo ḅara ḅụ.

¹⁶ Mie ḅụ, gbọrụḅọ-sọ fị ḅẹ ye, anịanịa ḅuu ḅẹ ye, anịanịa wẹrị fịafịama ḅẹ ene, anịanịa Ịwọ Akalụ Alalị, anịanịa Ịnyọsara-Ene mẹ, gboloma oloko sụa ma.

¹⁷ Arị aị mamgba papaa tọrọkọ ḅo ḅarị aị ḅẹ tẹmẹ, tẹ ịrụa ḅịya ye sarama tẹ kiri ḅụ tọn-arị ye pembe aị ma; karakaramatẹ ye ḅẹ karakara mẹ anie Kịrayịsị.

¹⁸ Ọ́ ḍụkụ tẹ gbọrụḅọ-sọ tọrụ-ḅịrị ẹrị ḅara kẹ iruo, kẹ opuḅọ kẹ amịna ḅụụ sịntẹ ó ponoma tẹ ọ́ sịḅị-tuu mḅọ pịrị, tẹ enjẹlị apụ tẹkẹ ma. Jen gbọrụ karakara sọ anị ḅio ofori, ọkọ sime tomḅọ mẹ mḅọ papaa ḅụụ-gelemarị, tomina kuroma ḅụ,

¹⁹ tẹ mḅọ pịkị Kịrayịsị ḅụụ ḅara sin tẹ, anie gbọrụ oju mẹ ḅẹ sịḅị ḅe. Kịrayịsị anị ọlọ kpesi wararị ḅara ḅụ, bebe oju mẹ ịnyọ nyanarị, tẹ anị ḅẹ anda na, iko ma na, eleke-eleke ma na oḅoloma wararị tẹ ḍụḅa paka-ḅoarị, Tamụnọ ḅiiarị anị ḍụḅa paka-ḅo ḅẹ ḅara.

Kịrayịsị Na Fịị Tẹ Pịkị Ori Na Ḍumo

²⁰ Ọ́ Kịrayịsị na fịị tẹ mẹ mịẹtẹ so na kiri na ḅụ ḅẹrẹtọn-arị atẹmẹ ma ḅarị ọmịna ḅụ kụrọ nyana-a. Anị kụma, ó tiegotẹ sime tomikiri mẹ pịrị apụ ḅara kẹ ḍumo kọn-arị? Ó tiegotẹ ma oloko ma kokoarị mịnẹ,

²¹ “Mie ọlọ ma,” “Anie fị ma,” “Ḅara kẹ osi ye lama ma”?

²² Mịna aị mamgba ḅo papaa aị sọ fama ḅa, arị mịẹ ye ḅụ sọ gbọrụ sakị; arịmgba tomi sụarị oloko na tolumarị aị na famam.

²³ Ye wẹrịtẹ sime-ḅara ḅụ, ọkọ sime oloko ma, tọrụ kẹ ye ḍikiarị ḅara ḅụ, nimi arị ḅụ emi ye kịkam, anie ịn kịnị ponoma tẹ ini enjẹlị apụ tẹkẹarị mẹ na, oḅori kẹ ḅụụ sịn ḅara ḅẹ ḅụụ-iderima mẹ na, pịkị ini ịna oju kẹ ẹrịmarị tọrụsiẹrị mẹ na ḅụ; kụma arị gbọrụ karakara iḅi sọ mịẹ-a, meni-oju mẹ sọlịmarị si-aị ma dasịẹma ḅụ.