Kịẹn-aḅịḅị 35 - FỊAFỊA BAỊBỤLỤ

Ịn Tọn Livayị Furo-ḅẹ-apụ Ma Pịrị Opu Ama Ma

¹ Jeriko ḅụ, Jodanị mẹ akaka, Mohabụ ḅẹ ele mẹ ḅio, KỊNỊNYANAḄỌ ḅe nwẹnị Mozizi ḅẹẹ,

² “Tọn Izirẹlịapụ ma pịrịị, mịnẹ, ịna anga yọ, ịn nyana anga ma ḅụ, ini opu ama kẹ Livayị furo-ḅẹ-apụ ma pịrịị, ini arị ḅio anga. Anịsakị iḅi osuka kiri ikelema-koro wararị opu ama mie ọ́ kẹ Livayị furo-ḅẹ-apụ ma pịrị ḅarị anga.

³ Opu ama ma ịna opu ama sọ tẹ ini arị ḅio anga ḅa, arịḅẹ iḅi osuka-akiri ma sime ịna opu anama na, ḍumotẹ ịn nyana tẹ ḍikiḍikiarị aị na, ịna anama mamgba na pịrịm.

⁴ Iḅi osuka-akiri ma tẹ ọ́ kẹ Livayị furo-ḅẹ-apụ ma pịrị ḅarị akiri ma opu ama mẹ ḅẹ onu la, tẹ anị ḅụ kuḅu oyia asi, mesi oyi finji kẹ ḅele opu ama mẹ ikelema-koro ḅa.

⁵ Opu ama mẹ kẹ ogboku wẹrị ḅara ḅụ, anị ḅio paka-ḅo ḅụ ó kuḅu ẹndẹ sọnọa si finji tọn ịrụa-saakịarị-anga da-mu ḅa, pịkị kuḅu ẹndẹ sọnọa si finji tọn suku-jụ-pakịrị da-mu ḅa, pịkị kuḅu ẹndẹ sọnọa si finji tọn ịrụa-ideriarị-anga da-mu ḅa, pịkị kuḅu ẹndẹ sọnọa si finji tọn ọgọnọ-jụ pakịrị da-mu ḅa; miemẹ iḅi osuka kiri ḅara ḅụ sime ịna opu ama ma pịrị ḅa.

⁶ Opu ama ma tẹ ọ́ kẹ Livayị furo-ḅẹ-apụ ma pịrị aị ma ḅụụ ḅọị sonio opu ama ma sọ ḅa, ó minini bẹkẹma kịnị-ḅaapụ ma pịrị tẹ ịn ḍumo-mangị kọn mu ḅụụ ḅọị ḅẹ anga ma; kẹ arị ḅụ sụa ḅụ ọmịnị opu ama amesi maaịn finji pịrị ḅa.

⁷ Opu ama mamgba tẹ ọ́ kẹ Livayị furo-ḅẹ-apụ ma pịrị ḅarị opu ama arịmgba maa ama fa opu ama amesi oyi finji na arịḅẹ iḅi osuka-akiri na.

⁸ Opu ama ma tẹ Izirẹlịapụ ma nyana ye ḅụ ị́ pịrị ḅarị aị ma, opu afuro ma ḅụ ị́ tọnwa aị ọkị ḅa, kala afuro ḅụ í boowa aị ọkị ḅa, furo-furo ḅụ sime anga mẹ nyana furo mẹ nyana ye la ḅara ḅụ mie ị́ anị ḅẹ opu ama ma kẹ Livayị furo-ḅẹ-apụ ma pịrị ḅarịye.”

Ḅụụ Ḅọị Opu Ama Ma

⁹ KỊNỊNYANAḄỌ ḅe nwẹnị Mozizi ḅẹẹ:

¹⁰ Izirẹlịapụ ma ḅẹẹ, “Ó Jodanị mẹ saḅa-ḅọrọ mu Kenanị ama mẹ ḅio sọ sakị,

¹¹ anịtẹrẹmẹ mie ọmịnị opu ama ma ḅụ ḅụụ ḅọị opu ama ma sẹlẹ ọmịna aḅụụ pịrị ḅarịye, mịẹtẹ kịnị-ḅaḅọ ḅe tẹ ḅiotọn-a ḅara ḅụ ḅẹḅọ-ḅẹḅọ ḅaa ḅọ mẹ ḍumo-mangị kọn anịanga mu ḅarị ḅara.

