Kịẹn-aḅịḅị 34 - FỊAFỊA BAỊBỤLỤ

Mozizi Kenanị Ama Mẹ Ḅe Oke Tọnm

¹ KỊNỊNYANAḄỌ ḅe nwẹnị pịkị Mozizi ḅẹẹ,

² “Tọn Izirẹlịapụ ma pịrị tẹ ịn ḅẹẹ, ‘ó Kenanị ḅẹ ama mẹ ḅio sọ-mu sakị, anị ama mẹ tẹ à kẹ ọ́ piri ḅarị ama mẹ, ị́ mị-ḅara kẹ anị ḅẹ oke tọn ḍụḅa ḅa:

³ Idọmụ pakịrị anga mẹ ḅụ Zini ḅẹ ịkpa ḅụ ọkị mu, ọmịna suku-jụ da pakịrị anga sọ ḅa, anịsakị suku-jụ pakịrị ḅụ ọmịna oke sọ ḅarị anga — ịrụa-saakịarị-anga anga ḅụ Fụn Tọrụ mẹ ḅẹ kunoma;

⁴ anịsakị ọmịna oke mẹ kpọlị Akịrabimu Iwo-anga ḅụ pịkị suku-jụ pịrị tẹ saḅa Zini mu ḅa, tẹ Kadẹsị-Baniya suku-jụ mẹ anị ḅẹ kunoma sọ ḅa. Anịtẹso anị pịkị ọgọnọ-jụ da ịrụa-ideriarị-anga anga ḅụ mu Eza-ada la, tẹ ọkọ ḍiki ḅọrọ mu Azimọnị la ḅa;

⁵ tẹ Azimọnị ḅụ pịkị Ijiputi agara ḅụ tụndụ ogboku mẹ da-mu ḅụ kororo mẹ la tẹ anị ḅẹ kunoma Mẹdịterenanị anie Opu Tọrụ mẹ sọ ḅa.’ ”

⁶ Ịrụa-ideriarị-anga anga ḅụ oke sọ ḅarịye anie Mẹdịterenanị anie Opu Tọrụ mẹ na anị ḅẹ tọrụ-agara na.

⁷ Miemẹ ọgọnọ-jụ ḅụ ọmịna oke sọ ḅa Mẹdịterenanị anịanịa Opu Tọrụ mẹ ḅụ ọmịnị ọmịna elekima sụa ọrụ puu mu Họ Tụndụ mẹ la ḅa;

⁸ Họ Tụndụ ḅụ ọmịnị ọrụ mẹ puu pakama mu Ematị ḅẹ Mẹnjị-ḅọrọ-anga mẹ la tẹ mu Zidadị ḅụ kunoma ḅa;

⁹ anịtẹso oke mẹ mu ma-mu Zifụrọnị la tẹ anị ḅẹ kunoma Eza-Inani sọ ḅa. Miemẹ ọmịna ọgọnọ-jụ ḅe oke sọ ḅa.

¹⁰ Eza-Inani ḅụ ọmịnị ọmịna ịrụa-saakịarị-anga anga ḅẹ oke mẹ tọn pakama mu Sefamụ la ḅa,

¹¹ anịsakị Sefamụ ḅụ oke mẹ ideri-mu Ribula la ḅa Eyini ḅụ ịrụa-saakịarị-anga anga ḅụ tẹ oke mẹ ideri-mu Kịnẹrẹtị ḅẹ tọrụ mẹ ḅẹ tuma anga mẹ la ḅa ịrụa-saakịarị-anga anga mẹ ḅụ;

¹² anịsakị oke mẹ ideri-mu Jodanị mẹ la ḅa, tẹ arịḅẹ kunoma nwẹnị Fụn Tọrụ mẹ sọ ḅa. Mie mẹ ọmịna ama na anị ikelema-koro oke mamgba na kẹ sụa sọ ḅa.

