Kịẹn-aḅịḅị 31 - FỊAFỊA BAỊBỤLỤ

Midiyanị Na Gbin Fịafịa Ọmụ Mẹ

¹ KỊNỊNYANAḄỌ ḅe nwẹnị Mozizi ḅẹẹ,

² “Midi ḅẹ apụ ma kẹ Izirẹlịapụ ma mịẹ ye ḅẹ gbẹẹfị ḅii. Ị́ aniemẹ mịẹ fama sakị, ini í kobiri mu ị́ atomi pịrị ḅa.”

³ Mozizi nwẹnị tomi ma ḅẹẹ, “Ọmịnị ọmịna ogbo-ḅio ḅụ tomi tẹlẹma tẹ kẹ ọmụ mẹ pịrịị, mịẹtẹ ịn Midi da-paka, tẹ ini ọgọnọ KỊNỊNYANAḄỌ ḅe gbẹẹfị ḅii ḅarị ḅara.

⁴ Izirẹlị ḅẹ afuro ma ḅụ, ị́ gbọrụ furo, gbọrụ furo ḅụ kịnị maa ẹndẹ oyia asi finji, finji kẹ ọmụ mẹ fịrịma ḅa.”

⁵ Mie ḅụ Izirẹlị ḅẹ kịnị maa ẹndẹ oyia asi finji ma ḅụ, furo-furo ḅụ kịnị maa ẹndẹ oyia asi finji, finji paka-ḅom, inimgba ḅụụ tẹlẹma ọmụ pịrị tẹ kịnị puku, oyi ẹndẹ finji (12,000) paka-ḅom.

⁶ Mozizi nwẹnị furo-furo ma ḅụ kịnị maa ẹndẹ oyia asi finji, finji ma na Finihasi, agbamịẹ Ẹlịyeza owiḅọtụḅọ ḅe na kẹ ọmụ mẹ fịrịma, ori ọ̀ ḅara ḅụ Fịafịa Yọ mẹ ḅụ ịn kẹ ye mịẹ ḅẹ ọkị aị ma na, ofuro tomi ma jikema ḅẹ ọdụ ma na ọlọm.

⁷ KỊNỊNYANAḄỌ ḅe tọn Mozizi pịrị ḅara ḅụ, ịn Midi na ọmụ mẹ gbinm tẹ owiḅọ goḅọ-goḅọ ḅaam.

⁸ Ịn Midi ḅẹ amadapụ ma kẹ ịn ḅaa apụ ma na sụa ḅaam; Midi ḅẹ sọnọ amadapụ ma tẹ ịn ḅaa apụ ma anie Evi na, Rẹkẹmụ na, Zọhọ na, Họ na, pịkị Reba na. Ini okologie kẹ Balamụ, Bẹyọ owiḅọtụḅọ ḅe sọ kẹ sụa ḅaam.

⁹ Kun-ḅara ḅụ Izirẹlịapụ ma Midi ḅẹ ereme ma na, ịna ḍọkọḍọkọ-awọmẹ ma na ọkịm; ọmụ ḅio fọịn tẹ ḍiema ọkị ḅara kẹ ịna opu anama mamgba na, ịna anana na, oḅori na ogbo, ogbo ma na, ịna ngọ mamgba na ọkịm.

¹⁰ Ịna opu ama mamgba tẹ ini angarị anga ma na, ịna ọmụapụ kobiri-kobiri tẹ simearị anga mamgba na in fịnị kẹ dọkịma famam,

¹¹ tẹ ịn fọịn ḅụụ pịrị aị mamgba na, ịn ḍiya ḅẹ fọịn aị mamgba tomi na nama ma na ọkịm.

¹² Anịtẹso ini ịn kun apụ ma na, ịn ḍiya ḅẹ fọịn aị ma na, fọịn ḅụụ pịrị aị ma na tan ḅo Mozizi na Ẹlịyeza agbamịẹḅọ ḅe na, Izirẹlị ḅẹ tomina-ogbo mẹ na pịrịm Jeriko ḅụ, Jodanị akaka, Mohabụ ḅẹ ele mẹ ḅio ịn kobiri tẹ simearị anga mẹ ḅụ.