¹² Opu ama ma gbẹẹfị ḅii ḅọ ḅe ḅụ ḅụụ ḅọị yọ sọ ọ́ pịrị ḅa, mịẹtẹ kịnị-ḅaḅọ ḅe fịị ḅịa nwenii ọ̀ ḅẹrẹkọn kẹ tomina-ogbo mẹ tọrọkọ sịẹsime ḅa.

¹³ Anịsakị opu ama ma tẹ ọ́ pịrị aị ma ọmịna ḅụụ ḅọị sonio opu ama sọ ḅa.

¹⁴ Ọ́ tẹra opu ama pịrị ḅa Jodanị mẹ ḅẹ ịrụa-saakịarị-anga ḅụ, tẹra opu ama pịkị Kenanị ama mẹ ḅio ḅụụ ḅọị opu ama sọ ḅarị aị.

¹⁵ Mịna opu ama ma sime ḅụụ ḅọị yọ sọ Izirẹlịapụ ma na, igoniapụ ma na, ini ogbo-ḅio angarị bịan-apụ ma na pịrịm, mịẹtẹ ḅẹ ḅọ, ḅẹ ḅọ tẹ ḅiotọn-a ḅara kẹ kịnị-ḅaḅọ mẹ inetẹ ḍumo-mangị kọn anịanga mu ḅa.”

¹⁶ “Kụma ori ikulele kẹ mḅọ fomu-gbin, tẹ anie ḅụ mḅọ fịị-fịị, ori anie kịnị-ḅaḅọ; kịnị-ḅaḅọ mẹ ini mḅọ ḅaa ḅa.

¹⁷ Anịanịa ọ̀ nwẹnị ọ̀ ḅara-ḅio simearị ḍụḅarị tẹ inetẹ tomḅọ ḅaa ḅarịye kẹ mḅọ gbin ḅịkịma tẹ mḅọ fịị-fịị, ori anie kịnị-ḅaḅọ; kịnị-ḅaḅọ mẹ ini mḅọ ḅaa ḅa.

¹⁸ Anịanịa ọ̀ nwẹnị ọ̀ ḅara ḅụ ori ọlọ tẹ kẹ owu sọarị sịn tẹ inetẹ tomḅọ ḅaa ḅarịye kẹ mḅọ fomu-gbin tẹ mḅọ fịị-fịị, ori anie kịnị-ḅaḅọ; kịnị-ḅaḅọ mẹ ini mḅọ ḅaa ḅa.

¹⁹ Ọmbie gbẹẹfị ḅii ḅọ ḅe ḅioju sọ kịnị-ḅaḅọ mẹ ḅaa ḅa mḅọ mḅọ na donia sakị.

²⁰ Mḅọ nwẹnị ḍiki-ḅioḅu ḅụ ogie kẹ tomḅọ temi, anịanịa kịnị-ḅa ye, anịanịa ye kẹ tomḅọ lama ye kẹ tomḅọ gbin, tẹ sime koru, mịẹtẹ mḅọ fịị ḅarị ḅara ḅẹḅẹ;

²¹ anịanịa fịya-a ḅụ tomḅọ ḅakụ ḅaa; anịrẹ oriḅe tẹ mgbụlụḅa mẹ ḅakụ ḅọ ḅe fịị ḅụ sọ ḅa; ori anie kịnị-ḅaḅọ; ọmbie gbẹẹfị ḅii ḅọ ḅe ori na donia sakị ḅụ ọ̀ ḅaa ḅa.”

²² Kụma ọ̀ nwẹnị mḅọ na fịya wararị tẹ bẹkẹma ogie kẹ mḅọ temi anịanịa ye kẹ kịnị lama ye kẹ mḅọ gbin, tẹ sime koru-a,

²³ anịanịa ḍụḅarị tẹ inetẹ tomḅọ ḅaa ḅarị ḍụḅarị kẹ mḅọ ẹrị-a ḅara kẹ gbin tẹ anị mḅọ la tẹ mịẹtẹ mḅọ fịịm, ori mḅọ na fịya wararị, tẹ pịkị ye kẹ mḅọ lama ḅẹ ḅii-a ḅẹsọ,

²⁴ anịtẹso tomina-ogbo mẹ bẹkẹma kịnị-ḅaḅọ ḅe na, ọmbie gbẹẹfị ḅii ḅọ ḅe na ogboku ḅụ mịna kụrọ ḅara-ḅio simearị ḅọ sụa oloko ma wẹrịtẹ sime-ḅara ḍiki ḅẹrẹ mẹ kọn ḅa.