¹³ Mozizi nwẹnị tọn Izirẹlịapụ ma pịrị tẹ ḅẹẹ, “Miemẹ anie ama mẹ tẹ apịan sụa ḅụ ọ́ nyana ḅarị ama mẹ tẹ KỊNỊNYANAḄỌ ḅe tọn tẹ kẹ kọn wararị esenia afuro na pakịrị na ma pịrị ḅẹ ama mẹ;

¹⁴ kẹ gotẹ ọkọ ḅẹẹarị, Rubẹnị owiapụ-awọmẹ ma furo mẹ ḍa warị-warị ḅụ na, pịkị Gadi owiapụ-awọmẹ ma furo mẹ na ịna aḍapụ awarị ma na, ịna sime anga nyana tẹ, pịkị Manasẹ furo mẹ kẹ maa anga ḍiya ḅẹ gbọrụ anga na sọ.

¹⁵ Maa afuro na pakịrị na ma Jeriko ḅụ Jodanị saḅa-anga ịrụa-saakịarị-anga dama-mu ḅụ ịna sime-anga ọkị tẹẹ.”

Mozizi Ama Mẹ Ḍie Ḅẹ Sịḅịdapụ Ma Tọnm

¹⁶ KỊNỊNYANAḄỌ ḅe nwẹnị pịkị Mozizi ḅẹẹ,

¹⁷ “Mịna ẹrẹ ma anie owiapụ ma tẹ ama mẹ ḍie ọ́ pịrị tẹ ọmịnị anga ḅẹ apụ ma ẹrẹ: Ẹlịyeza, agbamịẹḅọ ḅẹ na, Jọsụwa, Nọnị owiḅọtụḅọ ḅe na,

¹⁸ furo goyegoye ḅụ ọ́ gbọrụ sịḅịdaḅọ ọkị ḅa kẹ ama mẹ kẹ sime anga ḍie ḅụ.

¹⁹ Ma ma anie owiapụ ma ẹrẹ ma: Juda furo ḅụ, Kẹlẹbụ, Jefune owiḅọtụḅọ ḅe.”

²⁰ Simiyọnị furo ḅụ, Sẹmụwẹlị, Amihudu owiḅọtụḅọ ḅe.

²¹ Benijamịnị furo ḅụ, Ẹlịdadị, Kisilọnị owiḅọtụḅọ ḅe.

²² Danị owiapụ-awọmẹ ma furo ḅụ gbọrụ tọrọkọ-tarịḅọ Buki, Jọgịlị owiḅọtụḅọ ḅe.

²³ Josẹfụ owiapụ-awọmẹ ḅụ, Manasẹ owiapụ-awọmẹ ma furo ḅụ gbọrụ tọrọkọ-tarịḅọ Hanịyẹlị, Ẹfọdị owiḅọtụḅọ ḅe.

²⁴ Anịsakị Iferemu owiapụ-awọmẹ ma furo ḅụ gbọrụ tọrọkọ-tarịḅọ Kẹmụwẹlị, Sifilanị owiḅọtụḅọ ḅe.

²⁵ Zẹbulọnị owiapụ-awọmẹ ma furo ḅụ, gbọrụ tọrọkọ-tarịḅọ Ẹlịzafanị, Panakị owiḅọtụḅọ ḅe.

²⁶ Ịsaka owiapụ-awọmẹ ma furo ḅụ, gbọrụ tọrọkọ-tarịḅọ Palitiyẹlị, Azanị owiḅọtụḅọ ḅe.

²⁷ Asa owiapụ-awọmẹ ma furo ḅụ, gbọrụ tọrọkọ-tarịḅọ Ahihudu, Sẹlomi owiḅọtụḅọ ḅe.

²⁸ Nafutali owiapụ-awọmẹ ma furo ḅụ, gbọrụ tọrọkọ-tarịḅọ Pẹdahẹlị, Amihudu owiḅọtụḅọ ḅe.

²⁹ Mịna apụ ma anie owiapụ ma, inima tẹ KỊNỊNYANAḄỌ ḅe tọnm sime-anga mẹ ḍie Izirẹlịapụ ma pịrị nwẹn ḅẹẹ apụ Kenanị ḅẹ ama mẹ ḅio.