Ọmụ Mẹ Mu Ọmụapụ Ma Pịkịma-ḅom

¹³ Mozizi na, Ẹlịyeza, agbamịẹḅọ ḅe na, tomina-ogbo mẹ ḅẹ tọrọkọ-tarịapụ mamgba na nwẹnị mu ini na bịama ḅẹ kobiri-ogbo mẹ ḅio mẹnjị paka ịn dama.

¹⁴ Mozizi nwẹnị ịganị nyana ọmụ-ogbo mẹ ḅẹ fịrịmẹnjị-opuapụ ma na, ḅẹrẹtọn kịnị maa ẹndẹ oyia asi finji-finji pịrịarị apụ ma na, ḅẹrẹtọn kịnị sọnọa si, sọnọa si pịrịarị apụ ma na tẹ ọmụ mẹ ḅụ amịna fịrị mẹnjị tẹ ḅo apụ ma pịrị.

¹⁵ Mozizi nwẹnị ịn gbela, “Ó tiegotẹ ereme mamgba ḍumoma wẹrị?

¹⁶ Ḍikii, mịna apụ ma mie Pẹyọ ḅẹ ḅẹrẹ ḅụ, Balamụ kẹ ịn toluma ye ḅụ, Izirẹlịapụ ma mịẹtẹ ịn KỊNỊNYANAḄỌ ḅe pikirima ye, tẹ mie ḅụ obi fomu-ḅara mẹ ḅo KỊNỊNYANAḄỌ ḅe tomina-ogbo mẹ ḅio sọ ye.

¹⁷ Ọkọẹrẹsị mịọkụ, ḍọkọḍọkọ-awọmẹ ma ogbo-ḅio ḅụ owiḅọ goḅọ-goḅọ na, ẹrẹḅọ nwẹn-sịn ẹrẹḅọ tẹ gbọrụ anga mono ḅụ owiḅọ nimi tẹ ḅọ goḅọ-goḅọ ḅaa.

¹⁸ Kụma ḅụụ-gboloa eremịna-awọmẹ ma na ḅụụ-gboloa ereme ma na, ó ḍumoma wẹrị ọmịna aḅụụ pịrịị.

¹⁹ Ọmịna aḅụụ kịnị ḅaa tẹ ḅọ goḅọ-goḅọ na, ḅụụ kẹ ịn ḅaa tẹ ḅọ lama ḅọ goḅọ-goḅọ na, kobiri-ogbo mẹ ḅio paka mu etela-ogbo ḅụ akpụrụ-warị pike tẹ ó sọnọma aḍin kẹ ó kun apụ ma na kobiri sime tẹ tẹra aḍin karama ene na, sọnọma aḍin karama ene na ḅụ ọmịna aḅụụ gwa fịafịamaa.

²⁰ Kapa goyegoye na, nama oju apara kẹ mịẹ ye goyegoye na, oḅori oju ḅẹ isuke kẹ mịẹ ye goyegoye na, sịn kẹ mịẹ ye goyegoye na ọ́ gwa fịafịama ḅa.”

²¹ Ẹlịyeza, agbamịẹḅọ ḅe nwẹnị ọmụgbin owiapụ ma tẹ owu mu tẹ apụ ma ḅẹẹ, “Miemẹ anie oloko mẹ ḅẹ kẹẹ-koro wararị ye mẹ tẹ KỊNỊNYANAḄỌ ḅe tọn Mozizi pịrị ye mẹ:

²² Golu na, seleḅa na, ojo na, ikulele na, ịn kẹ tini sịn ye, na lẹjị na,

²³ ye goyegoye tẹ inetẹ fịnị daasịẹ tẹ dọkị faa ḅịa ye, anie ọ́ kẹ fịnị ḅụ ḅọrọma tẹ anị fịafịa ḅarịye Anị sime-ḅara, sime-ḅara sọ, pilema ye mịẹ fịafịamarị minji mẹ sọ anị mịẹ fịafịama ḅa; anịsakị ye goyegoye tẹ inetẹ fịnị mẹ daasịẹ ḅịa ye, minji mẹ ḅụ ḅọrọ tolu ḅa.

²⁴ Ọmịnị ọmịna akapa sịkịrị nyanam sọnọma aḍin karama ene mẹ ḅụ; anịsakị ọ́ fịafịa ḅa tẹ arị ḅọrọ fama sakị, ó kobiri-ogbo mẹ ḅio sọ ḅo ḅa.”