²⁵ Anịsakị tomina-ogbo mẹ ọmbie-gbẹẹfị-ḅiiḅọ ḅe ḅara ḅụ nimiatẹ-kịnịḅaḅọ ḅe ḍụa-ḅọrọma ḅa, tẹ tomina-ogbo mẹ siin ọ̀ pịkịma ọ̀ ḅụụ ḅọị opu ama mẹ tẹ ò ḍumo-mangị kọn mu opu ama mẹ mu tẹ ori anị ḅio anga nwenii Sịḅịda-Agbamịẹḅọ ḅe fịị sakị la ḅa.

²⁶ Kụma bẹkẹma kịnị-ḅaḅọ ḅe ḅẹ sakị, ḅẹ sakị ḅụ mẹnjị ḅụụ ḅọị opu ama mẹ tẹ ò ḍumo-mangị kọn mu sọ opu ama mẹ ḅẹ oke saḅa-ḅọrọ,

²⁷ tẹ ọmbie-gbẹẹfị-ḅiiḅọ ḅe etela-ogbo ọ̀ ḍọkị-ẹrị tẹ nimiatẹ-kịnịḅaḅọ ḅe ḅaam ḅẹḅẹ, ori ọmbie ḅẹrẹ-ḅarasii nyana-a.

²⁸ Kẹ gotẹ ọkọ ḅẹẹarị, tomḅọ ḅe ọ̀ ḅụụ ḅọị opu ama mẹ ḅio sime nyanam nwenii Sịḅịda-Agbamịẹḅọ ḅe fịị sakị la; kụma Sịḅịda-Agbamịẹḅọ ḅe fịị ḅọrọ tẹ nimiatẹ-kịnịḅaḅọ ḅe anị ọ̀ ḅụụ-ḅẹlẹ-ḅẹlẹ, ori inetẹ pịkịma-so ori nyana ama mẹ mu ḅa.

²⁹ Mịna aị ma kẹẹ-koro wararị oloko na, kụrọ ḅara ḅio sime ḅọ sụa oloko na sọ ọ́ pịrị mu ọmịna aḅụụ ḅụọ-fa-ḅụọ-paka la ḅa ọmịna anga yọ mamgba ḅụ.

³⁰ Ḅẹḅọ-ḅẹḅọ kịnị-ḅaaḅa, ḅẹrẹ kiri sime apụ ịn kẹ ye ẹrị ḅara ḍuko ye ḅụ mie kịnị-ḅaḅọ mẹ ini mḅọ ḅaa ḅarịye; kụma ịn gbọrụḅọ ngẹrị ẹrị tẹ ḍuko ye kẹ gbọrụḅọ-sọ ḅaa ḅịa.

³¹ Anie mẹ sikima, kịnị-ḅaḅọ tẹ ịn ḅaa ḅẹ ḅẹrẹ-ḅarasii pẹlẹ pịrị tẹ ḅo ḅara gberie-sọ ọmịnị mḅọ ḍumo ḅọrọma gotẹ daa-ọkị ḅịa; kụma mḅọ fịị ḅụ sọ ḅa.

³² Anịsakị tomḅọ tẹ ḍumo-mangị kọn mu ḅụụ-ḅọị ama sọ tẹ ḅọ, ọmịnị mḅọ ḅara pịkịma amịna ama mu igbigi daa-ọkị ma, Sịḅịda-Agbamịẹḅọ ḅe amụ fịị-a ogbo.

³³ Ọ́ mị-ḅara kẹ ama mẹ tẹ ọmịnị angarị ama mẹ pilema ḅịa; kẹ gotẹ ọkọ ḅẹẹarị, ọmbie ama mẹ pilemarị; anịsakị anị ḅio sara ọmbie mẹ gotẹ, kẹ inetẹ ama gotẹ agwa-agwa ḅẹẹ tẹ kẹ anị bẹkẹlẹma-bẹkẹlẹma ye ofori, tomḅọ mẹ tẹ ọmbie mẹ ọsụma ḅọ mẹ ọmbie mẹ ḅụ sikima.

³⁴ Ọmịnị ama mẹ tẹ ó ḅio ḅụ angarị ama mẹ wọlọma ḅịa, anị ḅẹ ogboku ḅụ mie àrị angarị ye, kẹ gotẹ ọkọ ḅẹẹarị, KỊNỊNYANAḄỌ ḅe Izirẹlịapụ ma ogbo-ḅio ḅụ angarị.