Fọịn Ḅo Aị Ma Ḍiya Mẹ

²⁵ KỊNỊNYANAḄỌ ḅe nwẹnị Mozizi ḅẹẹ,

²⁶ “Ị́yẹrị na Ẹlịyeza agbamịẹḅọ ḅe na, tomina-ogbo mẹ ḅẹ ḍa awarị-warị asịḅịdapụ ma na ḍiya ḅẹ tẹ ịn fọịn ḅo aị ma kịẹn, tomi na nama na sọ kẹ sụa kịẹn.

²⁷ Fọịn ḅo aị ma kẹ maa akiri ḍiya; gbọrụ pakịrị kẹ ọmụapụ ma tẹ paka-mu owu mẹ sọ apụ ma pịrịị, pịkị gbọrụ pakịrị kẹ tomina-ogbo mẹmgba pịrịị.

²⁸ Anịsakị ọmụapụ ma tẹ paka-mu owu mẹ sọ apụ ma jụụ ḅụ osoye pakama-ḅo KỊNỊNYANAḄỌ ḅe pịrịị: tomi ma na, pootẹ-anambulo ma na, yedogi-anama ma na, anana na, oḅori ogbo-ogbo ma na ḅụ, ẹndẹ sọnọa si finji ḅụ gbọrụ ye sime KỊNỊNYANAḄỌ ḅe pịrịm.

²⁹ Ịna jụụ ḅẹ pakịrị mẹ ḅụ anị ọkị tẹ kẹ Ẹlịyeza agbamịẹḅọ ḅe pịrịị, kẹ agba mịẹ KỊNỊNYANAḄỌ ḅe pịrị ḅara ḅụ.

³⁰ Anịsakị Izirẹlịapụ ma jụụ ḅẹ pakịrị ḅụ mesi oyi finji goyegoye ḅụ gberie-gberie ọkịị, tomi na, pootẹ-anambulo na, yedogi-anama na, anana na oḅori na ogbo-ogbo na, opu anama mamgba na ḅụ, tẹ arị kẹ Livayị furo-ḅẹ-apụ ma tẹ KỊNỊNYANAḄỌ ḅe Akpụrụ-warị mẹ ḍikiḍikiarị apụ ma pịrịị.”

³¹ Mozizi na Ẹlịyeza na nwẹnị KỊNỊNYANAḄỌ ḅe tọn ịn pịrị ḅara mịẹ.

³² Mịọkụ ọmụapụ ma fọịn ọkị aị ma ḅụ kirikọntẹ ḍiya ḅẹ aị ma anie: anana na oḅori na puku inia si ini finji na, sọnọma ẹndẹ oyia asi finji (675,000),

³³ na opu anama eseni apuku (72,000),

³⁴ na yedogi-anama sọnọma apuku, oyi maa ẹndẹ finji na oyia asi na (61,000),

³⁵ pịkị ḅụụ-gboloa eremịna-awọmẹ kịnị inia apuku (32,000).

³⁶ Ọmụapụ ma tẹ ọmụ mẹ mu apụ ma jụụ ḅẹ pakịrị mẹ kịẹn-ḅịḅị, anana na oḅori na puku amesi maa apuku finji, na sọnọa si ofori inia ẹndẹ na (337,500).

³⁷ Anịsakị oso KỊNỊNYANAḄỌ ḅe pịrị anana na oḅori na ẹndẹ oyia asi tesi oyi finji na sọnọ na.

³⁸ Opu anama ma ḅụ ini apuku oyia ẹndẹ finji (36,000); anị ḅụ oso KỊNỊNYANAḄỌ ḅe pịrị opu anama anie tesi oyi finji na maa anama na (72);

³⁹ yedogi-anama ma ḅụ, tẹra ẹndẹ jeia si finji ofori inia apuku (30, 500); anị ḅụ oso KỊNỊNYANAḄỌ ḅe pịrị yedogi-anama anie tesi gbọrụ nama finji (61);

⁴⁰ tomi ma kịẹn-ḅịḅị anie kịnị maa apuku (16,000); ịna aḅụụ sime KỊNỊNYANAḄỌ ḅe pịrị apụ anie kịnị asuei maa apụ finji (32).

⁴¹ Tẹ Mozizi oso aị ma tẹ agbamịẹ-aị ḅara ḅụ sime KỊNỊNYANAḄỌ ḅe pịrị aị ma kẹ Ẹlịyeza agbamịẹḅọ ḅe pịrịm, KỊNỊNYANAḄỌ ḅe wẹrịtẹ tọn Mozizi pịrị ḅara.

⁴² Izirẹlịapụ ma jụụ ḅẹ pakịrị mẹ tẹ Mozizi owiapụ ma tẹ mu ọmụ mẹ gbin apụ ma nye ḅụ sikima kiri mẹ,

⁴³ mịọkụ tomina-ogbo mẹ pakịrị mẹ anie: anana na oḅori na puku amesi maa apuku finji na sọnọa si ofori ini ẹndẹ na (337,500);

⁴⁴ opu anama anie: ini apuku, oyi ẹndẹ finji (36,000);

⁴⁵ yedogi-anama anie tẹra ẹndẹ jeia si finji ofori ini apuku (30,500);

⁴⁶ anịsakị tomi anie kịnị maa apuku (16,000).

⁴⁷ Izirẹlịapụ ma jụụ ḅẹ pakịrị mẹ ḅụ, ye ḅụ ḅẹ mesi oyi finji goyegoye ḅụ Mozizi gbọrụ ye, gbọrụ ye ọkịm, tomi-o, nama-o, tẹ arị kẹ Livayị furo-ḅẹ-apụ ma tẹ KỊNỊNYANAḄỌ ḅe Ọḅọkụ-Igbe koko Akpụrụ-warị mẹ ḍikiḍiki nyana apụ ma pịrịm, KỊNỊNYANAḄỌ ḅe wẹrịtẹ tọn Mozizi pịrị ḅara.

⁴⁸ Anịtẹso opu fịrịmẹnjịapụ ma tẹ kịnị maa ẹndẹ oyia asi finji, finji ma kẹ sịḅịda tẹ ọmụ mẹ gbin apụ ma ḅẹ kịnị maa ẹndẹ oyia asi finji kẹ sịḅịdapụ na, kịnị sọnọa si, sọnọa si kẹ sịḅịda Ọmụ-alapụ ma na nwẹnị sọma-ḅo Mozizi kpeki,

⁴⁹ tẹ nwẹnị Mozizi ḅẹẹ, “Ị́ afịrịmẹnjịapụ ọmụapụ ma tẹ wamịna ḅẹrẹtọn suku-ḅio sime apụ ma kịẹn tẹ, tẹ wamịna aḅụụ gbọrụḅọ-sọ fa-a;

⁵⁰ anịsakị wa, wa kẹ agbamịẹ KỊNỊNYANAḄỌ ḅe pịrị ḅẹ ye mẹ ọkị-ḅo tẹẹ; ọrụḅọ-ọrụḅọ ḍọkị-ẹrị golu kẹ tẹmẹ aị na, ḅarasụa-aị na, ekpe ḅụ sụa aị na, ẹrẹ emi agolu na, ḅerisụa-aị na, ịkụta na kịlalị na, kẹ KỊNỊNYANAḄỌ ḅe tọrọkọ si wẹrịso pịrị ḅẹrẹ fama wamịna aḅụụ pịrị ḅẹ ḅara.”

⁵¹ Tẹ Mozizi na, Ẹlịyeza, agbamịẹḅọ ḅe na ịna ḅara golu mẹ, arịmgba ịn kẹ ye tẹmẹ fama wararị aị ma daa-ọkịm.

⁵² Anịsakị agbamịẹ golu mamgba tẹ ḅẹrẹtọn kịnị maa ẹndẹ oyia asi finji, finji na, sọnọa si, sọnọa si na pịrịarị apụ ma kẹ agba mịẹ KỊNỊNYANAḄỌ ḅe pịrị ye golu kpoo maa puku, ẹndẹ jeia si mesi oyi finji (16,750).

⁵³ (Ọmụapụ ma ọrụḅọ-ọrụḅọ fọịn tẹ ḍiya aị ma ḅụ ye ọkị amịna ḅụụ pịrị tẹ).

⁵⁴ Mozizi na, Ẹlịyeza, agbamịẹḅọ ḅe na ḅẹrẹtọn kịnị maa ẹndẹ oyia asi finji, finji na, sọnọa si, sọnọa si na pịrịarị apụ ma ḅara golu mẹ daa-ọkịm, tẹ anị ọkị-ḅo kẹ ḅiokoroma ye sọma Izirẹlịapụ ma pịrị ḅara ḅụ Kobiri Akpụrụ-warị mẹ ḅio suum.